قصص و روايات - قصص رومانسية :

رواية حكم القلب للكاتبة روز الفياض الفصل الخامس

رواية حكم القلب للكاتبة روز الفياض الفصل الخامس

رواية حكم القلب للكاتبة روز الفياض الفصل الخامس

خلصت السنه واجت الامتحانات واخر يوم اجه عبدالله وياه اصدقائه ولد وبنات اني توني طالعه من الامتحان حاره الدنيا وحسيت روحي طالعه من الحر ووجهي مطبوخ طبخ احمر من الحر.
منال: هاي حبي طولتي شنو شتكتبين متفهميني؟
مروه: لج متت من الحر اكتب على كيف حسيت راح يغمى عليه من الحر حتى لعبت نفسي.
منال: اكعدي ارتاحي لتروحين توكعين واحير بيج وين اوديج ولايمي عبدالله واخلي يشيلج??.
عبدالله: السلام عليكم.

منال: بسم الله الرحمن الرحيم، كالوا ابن الحلال بذكره بس ابن الحلال شبسرعه طلع يمنه مثل العفريت??.
مروه: ??.
عبدالله: شبيكم جنتوا تحجون بيه؟
اجو اصدقائه سلموا وعرفهم علينه بعدين كال: شرايكم نروح نكعد بأي كافتيريا؟
رحنه هو يمشي بصفي.
عبدالله: وجهج احمر؟
مروه: من الحر متت اريد اخلص الامتحان بكل طريقه حتى اطلع من القاعه متت.
عبدالله: اسألتكم سهله لو صعبه؟

مروه: يعني مو صعبه بس طويله حيل وتحتاج تفكير، بس الحمدلله اني يساعدوني لان كاعده بالاخير هههه.
عبدالله: تغشون يعني؟
مروه: لا مقصدي الطلاب قصدي دائما الاساتذه اللي يراقبون علينه يساعدوني اذا معرفت شي.
عبدالله: كبار لو زغار اساتذتكم؟
مروه: بكل الاعمار.
عبدالله: يساعدوج بس انتي لو يساعدون البقيه؟
مروه: والله تريد الصدوك ممتنبهه مااصدك اخلص واطلع.
عبدالله: اذا زغار معناها معجبين بيج.

مروه: ههههه بسرعه فسرتها هيج ليش الكبار ماعدهم هيج سوالف؟
عبدالله: يعني متعرضه لهيج مواقف؟
مروه: اي طبعا. اني بنيه شي طبيعي تمر عليه هيج شغلات.
عبدالله: لا مو كل بنيه بس انتي شكلج جذاب مثل اللعابات زغيره وحلوه شخصيتج حلوه وصوتج عبالك طفله.
ضحكت استحيت كتله: هذا الحجي كله إلى؟ هههه بس هاي الفقره مال الصوت اتفق وياك بيها كلهم من يسمعون صوتي احسهم ينصدمون هههههه.

وصلنه للكافتيريا وكعدنه بس شويه وعبدالله كام وكلي: من رخصتج مروه اريد احجي وياج شويه.
كمت رحنه مشينه شويه يمهم.
مروه: شكو؟
عبدالله: ماكو اريد نتمشى سوا اني مجاي اكعد وياهم ويايه همه طول اليوم اني اجيت حتى اشوفج واكولج احبج وجها لوجه لاخر مره قبل العطله.
استحيت درت وجهي.
اتنهد حيل بعدين كال: امنيتي اسمع منج هالكلمه.
بقيت ساكته.
عبدالله: اني البارحه حجيت ويه الاهل بموضوع خطوبتنه.
التفت عليه بسرعه.

مروه: ليش؟
عبدالله: حتى اخطبج وتصيرين خطيبتي وبعدين نتزوج وتصيرين زوجتي بعد ليش.
مروه: الله يستر جنك اتسرعت.
عبدالله: اتفائلي مراح يصير الا كل خير. نسيتيني اتفضلي.
انطاني وردتين جوري وحده حمره ووحده صفره.
عبدالله: قبل من جنه زغار جانوا يكولون الاصفر لون الغيره والاحمر معروف.
مروه: اخ ياعبدالله لو بس اعرف تالينه شنو ارتاح راح اموت من التفكير.

عبدالله: تاليتنه ابيت واحد ان شاءالله تره لا احنه اول ولا احنه اخر اثنين يتزوجون وهم كل واحد مذهب لكم دينكم ولي دين مو هيج القران يكول وهذا دين الله شلون لعد بالمذهب؟
مروه: وحيدر؟
عبدالله: هم نخلص منه بس كولي يارب.
مروه: ياااارب.
حجينه هوايه وكل حجينه كان عادي فعلا جنه اصدقاء ويمكن هذا الشي اللي خلاني احبه صداقتنه حتى حبنه كان صداقه.

راحوا واحنه هم رجعنه للبيت وبدت العطله وجنت مرات اتصل بي ونحجي حسب ظروفي وظروفه لان مرات اتصل بس يكون مو موجود جانت علاقتته غريبه بس حلوه وبريئه مجان بيها اي شي يخدش الحياء لاكلمه ولاتصرف ولا نظره.
جنت على تواصل ويه منال وساعات يوديلي سلام وياها.
منال: حبي لتفكرين صدكيني يحبج وماكل راسي كلما يشوفني يسألني شلونها وشخبارها وسلمي عليها وكليلها مشتاقلها واليوم كلي فد شي.
مروه: شنو؟

منال: يريد يجي يخطبج بس كلي كليلها حتى يكون عدها علم بالموضوع متتفاجأ.
مروه: اويلي بطني ظلت توجعني من هسه خفت شلون نونه دبريني شكوللهم منين اعرفه؟
منال: على كيفج غير جيرانه وشافج مره جايتني وعجبتيه وانتهى الموضوع.
مروه: خررب حظي شوداني وحجيت وياه؟

منال: شوفي خل اكولج شي تره الموضوع من اول يوم جان جدي بالنسبه اله ومثل ماهو يعرف وضعج ورغم هذا متراجع وبقى على موقفه انتي لازم هم تصيرين شجاعه وتتحملين لخاطره وتواجهين اهلج.
مروه: شواجه لج اني ذبانه اخاف اكتلها انوب اواجه اهلي.
منال: هسه اني كتلج كتلي واحد منهم بس اريدج تكونين قويه واحجي وياهم كليلهم احبه واريده.

مروه: هههههههه ضحكتيني والله واني بهالحاله. شوفي اني صدوك مدلله بس ابقى عندي خوان شباب وكل شي بيدهم واخواني يحبون حيدر هوايه واخاف احجي شي كدامهم.
منال: هو كال كليلها هالاسبوع نجي ان شاءالله توكلي على الله بلكي يقبلون بدون هوسه ومشاكل.
مروه: ان شاءالله يارب.
طول الاسبوع واني بقلق وكل يوم اكول يمكن اليوم يجون وماكو هاي مر الاسبوع كله اليوم جمعه وصار العصر ماكو شي.

كاعده اني ارتب كنتوري وره صلاة المغرب يئست من جيتهم وسمعت الباب اندك بادت رجليه طلع احمد اخويه فتح الباب ودخل كال: امي وين؟
مروه: بغرفتها يمكن. ليش؟
احمد: نسوان بره يردوها يكولون خطار.
عرفت همه حيلي كله باد وظليت ارجف.
طلعت امي استقبلتهم اسمع صوتهم دخلوا شويه واجت امي: مروه هاي نسوان اجوي ووياهم منال صديقتج.
مروه: منال؟ صديقتي؟
امي: اي صديقتج شكو؟

مروه: شمدريني شكو مكالت راح تجي ولا اتصلت شلون تجي هيجي فجأه غير تكول حتى البس شي بي حظ.

الفصل التالي
جميع الفصول
روايات الكاتب
روايات مشابهة