رواية حكم القلب للكاتبة روز الفياض الفصل التاسع
الفتره الوراها اشتريت موبايل وجنت على تواصل ويه عبدالله بالرسائل فقط.
امي: حمودي حبيبي شوكت انت هم تخطب وتتزوج وافرح بيك؟ هاي فرات طاب طالع يحجي ويه زيوبه.
احمد: قريبا، قريبا ان شاءالله، اكو بنيه ابالي ويايه بالدوام خوش بنيه.
امي: اي يالله حاجيها وشوفها بالله.
مروه: اي عفيه اذا تحبها استعجل لتروح من ايدك بعدين.
احمد: لج يااحبها لا مو لهدرجه عاجبتني يعني خوش بنيه وحبابه بس شعرف منها واحبها.
مروه: حمود والله انت بس اخطب واني اركصلك ركص مصاير.
احمد: عبالي مدري شراح تسوين، طلعتي تردين تركصين هههه.
شبكته كتله: يمه يمه يامعزتك شكبرها بكلبي.
احمد: والله فد وحده كلاوجيه انتي طلعتي، معزتي شكبرها هاا علمود ذيج الشغله مو؟
مروه: ههههههههه لاوالله حبيبي انت محد بمعزتك وغلاتك هاي امي شوفها تسمعني هي مو بمعزتك.
امي: يااا هههههه صدوك طلعتي كلاوجيه.
بالليل احمد اخذ السياره وطلع وفرات بغرفته يحجي ويه زينب وامي وابوي بالهول يسولفون ويه حسين واني بغرفتي احجي ويه عبدالله ومنال بالرسائل.
وره شويه دك تليفوني رقم غريب ماجاوبت، دك مره ثانيه ماجاوبت، ومره ثالثه هم ماجاوبت، طلعت للمطبخ اريد اشرب مي.
نزل فرات يركض ويصرخ.
فرات: ولج يمممممممه، ولج يممممممممه..
اني كلاص المي بيدي اريد بس الزمه مااكدر جسمي كله ظل يرتعش ويرجف.
امي وابوي اجوا يركضون وحسين وياهم.
اني بقيت بمكاني رجليه مااكدر احركها وامشي دمي نشف.
فرات: ولكم لحكووووني، احمد..
مروه: شبي؟ شبي؟
فرات: ولج خابروني يكولون ابنكم قتلوه واخذوا سيارته..
اني هنا سمعت صريخ وصياح بس محسيت بشي بعد.
كعدت عبالي كابوس بس طلع مو كابوس كلها تبجي وتصرخ لامو معقوله.
كمت اركض ادور عليه ماكو كلهم موجودين بس هو ماكو.
مروه: حسين شبيكم تبجون وين احمد؟
حسين ميحجي بس يبجي.
مروه: فرات وينه احمد؟
فرات: ولج راح احمد بعد ماكو احمد، مات..
يبجي واني اباوعله ضجت من حجيه.
مروه: كافي، كافي عفيه، لا تبجون ليش هيج تسوون وتفاولون عليه.
اجه حسين حضني وظل يبجي حيل واني مامصدكه كل شويه اكول هسه اكعد وينتهي الكابوس بس مو راضي ينتهي.
امي: لج مراوي، راح اخوج، راح وليدي ونظر عيني آخ يايمه سوده عليه يابعد كلبي يايمه شلون ضربوك شلون ذبوك الله يشل ايده السواها ويذبه بجهنم الحمره.
اني هنا دموعي ظلت تصب شهالحلم اليخوف هذا ظليت ابجي وحسين حاضني ويبجي..
ابجي من الخوف شلون كابوس يخوف هذا ويعصر الكلب..
امي: اليوم اكله اريد ازوجك وافرح بيك مثل اخوك استعجل يكلي اكو بنيه ابالي خوش بنيه بس شويه اصبريلي..
بقينه الفاتحه 3 ايام مشفنه نوم ولا راحه ولا خلينه لكمة زاد ولاعيونه سكتت دقيقه من البجي انتهينه اني وامي.
وره الفاتحه دورت نقالي شحنته وشفت رسائل كومه من منال وعبدالله اكيد ظل بالهم بس مالي خلك شي ولا إلى خلك احد.
موت احمد كسرني وشلع كلبي هذا العزيز الاعز من روحي هذا الحنون ابو حلك الدافي ابو الحجايه الطيبه والنفس الكريمه هذا ابو طول الحلو اللي من اطلع وياه اتباها بي اخوي ويامحلاها من كلمه هذا سندي وظهري هذا إلى اميل عليه وانتجي هذا إلى اتفاخر بي وبأخلاقه وبحنيته كدام البنات هذا حمودي الما مثله اخ فدووه اروح لطولك يابعد عمري ولضحكتك.
ثاني يوم اجت منال سامعه من الناس اجت تبجي بس شفتها ذبيت نفسي بحضها وصرخت: ولج مناااال، ولج منااال لحكيني، حمودي راح ولج، حبيبي واخوي وصاحبي راااح، ولج راح وشلع كلبي منااال.
منال تبجي واني ابجي..
مروه: عفيه اني اكول كابوس بس اشو طول شنو القضيه مو كابوس هو كولي كابوس فدووه كولي كابوس.؟
منال: يااعمري انتي كافي لتسوين هيج حرام عليج ادعيله.
مروه: ولج روحي، روحي اخذها وياه وراح ولج مرد كلبي شلون يموووت الزين شلووون فهميني الحنين شلون يموت منال، شلون بيه ولج منو إلى وراه محد إلى محد إلى والله بس هو جان وياي وكلبه عليه ولج لو ابوي ولا هو لو امي ولاهو لو كلهم ولاهو ولج مو بس اخوي هذا روحي تعرفين شنو روحي موتني بموته موتني.
قبل لايروح جنت احجي وياه واكله اركص بعرسك وهو يضحك يكلي علمود مصلحتج.
لا والله خويه لا والله مو علمود مصلحتي علمود احبك يا روحي شلون بيه وراك ومنو إلى..
هالفتره جانت كئييييبه حيل، كل البيت كئيب وحزين امي بس تبجي ليل ونهار..
جنت من اروح للدوام انسى شويه بس من ارجع تروح عيوني من البجي كل ركن وكل زاويه تذكرني بي، اتذكر حجيه وضحكته وساعات انسى من اسمع الباب ينفتح كلبي يفز عبالي هو اجه.
لدرجة ساعات جان يتخيلي اسمعه يصيحلي.
امي صحتها تخربطت ضغطها ياصاعد يانازل وابوي هم تعباان واني احس اني يمكن اكثر وحده مفتقدته بالبيت لان جان صديقي مو بس اخوي.
منال: حبي لشوكت تبقين لابسه اسود؟
مروه: تحجين صدوك منال؟ هذا احمد هذا كلبي تعرفين شنو؟ اخذ كلبي وراح، لو البس كل عمري اسود ماارتاح ولا يروي كلبي عليه عفت الدنيا كلها وراه مالي واهس شي الدنيا كلها طلعت من عيني.
منال: مادام حجيتي معناها خل احجي بصراحه، مروه خطيه عبدالله، تره والله يكسر الخاطر يكول باليوم لو ادز 100 رساله ماتجاوب، وبالي يمها ماادري شبيها لااكدر اتصل ولااكدر اجيها للكليه، وانشلع كلبي وهي مترد، مااريد شي بس ترد عليه تكلي شلونها شلون صحتها شخبارها.
بجيت كتلها: مااكدر منال، مااكدر، مالي خلك حتى روحي.
منال: مروه، تره الولد ماله ذنب ويحبج، ومتحمل وصابر مابيها شي اذا رديتي على مسج وكلتيله زينه الحمدلله، لو تره يجي لهنا للكليه، كيفج انتي اختاري؟
مروه: لا يمعوده وين يجي، لا. لا. كل شي ولايجي اول جان احمد موجود ويدافع عني هسه اذا سمع فرات منو يدافع عني؟
بجيت بعدين كتلها: منال احمد جان الوحيد بجانبي وامي تعبانه بعد متتحمل واحمد راح يعني خسرت الحل الوحيد بحياتي ومادام ماكو حل بعد وماكو احد يوكف وياي ويساعدني معناها الاحسن للطرفين نفترق وكلمن يروح بطريقه.
منال: شهالحجي؟ لعب جهال هو؟ صارله سنتين الولد رايح جاي ويوميه مودي امه، وتاليها تستسلمين باول موقف شنو هالسلبيه هاي!؟
ظلت منال تحجي وتصيح عليه واني ابجي مالي حيله ولاعندي طاقه للنقاش.
بعدها تحجي دك تليفونها عبدالله بس ماحجه وياي بس وياها ماادري شكللها.
شويه وشفته جاي من بعيد كلبي ظل يدك بسرعه. من زمااان ماشفته.
عبدالله: السلام عليكم.
مروه: وعليكم السلام.
عبدالله: البقيه بحياتج.
بجيت دموعي طاحت مثل المطر عبالك تريد حجه لو عبالك جنت منتظرته يجي حتى اشكيله ويخفف عني.
منال راحت وخلتنه بحدنه اني ابجي وهو كاعد يمي يباوعلي..
عبدالله: شلعتي كلبي، كافي بجي لخاطري، مااتحمل اشوفج هيج تبجين ومااكدر اسويلج شي.
مروه: مو بيدي عبدالله، مو بيدي، هذا حبيبي وروحي وكلبي كله هو.
عمر: الله يرحمه، بس هيج اني طلعت ولاشي اذا هو روحج وكلبج وحبيبج اني شنو؟
مسحت دموعي كتله: انت غير وهو غير، هو اعز واحد عندي بهاي الدنيا كلها اعز من روحي.
عبدالله: الله يرحمه، بس اني زعلان عليج حيل.
باوعتله ماحجيت شي حقه يزعل وحقي اني هم لان مو بيدي مالي خلك.
عبدالله: من اتوفى لليوم واني منتظر بس تردين على مسج واحد يوميه كم مسج بمسج ادز اريد بس اعرف شلونج متجاوبين ماكسرت خاطرج؟
مروه: مو قصدي، بس مالي خلك روحي، البيت كئيب وامي صحتها مو تمام والولد يطلعون بس اني ابقى افتر بالبيت وحدي وكل مكان يذكرني بي وبحجيه وبضحكته لدرجة ساعات يتخيلي اسمعه يصيحلي، اخوي هذا عبدالله.
احجي ودموعي كل شويه وحده تنزل تركض امسحها وتنزل وحده ثانيه بمكانها..