رواية حكم القلب للكاتبة روز الفياض الفصل السابع عشر
فعلا العصر اجت منال اني بغرفتي دخلت شافتني اتفاجأت بس ماحبت تبين حاولت تتصرف عادي بس ماكدرت ظلت تبجي.
اني اباوعلها كتلها: ليش تبجين؟ المفروض صار عادي. كلما تجين تشوفيني هيج بهالحاله.
منال: الله يكسر ايديهم ان شاءالله.
مروه: لو عالضرب تهون انساه من يروح وجعه، بس إلى سووه اكبر يامنال مينحجي.
منال: شسوولج ياعمري شسووا؟
بجيت..
حجيتلها خطيه بس تبجي متحجي دموعها تصب ممصدكه.
مروه: اريد اسألج ومااريد اسألج.
منال: ادري حبيبتي ادري شتردين تسألين عن عبدالله؟
هزيت راسي اي.
منال: شحجيلج؟
مروه: لتكولين سووله شي؟
وكع كلبي برجليه كلت حيدر سواها.
منال: لا مابيه شي. بس اخوه انخطف والي خطفوه طلبوا فديه وانشلع كلبهم على مارجع سالم الهم.
مروه: ياستار يارب. خوما أذوه؟
منال: لا مابيه شي بس همه بعد صارت بيهم خوفه ميكدرون يطلعون للشارع، طبيعي العين عليهم شكلك ابوهم دكتور معروف وعدهم فلوس.
مروه: الله يساعدهم.
منال: راحوا لاربيل.
مروه: راحوا، راحوا؟ يعني عافوا بيتهم وانتقلوا؟
هزت راسها اي.
دمعت عيوني كتلها: احسن هيج، حتى ينساني واني هم احاول انساه.
منال: شينساج؟ هو من عرف اتزوجتي، اوووف، خابرني بجه بجي ماسامعه رجال بحياتي هيج يبجي، كتله تكول خل ينساني ومبري الذمه وخل يبريني الذمه وكتله تكول احبه اكثر من روحي وماراح انساه ومجبوره.
مروه: اي والله مااتصور راح انساه بيوم من الايام، راح يظل غصه وحسره بكلبي هو شبابي الماعشته.
منال: كلي لو شفتيها كليلها اذا هي تحبني اني اموت عليها ومااكدر انساها ومبرية الذمه وخل تسامحني ماكدرت اوفي بوعدي وياها ولاكدرت اكون كد كلامي تأذت هواي بسببي حبي الها وصبرت وتالي ماكدرت اسوي شي.
سكتت ظليت اباوع لمنال وغصه لازمتني بس احجي ابجي وتعبت من البجي.
منال: انسيه حبيبتي، انسيه..
بلعت ريكي وحاولت اسيطر على دموعي.
مروه: ليش??؟ هو الذكريات الحلوه من شبابي اني هسه احس نفسي عجزت كلبي شيب مو بس شعري احس كبرت 50 سنه من التعب والقهر إلى شفته بسنه غيري شافوه بعمر كامل.
منال: وهسه شراح تسوين؟
مروه: مااسوي. شسوي؟ انتي تشوفيني اكدر اسوي شي؟ لو اكدر جان سويت من زماان. هاي باقيه منتظره رحمة الله.
منال: ونعم بالله.
بقيت عند اهلي شهر كامل بغرفتي اطلع بس للحمام وارجع حتى من يجي احد مااطلع من الغرفه اي واحد يريد يشوفني يجيني للغرفه خالتي بنات خالتي بنات عمتي..
حيدر وبيت عمي كلهم مشفت احد منهم. لااجو ولااتصلوا تليفوني بقى عندي جنت اتصل بمنال عالاقل احجي ويه احد. جنت ساعات افكر اغير رقمي خاف حيدر يتصل. بس اتراجع عن فكرتي خاف فد يوم عبدالله يفكر يتصل.
جنت لاعايشه ولاميته.
اتذكر حجاياته من يكلي انتي إلى متصيرين لغيري انتي قسمتي ونصيبي من جان يكولي سهله لتخافين اني اقنعهم مو بكيفهم ميوافقون، من جان يكلي ناذر اذا اتزوجنه مانروح ويه الزفه نروح وحدنه نفر المحافظه كلها واخلي الاغاني على اعلى صوت واخلي الناس كلها تعرف حبيتج واخذت غصبن على اهلج وانزل بكل تقاطع اركص على عنادهم.
الحجي شكد حلو شلون يرسملي حياة غير حياتنه وواقع غير واقعنه ويعيشني بدنيا غير دنيتنه ويخليني اطير للسما وانسى كل الوجع إلى بصدري بالجهه اليسرى من صدري بكلبي..
كلبي إلى احسه كبر عمر من القهر والوجع، الله يعينه شكد وجع شاف واتحمل.
وراها اجه حيدر اسمع صوته يحجي واسمع امي ترزله طلعت السماعات وخليتهم بأذني وشغلت الراديو بالنقال مااريد اسمع صوته ولا صوت اي واحد بيهم.
شويه ودخل ماادري دك الباب لو لا مااسمع لان السماعات بأذني سلم مارديت عليه، حجه ماادري شنو ماسمعت شي وغلست جر السماعات من اذني.
حيدر: مو احجي وياج؟
مروه: واني مااشتهي احجي وياك، خير شكو بعد شتريد لاحكني لهنا؟
حيدر: كومي يالله، شنو متردين ترجعين؟
مروه: والله صلافه.
حيدر: تأدبي.
مروه: مااروح وياك لاي مكان زين. كافي عاد شويه خلي عندك احساس.
حيدر: هسه اني الماعندي احساس؟
مروه: لو عندك ذرة احساس جان ماراويتني وجهك بعد.
حيدر: هييهه لياخذج الواهس وتدوسين بالحجي تره ساكت منج لخاطر عمتي وعمي.
مروه: وين جان خاطر عمتك وعمك قبل؟ شتريد تسوي سوي بعد ميهمني اتعودت.
حيدر: دكومي كومي خلصيني.
مروه: عجيب امرك شتريد مني بعد؟ مو اني حيوانه على كولتك. مو آدميه شتسوي بالحيوانه بعد؟ روح شوفلك وحده آدميه مثلك احسنلك..
حيدر: من اكلج كومي تكومين.
هو واكف واني كاعده على جربايتي اني احجي واحس نار شابه بصدري وهو عصبي ومتوقعه بأي لحظه يضربني..
بس مو مهم بعد شمتوقع ارجع وياه واتصرف طبيعي كأنه مصاير شي.
مروه: حيوانه اني لايكرم الحيوان ميسوي سوايتي مو؟ نكسه اني مو؟ شتسوي بيه بعد شتريد من وحده نكسه؟ فد قندره اني ها حيدر شنو بعد خاف نسيت شي ذكرني؟
ساكت هو بعدين سحب كرسي وكعد كبالي. بقى مدنك بعدين كال: شتردين هسه؟
مروه: طلكني.
حيدر: هههه والله؟ لو تموتين.
بقينه ساكتين بس اني دموعي بطرف عيني اتمنيت لو عندي الشجاعه واموت نفسي واخليهم طول عمرهم ندمانين بلكي يحسون بتأنيب الضمير.
حيدر: ولج احبج اني.
طاحت دموعي كتله: واني كرهتك، خاف قبل جنت احبك لان ابن عمي واحبك مثل اخواني بس اني بعد اللي صار ماعندي ابن عم ولاعندي اخوان كلكم اكرهكم..
اتنهد هو بعدين كال: الصار من ايدج انتي السبب انتي بي، إلى رفضتيني علمود واحد ميسوه.
مروه: حتى لو مو هو جاي، هم ماراح اقبل بيك لان جنت حاسبتك اخوي مو اكثر.
حيدر: بس اني ماحسبتج بيوم اختي، كل عمري احبج وانتظرتج سنين.
مروه: مشكلتك هاي مو مشكلتي، اني هسه مشاعري تجاهك اختلفت 180 درجه، لو مو تحبني لو تموت علي مااكدر حتى اشوفك مثل قبل حتى ابن عمي واخوي مااكدر اتخيلك.
حيدر: تحبيني بعدين من تنسين.
بجيت كتله: شنسه؟، شنسه. الاهانات لو الضرب؟ لو كل اللي سويتوه بيه كله؟ شلون؟ علواه انسه. بس كون انساكم كلكم كون هيج الله يرحمني ويخليني افقد الذاكره حتى انساكم كلكم لان كلكم دمرتوني وكرهتوني بحياتي اكره نفسي لان الله خلقني بنيه لاحول إلى ولاقوه.
حيدر: انسيج اني، والله انسيج.
مروه: انت اكثر واحد تذكرني شتنسيني بعد، اكثر واحد كرهته بيهم.
حيدر: اكثر واحد عاد مره وحده؟
مروه: اي اكثر واحد، لان تكول تحبني واكثر واحد أذيتني وكسرتني. بعد شلون تحبني؟ شلون تنسيني؟ شلون تريدني ارجع للبيت إلى انهانيت بي اكبر اهانه بعمري؟ ماكو وحده تقبلها على نفسها حتى المو زينه هم متقبل احد يحجي بشرفها..
بس هو العتب مو عليك العتب على المحسوبين اهلي واخواني..
حيدر: يعني هسه المشكله بالبيت؟ نسكن بحدنه.
مروه: قبل جنت تشتكي مني تكلي بارده وماعندج احساس هسه منو البارد؟
حيدر: والحل؟
مروه: ماكو حل، طلكني لان مينفع بعد. مو شي بسيط الصار ولاشي سهل ولا شي عادي، لو الله ينطيني عمر ثاني فوك عمري هم مااتصور اكدر انسى وارجع اعيش حياتي طبيعيه.
حيدر: مااطلك، شنو انتي قابل اول وحده لو اخر وحده يصير وياها هيج؟
مروه: لو فرات سوه هيج ويه زينب تقبل؟
سكت ماجاوب.
مروه: تقبل؟ لو جان يريدها وهي متريده توافق على خطوبتهم؟
هم ماجاوب.
مروه: روح عفيه روح، اتزوج وعيش حياتك بعيد عني لاتجي بعد تحاول ترجعني لو تقنعني، اذا تحبني صدوك طلكني.
حيدر: مااطلكج لو تموتين، ولاترجعين ابقي هنا شكد متريدين بس من باجر اتزوج وكولي ماكال.
مروه: مبروك مقدما..
طلع راح ظل يصيح بره ويدردم.
اني لفيت راسي ونمت ودعيت ربي ياخذ امانته ويموتني..