رواية حكم القلب للكاتبة روز الفياض الفصل الثاني عشر
حيدر: شوكت النتائج مالتكم؟
مروه: ماادري.
حيدر: واحنه شوكت نتيجتنه؟
مروه: يانتيجه؟
حيدر: نتزوج..
مروه: شنتزوج؟، مو حجينه المره الفاتت وكلتك انت مثل اخوي.
حيدر: اكلج انتي تحجين صدوك لو تردين ترفعين ضغطي؟
مروه: لا صدوك، ليش اريد ارفع ضغطك.
حيدر: انتي بعدج زغيره متعرفين تحكمين وتقررين.
مروه: مادام تشوفني زغيره شجابرك علي؟، انت مو تعرف بنات كومه مامعقوله ماكو وحده بيهم تارسه عينك؟
حيدر: صحيح اعرف بنات بس مو مال اتزوج وحده بيهم، بعدين اني كتلج احبج مو بكيفي اعرف بنات صح واعرف احلى منج بعد بس مو بكيفي مو بيدي احبج انتي، متعود عليج وعندي كل البنات اللي اعرفهم ميجيبون ظفرج.
استغفرالله العلي العظيم ياربي حرام اللي يصير بيه وبيهم حرام ربي انت عدل ماترضى بالظلم مااريد انظلم ومااريد اظلم احد بيهم.
كل دقيقه يدك تليفونه ويكطعه ويدك ويكطعه.
مروه: رد عليها رد، ليش مستحي مني.
حيدر: ختولي مو فارغلها هسه ههههه.
مروه: شوكت تفرغلها لعد بالليل؟
حيدر: انتي الج الصافي، مالج علاقه بالليل بالنهار.
مروه: لا بالله؟، ليكون عبالك ابن عمي معناها لازم اتزوجك واتحمل خرابيطك؟
حيدر: ها، ها، بدينه بالحجي المو زين؟
مروه: لازين ولا مو زين، اني اذا ردت اتزوج راح اتزوج واحد اني اول بنيه بحياته مو يعرف 20 وحده واني بس اسمي زوجه ومركونه عالرف للكشخه.
حيدر: وين اكو هيج واحد ميعرف بنات وميباوع ومدري شنو؟
مروه: ماكلت ميباوع كلت ميعرف بنات واكو ليش ماكو.
حيدر: المطلوب هسه شنو؟ مااحجي ويه بنات خلص يابه بطلنه بعد.
مروه: ميفيد الحجي، وياك انت مترهملي.
حيدر: ليش بالله ماارهملج يابه؟
مروه: منين تحبني ومنين مصاحب 50 وحده؟، وتحجي وياهم وجماله ماكل راسي عالخطوبه والزواج؟
حيدر: اي احنه خل ننخطب بالاول، ولعنه على روح امه وابوه اليحجي ويه البنات بعد، مراوي كافي تره صدوك احجي تره محد سواها قبلي وانتظر هلكد يوميه تعبر عليه اشكال البنات واكو بيهم همه والله يركضون ورايه إلى تكتبلي الرقم والي تتصل والي تنتظرني يم السياره بس اني مااريد ولا وحده، اريدج انتي احبج، افتهمي مو بيدي احبج.
بقيت ساكته ماعندي رد وحجي اكثر من إلى حجيته قبل..
حيدر: تدرين اربع سنوات انتي بالكليه اني متأكد اكو شباب جانوا معجبين بيج واكو شباب صارحوج واكو شباب خطبوج ومتحمل كل هذا وضاغط على اعصابي واكول ميخالف خل تكمل رغم واحد ثاني بمكاني والله ميخليج تدخلين كليه اصلا يكعدج بالبيت.
درت عليه بعصبيه..
مروه: شنو هالخرابيط؟ جنك زودتها شويه؟ ابن عمي على عيني وعلى راسي بس شنو خليتني اكمل مدري شنو؟ تره ابوي موجود واخواني موجودين ومسؤوله منهم عندي ولي امر يعني مو انت اللي تقرر اكمل لو مااكمل.
حيدر: كان بأمكاني من اول سنه اخبطج رسمي وابطلج ومحد يكدر يحجي هذا قصدي.
مروه: اذا انت كان بأمكانك بس ماسويت فاني هسه بأمكاني اقبل باي واحد ثاني واكول اريده ومحد يكدر يحجي.
حيدر: سويها وشوفي شلون محد يكدر يحجي.
مروه: شتسوي بالله؟
حيدر: خليها ابالج مروه، متصيرين لغيري لو تموتين وتشبعين موت.
مروه: ادري يعني هي الشغله بالكوه؟
حيدر: اي بالكوه زين.
مروه: كافي عفيه لتحجي شي بعد وتخليني اكرهك.
حيدر: مو بكيفج، تحبيني غصبن ماعليج.
سكتت مااريد اسوي مشكله اندم عليها بعدين ولو هو يدوس بالبطن بس المشكله من يعصب يصير مثل فرات يطلع الوجه الثاني.
وصلنه للبيت نزلت اني وهو قفل السياره ونزل لاكاني فرات سلمت بعصبيه.
فرات: شبيج؟
مروه: شبيه بعد ابن عمك حبيبك اجاني كدام الطلاب واحرجني والا يوصلني وانوب يدوس ابطني بكلامه.
دخل هو اني رحت للغرفه.
اسمعه يحجي هو وفرات ويشتكيله.
حيدر: يااخي شسويلها، هي بارده، فد مره ماعدها احساس..
فرات: ثول، اي والله ثول، عود هاي انت ابو بنات ومتعرف تحجي وياها بعد شكولك وشحاجيك دفوت فوت خل نتغدا كتلنه الجوع.
دخلوا رحت غسلت وكلت لامي: راح انام لحد يصيحني عالغدا.
امي: ليش مجوعانه؟ علمودج مسويه تمن باكلا وكليت سمج وياه..
مروه: العصر اكل، هسه انسدت نفسي من وره ابن حماج حسبي الله عليه.
امي: لاتحسبين عالولد، انتي إلى دايسه ابطنه وين تلكين واحد هلكد يتحملج؟
رحت لغرفتي وسديت الباب طلعت التليفون ودزيت مسج لعبدالله: اليوم اخر يوم ومشفتك ليش مااجيت حتى لو من بعيد؟
ماجاوب وره شويه دز مسج: اتمنيت اجي بس خفت احد يشوفنه وتصيرلج مشكله، مو كل مره تفوت سلامات من ترحون للنتائج اجي ان شاءالله..
وره اسبوعين تقريبا يوم جمعه جان كعدت الصبح عبدالله دزلي مسج.
عبدالله: صباح الخير حياتي شلونج؟ مشتاقلج، اليوم بالليل نجي اني والوالد وعمي واخواني حتى نحجي ويه ابوج واخوانج اريدج تدعين من كل كلبج يوافقون.
مروه: يمه، شهالرعب من الصبح عبدالله؟
عبدالله: الناس تكول صباح النور اول وبعدين تبجي وتولول هههه شبيج خايفه خو منبقى هيج خالين ايدنه على خدنه وكاعدين غير لازم نحاول حتى نطلع بنتيجه.
مروه: والله صار عندي مغص من الخوف الله يستر وتعدي وتنتهي على خير يارب.
عبدالله: الله كريم بالنهايه كل شي قسمه ونصيب.
مروه: يعني شنو؟
عبدالله: يعني انتي نصيبي وقسمتي.
مروه: عبالي.
عبدالله: ههههه خفتي لج شلون اعوفج من كل عقلج اكدر اعوفج.
مروه: واذا موافقوا؟
عبدالله: تفاءلوا بالخير تجدوه.
مروه: حتى لو عندي شوية تفاؤل طار هسه من الخوف.
عبدالله: مراوي؟ احبج فوك متتصورين.
مروه: يعني شكد؟
عبدالله: شكد تتصورين؟
مروه: ماادري شكد؟
عبدالله: بكد عمري وحياتي وكلبي.
مروه: عبدالله، اذا هالمره ماصارت وردت تنسحب ماازعل تره اعرف تحبني بس مابيدك ولابيدي شي نسويه بس لاتنساني لان اكيد اني مستحيل مستحيل انساك.
عبدالله: كتلج انتي قسمتي ونصيبي، لتفكرين بغير شي بعد انتي إلى وبس.
بيومها بقيت الوب افتر بالبيت ماادري شسوي من الخوف حاولت اتصرف طبيعي حتى ميبين عليه اعرف شي لدرجة كلت لفرات: خل نروح لبيت عمي ضوجه واريد اشوف زينب.
طبعا هو كيف واتونس يريد يشوف زينب وعباله اني رايحه حتى اشوف حيدر.
رحنه وصلنه كلهم موجودين بس حيدر طالع الحمدلله كعدنه تقريبا للمغرب بالكوه فرات قبل يكوم يريد يبقى كاعد.
بطلعتنه اجه حيدر: هاي وين؟ زشوكت اجيتوا؟ شعجب بينتوا؟
الكلام طبعا واضح للكل موجه إلى اني ساكته ومغلسه.
فرات: من العصر اجينه بس انت طالع شنسويلك؟
حيدر: ماادري بيكم شمدريني، لو ادري جان اجيت من وكت قابل اشم ايدي.
فرات: يالله عالجايات ضاعت عليك اليوم هههه.
حيدر: لا لا، كعدوا بعد وكت، ابقوا بالليل اني اوصلكم وره العشا.
فرات: لا بعد امي مناك بحدها خطيه، واحنه هم ضجنه وتعبنه من الانتظار وانت ماكو.
حيدر: ادري جان اتصلت وكلت اني جاي جان ماطلعت والله. هسه دكعدوا شويه بعد شدعوه عليكم ساعه بس ساعه وروحوا.
فرات: يالله عمي نكعد امرنه لله، بس ساعه مو اكثر؟
كعدنه كلها تسولف وتضحك حيدر كاعد كبالي اني مغلسه ولا جني اشوفه احس بي يباوعلي.
وره تقريبا ساعه كمنه حتى نروح راد يوصلنه هو بس فرات مقبل لان دنيا ليل ومو امان اخذنه تكسي ورجعنه.
نزلنه من التكسي ووكفت سياره يمنه باوعت شفت عبدالله نزل ووياه اهله، شافني هو ودنك اني دخلت بسرعه للبيت كلبي احسه من الخوف يمكن دكاته عبرت المستوى الطبيعي ظليت ارجف من الخوف.
اسمع صوتهم دخلوا اجت امي.
امي: منو اجه؟
مروه: ماادري من نزلنه من التكسي وكفت سياره نزلوا منها رياجيل ماشفتهم دخلت بس فرات جان واكف.
امي: خير ان شاءالله؟
طلع حسين كال سووا جاي بسرعه.
اني بدلت ملابسي ورحت يم امي سويت نفسي اساعدها بصوره طبيعيه.