رواية حكم القلب للكاتبة روز الفياض الفصل الرابع والعشرون
طلعوا بيت عمي وامي وابوي والولد وزينب طلعوا وراهم للباب اني مطلعت استحي ظليت اباوع من باب الديوانيه شويه ورجع حيدر.
حيدر: مروه؟
مروه: نعم؟
حيدر: مو الصبح تكولين مموافقه، مااحبك، ابتلي بيج والله.
مروه: ههه لا خلص.
حيدر: خلي التليفون يمج مو تنامين.
مروه: ان شاءالله.
حيدر: اليوم طالعه حلوه.
مروه: ليش اني مو حلوه؟
حيدر: لا حلوه تخبلين بس شعرج حلو مسويته لايكلج والفستان اخ يالفستان ليش نزعتيه؟
مروه: ههه يوميه أتأكد انت مو صاحي.
حيدر: غير من وراج رجال محامي محترم وشخصيه وهيبه لعبتي بيه لعب.
مروه: هههه.
حيدر: اويلي لتضحكين تطلع الغمازه تره مااروح اليوم ابقى لازملكم الباب.
مروه: ههههه كافي ديسمعون الضحك عيب فشله.
حيدر: ابوي ليش محجه من وكت حتى نلحك نحجيلنه كم كلمه الا باللحظات الاخيره من الشوط الثاني يالله ينطق الشهاده هسه شفتهمنه.
راح اوصلهم وارجع مو تنامون لو تقفلون الباب تره اكسر بابكم بالطابوك.
مروه: هههههههه كافي روح والله استحي من اخواني هسه شيكولون شبيها تضحك.
صاحوا عليه بره رد عليهم: الله واكبر عليكم اذا مستعجلين ليش مجبتوا وياكم سيد جان عقدنه هسه وبتت يمهم اليوم وانتوا رحتوا بحدكم.
كلهم ظلوا يضحكون.
مروه: يالله روح كافي نحجي بالتليفون.
حيدر: مو تنامين، يالله مع السلامه.
مروه: مع السلامه.
راحوا وبس وصلوا اتصل.
حيدر: حبيبتي.
مروه: نعم؟
حيدر: ممصدك إلى صار يعني هسه انتي خلص صرتي مرتي؟
مروه: لا. خطيبتك.
حيدر: شحدج مرتي ماكو خطيبتي.
مروه: ههه اوك.
وره يومين صارت كعدة الزلم انترس شارعنه سيارات الدنيا انكلبت ممبقي احد مجايبه وياه البيت مكفاهم ظلوا بره بعدين دخلوا عند الجيران فتحولهم بيتهم.
اني بيومها عزمت منال خلصتها ضحك على خبال حيدر اجت ساعدتني لبست فستان تركوازي ساده ضيق وقصير وسشورت شعري وخليت مكياج بسيط من طلعوا دخل هو لبسنه الحلقات بعدين كلها راحت بقى بس هو ظلينه نحجي ونسولف وكل دقيقه وكال ممصدك.
مروه: زين شسويلك حتى تصدك اكرصك؟
حيدر: ابد الرومانسيه عندج منقرضه مااكو امل منتهيه فد مره، كولي ابوسك احضنك.
مروه: هههه لا حبيبي ماكو هيج حجي.
حيدر: شكلتي؟
مروه: شكلت؟ ماكو هيج حجي.
حيدر: لا قبلها حبيبي، الله عليج عيديها.
مروه: هههه، مااعيد شي.
وره شهر اتزوجنه ماسوينه حفله بس زفه واجه حيدر اخذني من الصالون رحنه ناخذ صور كلي: الله واكبر عليج شمسويه؟ ??
مروه: ليش؟ مو حلو؟
حيدر: يامو حلو، بالله منين ابدي اليوم؟
مروه: هههه اشش فضحتنه.
حيدر: بعدج مشفتي شي خل نطلع وشوفي.
بس طلعنه من التصوير ظل يركص بالباب يم الفرقه ركص هو وجماعته واني كاعده بالسياره اضحك وانتظره.
صعد بالسياره طول الطريق يغني بعلو صوته ويدك هرنات خبل اهل السيارات بالشارع ويصيح على جماعته ومخلي العلم العراقي عالسياره يكول انتصرنه.
زفونه للفندق دخلنه وويانه امي وامه وزينب بس نزعت البدله انطيتها الهم كللهم: يالله رحم الله والديه من زار وخفف.
امه: عود على كيفكم شويه شويه.
حيدر: يوم روحي لاابتلي بيج، انتي متزوجه ابوي صارلج 30 سنه ماله منه وطالع الزواج من خشمج جايتني هسه على كيفكم، الا اطلع القهر الشفته منها.
زينب: ههههه لا يمعود احنه ماصدكنه عقلت ووافقت ??.
حيدر: والله اليجي منكم هنا لو يتصل فكره.
اني رحت سبحت وبدلت طلعت لكيته كاعد عالجربايه كلي: ليش غسلتي المكياج وخربتي شعرج؟
مروه: ليش غير سبحت شنو قابل ابقى بي.
حيدر: مو جنت اني اريد امسحه واخربطه.
ضحكت كتله: هسه احط غيره وخربطه.
حيدر: اليوم والله لاطلع القهر الشفته منج كله، لج خبلتيني احبج.
مروه: واني هم احبك.
حيدر: عليج العباس عيديها.
مروه: ههه احبك.
حيدر: يبوووي وامي تكول على كيفك شويه شويه شحاجيها بالله؟
ثاني يوم سافرنه لاربيل بقينه اسبوعين ورجعنه مرت فتره طويله على زواجنه بس مصار حمل والسبب مني اكيد لان هو عنده طفل..
جان كل اسبوع يجيبه يبقى عدنه يوم كامل حلو ووكح يلعب ويركض جان من يجي يسوي جو بالبيت والحمدلله يحبني..
راجعنه هوايه اطباء واخذنه كومه ادويه بس ماكو فايده صحيح حيدر ماجان محسسني انه هو مهتم للموضوع بس اني جنت ضايجه وافكر هوايه وهو خطيه.
مروه: حيدر؟، شلون اذا مصار عدنه اطفال؟
حيدر: عادي ياروحي، شنو المشكله، يصير بعدين لتخافين.
مروه: واذا مصار بعدين؟
حيدر: عادي ياروحي، اتزوج عليج.
مروه: شنووو؟
حيدر: ههههه، شبيج مو جنتي مسويه نفسج مقهوره على ساره وترديني ارجعها.
مروه: صحيح بس جنه منفصلين بوقتها، هسه لا شحدك تسويها.
حيدر: اي شكو بيه هي هم تحبج ماكله راسي جانت كل كلمه والثانيه لو بت عمك جان مكلت هيج لو بت عمك جان مسويت هيج لو بت عمك جان محجيت.
مروه: هههه اكيد جنت مخبلها ومضوجها حتى تحجي هيج.
حيدر: شمضوجها؟ هي مو صاحيه.
مروه: شبيها شفتها بزواج فرات وزينب حبابه اجت سلمت علي وبوستني.
حيدر: والله؟ اول مره اسمع وحده تبوس ضرتها.
مروه: ههههه لا والله حبابه شبيك كلتلي جنت متشوقه اشوفج واتعرف عليج بس ممتوقعه انتي هيج حلوه.
حيدر: واجت بيومها متخبله، اتخبلت البنيه من وراج كل كلمه وراها بت عمك، شسويتيلها؟
مروه: هههه شسويتلها بس تأثرت يمكن لان شافتني ركصت هههه.
حيدر: خبلتيها مو اني جنت متخبل من وراج.
مروه: ههههه على اساس هسه عقلت.
حيدر: حتى تعرفين شكد احبج، المفروض انزل بيج عقوبه كل دقيقه تكولين احبك حتى اطلع الفرق من جنتي شالعه كلبي.
مروه: تستاهل من ايدك.
حيدر: صحيح استاهل، حتى صاحبتي ملت مني بوكتها من كداما اسولف بيج عافتني كلتلي شنو ماعندك غير موضوع غير سالفه المن تحجي ويايه بعد اذا ذابحني ابت عمك ههههههه.
مروه: ههههه وبعدين؟
حيدر: بعدين شنو ظليت بدون صاحبات من وراج حتى صاحباتي هجوا.
مروه: ههههه احسن.
منال اتزوجت ورحت بزواجها طولت يالله اتزوجت لان جانت عدهم حالة وفاة.
حلوه جانت طالعه ووره فتره بسيطه حملت ماشاءالله واستحت تكولي لان اني مصار عندي حمل رغم اتزوجت قبلها بس بعدين عرفت بيها حامل ورحتلها وباركتلها وكتلها انتي اختي ميحتاج تستحين او تنحرجين هاذي قسمة ربي وان شاءالله تكومين بالسلامه.
وراها بفتره جنت عد اهلي واتصل بيه حيدر كال: مروه راح اجي عليج جهزي نفسج.
جنه متفقين ابات عد اهلي بيومها بس من سمعت صوته ضايج سكتت ورجعت وياه.
مروه: شبيك؟ اشو ضايج؟
حيدر: ماكو شي؟
مروه: احجي شبيك؟
حيدر: هاي العوبه تريد تتزوج.
مروه: منو؟
حيدر: ساره.
مروه: اي؟ ويعني؟ ليش ضايج؟ انت شكو بيها؟
حيدر: متريد حمودي، اتصلت بيه الصبح تكولي تعال اخذه.
سكتت اني جنت متوقعه هيج من البدايه لان هو من اول ماجابت كال اتفقنه يبقى عدها فتره وبعدين الله كريم.
مروه: اي؟
حيدر: اي، شنو بعد معناها لازم اجيبه يبقى عدنه بالبيت عد امي.
سكتت ماعلقت من وصلنه للبيت راد ينام بالبدايه بعدين نزل يدخن بره.
نزلت وراه كتله: هسه مافهمت انت ليش ضايج؟ تريد ترجعها يعني؟ اذا تريد ترجعها حيدر كول من هسه لاتشلع كلبي.
حيدر: شرجعها من كل عقلج؟
مروه: لعد شنو؟ اني صح قبل كتلك رجعها علمود الطفل بس جنه منفصلين، هسه جذب مااكدر اذا ترجعها اتخبل..
ادري علمود الطفل وادري ماله ذنب بس مااتحمل..
المصيبه عندك طفل منها اتهستر غير.
حيدر: شبيج. شبيج هسه اني كلت ارجعها؟ اكولج خلص راح تتزوج شرجعها بعد؟
مروه: اي المن ضايج بعد فهمني؟
اتنهد وكلي: يعني متضوجين اذا اجيب حمودي عدنه؟
مروه: يعني علمود حمودي؟ من كل عقلك؟ اولا اني متوقعه هالشي خصوصا هي بعدها زغيره يعني متوقع انه تتزوج مره ثانيه، ثانيا شلون اضوج مو ابنك هو اكو احد يذب ابنه؟ ثالثا اني احبه وماعدنه اطفال عالاقل يونسنه بالبيت.
حيدر: هو يبقى يم امي انت مو مطلوب منج تهتمين بي.
مروه: ليش؟ شنو ماانفع؟ تره بت اختك اني جنت اهتم بيها من ارجع من الدوام.
حيدر: لا لج قصدي يعني مو ابنج مو ملزمه بي.
مروه: ابنك ابني ان شاءالله لتخاف، بس اني مااريد هالشي يأثر على علاقتنه بيوم من الايام او يخلق مشكله او تفكر لان ابنك مو ابني تتصور مااحبه؟
حيدر: يابه ابنج انتي شتردين تسوين وياه سوي واذا حجيت عود ذيج الساعه عاتبيني، زين هيج؟
مروه: معناها كافي تدخين ويالله كوم خل نروح انام قبل لا احد يحس وعبالهم اكو شي..