رواية حكم القلب للكاتبة روز الفياض الفصل التاسع عشر
ماطلعت سلمت عليهم مااريد اشوفهم ولااشوف فرات وحتى حسين هم مااريد اشوفه.
وره ماطلعوا امي اجت كلتلي: مروه. ابوج يريدج.
رحتله هو كاعد بالديوانيه ويمه فرات وحسين.
كعدت يم امي مباوعتلهم كعدت بسكته.
ابوي: بابا انتي شنو طول الوقت كاعده وحدج بالغرفه متملين متضوجين؟
ماحجيت شي.
ابوي: باباتي بيت عمج يردوج ترجعين؟
دمعت عيوني كتله: هالمره لو تذبحوني ماارجع.
ابوي: لا منذبحج. احنه ناخذ رأيج اني كتلهم بكيفها هي.
مروه: من شوكت تأخذون رأيي؟ وعكبيش؟
ماارجع. مااريده. مااحبه كرهته بعد. مااعرف كلمه ممكن تعبر اكثر يمكن توصللكم الفكره..
دمرتوني وعذبتوني بما فيه الكفايه ومو مره وحده، ظلمتوني ومو مره وحده..
حطمتوا كل ذرة ثقه عندي بنفسي وبيكم..
كسرتوا كل شي حلو بكلبي حتى صورتكم..
خليتوني ادعي الله ليل ونهار اموت حتى تتعذبون بذنبي..
كرهتوني بنفسي لان بنيه. مااكدر اعترض وادافع عن نفسي ادعي عليكم كل مغربيه. كلبي صار اسود من وراكم. صرت حقوده بسبب إلى سويتوه بيه. كرهت الناس كلها بس انتو اكثر شي مااحبكم بعد ومااحسكم اهلي..
الاهل ميكسرون بناتهم. ميسوون إلى سويتوه وياي. عمي هو عمي نفسه وابنه ميسوون ابتهم مثلكم، موتوني واني عايشه، مااحس نفسي عايشه وماكو شي ابالي غير إلى سويتوه بيه والي الله راح يسويه بيكم..
شتردون بعد يصير بيه اكثر من هيج يوميه انام بالليل اكول ياربي كون ميطلع علي الصبح..
ومن اكعد اول مااكعد اتذكر ومن اتذكر كلبي احسه يريد يوكف، واتمنى لو عندي شجاعه واموت نفسي بس مع الاسف جبانه مابيه خير، لا الله اموتني ومريحني ولا اني اموته نفسي ولا انتو اموتيني ومخلصيني من هالعذاب..
احجي ودموعي تصب وامي تبجي ابوي هم بجه وحسين اجه يمي حضني.
حسين: سامحيني.
بقى يبجي واني ابجي.
فرات: احنه قابل جنه نريدلج الاذيه لو جنه فرحانين بالي صار؟
ماجاوبته ولاحجيت شي ولاباوعتله كمت درت على ابوي كتله: مهما صار انت ابوي مالي غنى عنك. بس اني من اليوم إلى اتزوجت بي غصب حسبت نفسي ماعندي اخوان بعد. بس احمد الله يرحمه لان هو الوحيد إلى جان يفكر بيه وبراحتي. الوحيد إلى اخذ رأيي. والوحيد إلى ساندني وكلي اني اخوج متسوين شي غصبن عنج وراسي يشم الهوا.
امي خطيه ظلت تبجي حيل ابوي هم عفتهم ورجعت لغرفتي وسديت الباب.
بقيت كاعده الليل كله ابجي وخفت خاف امي تتخربط لان حجيي اذاها.
جعت. من حسيت بيهم ناموا طلعت رحت سويتلي لفه ورجعت لغرفتي اندك باب غرفتي فتحته حسين.
حسين: بعدج كاعده؟
مروه: اي بعدني. شبيك؟ شكو؟
دخل للغرفه وكلي سدي الباب وتعاي.
سديت الباب واجيت كعدت يمه.
جنت ملتهيه اكل جوعانه مااتعشيت.
حسين: مراوي بعدج زعلانه مني؟
ماجاوبته شجاوبه. مااكدر اكله اي كاسر خاطري.
ادري بي ضميره يأنبه. بس مااكدر اكله مسامحتك ونسيت لان جذب مااكدر انسى ومااكدر اسامح صدوك كلبي احسه صار اسود وصرت حقوده..
حسين: اريدج تسامحيني. صحيح اني اخوج واكبر منج بس غلطت بحقج وظلمتج.
ماوكفت وياج وكلبي ماكلني عليج والله..
مروه: ماله داعي هالحجي، ميفيد بعد.
حسين: شلون ماله داعي وانتي لهسه متأذيه ومقهوره.
مروه: الصار صار بعد ميفيد الحجي. ماكو شي ممكن يغير الماضي والاشياء اللي صارت بي. لو نكدر نغيره جان ماخليت احمد يطلع ذاك اليوم والباقي كله يتغير بوجوده.
حضني وباسني كلي: اذيناج هوايه. وحرمناج من حقج. جبرناج وظلمناج وكل هذا ومن تكولين ماعندي اخوان لو تكولين لو احمد موجود احس تشلعين كلبي.
بجى ومن بجى هو شلع كلبي حطيت اللفه وشبكته وظلت دموعي تنزل مثل المطر اريد احس بوجوده وياي بظهري بحياتي اريد احس عندي بعد اخ وعندي ظهر وعندي اهل مو وحيده..
شبكني وباس راسي كتله: انت اخوي لو شيصير تبقى اخوي وحبيبي. بس اذا تريدني اسامحك صدوك احجي ويه حيدر خليه يطلكني مااتحمل بعد ارجع. اسوي بنفسي شي اذا رجعتوني اله هالمره.
حسين: مترجعين، خلص اخذيها مني. هالمره اني اوكفلهم مترجعين. أمني وارتاحي.
مروه: وفرات؟
حسين: لافرات ولاغيره، ابوي لو كلج ترجعين مااخليج ترجعين. خلص.
سحبت ايده بستها كتله: والله اموت هالمره اذا رجعتوني.
باس راسي كلي: خلص. وعد مني محد يغصبج بعد، يالله كومي كملي لفتج صارلج ساعه تلوجين.
ضحكت وهو ضحك وراح.
حسيت نفسي فرحااانه بليلتها خلصت اكلي بشهيه ونمت مرتاحه وكلبي بارد.
ابوي وامي وحسين قرروا ميردون على بيت عمي على موضوع رجعتي واذا سألوهم يكلولهم وره زواج فرات وزينب.
حتى متصير مشاكل وقرروا يخلون الطابق الفوك لفرات وزينب ويطلعولهم درج عالشارع.
حددوا يوم زواج فرات وره 20 يوم.
كلت لامي مااريد اكون موجوده مااريد اشوف اي احد من بيت عمي واريد اروح يم منال بيوم العرس.
امي: عيب يوم شنكول للناس ولبيت عمج و للجيران؟
مروه: وين العيب بالموضوع؟ اخوي ومااحجي وياه ولا ويه مرته واهلها ليش بعد عيب مو همه إلى بدوا وياي بالغلط ليش استحي منهم بعد؟ وراح يجون ويجيبون مرت حيدر كدام الناس وياهم بعد هذول إلى تردين استحي منهم؟
امي: وماالله ماادري شكولج، هو هم زواجيش هذا ناس متحجي ويه ناس.
مروه: اني راح احجي ويه حسين حتى يوديني لمنال.
حجيت ويه حسين سكت بالبدايه بس بعدين مقبل.
حسين: ميصير متحضرين زواج اخوج حتى لو متحجين وياه الناس متعرف وراح تستغرب. بعدين امي منو وياها ابقي بالبيت ولترحين بالزفه.
مروه: اذا ابقى متجبروني اروح بالزفه؟
حسين: خلص كتلج ابقي مترحين بالزفه.
امي: ان شاءالله، قابل اني اكدر عليج انتي واخوج.
بيوم زواج فرات الظهر حسين وداني للصالون.
لبست فستان قصير للركبه اموج وردي وبنفسجي من فوك لف عالجسم ومن الخصر كلوش وامي لبستني طقم ذهب سلسله وبيها فص بنفسجي وشعري بس شسوار بقيته مفتوح وخلتلي مكياج بنفسجي ووردي يجنن.
جان اكو عرايس بالصالون وحده منهم وياها امها من خلصت وكمت ظلت تهلهل عبالها خطوبتي..
ظليت كاعده منتظره حسين والدمعه بعيني لاخطوبه مثل البنات ولازواج.
اجه حسين اخذني..
دخلت للبيت كلها اتعجبت تخبلين وشطالعه وشصايره.
راحوا بالزفه اني بقيت بالبيت من رجعوا اني بقيت يم امي وخالتي بالمطبخ اساعدهم.
ماسلمت على زينب ولاباركتلها ولا مرت عمي شفت زوجة حيدر يمها كاعده. والله عين صلفه جايبيها وياهم بعد، بعدين اجت هي سلمت عليه لابسه بنطرون اسود وبدي احمر وخاله حمره لون احمر مبينه سمره اقصر مني بس اسمن.
ظليت اوزع مي واباوعلها.
اجت مرت عمي باستني وسلمت ماحاجيتها سكتت وظلت واكفه وتلعب بشعري وكل دقيقه وكالت: حيدر متخبل عليج. لو شايفج اليوم طالعه باربي بهالفستان والشعر جان مخالج تبقين بعد اكثر..
هم ماجاوبتها. واصلا كرهت اسلوبها لان خطيه مرته كاعده ميجوز هالحجي اني يجوز ميهمني امره بس هي اكيد يهمها وتنقهر من تسمع هالحجي.
رحت يم خالتي كعدت بنات خالتي ظلوا يركصون اني اباوعلهم بس بعدين اخذنه صور وظليت رايحه جايه يم زينب عالعناد بس ماعبرتها ولاسلمت عليها ولاباركتلها.
بعدين خالتي كلتلي: اكلج هاي المن جايبيها وياهم؟
مروه: منو؟
خالتي: زوجة حيدر.
مروه: على عنادي يمكن..
خالتي: دكومي ركصي على عنادهم شبيج حتى لايكولون مقهوره منها.
كمت كلت للبنات شغلوا الاغاني اني اعرف اركص ركصي يخبل خلولي اغنية ام كلثوم سيرة الحب..