رواية حكم القلب للكاتبة روز الفياض الفصل الثامن
الفتره اللي وراها فرات جان يحب بت عمي زينب اخت حيدر وهي هم تحبه فخطبها واليوم المهر بالبيت طبعا ابيت عمي وبس الاهل ماكو احد غريب رحت للصالون وياها ولبست فستان ازرك جويتي طويل وضيق عالجسم وبدون ردن بس بسيط مابي شغل او شي وشعري حيل طويل كلت لام الصالون ترفعه رفعت جزء وخلت جزء سوته ومكياجي جان جدا بسيط مجرد آيلاينر فوك العين ومسكارا وحمره لون فوشي بس جان لونها فدشي ويه وجهي لان اول مره اخلي حمره طوخ واني بشرتي بيضا حيل فجان منو يشوفني يتعجب شطالعه شطالعه.
طبعا جنت فرحانه بالنهايه هو اخويه واحبه وهي بت عمي ركصت وهلهلت واحتاريت شسوي جنه كوليتنه موجودين بيت عمي كلهم وبيت عمتي وبيت خالتي واهلي جانت حفله حلوه جابوا دكاكات وركصوا الولد وشبعنه ضحك على فرات يركص وفرحان متخبل هو وحسين.
اني كمت اوزع ويه البنات عصير وكيك. طبعا اني خاله شال ازرك جبير على جتفي وصدري لان الفستان بدون ردن وابن خالتي موجود وحيدر موجود.
وزعت العصير وصلت لحيدر مد ايده اخذ عصير من الصينيه يباوعلي اني اتصرفت طبيعي وياه مااتذكر فد يوم فكرت بي بالطريقه اللي هو يفكر بيها بيه.
حيدر: شكرا مرتي.
مروه: ??.
ارتبكت وضجت وكعت الصينيه من ايدي الحمدلله جانت فارغه بس بيها مي واكع فمن وكعت انجفه المي على فستاني.
رحت للمطبخ وديت الصينيه وحاولت انشف فستاني قبل لتصير بي بقعه جابتلي امي كلينكس.
دخل حيدر: سلامات؟
امي: ماكو شي اتبلل فستانها وتعرف دلع البنات.
حيدر: اي عاد اليوم يحقلها تدلع??.
باوعت لامي امي تحبه لحيدر ولو عليها اول وحده توافق عليه.
بقيت كاعده بالمطبخ حاره الصاله هو اخذ كلينكس وطلع وامي هم راحت.
بعدين دخل ابن خالي طفل زغير عمره 3 سنوات شلته وبسته من خده طبعت الحمره على خده دخل حيدر.
نزلته شاله هو باوع لخده: بالله خل اشوف خدك.
لزم وجهه وباس بنفس مكان بوستي ونزله.
ضجت ياربي ليش يشوه صورته بنظري طول عمرنه جنه مثل الاصدقاء اني الوحيده من بنات العائله إلى تحجي وياه براحتها بدون قيود لان هو جان اكبر مني ب6 سنوات فجان ينصحني من دخلت كليه وجان يعلمني شلون اتعامل ويه الطلاب والاساتذه وويه اللي يجون ويصارحون جان صديقي وابن عمي واخوي.
حيدر: مروه احنه شوكت؟
مروه: شنو؟
حيدر: يسوولنه حفله مثل هاي.
مروه: حفلتيش؟
حيدر: شكد تحبين تشلعين كلبي.
مروه: اني؟
حيدر: لا امي. لج شيبت واني منتظرج لخاطر ربج.
مروه: وليش منتظرني هاي بنات الناس هوايه وكل الناس خير وبركه.
حيدر: مو اكلج تحبين تشلعين كلبي. ادري بنات الناس هوايه بس شسوي ماكو وحده بيهم تشبهج.
كلت اذا هذا هيج حجيه شلون من يعرف بموضوع عبدالله شلون من يعرف اني موافقه على عبدالله شلون من يعرف اريده واحبه.
والله كسر خاطري بس الكلب يحكم وكلبي لعبدالله.
حيدر: طالعه تخبلين الحمدلله محد غريب هنا ويشوفج لو ادري هيج جان اني جبتكم من الصالون??.
مروه: حيدر مصختها.
حيدر: لج انتي المصختيها حسي شويه كلبي مشتعل نار.
كمت طلعت لزم جف ايدي جريت ايدي وطلعت حيل ضجت.
طبعا كلها جانت تكولي يوم الالج ولحيدر ولاحمد اخويه نفس الشي.
عمتي: يالله حيدوري ان شاءالله نفرح بيك.
حيدر: وين ياعمه بت اخوج ماوراها هسه تخلص كليه تكول دراسات ههه.
عمتي: هههه يمه حبيبي مستعجل لج مروه شلعتي كلبه خلصي دراستج تعبتيه.
حيدر: اي والله ياعمه حاجيها صارلي 3سنوات منتظر الله يقبل؟
حسيت كرهت حتى روحي بيومها من كدما حجوا بهالموضوع واباوع لامي وابوي مبتسمين فرحانين بالحجي بس احمد خطيه كاعد يمي وحاس بيه شاف عيوني دمعت حط ايده على جتفي بعدين باسني من راسي.
ياكلبك الحنون ياخويه احن اخ بالدنيا الله لايحرمني منك ويرزقك ابنت الحلال اللي تقدرك وتسعدك ان شاءالله..
بالليل كلها بدت تروح فرات وزينب يردون يرحون للتصوير وحيدر يوصلهم بسيارته طبعا نحاسة فرات اعرفها ومتوقعتها من رادوا يطلعون كلي لبسي شي وغطي شعرج وامشي ويانه..
مروه: لا شسوي رايحه انتو روحوا امي وين امي خل تروح وياكم.
فرات: كومي لبسي عبايه شي وامشي ويانه??.
صح اخوي واحبه بس نحاسته تكرهني بي.
ليش يريد يجبرني على شي مااريده زواج هذا مو لعبه شلون اهون عليه هو ياخذ اللي يحبها واني انظلم وهو اللي يظلمني؟
يريدني اتزوج حيدر حتى لاتصير مشاكل بينه وبين زينب وبيت عمي واني شنو ذنبي ادفع ثمن اختياره..
رحت على اعصابي طبعا اني لازم اكعد كدام يم حيدر لان فرات وزينب كعدوا وره.
يسولفون ويضحكون هو وياها واني كلبي معصور وكل شويه وكالوا: عقبالكم يارب.
حيدر: ياااارررب.
اني ساكته بس دموعي بطرف عيني بس ارمش اتطيح.
وصلنه ونزلنه دخلوا ياخذون صور دخلت وراهم حتى اساعد زينب لزمني من ايدي كلي خلصي وتعاي.
جريت ايدي ودخلت بعد مطلعت الا وياهم.
المصوره: انتو هم مخطوبين؟ تاخذون صور؟
حيدر: الله يسمع منج.
اني راسا كتلها: لا لا يامخطوبين ابن عمي بس.
المصوره: مبين عليكم مخطوبين ههه.
فرات: هههه اصبر ولك فضحتنه.
زينب: هههه خليهم براحتهم بس انت حلال وهم حرام؟ مو جنه احنه مثلهم.
فرات: اهاا شنو تردين اخليه من هسه يشبك اختي لو ياخذ وياها هيج صور غير اذبحه واذبحها يحترمون نفسهم منا لحدما يلبسون حلقات وبعدين بكيفهم ههه.
وييع لعبت نفسي من هالحجي وهم كلهم يضحكون وفرحانين بس اني.
حيدر: اكلكم شرايكم منرجع للبيت اخذكم فره بالسياره؟
فرات: اي والله ياريت.
مروه: لا الدنيا تخوف تسليب وقتل نرجع للبيت احسن.
حيدر شغل الاغاني وعلاها زينب وعلي يبسبسون ويضحكون بيناتهم.
حيدر: خل نحجي شويه محسوبه مرتي بس بالاسم، اريد رقمج من ننزل انطينياه.
مروه: ماعندي نقال.
حيدر: شعجب؟ معقوله عمي مااشترالج لهسه لو متردين تنطيني الرقم؟
يحجي بصوت ناصي اني مغلسه وفرات وزينب بعالم ثاني منسجمين يسولفون ويضحكون وهذا لاكيها فرصه.
درت وجهي عالشباك اباوع عالناس وافكر بمصيري.
لزم ايدي راسا جفلت وخفت هسه يشوفه فرات ويترزل واترزل وياه سحبت ايدي وخزرته.
حيدر: اللهم طولج ياروح.
مروه: حيدر اتزوج.
حيدر: ولج علواه بس غير ابوج واخوج يردوج الا تكملين الكليه يالله.
مروه: قصدي وحده ثانيه، شجابرك علي؟
حيدر: كلبي جابرني احبج غير، الايده بالمي مو مثل الايده بالنار انتي مترهيه وتدوسين على كلبي.
درت وجهي وظليت ادعي ياربي ياصاحب الفرج ياعال بلا درج يامن شق البحر لموسى حتى خرج ياربي خلصني وخلي يمل بحده ويغير رأيه بدون مشاكل..
بقينه نفتر بعدين دخت تعبت من الصبح كاعده ويه زينب بالصالون وبالبيت والتصوير وهسه هم دخت من الفره.
مروه: مو كافي تره دخت ولعبت نفسي من الفره؟
حيدر: شبيج؟ صدوك دختي؟ لو تردين بس ترجعين للبيت؟
مروه: يعني هسه شنو الفايده من هالفره؟
حيدر: شكد بارده لخاطر ربج، هي بس هالمره مسموح نطلع سوه بعد ماكو منا لحدما نلبس حلقات.
سكتت هذا ماعنده غير سالفه وغير موضوع
رجعنه للبيت..