قصص و روايات - قصص رومانسية :

رواية حكم القلب للكاتبة روز الفياض الفصل الثاني

رواية حكم القلب للكاتبة روز الفياض الفصل الثاني

رواية حكم القلب للكاتبة روز الفياض الفصل الثاني

المهم اخذلنه تكسي ودفع الكروه سلمنه وصعدنه بقوا هم واكفين يباوعلونه.
من اتحركت السياره كالت منال: اكلج مرمر اريد اكولج فد شي.
اني هالحجي جنت افكر بعبدالله شكد حباب ومؤدب بس شلون مخاف من رد فعلي وانطاني الرقم هيج ويكلي اتصلي.
مروه: كولي.
منال: نعمة تكولي جنه عبدالله معجب بيه.
مروه: معجب بمنو انتي لو هي؟
منال: اني.
مروه: وشلون عرفت.
منال: ماادري تكول حاسه واني هم حاسه.

مروه: اممم، واذا اكولج هسه وانتوا تمشون كدامنه انطاني رقمه وكلي اتصلي بيه.
منال: جذابه??.
مروه: والله.
منال: مااصدك عبدالله يتحرش ببنيه وينطيها رقمه??
مروه: ليش مو توه متوقعه معجب بيج؟
منال: اي صح بس اني مشفت منه اي تصرف من هيج نوع بس احنه خمنه تخمين هيج لان كل مره يكلي اخويه انسيه ميستاهلج.
مروه: اي طبيعي يكولج هيج مو تكولين هو خوش ولد وعكس اخوه معناها يعرف اخوه ابو بنات وميفيدج.

منال: وهسه شراح تسوين ليش مكلتيله انتي مو من هالنوع ومراح تتصلين.
مروه: يجوز اتصل.
منال: جذابه انتي مو مال هيج سوالف صديقتي واعرفج جان سويتيها من زماان.
مروه: على كولتج بعدين شنو فرقه عن البقيه حتى اتصل بي اللي يميزه انه هو طبيب فقط ماكو شي ثاني.
منال: وابوه طبيب معروف وناس حالتهم توب وهمه بس ولد ماكو بنات وامهم وابوهم.
مروه: بس تدرين حباب اول مره احس احجي ويه ولد بهيج راحه ماادري ليش.

منال: هو كولش حباب وماعنده سوالف تعبانه بس شكلج عجبتيه.
مروه: شنو الفايده؟
منال: ليش لان سين يعني هاي اني وانتي اني سين وانتي شين وماكو صديقات مثلنه حتى الخوات مو مثلنه.
مروه: شنو سين شنو شين؟
منال: سين سنه وشين شيعه.
مروه: مفكرت هيج اصلا شمدريني هو سني لو شيعي بس انتي تدرين اني ابن عمي يريدني.
منال: وانتي مترديه بعد شنو ليش خايفه مو تكولين بنات خالتج متزوجات سنه.

مروه: اهل امي غير عن اهل ابوي اهل ابوي متعصبين ومو مثل اهل امي عبالك من غير عالم.
منال: الله كريم هسه رحنه وصلنه للزواج وهو توه شفتيه وشافج، بس والله متعجبه من تصرفه هيج يعني شبسرعه رقمج يعني هو الكاركتر ماله مو هيج معناه شكد عجبتيه واتجرأ وطلب منج تتصلين بيه.
مروه: اكيد امي مراح تقبل.
منال: طبعا متقبل خو مناويه تكوليلها اريد اتصل بولد انطاني رقمه.
مروه: تدرين مااعرف اظم شي عن امي.

منال: شدعوه راح تتصلين.
مروه: تصدكين ارتاحيتله وشكلي راح اتخبل واسويها ههههه.
منال: لو اسمعج بأذني مااصدك.
مروه: ههههههه
رجعت للبيت ومحجيت لامي شي بس بقيت افكر بموضوع الاتصال.
معقوله راح اغير قناعاتي واغير تفكيري واتخبل واتصل بي.
العصر محد بالبيت كلهم طلعوا بقيت وحدي كعدت يم التليفون اتصل لا مااتصل اتصل لا مااتصل ظليت محتاره بس اني حسيته مختلف مو مثل الطلاب اللي ويايه.

اخر شي اتشجعت ودكيت الرقم طلعلي ولد سألته عنه كال نص ساعه ويجي.
وره نص ساعه اتصلت نفس الشي طلع نفس الولد كلي مو موجود.
اتصلت بعد شويه طلع هو.
عبدالله: الو.
مروه: الو؟
عبدالله: نعم.
مروه: عبدالله موجود بلا زحمه؟
عبدالله: اي نعم اتفضلي اني عبدالله.
مروه: هلو عبدالله شلونك.
عبدالله: الحمدلله.
مروه: اني مروه.
عبدالله: هلوو. هلو. مروه شلونج؟
مروه: الحمدلله زينه.

عبدالله: اتأخرتي من الظهر لهسه مكابل التليفون ومااخلي احد يشغل الخط.
مروه: جنت متردده اتصل بصراحه ماادري شلون اتجرأت واتصلت وديكت كم مره بس يطلعلي ولد يكول شويه ويجي.
عبدالله: لا مدك عندي هاي الخط اكيد يشمر.
مروه: يجوز.
عبدالله: خفت متتصلين وانضرب بوري ههه.
مروه: هههه خفت اتصل اصلا وماادري تصرفي هذا شنو نتيجته بس اكيد راح اتندم.
عبدالله: ليش؟

مروه: لان بحياتي كلها ممتصله بولد ومو مال هيج سوالف ابد بس ماادري ليش اتصلت.
عبدالله: اعتبريني صديق سوالف عاديه مابيها شي.
مروه: ماكو هيج صداقه ومو متعوده اضم شي على امي.
عبدالله: عادي تحجين لامج كل شي؟
مروه: مااحب اضم شي عنها.
عبدالله: زين خل نتعرف على بعض وبعدين اذا عجبتج صداقتنه كوليلها.
مروه: بعدين شوكت؟ اني هاي اول واخر مره اتصل.

عبدالله: ليش؟ اني اتمنى تتصلين بعد حسيت ارتاحيتلج اليوم من شفتج وحجينه عبالك اعرفج من زماان وخصوصا نفس الاراء والافكار عدنه.
بقينه شويه نحجي بعدين اترخصت وسلمت عليه وسديت التليفون بس جنت فرحانه ماادري ليش رغم الحجي جان عادي وماكو اي شي خاص.
ثاني يوم حجيت لمنال من داومنه مصدكت من كتلها اتصلت بي.
منال: لو تحلفين مااصدكج.
مروه: والله اتصلت بي.
منال: ??????.

مروه: لتباوعين هيج اتخبلت واتصلت وتدرين فد شي ماادري ليش ضميري ميأنبني لان اتصلت ولا مستحيه من نفسي.
منال: لا مااصدك مو معقول شنو هذا حب من اول نظره انتي وهو صرت مااعرفكم.
مروه: خوش ولد حباب.
منال: اي بس نفسه إلى كلتي عنه عادي الشي الوحيد إلى يميزه بس كونه طبيب.
مروه: اي فعلا.
منال: ??????.

مرت الايام اني بعد مااتصلت بعبدالله لحدما فد يوم اني ومنال الصبح عدنه اول محاضره واكفين بالكافتيريا يم القسم وشفنه عبدالله جاي باتجاهنه.
عبدالله: صباح الخير.
اني ومروه: صباح الخير??.
وكف وسلم وبقى واكف يسولف كال جاي ويه اصدقائه يسألون على بنيه بقسمنه.
قرب وقت المحاضره ومنال كالت: اني اروح ادخل للمحاضره لان عندي تنبيه مااكدر ماادخل.
عبدالله: زين معناها مروه تبقى وياي اريد احجي وياها.
مروه: ??.

عبدالله: نتمشى شويه؟
استحيت امشي وياه كدام الطلاب كلهم يعرفوني مو مال علاقات ومشي وهالسوالف بس استحيت ارفض.
مشينه شويه ابتعدنه عن القسم.
عبدالله: مروه انتي مرتبطه؟
مروه: شلون يعني مرتبطه؟
عبدالله: يعني اكو بحياتج احد؟
مروه: لا لتشوفني حجيت وياك تره جبانه مو مال هيج سوالف بس ماادري ليش وياك اتصرف عادي بدون خوف وتفكير.

عبدالله: اني نفس الشي ههه اول مره انطي رقم لبنيه واكعد انتظرها تتصل وهسه اول مره اروح لغير كليه حتى اشوف بنيه.
سكتت واستحيت معناها جاي علمودي حسيت بالاطراء وعرفت معنى كلامه وجنت حاسه نفسي اعرفه مع العلم المفروض بعدني مااعرفه.
ظلينه نتمشى ونحجي هو يحجي عن شخصيته واني عن شخصيتي لحدما طار الوقت محسينه بي بقينه نتمشى وراها راح وطلب مني اتصل.

الفصل التالي
جميع الفصول
روايات الكاتب
روايات مشابهة