رواية حكم القلب للكاتبة روز الفياض الفصل الخامس والعشرون والأخير
ثاني يوم حيدر حجه ويه اهله وكللهم راح يجيب حمودي عدنه بالبيت طبعا فرحوا وعمي اجه اتشكر مني لان قبلت..
راح جابه وبقى عدنه. جنت الصبح بالدوام ومن ارجع اني استلمه من بيبيته وبالليل طبيعي يريد ينام يمنه بس جان مونسنه حيل مثل سوالف حيدر نفس الوكاحه.
بس كبر شويه دخلناه حضانه لان بيبيته تتعب الصبح وياه.
وزوجة حسين هم جابت ولد وهم سموه احمد. واني ماكو شي جنت كلما اسمع وحده حامل لو وحده جابت انقهر على نفسي وعلى حيدر.
امي جانت تنقهر ومرت عمي جانت كلما تسمع بطريقه للحمل تجي تكولي وكل فتره تاخذني لدكتوره شكل حتى جنت استحي اكول لحيدر اريد اروح للدكتوره على كدما رحت بس شسوي حجي الناس جان يأذيني واسئلتهم مؤلمه بس احد يشوفني يسألني ماكو شي؟ مصار عندج شي؟ محملتي؟ مرحتي للدكتور الفلاني؟ او الدكتور العلاني؟ مسويتي هيجي؟ مجربتي هيجي؟ مرحتي للزياره؟ خاف مدري شنو؟ خاف هيجي خاف هيجي؟
جان حمودي ابني..
اسبحه واوكله والعب وياه واشتريله كل إلى تسوي الام جنت اسوي اله..
مااكدر اقصر بشي لان ضميري يأنبني على اقل شي..
احسه فعلا ابني الله انطانياه حتى يسد حنان الامومه العندي سبحان الله فعلا كل بنت ام بالفطره.
جنت وين مااروح اخذه وياي وجان يصيحلي ماما واني افرح واكيف خصوصا اذا ناس مااعرفهم وميعرفون مو ابني جنت احس بنوع من الفخر ماادري الغرور ماادري شنو من يصيحلي ماما..
حيدر جان يحس بالامتنان لان ربيت ابنه، ويصيحلي كدام الناس ام احمد..
ورغم احبه من يكولي هيج بس بقى عندي احساس بالنقص عبالك اذا حملت وصار عندي طفل منه راح يعوض هالنقص..
غصه بكلبي بقت من اشوف وحده حامل لان مجربت هالشعور ومحتاجه اعيشه حتى تكمل حياتي لان اكو بكلبي خوف دائما ساره ترجع تاخذ حمودي مني رغم هي تنازلت عنه بالمحكمه بس مو بيدي.
كبر حمودي حبيبي ودخل مدرسه واليوم اول يوم من وصلناه الصبح ظليت ابجي..
حيدر: اها ليش تبجين؟ ادري هو رايح للمدرسه لو للعسكريه؟
مروه: هههه هسه وكتك.
حيدر: شسويلج اذا انتي كلبتيها مناحه وهو الولد توه بصف الاول لو دخل كليه شلون؟ لو راد يتزوج شلون؟
مروه: ان شاءالله يدخل كليه ويتزوج.
حيدر: وابوه هم يتزوج.
مروه: ابوه اذبحه قبل لايفكر مجرد تفكير بهالموضوع.
مر على زواجنه 5سنوات وماصار عدنه طفل وحاولنه نسوي طفل انابيب ومانجحت العمليه وجانت منال خطيه تواسيني خصوصا بعد ماسوينه عملية طفل الانابيب ومانجحت لان جنت حيل مكتأبه ونفسيتي تعبانه.
بعدين قررنه نسافر نغير جو ونشرد من الحر فرحنه لاربيل اني وحيدر وحمودي بقينه اسبوعين ورجعنه.
رجعنه نفسيتي جانت احسن الحمدلله ووجود حمودي جان مهون عليه الموضوع وساد الفراغ إلى بحياتي.
من نجح احمد لصف الثاني مره جان عدهم اجتماع اولياء الامور ورحت للمدرسه وبقينه للظهر يالله خلص الاجتماع ومن خلص اتصلت على حيدر حتى يجي ياخذني.
اجه حيدر كال: خنروح نتغدا بره مشتهين كباب.
رحنه من وصلنه ودخلنه شميت ريحة الشوي لعبت نفسي.
كعدنه اتغدينه وخلصنه ورجعنه بالطريق حمودي نام من وصلنه نزل حيدر ونزل حمودي دخلنه للبيت عمي ومرت عمي نايمين.
صعدنه لغرفتنه بدلنه وغسلنه ونمنه بس معدتي مو مستقره العصر من كعدنه بعدها لعبانه نفسي احس الريحه بقت بخشمي حيدر طلع وعمي اخذ حمودي وراحوا للجامع بس اني ومرت عمي جنه نباوع عالتلفزيون جانوا بوقتها يعرضون المسلسل التركي سنوات الضياع ومتابعيها.
من خلصت المسلسل كتلها: عمه راح انام شويه معدتي موتتني لعبانه نفسي.
كالت: اي نامي، بس لو تشربين بيبسي ترتاحين.
كمت رحت اشرب بيبسي بس حسيت خلص مااتحمل بعد راح اتقيئ.
رحت للحمام ظليت اتقيئ حسيت راح اموت.
اجت هي كلتلي: يالله هسه ترتاحين مدام اتقيئتي نامي ارتاحي.
رحت صعدت نمت بالليل من اجه حيدر كعدني.
حيدر: مراوي؟
مروه: امم.
حيدر: شبيج حبيبتي مريضه؟
مروه: معدتي أذتني.
حيدر: وهسه شلون صرتي؟ بعدها تأذيج؟
مروه: لا زينه احسن الحمدلله.
باسني?? كال: يالله كومي خل نتعشا وجهج اصفر اليوم.
كعدت غسلت ونزلت جوه بديت اسوي عشا ومرت عمي اجت ساعدتني كلتلي: وجهج اصفر، شوداكم اليوم واكلتوا بره آخ ياحيدر يموت على اكل المطاعم.
اني اشتغل بس لعبانه نفسي خصلت وصبيتلهم همه اتعشوا اني ماكدرت.
عشيت حمودي وصعدته انومه.
نومته ونزلت كعدت يمهم شويه بعدين راحوا ناموا بقينه اني وحيدر نباوع عالتلفزيون اتمددت خليت راسي على رجله
بعدين طلع جكاره يدخن بس بده يدخن رحت اركض للحمام اتقيئت.
حيدر: شبيج اليوم؟
مروه: معدتي موتتني، مو طبيعيه اليوم.
حيدر: شنو من الاكل يعني؟ مو اكلت وياج؟
مروه: راح اروح فوك بلكي اكدر انام.
حيدر: اوك روحي هسه اجي وراج بس اقفل الباب واطفي التلفزيون.
صعدت وهو صعد وراي بيومها كوه نمت ثاني يوم مارحت للدوام بقيت نايمه للظهر كعدت كوه اتغديت لكمتين ولعبت نفسي.
العصر بعد مااتحملت..
رحنه للدكتور مال باطنيه اول ماحجيتله سألني: مو حامل؟
ظليت صافنه بعدين كتله: ماادري، مااتوقع متزوجين صارلنه ( 6 ) سنوات بس ماعنده اطفال.
الدكتور: معناها ترحين اول شي تسوين تحليل حمل وبعدين ترجعين.
رحت للمختبر سويت تحليل حمل كلي نص ساعه ورجعي، حيدر كلي ابقي كاعده اني انتظر النتيجه اجيبها واجي.
مااريد اتفائل واتأمل وانصدم بس مو بيدي ظليت بقلق كاعده واهز برجلي..
وره شويه رجع كلي: يالله كومي.
كمت بس مقبل نرجع للدكتور..
مروه: ليش؟ غير يشوف النتيجه؟
حيدر: النتيجه تكول، لازم دكتوره مو دكتور.
مروه: ليش؟
حيدر: حبيبتي، حامل انتي..
مصدكت من كلي ومن الفرحه ماكدرت احجي استحيت رحنه للدكتوره ودخلنه وحولتني للسونار رحنه سويت سونار ورجعتلها كالت: مروه حامل عليج شهرين..
الطفل زين الحمدلله وكل شي تمام، تجين الشهر الجاي حتى نجيك وضعج ووضع الجنين، ومبروك.
مبروك، مااتخيلت راح اسمع هالكلمه بيوم من الايام الحمدلله والشكر..
طلعت من الدكتوره ابجي حيدر كاملي بسرعه عباله اكو شي مو زين.
حيدر: شكو؟ شبيج؟ ليش تبجين؟
هزيت راسي ماكو شي..
مروه: ماكو شي، كل شي تمام، بس مو مصدكه.
اكو مره عجوز كاعده سألتني: شبيج خاله؟ ليش تبجين؟
مروه: مابيه شي خاله.
حيدر: ماكو شي، خاله حامل وفرحانه..
العجوز: اول واحد هذا؟
هزيت راسي اي..
مروه: اول واحد من( 6 )سنوات ماعندي اطفال.
فرحتلي خطيه وظلت تصيح: صلاوات، صلاوات، مبروك خاله، الله يكومج بالسلامه ان شاءالله وكلها ظلت تباركلنه.
حيدر: يالله، خل نروح امي خابرت تكول حميد ظل يبجي عليكم.
رجعنه للبيت، جنت فرحاانه حيل ومستحيه. بس حيدر وينه ووين المستحه اول مدخلنه صاح: وينكم.؟ يابه المره حامل، فد ذبيحه شي ممحضرين حتى لو دجاجه.
مرت عمي ظلت تهلهل وحيدر راسأ اتصل بأمي وكللها واتصل بأبوي واتصل بزينب وحسين ومبقى احد يعتب عليه.
من صعدنه كلي: فرحانه؟
مروه: اكيد، اصلا ممصدكه..
حيدر: اني هم فرحان.
مروه: انت عادي، مو جديد عليك الموضوع عندك حمودي.
حيدر: لاجديد، بحمودي ماجان الموضوع مهم بالنسبه إلى لان ماجنت احب امه، بس هالمره غير..
بعدين حمودي مو بس ابني، ابنج انتي امه انتي ربيتيه..
مروه: ابني. واموت عليه واحبه من كل كلبي وجنت اخاف امه تجي بيوم من الايام وتكول اريده بس هالطفل اله معنى غير عندي.
باس كصتي وباس ايدي كلي: ادري، بس هالمره اريد بنيه، حتى تطلع مثلج عنوديه ولسانها طويل.
مروه: هههه انت شمجلبلي لسانج طويل شحاجيه وياك؟
حيدر: والعناد؟ هم كولي مو عنوديه؟
مروه: شدعوه انت مو عنيد منو عنودي اكثر اني لو انت الله عليك؟، لو تريد اذكرك بعنادك مال قبل.
حيدر: فوكاها، فوكما احبج؟
صارت عدنه بنيه سماها حيدر ( ايفان ) اسم كردي لان احنه من رحنه لاربيل اتغيرت علاقتنه ووراها رجعنه لبعض.
وعبدالله بقى ذكرى حلوه بكلبي وحرفه برقبتي??. ختامنا: اعطوا فرصه لاحبائكم لتعتادوا عليهم، ولانفسكم لتعيشوا بسلام..
ولقلوبكم لكي تشفى..
لاتغلقوا ابوابكم من اول صدمه فالحب اساس الحياة والكتاب لايعرف من عنوانه????
تحياتي.