قصص و روايات - قصص رومانسية :

رواية حكم القلب للكاتبة روز الفياض الفصل الرابع

رواية حكم القلب للكاتبة روز الفياض الفصل الرابع

رواية حكم القلب للكاتبة روز الفياض الفصل الرابع

بقينه نحجي مرات بالتليفون وبين فتره وفتره يجي للكليه.
وجان اذا ميكدر يجي ينتظر منال يم راس شارعهم من تطلع حتى يسألها عني.
اليوم عيد ميلادي وعادة جنت اجيب كيكه زغيره اني ومنال وكم بنيه ولد من شعبتي وجانوا يجيبولي هدايا بسيطه رمزيه يعني بطاقات تهنئه او اقلام او لفكس او كتاب معين لان اني احب القراءه.
كاعدين نسولف اني ومنال والبنات والولد واجه عبدالله.
عبدالله: السلام عليكم.
كلنه: وعليكم السلام.

اتفاجأت بي مكال راح يجي ولا يعرف تاريخ عيد ميلادي حتى يجي.
كعد يمنه سولفنه شويه وعرفته منال عالولد والبنات كعد عالكرسي اليمي ويحجي بصوت ناصي.
عبدالله: كل عام وانتي بخير، ان شاءالله العمر كله.
مروه: وانت بخير. شكرا.
عبدالله: مكلتي اليوم عيد ميلادج وعازمه شلتكم؟
مروه: اكو واحد قبل يوم يكول؟
عبدالله: لعد شوكت يكول؟
مروه: بنفس اليوم.
عبدالله: ليش؟
مروه: حتى محد يكلف نفسه ويجيب هديه هيج ابسط واحلى.

عبدالله: يعني الموجودين محد منهم جابلج هديه؟
مروه: لا بالعكس لكن هدايا رمزيه بسيطه اشياء للذكرى يعني قلم بطاقة تهنئه قصه هيج اشياء يعني.
عبدالله: خوش فكره.
حجه ويه منال ماادري شكال.
منال: مروه حبيبتي كومي دلي دكتور عبدالله على قسم الجغرافيه.
باوعتله عرفته يريد نكوم نتمشى بس ميريد يبين هالشي كدام الطلاب.
كمت وهو كام ورحنه نتمشى.
عبدالله: اي. كل عام وانتي بخير.
مروه: ههههه شنو كل دقيقه.
عبدالله: ليش مكلتي؟

مروه: مو كلنه عيب ميصير. بس انت منو كلك؟
عبدالله: ناس اعرفهم هنا اتصلوا بيه كلولي حبيبتك اليوم عيد ميلادها.
مروه: ??حبيبتك؟ منو هالناس؟
عبدالله: ??شبيج لتخافين اتشاقى منال كلتلي اليوم الصبح شفتها.
مروه: عبالي والله كلبي وكف.
عبدالله: شنو تردين اجيبلج هديه؟
مروه: شكرا بس ميحتاج.
عبدالله: ميصير لازم هديه حتى بعيد ميلادي انتي هم تجيبن هديه متغلسين هههه.
مروه: معناها كيفك كتاب او قلم.

عبدالله: لا اني جبت شي بسيط بس حتى متنسيني بيوم من الايام هذا اللي سمح بي وقتي طلعت من الدوام للسوك عالسريع ماكو وقت افتر واشوف براحتي واجيت لهنا.
طلع علبه زغيرونه وانطانياه.
باوعتله وباوعت للعلبه.
عبدالله: شبيج خايفه؟ اخذيها فتحيها تره شي عادي وبسيط.
اخذتها وفتحتها حرفA ذهب.
مروه: لا عبدالله لا مااتفقنه هيج مااكدر اخذها.
عبدالله: ممتفقين على شي اصلا.
مروه: لا مااكدر اخذها.
عبدالله: اي ليش؟

مروه: هوايه مو مال هيج وضع ولا مال هيج علاقه.
عبدالله: ليش؟ انتي ليش كله خايفه؟
مروه: عبدالله انت داتمشي بسرعه ديتطور الوضع بسرعه.
عبدالله: بالعكس كولش بطيئ مع العلم انتي فاهمه واني فاهم انتي تعرفين واني اعرف شنو نريد بس دنماطل وحاسين بالاحراج ليش مااعرف.
مروه: انت متعرف شي.
عبدالله: مااريد اعرف شي اعرف بس اني احبج وانتي تحبنيني وبس.

ظليت مصدومه من كلامه هالمره صار كل شي عالمكشوف مااكدر اتهرب بعد ولا هو.
عبدالله: الباقي مو مهم، المهم هسه تاخذين الهديه.
مروه: بس لازم نحجي اكو اشياء مينفع تتأجل اكثر مادام صار كل شي واضح هسه.
عبدالله: اخذيها اول وبعدين نحجي بكل شي..

اخذت الهديه كتله: عبدالله انت انسان محترم واني بحياتي محاسه بهيج راحه ويه احد بالحجي بس وياك مااعرف ليش واعرف إلى داسوي كله غلط واعرف راح اندم عليه بعدين بس مخايفه مااعرف ليش مرتاحه وعندي امل.
عبدالله: ليش غلط؟ احنه شمسوين؟ تره محد يعرف بموضوعنه بس منال واني نيتي صادقه وياج والله اني مااحب هالسوالف لذلك جنت ممرتبط. بس من اول مره شفتج عجبتيني وبعدين حبيتج شنو الغلط بالموضوع؟

مروه: انت سني واني شيعيه.
عبدالله: وشنو يعني؟ قابل احنه اول اثنين يحبون بعض وكل واحد من مذهب؟ اكو ناس كل واحد من دين وتنجح علاقاتهم ويتزوجون ويكونون عائله.
مروه: بس اهل ابوي متعصبين مراح يوافقون.
عبدالله: مو كيفهم يوافقون لتخافين.
مروه: وبعد شي اخطر.
عبدالله: اخطر! هههه. شنو؟
مروه: مينطون للغريب.
عبدالله: هم مو بكيفهم.
مروه: وابن عمي يريدني??.
عبدالله: ابن عمج؟ من شوكت؟

مروه: من زماان جانوا يكولون مروه لحيدر.
عبدالله: يعني من جنتوا زغار قصدج؟
مروه: اي.
عبدالله: يمعوده وكعتي كلبي. هاي سوالف صارت قديمه وابن عمج يمكن يحب وحده ثانيه هسه او يعرف وحده، اني هم جانوا يردونلي بت خالتي بس اتزوجت وراحت يأست مني هههه.
مروه: الله يسمع منك.
عبدالله: وانتي؟
مروه: شنو؟
عبدالله: ترديه؟
مروه: اذا اريده شسوي واكفه وياك لعد؟
عبدالله: يعني تحبيني مثل مااني احبج مروه؟
استحيت حيل وضحكت.

مروه: Stop شويه شويه مو هيج لتتوقع تسمع مني هيج كلام.
عبدالله: ليش همه إلى يحبون شيحجون؟
مروه: ماادري.
عبدالله: يعني اذا اتقدملج تقبلين؟
مروه: هسه؟
عبدالله: من تخلص السنه؟
مروه: الله كريم بس انت هيج تخوفني.
عبدالله: ليش تخافين كل الامور راح تكون سهله وطبيعيه ان شاءالله ماكو شي ماله حل واني راح احاول بكل طريقه ممكنه الى ان يقتنعون ويوافقون.
مروه: الله كريم.

عبدالله: معناها اني راح افاتح اهلي بالموضوع هالفتره حتى يحسبون حسابهم عالعطله وانتي هم تنطين خبر لاهلج.
مروه: لا مستحيل مااحجي شي اخاف ابوي واخواني راح يفتحولي مجلس تحقيق صح ابوي مدللني ويحبني بس مو هيج ابوي بهيج مسائل يمشي وره حجي عمي واخواني.
عبدالله: خلص حبي لتفكرين تنحل سهله صدكي..
مروه: ان شاءالله.

الفصل التالي
جميع الفصول
روايات الكاتب
روايات مشابهة