رواية حكم القلب للكاتبة روز الفياض الفصل الرابع عشر
وره تقريبا شهر صاحلي ابوي بالهول رحت هو كاعد ويمه امي وفرات وحسين.
ابوي: بابا، اليوم عمج خطبج مني لابن عمج حيدر، شتكولين؟
فرات: شتكول؟ هو بكيفها، نمشي بحجيها احنه، نمشي بحجي النسوان؟
مروه: مااريده.
فرات: اكوم ادوس ابطنها هسه؟
ابوي: اسكت خلينه نحجي، مو اني كاعد اشو متحترم انت؟
فرات: متشوفها شلون طايحت حظ عينها صلفه الها عين وبعد تحجي..
ابوي: بابا تره الولد يحبج ويريدج ومنتظرج صارله فتره.
مروه: مااريده. مااحبه. مااشتهيه. مكايلتله ينتظر..
فرات: تردين الدكتور مو؟ لو تموتين متاخذينه لو تموتين سمعتي؟
ابوي: اسسكت، ليش يا بابا ليش مترديه؟
مروه: لان مثل ابنك هذا نفس الاسلوب.
راسا كام وضربني.
دفعه ابوي وامي شبكتني.
فرات: ولج والله اندمج وشوفي.
ابوي سكت ماحجه بالموضوع بعد وره يومين يمكن اني وامي جنه عند الدكتور لان ضغطها مينتظم.
رجعنه لكينه سيارات ابابنه هوايه دخلنه للمطبخ لكينه حسين ياخذ مي.
امي: شكو شصاير منو عدنه؟
باوعلي ماحجه شي بس اشر عليه.
ماافتهمت شي ولا امي.
امي: شنو منو عدنه؟
حسين: بعد منو، الدكتور وجايب عشيرته كلها وياه وصار ساعه يحجون وابنج قافل ويكلهم ابن عمها ناهي عليها.
امي: ياويلي ويلاه عزا العزاك فرات شسويت باختك؟ حسبي الله ونعم الوكيل شلون بي هذا الولد شلون براسه اليابس؟
اني بجيت وامي خطيه ظلت تبجي.
ظليت اطلك عبالك اروح وارجع بالغرفه ومتوقعه باي لحظه يجي يطيح حظي.
طولوا ومااسمع بس صوت فرات يصيح بعدين صار هدوء يمكن طلعوا اني من حسيت طلعوا ظل كلبي يركع من الخوف ورجليه بادت.
امي رأسا اجت يمي تخاف فرات يجي يضربني شويه وسمعنه صياح بره وعيطه ركضنه اني وامي للمطبخ شفنه فرات وحيدر هم جاي ويصيحون ويتعاركون همه وعبدالله واهله والناس يفاككون بينهم.
المهم فكوهم وراحوا وفرات وحيدر وابوي وحسين دخلوا للبيت اني ركضت لغرفتي وامي وكفت اباب الغرفه.
همه دخلوا وهو اجاني مثل الصاروخ شبعني كتل امي تصرخ وحسين يدفع بي وابوي يصيح وهو عبالك يريد ينتقم كسرني تكسير وحيدر واكف يباوع بعدين سحب فرات ودفعه.
اخر شي امي اتخربطت يالله عافني ووخر.
فرات: بنت الكلب اني اعلمج، ولج اذا مااذبحج واذبحه مااطلع اني.
حيدر: كافي، شهالحجي؟ تذبحه شنو هالطايح الحظ هذا وتذبحه اني انهيه طلقه وحده وينتهي موضوعه اشو المحكمه متروسه مجرمين بس اشوفلي واحد وانطيه جم فلس وهو يصفيه ويلعن خير خيره.
شكد كرهته حيدر الماعنده احساس.
دفع فرات طلعه بره الغرفه وحسين كوم امي خلاها عالجربايه واني رحت يمها شبكتها وابجي وهي تبجي وحسين واكف على راسنه ابوي راح للهول.
شويه ورجع حيدر دخل كلي: شوفي لج، خاف قبل جنت محترمج ومخليج براحتج اكول خطيه اجبرها واضغط عليها هسه بالعناد الا اخذج واكسر خشمج، واريد اشوف زلمه اليعترض لو يكول اريدها الا بطلقه انهي حياته والله مو تكولين ماكتلج، كيفج اختاري انتي لو هو؟.
حسين: اطلع حيدر مو وكته هالحجي، اطلع بره هسه.
حيدر: حضري روحج هالاسبوع نتزوج، الا اكسر خشمج واخليج خدامه، بس خدامه لا انتي متزوجه ولا انتي مطلكه الا اخليج معلكه، هالشارب مو على رجال اذا ماندمتج.
حسين: دروح يااخي، دروح، اطلع منا متشوف امي متخربطه شجلبت انت.
طلع من الغرفه بقينه اني وامي وحسين وتلاثتنه نبجي.
بليلتها امي نامت يمي بالغرفه ولو اني مانمت ولاغمضت عيني بس ابجي بس هي خطيه نامت لان تعبت وداخت ضغطها ارتفع وحسين كل شويه يجي يشوفها.
حسين: كل إلى صار بسببج.
مروه: ليش بسببي شسويت؟ واحد واجه من الباب وخطبني شنو الغلط البيها هاي؟ هو يريدني واني هم مقتنعه بي شنو الغلط البيها؟ انتو لو ردتوا وحده عادي عدكم تحبون وتخطبون وتتزوجون إلى تردوها بس اني حرام لان ابنيه شنو حيوانه اني مالي قيمه حتى تزوجوني بكيفكم وتضربوني هيج؟
حسين: ماكلنه حيوانه.
مروه: لعد شنو انسانه؟ مو انسانه، الانسان اله حقوق وهذا حقي من ربي الله يكول الزواج بالاكراه باطل وانتو تردون تزوجوني هذا لان صديقكم اخوك يدافع عنه لان اخو زوجته منو اقربلكم اني لو هو اني اختكم لحمكم ودمكم شلون ينطيكم كلبكم هيج تسوون ويايه؟
حسين: وشعرفتي عن هذا عبدالله حتى تجلبين بي يجوز مو خوش انسان؟
مروه: عالاقل هذا عمره ماباوعلي بنظره مو حلوه مثل ابن عمك ولامره دك تليفون عليه واتصل ولامره قبل يوكف وياي كدام الطلاب ميريد تجيني حجايه واول ماحجه وياي كلي اني مو مال لعب ماالعب على بنات الناس، ابن عمك هيج مثله؟ لو يشبهه؟ ابن عمك مو يكل للناس خاطبني وهو لهسه يلعب لعب عالبنات؟ هذا إلى يدير باله عليه؟ هذا ماعنده مخافة الله اعراض الناس مو لعبه بس مااكول غير حسبي الله ونعم الوكيل بيكم، جان عندي اخ واحد ومات الله اخذه حتى تتسلطون عليه وتظلموني لو باقي عايش محد منكم يكدر يسوي هيج ويايه.
ظليت ابجي حيل وهو واكف ميحجي ادري بي ضميره يأنبه وادري بي مقهور عليه بس مادام يخاف من فرات يحجي الحق فلا اخوي ولا اعرفه.
ثاني يوم العصر اجه حيدر اسمع صوته بره يم ابوي والولد امي راحت يمهم.
حيدر: الخميس العرس، مااتاني بعد اكثر لو تموت.
فرات: الخميس الخميس، كيفك.
ابوي: شوكت الزلم تكعد اذا الخميس العرس؟ لاتستعجلون وتخبصونه.
امي: شتردون من البنيه، مو كافي السويتوه البارحه؟ خلوها ترتاح كم يوم ماطاير العرس.
فرات: يمه لتحجين ولتدخلين، انتي خربتيها انتي مشجعتها.
امي: طايح الحظ، شنو خربتيها؟ شنو لتحجين ولتدخلين؟ امها اني وامك احترم نفسك والزم لسانك من تحجي ويايه، بعدين شنو خربتها؟ شسوت هي حتى خربتها؟ وافقت على واحد اتقدملها شنو سوت جريمه؟ هاي انت مو زينب جانت تحبك وتليفونات وطلعات وطبات اشو ماحجه اخوها شي ولاانت كلت عيب؟
ابوي: اكعدي. اكعدي. انت تعبانه هسه، وعوفي هالحجي ماله داعي بعد خلص تتزوج ابن عمها، اوله بيها من الغريب من شوكت احنه ننطي بناتنه للغرب، وانت ضب لسانك واحجي ويه امك بأدب..