قصص و روايات - قصص رومانسية :

رواية حكم القلب للكاتبة روز الفياض الفصل السابع

رواية حكم القلب للكاتبة روز الفياض الفصل السابع

رواية حكم القلب للكاتبة روز الفياض الفصل السابع

وراها بكم يوم اتصلت ام عبدالله وحصلت نفس الجواب..
هالمره اني كطعت الامل مو بس من اهلي لا وحتى من اهله لان امه مبين عليها جايه بالكوه اكيد هو ضاغط على اهله..
بهالفتره كطعوا الاتصالات الارضيه وبقيت مااعرف شي عن منال ولا عن عبدالله ولاهمه يعرفون شي عني الى ان ذاك اليوم اجه احمد من وكت من دوامه وصاحلي رحتله هو جان كاعد بغرفته.
مروه: نعم؟
احمد: دخلي وسدي الباب.
خفت كلت اكيد عرف بموضوع عبدالله..

دخلت وسديت الباب.
احمد: اليوم اجاني عبدالله للدوام وحجه وياي.
ظليت ارجف وكلبي ظل يدك حيل من الخوف.
احمد: احجي.
مروه: ياعبدالله؟
احمد: عبدالله ابو كلية الطب إلى اجت امه كم مره خطبتج اله.
مروه: اي وشيريد؟
احمد: شيريد برأيج؟
مروه: ماادري.
احمد: شوفي مروه راح اسألج مره وحده واريد تجاوبين بصراحه زين؟
مروه: ان شاءالله.
يمه رجليه بادت من الخوف سؤاله اعرفه بدون ميحجي.
احمد: شبينج وبينه؟

ظليت ابلع ريكي واباوع بعيوني منا ومنا محتاره شجاوب وشسوي وشكول شصخمتي بنفسج مروه عزا وصخام..
احمد: اخر مره راح اسألج وفكري زين قبل لاتجاوبين لان اذا جذبتي راح تخسرين وكفتي وياج.
مروه: والله مابيني وبينه شي.
سكتت شويه وخفت من القسم كتله: شافني مره بالكليه ومره يم بيت منال وسائلها عني وكلتلي يريد يخطبج كتلها اهلي مراح يقبلون وكلتله بس كالت هو يكول اني اقنعهم.
احمد: هو يعرف احنه شيعه؟
هزيت راسي اي.

احمد: زين يعرف ابن عمج رايدج.
هزيت راسي اي.
احمد: وشمتوقع شلون يقنعهم متكليلي؟
سكتت ماحجيت شي بس دموعي بطرف عيني اخاف ابجي يكول تحبه ويحبها واكو شي بينهم اكبر من الحجي الكلته.
احمد: انتي شنو رأيج؟
مروه: كيفكم.
احمد: كيفنه؟ فرات اخوج موافق على ابن عمج ومراح يقبل بالولد هذا وحسين هم راح يقبل بابن عمج وابوج تعرفيه وتعرفين موقفه يعني بس اني ممكن اوكف وياج فكولي الصدوك شنو رأيج؟

مروه: احمد انت اخويه الجبير والوحيد اللي احترمه بيهم لان متفرض عليه شي ولان محترمني مو مثل فرات عنده لان اني بنيه معناها لازم مالي رأي ومعزتك عندي غير اعز حتى من امي وابوي اني الولد مقتنعه بي خوش ولد وانتو سألتوا عنه بس مااكدر اكول موافقه لو احجي بي كدام فرات لو ابوي تعرف فرات يكلب الدنيا اذا عرف.
احمد: الله كريم خلص لتشيلين هم اني اخوج الجبير ومحد يكدر يغصبج على شي وراسي يشم الهوا.

مروه: حبيبي يابعد عمري...
ارتاحيت من حجيت ويه احمد بس خوفي بعده لان فرات مو مثل احمد فرات عصبي موت ونحس مو سهل مثل احمد.
احمد حجه ويه امي بالموضوع وامي صاحتلي: صدوك الحجي اللي سمعته من اخوج؟
مروه: ياحجي؟
امي: انتي تعرفيه لهذا الولد عبدالله وموافقه عليه؟
سكتت بعدين كلت لازم اصير شجاعه مثل ماهو ديحاول اني هم لازم احاول عسى ولعل تنتهي بسهوله المسأله.
هزيت راسي اي.

امي: وليش محجيتي من الاول من شوكت تضمين علي؟ لو تعرفين نفسج غلطانه هالمره باللي سويتيه فسكتي؟
مروه: عفيه يوم لتزعلين مني مو بيدي خفت ومجنت متصوره الامور توصل لهالمواصيل لان من البدايه كتله اهلي مراح يقبلون بس هو بقى مصر وكلي اني مو مال لعب واني اقنع اهلج لتخافين.
امي: تدرين شمعناه اذا وافقنه عليه؟ معناها مشكله جبيره بينه وبين بيت عمج ومشكله اكبر بينج وبين ابوج واخوج.

مروه: يوم انتي احجي ويه فرات فدووه اروحلج هو من يقبل ابوي يقبل بس انتي تكدرين تحننين كلبه فدووه.
امي: ولج عمج بس يسمع يكلب الدنيا وتعرفين مرته متقصر متريدج بس هسه تطلع الصوج بيج حتى تطلع بريئه هسه يجلبون سني وسني اعرفها واعرف عمج وتفكيرهم عمج ماعنده شخصيه يمها.

طاحت دموعي كتلها: يعني اني بتكم الوحيده وعادي عدكم اتزوج غصبن عني؟ هو فرات شدخله بالموضوع اني راح اتزوج لو هو حتى هيج مستميت علمود حيدر؟ اني حيدر مااريده مااكدر اتخيل نفسي متزوجته.
امي: شبيه تره خوش ولد ويحبج وماله علاقه بحجي امه راح يدللج ويداريج.
مروه: يوم مااكدر اتخيله زوجي مو بيدي والله اشوفه ابن عمي واخوي بس مو اكثر حتى لو مو عبدالله موجود هم مااكدر اتخيل نفسي متزوجه حيدر.

امي: نشوف. نشوف. شهالبلوه الله يستر اليوم من يكللهم احمد شيكولون بس حضري نفسج للرزاله والحجي لاعبالج اخوانج غشم ميفهمون واضح الموضوع مادام صار بي هلكد ملحه.
راحت امي للمطبخ واني رحت لغرفتي سديت الباب وكعدت افكر شلون ياربي شسوي شلون اوصل لمنال محتاجه احجي ويايها??.

كالمعتاد بالليل انفتح الموضوع اني جنت بغرفتي حتى مااتعشيت من الخوف بقيت بغرفتي اسمع صوتهم علا احمد وفرات وامي ابوي وحسين ساكتين بس فرات ظل يصيح ويعيط.
شويه وانفتح باب غرفتي اني جنت مسويه نفسي ارتب كتبي.
فرات: شنو هالحجي اللي سمعته هذا؟
مروه: شنو؟
فرات: هذا جاي لاخوج للدوام وحاجي وياه.
مروه: اي وشنو؟
اني جسمي يرجف من الخوف لو يذبحوني ميلكون بيه قطرة دم.
فرات: وانتي قابله؟
مروه: اذا خوش ولد شكو بيها؟

فرات: شكو بيها هاا؟ شوفي لج منا وهيج راح يجي الدوام واذا سمعت جايلج للدوام وحاجي وياج تره متلومين الا نفسج اذبحج واحسب الله ماخلقج افتهمتي؟
سكتت ماحجيت شي من الخوف.
رجع صرخ: افتهمتي؟
اني كمزت من خوفي مااكدر احجي عبالك بلعت لساني بس هزيت راسي اي.
طلع وركع الباب حيل.
بده الدوام ماصدكت شوكت يبدي حتى اشوف منال واحجيلها ظليت كاعده يم باب القسم منتظرتها بس شفتها اجت ركضت عليها وحضنتها وبجيت.

منال: حبي اشتاقيتلج ليش تبجين شصاير؟
مروه: تعباانه منال تعبانه راح اموت من الخوف.
حجيتلها كل شي كتلها: عفيه انتي حاولي تتواصلين وياه وكوليله احمد وامي عرفوا واثنينهم من جانبنه بس فرات حاس وديراقبني يعني ابد ابد لايجي للكليه ولايحاول يحجي ويايه لان يذبحني والله يذبحني.
منال: كافي كافي كطعتي كلبي بسج بجي شوفي شكد متغيره شلون ضعفانه هيج الحب يسوي يضرب الحب شو بيذل ههههه..

مروه: ولج اهلي واعرفهم هاي بعدنه بس فرات مشكلتنه بعد من يعرفون بيت عمي الله يعلم شيسوون.
منال: زين ليش متحجين وياه وتفهميه؟
مروه: منين احجي وياه؟ هو اكو تليفون لو اكو جان حجيت.
منال: عندي نقال اشتريت حتى اتفيك كدام الطلاب هالنوب طلعوا 3 ارباعهم مشترين ههه.
مروه: صدوك والله تحجين؟
منال: اي والله شبيج، وهو هم عنده نقال شفته بيده ذاك اليوم من لاكيته وانطاني رقمه.
مروه: دكي عليه عفيه او دزيله رساله.

منال: هسه ادزله رساله حتى اذا مو مشغول نتصل.
دزتله منال مسج ماكو رد كعدنه ننتظر اخر شي كتلها كومي خل نتمشى مالي خلك اسلم على احد.
كمنه نتمشى ونحجي دك تليفونها هو..
منال: الو هو عبدالله شلونك؟ شخبارك؟ خوما مشغول؟
لابس اكو ناس اكلوا راسي من اجوا لهسه يسألون عنك ويردون يحجون وياك.
انطتني التليفون وكلبي يدك يدك.
مروه: الو؟
عبدالله: الو حياتي.
استحيت شحجي وشرد عليه..
عبدالله: مراوي حبيبتي الو وينج؟

مروه: الو، وياك اسمعك.
عبدالله: ليش ساكته؟ احجي خل اسمع صوتج.
مروه: اوكي.
عبدالله: حبيبتي.
مروه: شلونك؟
عبدالله: من سمعت صوتج هسه صرت زين، شلونج انتي؟
مروه: شلوني بعد مشلوع كلبي وخايفه امي واحمد عرفوا وحجيت وياهم واقنعتهم بس فرات كلب الدنيا من حجه وياه احمد وعرف انت رايح لاحمد وحاجي وياه وكلي اذا اسمع جاي للكليه وحاجي وياج متلومين الا نفسج.
عبدالله: خو مضربج او سوالج شي؟

مروه: لا الحمدلله بعدنه موصلنه لهيج مرحله ميكدر اصلا مادام احمد موجود.
عبدالله: لتخافين حياتي هانت المره الجايه اروح لفرات واحجي وياه.
مروه: لا لا لا شتروحله وتحجي وياه لتفكر مجرد تفكير تروحله فدوه تره يعاند اكثرر ويحس اكو شي ويرجع يذبحني والنبي يذبحني ماعنده مانع.
عبدالله: حبيبتي اتحملي اني هم داضغط على اهلي هوايه واضغط على نفسي اكثر.
مروه: عبدالله خايفه متتصور شكد خايفه مو من الضرب من النتيجه.

عبدالله: افااا كل هالتعب والهوسه وتخافين من النتيجه؟
مروه: المهم اني راح اخليهم يشترولي نقال حتى عالاقل نكدر نتواصل بالرسائل.
عبدالله: ياريت، انتظرج.
سلمت عليه وسديته بيومها ارتاحيت من احجي وياه اطمئن ياخذ الامور ابساطه ميعقدها..

الفصل التالي
جميع الفصول
روايات الكاتب
روايات مشابهة