رواية حكم القلب للكاتبة روز الفياض الفصل الثالث عشر
يحجون ويسولفون بس مو واضح الحجي مره صوتهم عالي مره صوتهم ناصي مره يضحكون مره يسكتون واني كلبي على يادقيقه يوكف من الرعب.
اجه حسين اخذ الجاي كلتله امي: منو اجه؟
حسين: خطابه على بتج.
امي باوعتلي اني ساكته ووجهي ينطي الوان..
امي: منو يعني؟
حسين: الدكتور.
امي: امم، يالله اخذ الجاي وروح.
سويت نفسي متعجبه ومستغربه..
امي: هاي الكعده ناقصه اخوج احمد سوده عليه، جان هسه كاعد وياهم ويحجي لو موجود جان قنع ابوج واخوج وفضت السالفه سلامات.
طاحت دموعي اتذكرت حجيه من كلي احجي بس اذا تجذبين راح تخسرين وكفتي وياج، حبيب كلبي والله فدووه رحتلك شكد محتاجه وجودك وياي.
بقوا تقريبا ساعتين وبعدين طلعوا.
اني يم امي بالمطبخ واجه فرات لزمني من شعري: شوفي لج، اني ساكت لهسه لخاطر امي مريضه اذا مرة اللخ اجه هذا مااحجي حجي وياج بعد، ورب الكعبه ابهذل احوالج عبالج اني ماافتهم مااعرف تعرفيه ويعرفج لو يظل اخر واحد بالدنيا مااقبل بي سمعتيني عدل؟ لو تموتين غير ابن عمج ماكو.
مروه: مااريد ابن عمي، مااريده لو تموتني مااريده..
ابجي واحجي ولازمه ايده يجر بشعري.
ابوي كاعد بالديوانيه ويصيح على فرات وامي لازمه فرات خاف يضربني وحسين واكف هم.
فرات: انجبي واسكتي لااشك حلكج ادبسز متريده رادتج ريده وحما الشديده، كلبه، طايحت الحظ هذا الغريب احسن من ابن عمج؟ شعجبج بي بس فهميني؟
مروه: عوفني، مالك علاقه بيه عوفني، مااريده هي كوه انت علمود مرتك ذابح نفسك خاف تزعل هي واهلها.
ظربني كف خله حلكي يصب دم وامي ظلت تصرخ وحسين يريد يفتح ايده من شعري ماكو.
عبدالله: وربي، وربي، اذبج للجلاب وماانطيجياه وشوفي، جايبتلي واحد سني ليش شبي ابن عمج شناقصه من مذهبج ومشتريج وماناقصه شي.
مروه: ذبني للجلاب، بس حيدر مااريده الجلاب ارحم منك.
ضربني كف ثاني وامي تصرخ: اسكتي، لج اسكتي لتحجين.
مروه: احجي، والله احجي، شتريدون تسوون سووا، وينه احمد، وين رحت وعفتني، بس هو اخوي بس هو انتو جلاب.
فرات: بس هو اخوج ها؟ خوش اخوج راح ظليت اني واني الا اربيج من جديد واطلع الدلال من خشمج الا اكص لسانج هذا وكولي كال، طلعه من البيت بعد ماكو، تلفون ماكو، من غرفتج طلعه هم ماكو، مو بس من البيت اذا اشوفج مديتي راسج اكصه.
امي: عوفها، لك عوفها موتتها.
فرات: وين عرفتيه؟ كليلي وين عرفتيه؟ وشعنده مجلب بيج لازك؟
مروه: مثل ماانت لزكت بزينب آآآآخ.
يجرني من شعري وكل دقيقه يضربني كف وجهي احسه خدر من الضرب.
اخر شي طلع ابوي عبالك جان نايم، يسمع وكاعد جوه ولاعبالك.
ابوي: كافي، عوفها كافي.
فرات: خليها، خليها تتربى، اليوم اربيها من اول وجديد انتو الخربتوها.
امي: عوفها كافي.
ميقبل يعوف شعري لدرجة دخت ماظليت اشوف اخر شي حسين دفعه حيل يالله تركني.
بس تركني كعدت بالكاع رجليه متشيلني بعد دخت ومااشوف شي..
امي كعدت يمي تبجي وخلت راسي بحضنها اني مغمضه عيوني لان دايخه بس دموعي مثل المطر.
حسين واكف يدفع بي حتى لايرجع يضربني شويه ورجع سحبني من شعري من المطبخ لغرفتي اني اصرخ وامي تصرخ وحسين خطيه يدفع بي يريده يعوفني.
دخلني للغرفه وسد الباب وطلع.
فرات: والله اليفتحلها الباب ياويله وياسواد ليله.
حسين: دعوفها ياخويه دعوفها.
امي: الله يشلع كلبك يافرات على كدما شلعت كلبي، الله يشلع كلبك.
بقيت للصبح ابجي وامي خطيه كل شويه تجي تشوفني تخاف خاف اسوي بروحي شي.
وجهي كله دم من خشمي وحلكي وصار كل آثار ضرب زركه على خدودي وعيوني.
دورت النقال بسكوت خليته صامت ودزيت مسج لعبدالله: لاتدز اي شي بعد على هذا الرقم ولاتجي ولاتتصل اني من اكدر راح اتواصل وياك.
عبدالله: شصار؟ فرات حجه وياج شي اذاج ضربج كولي شصار؟
مروه: مااكدر احجي بعد راح ياخذ النقال اني اشوف فرصه بعدين واتصل بيك مع السلامه.
عبدالله: حبيبتي اتحملي لخاطري ماانتهى الموضوع مو بكيفهم، يالله روحي مع السلامه.
مسحت الرقم والمسجات وصدوك بس كعد الصبح دخل اخذ الموبايل من جنطتي وطلع..
الصبح باوعت لوجهي بالمرايه وجهي كل مورم وازرك دورت الكاميرا صورت وجهي حتى ماانسى إلى سواه بيه حقدت عليه حقد.
بقيت على هالوضع تقريبا اسبوعين من يكون فرات موجود هو او ابوي ابقى بغرفتي مااطلع لان حتى ابوي كرهته.
ومن يطلعون اطلع من الغرفه اسبح واتحرك بالبيت واساعد امي.
محد يعرف من اهلنه باللي صار اكيد لان لو حيدر يعرف ثاني يوم يكول نخطب.
ذاك اليوم اني نايمه العصر واجت امي كعدتني.
امي: مروه، مروه، يمه كومي اجتج منال.
كعدت ورتبت شكلي شويه وكتلها: جيبيها هنا خل تجي.
اجت منال بس شافتني اجت شبكتني اني بجيت وشبكتها.
منال: حبيبتي، هاي شصاير بيج متغيره وضعفانه ووجهج اصفر شصار كليلي؟
كعدت يمي عالجربايه اني اسولفلها وابجي وهي هم تبجي وياي.
منال: والله اني عرفت بدون ميكلي عبدالله، حسيت بس كلت اسأله واتأكد من سألته كال رحنه اني وابوي واخواني واهلي خطبناها هالمره من ابوها واخوانها ومقبل اخوها، وطبعا اخذوا منها التليفون واخاف سوولها شي، كتله اني اروح واشوف شصار..
خطيه والله هو هم تعبان لان اهله هم يضغطون عليه بس يكول ماافقد الامل راح احاول بعد بس كليلها لخاطري خل تتحمل اني مااعوفها.
بجيت حيل كتلها: ليش يصير بيه هيج؟ ليش احمد راح وبقى فرات؟
منال: استغفرالله حبيبتي، هذا امر ربج استهدي بالرحمن.
مروه: اني لخاطره انتظر العمر كله، بس هم ماراح يقبلون هذا فرات حقير هسه صارت شغلة عناد مادام عرف اني اعرفه وعندي علاقه بي لو اموت كدامه ميوافق.
منال: ربج قادر على كل شي ان شاءالله يهديه ويحنن كلبه عليج.
مروه: ماشفتي شسوه بيه حتى صورت وجهي صوره بالكاميرا حتى ابقى اتذكر إلى سواه بيه.
منال: لاحبي لتكولين هيج انسي حبيبتي انسي حتى تكدرين تقاومين.
مروه: بالعكس اني اريد اتذكر حتى اكدر اصبر واتحمل.
بقت منال يمي ساعتين وبعدين راحت بس انطيتها الكاميرا حتى تطبع الصور مال اخر يوم بالكليه ومال التخرج وكتلها تكل لعبدالله: شوكت ماحس ميكدر يكمل بعد معذور ماازعل منه ومبري الذمه، وشكد مايصبر ويتحمل اني وياه.
حتى للنتائج خفت اكول اريد اروح استلمها منال راحت استلمتها عني نجحنه..