قصص و روايات - قصص رومانسية :

رواية حكم القلب للكاتبة روز الفياض الفصل الخامس عشر

رواية حكم القلب للكاتبة روز الفياض الفصل الخامس عشر

رواية حكم القلب للكاتبة روز الفياض الفصل الخامس عشر

حيدر: معناها الخميس تمام.
ابوي: الزلم شوكت كعدتهم غير نفتهم؟
حيدر: عمي ماله داعي كعدت زلم. شنو اني غريب؟ هي طالعه من بيتك لبيت عمها. وكل الناس تدري هي إلى بعد ماله داعي هالرسميات.
فرات: اي والله، على شنو بعد خل تتزوج بسرعه وتفكنه.
امي: امداك، وامده البطن الجابتك.
فرات: ميخالف يوم، انعم الله عليج.

اني اسمع وابجي عمت عيوني من البجي اليوم الاثنين والخميس اتزوج وادخل لسجن الله يعلم شنو راح اشوف بي من ضيم وقهر..
ياربي مالي غيرك الهي سيدي مولاي فوضتلك امري لو تموتني لو تخليهم يموتوني لان اني جبانه مااكدر اموت نفسي جذب.
ثاني يوم حجيت ويه امي كتلها: اريد اتصل بمنال.
امي: ليش تتصلين بيها؟ تردين فرات يدري ويكلب الدنيا على راسج ويضربج ويشلع كلبي عليج؟

بجيت كتلها: ياريت يضربني، ياريت، بس كون ضربة موت حتى اموت وارتاح.
ظلت تبجي كعدت يمي: يايمه انتي مو زغيره. انتي شابه وهسه خلص راح تتزوجين وهاذي حياتج هسه. لازم تتعودين على زوجج وبيتج وحياتج الجديده، حاولي تكسبيه وهو اول وتالي راح ينسى ويتغير انتي بت عمه دمه ولحمه ماراح يكسر بيج، بس هسه هو طبيعي كرامته انجرحت بسببج، بس هو يحبج وانتي تدرين شكد يحبج.

مروه: اريد اتصل بمنال، مو تردوني اتسمم اتزوج هاي راح اتصخم واتسمم عساني اتسمم صدوك كون واموت، اريد اعزمها اريدها تجي لان بعد ميخليني اشوفها اذا رحت عدهم ولايخليني احجي وياها.

سكتت امي باستني ومسحت دموعي كلتلي: من يطلعون بعدين انطيج التليفون وخابريها، هي مو هو، اذا تحبين امج لاتحجين وياه ولاتتصلين بي بعد، اذا عرفوا يذبحوج واني اموت وراج اذا سوولج شي بعد مااتحمل اخسر 2 احمد لهسه ماخذ حيلي سوده عليه وانوب انتي شيظل بيه بعد..
حضنت امي وبجيت، بجيت، بجيت، لحدما حسيت بعد ماظل دمع بعيوني.
بعدين رحت لغرفتي واجت امي جابتلي التليفون دكيت على منال.
منال: الو.
مروه: الو منال.

منال: هلووو لج وينج؟ متت من الخوف عليج تليفونج مغلق وعبدالله حالته حاله يوميه يجينه يسألني عليج والله متنه من الخوف كلت بس لا ذبحوج.
هي تحجي واني ابجي.
منال: لاتبجين، احجي فدوه مو متت من الخوف شسوولج احجي؟
حجيتلها إلى صار كله وكتلها الخميس راح اتزوج.
منال: اعترضي، كوي للسيد مااريده، كولي للقاضي جبروني..
مروه: ياريت بالحجي، لج يكتلوه والله يسووها والله بالعناد يسووها ويكتلوه??.
ابجي وهي تبجي.

منال: والحل؟ شنو الحل؟ هيج يعني بكيفهم يقررون وبكيفهم ينفذون؟
مروه: الحل لو اقبل لو هو يموت، شختار برأيج اموته لو اني اموت شتشوفين منو الاسهل؟ منو الانسب اني مو؟ اني اموت واني عايشه احسن ميرحون يضربوه طلقه يخلوني عايشه اتعذب عليه وعلى روحي.
منال: شهالظلم، شهالجبروت، ليش اكو ناس هيج يدمرون حياة غيرهم بس علمود العناد؟ اخوج هذا شنو من بشر؟

مروه: منال، اريدج تجين يوم الخميس اشوفج، وعبدالله كليله يسامحني ويبريني الذمه تعبته وشلعت كلبه..

اختنكت من البجي سكتت شويه ورجعت كتلها: الله شاهد حاولت اتحمل بكل طاقتي، الضرب مو مهم والاهانه والحجي كله يهون، بس هالمره غير لو اقبل لو روحه هو، وهذا فوك طاقتي مااتحمل اشوفهم يأذوه، الموت عندي ارحم والله، واني بالحالتين ميته ميته، من يسووله شي ومن يزوجوني واحد ثاني فخل ينساني احسن، ويعيش حياته اني مو اله ولاقسمته، ومبري الذمه ومراح انساه لو يكطعوني..

اختنكت مره ثانيه بدموعي وسكتت بعدين كتلها: هو اول واخر واحد بكلبي، كليله احبه، والله احبه اكثر من روحي واذا يحبني صدوك بغلاتي عنده بداعتي عليه خل يتركني وينساني وليسوي شي بعد وليحاول خلص انتهى الموضوع..
حتى خطوبه مثل البنات مسوولي ولاكعدت زلم ولانسوان اجو قبل العرس.
بيومها الصبح منال راحت وياي للصالون خلصتها بجي عبالك ماخذيني للموت.

منال: صوجي اني والله كله صوجي اني اخذتج بذاك اليوم للطبيه وعرفتج عليه هسه اني شايله ذنبكم اثنينكم انتي وهو.
مروه: بعد ميفيد الحجي.
منال: اني مكتله اليوم زواجج بس كتله خلص انتهى الموضوع وانخطبت.
مروه: احسن.
منال: يااحسن لج والله اتخبل امه تجي تبجي يم امي عليه تكول لااكل لاشرب وابوه واخوانه لازمي كوه حتى لايروح لاهلج.

مروه: منال كافي بعد لتحجين بي من اسمع اسمه الزم كلبي بيدي عبالك يوكع مني. تدرين شنو احس؟ نفس احساسي من مات احمد نفس الالم نفس الوجع نفس الضياع واحس حياتي انتهت ومالها طعم بعد.
منال: الله يصبر كلبج.
مروه: شيصبره؟ بعدني مشفت شي من القهر هاي البدايه بس. اذا كل يوم اشوف حيدر بخلقتي ووياي بنفس الغرفه شلون يصبر كلبي شيصبره شلون انسى؟

منال: الفلم إلى انطيتينياه المره الفاتت مال الكاميرا طبعته وجبتهم حتى تلتهين بيهم شويه ذكريات الكليه والدوام.
مروه: زين سويتي.
منال: بس صوره وحده اخذتها.
مروه: ياصوره؟
منال: الصوره إلى مصوره بيها وجهج من ضربج فرات اول مره.
سكتت اتحسرت كتلها: ليش اخذتيها؟ قابل اكثر من الضرب والكتل مال اخر مره من اجوا؟ مو اجيتي وشفتيني شلون مشوهه من الضرب؟

منال: مو اني طبعتهم قبل ليجون عبدالله واهله اخر مره وشوفت الصوره لعبدالله لذلك جاب اهله واجوكم اخر مره.
طاحت دموعي كتلها: كافي شلعتي كلبي لتحجين بي بعد خليني اليوم افكر بالموت بلكي الله يستجيب دعائي ويموتني قبل لا ادخل لذاك البيت.
من خلصنه اجوا فرات وزينب وحيدر بالسياره حتى نروح للتصوير.
منال سلمت علي بالصالون حضنتني وحضنتها وظلينه نبجي وسلمت عليها وطلعت مااجت هي ويايه للعرس كالت مااكدر اشوفج هيج.

رحنه للتصوير همه يضحكون فرحانين واني امسح دمعه تجي غيرها.
حيدر مجان فرحان بالعكس جان معصب وماله خلك حتى بالصور كوه يبتسم.
رجعنه للبيت وشويه واجت الزفه اني عبالك خلص رايحه للموت برجليه ابجي وامي تبجي.
صعدنه بسيارته هو يسوق واني يمه كدام وامي وامه كعدوا وره.

امي توصيه عليه هو ولا حجه كلمه ولاعلق بس يهز راسه. وصلنه لبيت عمي ونزلنه عادي جان عرس عادي بالبيت مثل اي عرس وبالليل زفونه لغرفتنه فوك صعدنه ودخلنه.
هو بدل ملابسه ونام واني هم من نام كمت نزعت وغسلت ولبست ملابسي بس مغمضت عيني للصبح الحمدلله مااتدنه يمي ولاحاجاني.
بقينه شهر يمكن على نفس الحال لايحجي وياي ولا اني احجي وياه ابد حتى من يريد شي يطلب من زينب لو امه.

زينب جنت احسها تراقبني اتصور تنقل الاخبار لفرات.
ذاك اليوم بالليل رجع متأخر اني نايمه كعدني.
حيدر: مروه مروه.
كعدت خفت راسأ اجه ابالي امي صارلها شي.
مروه: شكو؟ امي شبيها؟
حيدر: شبيها امج؟ منو جاب طاريها. مابيها شي.
مروه: لعد شكو بهالليل خبلتني؟
حيدر: انتي الخبلتيني.
اتدنه راد يبوسني اني دفعته.

الفصل التالي
جميع الفصول
روايات الكاتب
روايات مشابهة