رواية حكم القلب للكاتبة روز الفياض الفصل السادس عشر
مروه: لاتدنه يمي تره والله اكلب الدنيا عليك واكعد البيت كله.
حيدر: شنو تخوفيني؟
مروه: شتريد مني لخاطر الله؟ مو كتلك الف مره مااحبك ولااريدك؟ مو ردت تكسر خشمي بالعناد؟ هاي كسرت خشمي ودمرت حياتي، مو ردتني خدامه لامتزوجه ولامطلكه؟ هاي اني هسه لامتزوجه ولامطلكه، شتريد اكثر بعد كلي حتى اكرهك اكثر بعد؟ تريد تذبحني؟ اذبحني وخلصني هي عيشتيش عيشتي، انت مو تعرف بنات وصاحبات وتحجي وياهم وتطلع وياهم؟ بعد المن مجلب بحظي شتريد مني؟ اعتقني لوجه الله، مو صارلك شهر متحجي وياي ولاتدنه يمي شتغير هسه؟ شنو على مزاجك اني شوكت ميعجبك؟
حيدر: مو بكيفج، انتي هسه مرتي غصبن ماعليج افتهمتي خدامه بالوقت اليعجبني ومرتي بالوقت اليعجبني، اعتقني عوفني مدري شنو هاي احجيها لخوالج لو تموتين مااعتقج لو تصعدين للسما وتنزلين، تردين اعوفج حتى تقبلين بذاك الكلب مو؟ ماكو بعد ظلي هنا نوحي من طاح حظج.
مروه: اقبل بأي واحد الا انت.
ماحسيت الا ضربني.
مروه: اضربني. موتني. بس لو تموت متلمس مني شعره برضاي والله.
رجع ضربني.
صعدتلنه زينب دخلت كوه فرغتني من عنده.
زينب: شبيكم؟ شبيكم اتخبلتوا بهالليل؟ الساعه 2 الناس نايمه هسه تكعدوها كلها على صياحكم.
حيدر: كلبه، هاي كلبه، الا اموتها يالله ارتاح، مو مال احترام.
زينب: شصار؟ فهموني؟
اني ابجي وهي واكفه يمه لازمته من ايده.
حيدر: سأليها هي، سأليها اكو مره متزوجه صارلها شهر تنام بصفحه ورجلها بصفحه؟ اكو واحد متزوج بس كدام الناس صارله شهر؟ المن متزوج اني بعد المن فهميني؟
طلعته زينب ماادري وين راح بس الصبح من نزلت كلها تدري امه تحجي وتسمعني حجي وزينب تحجي وعمي وجهه ثكيل وهو ماكو ماشفته..
كلت هاي من اولها هيج الله يستر من تاليها..
سوه نفسه برئ واني المجرمه شهر تنام بصفحه ورجلها بصفحه، وين جان رجلي صارله شهر حتى لسانه مااجه على لساني لابكلمه ولابحرف. يطلع الصبح يرجع نص الليل وتليفونه ميبطل مسجات وترميش كله بنات، واني مثل ماهو راد خدامه لامتزوجه ولامطلكه ليش هسه طلعت غلطانه من رفضت، شنو يريد اذب نفسي بحضنه عكب حجيه وتصرفاته عكب كل إلى سواه عكب ماذلني وكسر خشمي على كولته..
الظهر رجع هو من الدوام اني بالغرفه جنت انظف ماحاجاني ولاسلم دخل بدل وغسل ونزل يتغدا بعدين صعد نام..
اني طلعت الصور مال الكليه وكعدت الهي نفسي بيهم..
العصر هو بعده نايم سمعت هوسه جوه وصياح صوت فرات اخوي..
نزلت اركض بالي يم امي.
بس نزلت لزمني من شعري وصعدني فوك للغرفه حيدر كعد على صوتنه.
فرات: هسه تاخذها هنا كدامي.
حيدر: شكو؟
فرات: ولك عبالي رجال وتكسر ظهرها؟ مره امشيه حجيها عليك لهسه تريد تفضحنه، هسه تاخذها غصبن ماعليها، حتى اذا مسويه شي والله والله ورب الكعبه هنا اذبحها واغسل عارها.
اني ابجي واتوسل وزينب تبجي رغم اني متأكده هي اللي كلت لفرات واجه بس بعد عكبيش تبجي..
مروه: مااريده، كوه مااريده..
فرات: اسكتتتي، اسكتي كلبه، فضحتينه والج عين تحجين بعد.
كل ضربه جنت اتمنى بيها الموت اتمنى يضربني ضربه تاخذ روحي بس ماكو..
حيدر: كلما اكول صرتي ادميه واكول اعاملج مثل الاوادم تطلعين حيوانه.
مروه: ادميه غصبن عليك. انت الحيوان.
عاد هنا هو لزمني كل لفرات: اطلع بره هسه خليها إلى..
استلمني كف وره الثاني. حسيت بروحي راح تطلع..
حيدر: حيوان ها؟ ليش مترديني ها؟ ليش متردين اتدنالج؟ شمسويه هاا؟ احجي لج نكسه، شمسويه ولج؟ منو هو كليلي؟ حتى افرغ المسدس براسه وبراسج واذبكم للجلاب.
مروه: والله مسويت شي، والله.
حيدر: والله ها؟ هسه نشوف لج حيوانه يكرم الحيوان احسن منج ميسوي سواتج..
مروه: اخذ إلى تريده مني بس مو برضاي غصبن عني حتى ترتاح واظل ادعي عليك ليوم الدين.
حيدر: رضاج شنو؟ انتي والقندره، راسا شك ملابسي ودفعني عالجربايه..
بجيت بجي بساعتها حتى على احمد اخوي مابجيت هلكد..
من اخذ اللي يريده وشاف اني بعدني بنيه محد ماس شرفي. راح طلع بدون كلام وعافي وحدي بالغرفه مهزومه ومكسوره وجرح بكلبي شكبررره منه ومن فرات..
لفيت جسمي ونزلتلهم جوه لكيتهم كلهم كاعدين عمي ومرته وفرات وزينب حتى حسين اخوي موجود.
شافني اتفاجأ بشكلي ومنظري وجهي كله دم وملابسي مشككه رأسا كام.
مروه: مامبريين الذمه ليوم الدين، ظلمتوني من زوجتوني غصب، هيج بس علمود العناد، وهسه خفتوا على شرفكم وظلمتوني مره ثانيه، وهو زواج باطل مادام مو برضاي وهذا الصار هسه كدامكم يسموه اغتصاب مادام هالزواج باطل ومادام اللي صار غصبن عليه، الله لايوفقكم ولاينطيكم على اللي سويتوه بيه، حسبي الله عليكم الله. يسلط عليكم مثل ماتسلطتوا عليه. بس اتذكروا اللي سويتوه بيه حتى الله من يردها الكم متكولون شمسوين وليش الله سوه بينه هيج الله ينتقم منكم ان شاءالله.
زينب تبجي وعمي مدنك وفرات وحسين كلهم مدنكين، حيدر باوعت شفته بالحديقه يدخن.
مروه: الظلم ظلمات. وكل ظالم الله يسلط عليه إلى اظلم منه. الله يسلط عليكم ان شاءالله. وماتغير شي خاف قبل جنت مااريده هسه اكرهه، اكرهه مو بس مااريده.
درت على زينب كتلها: وانتي ليش تبجين؟ المثلج متبجي عندج اخوج واكفلج ويدور سعادتج مو مثلي ماعندي اخوان جان عندي بس واحد ومات وماتت راحتي وياه وظليت بدون اخوان لو عدل جان محد سوه ويايه هيج، لو تبجين لان كلتي لرجلج اختك يمكن مو بنيه ومتقبل اخوي ياخذها؟
زينب: لا والله ماكتله هيج.
صعدت للغرفه مااريد اسمعها واسمع اعذارها صعدت الدرج كوه واسمع صوت حسين يبجي، اتمنيت لو انزل واسمعه بعد حجي حتى يحس بحركة كلبي وشكد اذوني وذلوني وعذبوني وظلموني وكسروني.
بقيت وراها يومين بالغرفه مانزلت جوه ابد حتى الاكل كطعته زينب تصعدلي اكل بس مااكله وحيدر ميصعد للغرفه.
امي سمعت باللي صار واجت هي وابوي ظلت تبجي من شافتني وجهي مشوه من الضرب بس اني مطاحتلي بعد دمعه بقيت ساكته مقهوره عليها متكدر تسويلي شي ومريضه ماادري شكول وشفكر.
امي: نزلي حبيبتي ابوج جوه سلمي عليه خل يشوفج مقهور عليج.
مروه: منو ابوي عندي اب اني؟ لو عندي اب ماجان سووا بيه هيج، بس ماعندي اب.
بجت امي: اخذج وياي للبيت متبقين هنا بعد كافي.
نزلت امي اسمعها تصيح جوه ماادري منو بعد اكو جوه.
رجعت صعدت كلتلي: كومي لمي ملابسج واشيائج حتى نروح.
مروه: وشنو فرق هناك عن هنا هناك؟ ولدج ميقصرون يعينون ويعاونون، منو يريد يضرب خل يجي يضرب هلا بي بيش الكيلو اني، المهم صورتهم كدام ابن عمهم.
امي: شحده بعد اليتدنالج اموتهم والله.
مروه: جان موتيهم قبل يمه، هسه شيفيد؟ شيفيد.
امي: محد اله علاقه بيج بعد ظلي بغرفتج.
بجيت كتلها: كولي والله؟ كولي والله بعد مالهم علاقه بيه؟ لاتخلوني اسوي بروحي شي كافي، كافي دمرتوا حياتي حتى روحي مااشتيها بعد ليل ونهار ادعي الله يموتني وارتاح.
امي تبجي واني ابجي واصيح هم اكيد يسمعوني.
رجعت ويه امي لبيتنه حتى من شفت ابوي ماسلمت عليه ولاباوعتله بس دخلت لغرفتي سديت الباب ونمت على جربايتي غمضت عيوني اتخيلت نفسي بعدني بالكليه مرتاحه من الهم والتفكير اكبر همي باجر شنو البس وهالاسبوع مااشتريت شي جديد اكشخ بي بالدوام بس مااكدر اتخيل راحتي بدون عبدالله، الله اليعلم شنو وضعه هسه اتعود اكيد وبدا ينسى، عباله اني خلص اتزوجت ونسيته وعايشه حياتي ويه زوجي..
وايام سعيده لان بعدني عروس.
ثاني يوم الصبح كلهم بالدوام طلعت يم امي كتلها: اريد اتصل بمنال مشتاقتلها.
كامت انطتني النقال اخذته ورحت لغرفتي اتصلت بيها.
منال: حبيبتي؟
مروه: حبيبتي.
منال: شلونج مراوي؟ مشتاقتلج ياعمري كلبي نار عليج والله.
مروه: مشتاقتلج هواي.
منال: اني اكثر والله من شفت رقمج ماصدكت عبالي مشتبهه.
مروه: تعاي اريد اشوفج.
منال: اي اكيد اجي العصر اجي ان شاءالله..