رواية حكم القلب للكاتبة روز الفياض الفصل الثامن عشر
بنفس الشهر حيدر خطب واتزوج. وابوي سوه هوسه واتعارك ويه عمي وحسين اتعارك ويه حيدر امي طبعا خلصتها بجي بس اني جنت بارده فعلا هالمره ماحسيت الموضوع يخصني اصلا، لو هو كله ميهمني بعد والي سواه ريحني.
ارتاحيت من خربت العلاقات بينهم ولو بعد فوات الاوان بس عالاقل شي يبرد نار كلبي..
هو يفكر هيج ينتقم ويقهرني. بس اني فرحت بالنتيجه مو مهم عندي لو شنو يسوي بعد بقى فرات ماعنده رد فعل عالموضوع بس اكيد الصار مو بصالحه شلون يتزوج هسه وابوي وعمي ميتحاجون..
مر شهر بعد واجه حيدر من جديد اني جنت توني طالعه من الحمام جاي امشط شعري ومحد بالبيت بس اني وامي.
دخل وسلم امي وجها ثكيل عليه بسبب موضوع زواجه بس اني عادي رديت السلام حتى لايكول مقهوره.
حيدر: شلونكم؟
امي: الحمدلله.
حيدر: شلونج مروه؟
مروه: بخير.
حيدر: تمام.
امي: جاي لو كهوه؟
حيدر: والله عمه ياريت لو جاي.
راحت امي تسوي جاي اني ملتهيه امشط شعري.
حيدر: شلونج؟ شخبارج؟
مروه: الحمدلله بخير.
يلعب بسويج السياره ويباوعلي.
اني مدنكه امشط شعري طويل ياخذ وقت بالتمشيط.
حيدر: اي؟
مروه: اي؟
حيدر: ماكلتيلي مبروك؟
مروه: اي نسيت والله. مبروك.
حيدر: الله يبارك بيج.
هو ساكت واني ساكته بديت اضفر شعري كصيبه وهو يباوع.
حيدر: جنت ادور يمكم هنا بيت للايجار.
مروه: ليش؟
حيدر: النه اني وانتي خوما باقيه انتي هنا طول العمر وساره تبقى ويه اهلي.
مروه: ههههه. والله ماادري شكول وشحجي.
حيدر: احجي؟
مروه: يعني من جنت بس اني مارجعت وياك هسه من اتزوجت تتوقع ارجع؟ ههههه والله ياربي.
حيدر: والحل وياج شنو؟ إلى تردينه شنو؟
وين تردين توصلين؟
مروه: طلكني.
حيدر: اهووو هم رجعنه على هاي السالفه.
مروه: انت ليش متقبل تستوعب وتفهم احنه مينفع نبقى سوا بعد احنه منرهم سوا بعد اللي صار؟
حيدر: وانتي ليش متستوعبين ماكو طلاك؟
مروه: هذا الحل العندي، وماعندي غيره.
حيدر: اذا اطلك ساره ترجعين؟
مروه: ليش اني هنا بسبب ساره؟ اني هنا لان مااريدك افهمها عاد، بعد إلى سويته كرهتك.
حيدر: لج انتي لشوكت تظلين هيج لسانج شطوله؟
دخلت امي جابت الجاي.
مروه: الف مره كتلك ماافيدك بعد طلكني، طلكني وارتاح يااخي شجابرك عالتعب والدوخه.
حيدر: استغفرالله هاي إلى تخليني اكفر هسه.
امي: عمه انت هسه شتريد منها؟
حيدر: عمه شنو شاريد منها غير مرتي واريدها.
امي: مو اتزوجت بعد عوفها بحالها، شنو ماكافك إلى سويته؟
حيدر: شنو عوفها. شلون يعني اعوفها زوجه مع وقف التفيذ يعني؟ مرتي احبها واريدها.
امي: تحبها تسوي بيها هيج؟ وتالي تتزوج عليها وهي بعدها عروس؟
حيدر: هي إلى جنت على نفسها، هي تعاند وتتحداني اني رجال دمي حار مااتحمل.
امي: والله ياعمه انت من تزوجت كطعت كل امل باقي برجعتها حتى اذا هي تقبل احنه منقبل. شنو بنتي فصليه خوما فصليه يوميه تسوي وياها موقف جديد اضرب من إلى قبله؟
حيدر: هسه اني ماجاي اتناقش بالي صار إلى صار امر واقع بس اريد نوصل لحل.
مروه: طلكني.
حيدر: ليش مااطلبج لبيت الطاعه احسن شرايج؟
مروه: سوي إلى تريده انت هذا اسلوبك وماراح يتغير دائما الغلط تعالجه بغلط اكبر.
حيدر: ابهذل احوالج والله.
مروه: شبقى ماسويته بعد؟ وتكلي تحبني خوش تحبني ههه اذا تحبني صدوك طلكني حيدر..
حيدر: واذا ماطلكت؟
مروه: ارفع عليك دعوى طلاق بالمحكمه واجحي كدام الكل كل إلى صار واللي سويته بيه وافضحك كدام جماعتك.
حيدر: تردين تفضحيني وتفضحين نفسج؟ عفيه عليج. عفيه عليج بت عمي.
مروه: ماسويت شي غلط حتى انفضح بس انت سويت.
ماحجه شي ولاعلق كام وطلع راح.
فرات جان يلح على ابوي يتصالح هو وعمي حتى يتزوج بدون مشاكل بس ابوي ميقبل يروح لعمي.
ذاك اليوم اجوا عمي ومرت عمي النه بالليل اني جنت احجي ويه منال بالغرفه.
منال: عبدالله دزلي مسج اليوم من رقمه هناك كال هذا رقمي.
مروه: اي؟ وشلونه؟
منال: شلونه؟ لو قصدج سأل عنج لو لا؟
مروه: لا شلونه، شيسأل عني بعد المن يسأل؟
منال: بس هو سأل عنج؟
مروه: الله عليج؟
منال: والله العظيم، اول ماحجيت وياه كلي شلونها مروه وشخبارها؟
مروه: لهسه يتذكرني؟
منال: طبعا شنو بهالسهوله قابل النسيان جان نسيتي انتي.
مروه: اييي والله، بس اني اصلا مااريد انساه.
منال: حجيتله عالصار من اتزوجتي لهسه.
سكتت دمعت عيوني وكتلها: ليش حجيتيله؟ هالموضوع المفروض ميهمه وميخصه لان اني هسه مااخصه اخص واحد غيره ولان معرفته بي لاتقدم ولاتأخر..
انتي هيج تخلين بجروحي ملح منال..
منال: كلي هم يجي يوم ونرجع؟
بجيت كتلها: منال لتحجين هيج وتخلين عندي امل، جذب نرجع اني وعبدالله واصير اله جذب، اذا اتطلكت راح يصير كدام الناس اسمي مطلقه تتوقعين اهله يقبلون ابنهم الجبير واول فرحتهم ودكتور يتزوج وحده شهادتها اقل من شهادته ومن غير مذهب واهلها طارديه 4 مرات قبل وهم مطلقه..؟ من كل عقلج؟
منال: اي وشكو بيها شنو المطلقه زانيه يعني، اتزوجتي غصب يعني انظلمتي هذا مينحسب زواج.
مروه: اذا تحبيني صدوك لتحجين هيج وياه واذا هو حجه كليله انساها وعيش حياتك لان متفيدك بعد ماله داعي تدخل بمشاكل ويه اهلك بسببها، لان هي نستك..
بهالاثناء سمعت صوت عمي ومرته اجوا.
مروه: نونه اسمع صوت عمي ومرته اجوا راح اروح اشوف شنو الفلم وبعدين نحجي ان شاءالله.
منال: اوكي حبي بس طمنيني.
مروه: اكيد.
سديت التليفون وكعدت اسمعهم يتعاتبون امي خطيه مقهوره تحجي بعصبيه وتصيح عليهم وابوي هم اسمعه يعاتب عمي.
إلى فهمته همه يردوني ارجع بدون مشاكل ومرت حيدر تبقى كاعده وياهم واني بيت وحدي ويتزوجون فرات وزينب لان طولوا..