رواية حكم القلب للكاتبة روز الفياض الفصل الثالث والعشرون
رجعت التليفون هو ساكت كتله: هالكلمه لهالحظه تخليني افكر، اني فعلا نكسه من اتذكرها تلعب نفسي من نفسي..
عاد هنا اني بجيت حيل وسمعني هو كلي: لاتبجين انتي مو نكسه، اني نكس، اني المو آدمي واني كل إلى كلته اروحلج فدوه.
حنين تبجي حاضنتني كتلها: لتبجين مابيه شي.
رجعت بجيت من اتذكر عبالك البارحه صار عبالك اليوم نفس الالم نفس المعاناة.
سديت التليفون وكعدت امسح دموعي اريد اصبر نفسي حتى ماابجي اريد النار البكلبي تبرد بس ماكو فايده.
حنين: ابجي عمري ابجي لاتستحين.
عبالك جنت منتظره احد يكلي ابجي بجيت وبصوت عالي هو دك دك كذا مره بس ماجاوبته.
ظل الليل كله يتصل ماجاوبته، دزلي مسج: فدوه اروحلج ردي.
ماجاوبته..
اندك باب الغرفه فتحته حنين اجت بسمه شافتني عيوني مبينه باجيه وحنين هم.
بسمه: نومت امي واجيتكم، شبيكم ليش تبجون؟
حنين: ماكو شي هي وحيدر.
بسمه: اتعاركتوا؟ توكم اليوم حجيتوا سوه واتشاوفتوا شبسرعه لحكتوا اتعاركتوا؟ شصار؟
حنين اشرتلها سكتي.
رجع دز مسج: جاوبي ماراح اسألج بعد عن اي شي.
هم ماجاوبته مااشتهي احجي وياه هسه..
حنين: جاوبيه خطيه.
مروه: مااكدر.
حنين: ردي عليه بمسج.
ظل كل شويه يتصل..
بسمه جاوبته: الو
حيدر: الو؟ مروه.
بسمه: الو هلو حيدر اني بسمه. مروه متكدر تحجي هسه بس ترتاح ترجع تتصل بيك.
حيدر: اوك.
سدته بسمه دزلي مسج: آسف حبيبتي.
خلص مانحجي بهالموضوع بعد بس لاتبجين..
لاتتصورين الموضوع بس عليج صعب يمكن اني اصعب منج من اعرف كل إلى صارلج بسببي ومااكدر اسوي شي حتى تنسين..
من اسمعج تبجين ومااكدر اسويلج شي ومن اعرف بكل إلى شفتيه ومريتي بي وهم مااكدر اسويلج شي حتى تنسين، وفكرة شخص ثاني يخلي ايده عليج خبلتني..
من سمعت فرات كال هيج شي اتخبلت.
تتخيلين شنو من عذاب؟
فكرت يمكن لهالسبب متريدني.
شنو من افكار مرت بعقلي؟
حسيت نفسي واحد غبي لان ضيعت عمري منتظرج شنو من، وسكت يمكن خلص رصيده.
نمت خليت التليفون صامت الصبح نزلنه حتى نطلع للشلالات اتريكنه ورحنه اني مالي خلك وبس صعدنه هذا السايق خله الاغاني الحزينه نفسها خليت السماعه بأذني مالي خلك ابجي فتحت التليفون لكيت 12 مسج من حيدر.
بالبدايه فكرت مااجاوبه بس استحيت اغلس هو ديحاول يعتذر مااكدر افشله دزيتله مسج: صباح الخير. احنه اليوم رايحين للشلالات. والبارحه نمت تعبانه، هسه شفت المسجات.
ماجاوب اكيد نايم لو راح يخلص شغله.
حلو جان المكان يجنن سبحان الله الطبيعه تخبل المي ينزل من الجبل عبالك جان بالثلاجه بااارد اتونست والتهيت ونسيت للظهر دزلي مسج: صباح النور.
جنت نايم البارحه خلستيني، شنو اسمه فندقكم؟ وسلميلي عالشلالات..
ضحكت كتبتله: همه هم يسلمون عليك، احنه بفندق الجواهري.
رجعنه المغرب بالطريق اتصل.
مروه: الو؟
حيدر: الو هلوو.
مروه: هلو.
حيدر: شبيج؟
مروه: مابيه شي بس نعسانه الطريق طويل.
حيدر: اخ ياربي شلون بيج؟
مروه: شبيه؟
حيدر: من شفتج وشفتيني بس اريد احجي وياج تطلعين عذر.
مروه: هههه يعني ماانعس، احجي يابه براحتك ماراح اعترض لو اطلع عذر.
حيدر: شحجي كل الحجي تعرفيه، احبج مو جديده.
مروه: ههه انت المفروض هسه كبرت وعقلت وراسك انترس شيب وبعدك على حجيك وسوالفك.
حيدر: شعقلت انتي وراج عقل..
وشبي حجيي لان اكول احبج، قابل مجذب صارلي سنين اعيد وازيد بيها وانتي إذن من طين وإذن من عجين.
مروه: اريد اكول شي بس اخاف تضوج؟
حيدر: كولي اي شي بس احجي مااضوج.
مروه: ليش مترجع ساره؟
حيدر: خررب يومج، انتي شنو؟ شنو من قابليه عندج حتى ترفعين ضغطي؟
مروه: اصبر بس اصبر شويه، خل اكمل حجيي وبعدين ضوج وعصب.
حيدر: احجي، شتحجين بعد؟
مروه: موهي متريد الطفل، حرام شنو ذنبه يعني هذا بشر مو لعبه شلون يطاوعك كلبك يبقى بدون ام؟ اول وتالي هي راح تفكر تتزوج.
حيدر: روحي، خلص، مااريد احجي بعد.
مروه: اي ليش؟ يعني شنو الموضوع مو مهم؟ احنه نتناقش هسه.
حيدر: شنتناقش انتي عاقله؟ مستوعبه شتحجين؟ اني مطلك البنيه من وراج وانتي تردين ارجعها، روحي فورتي دمي مااكدر احجي بعد. مع السلامه.
مروه: مع السلامه.
وصلنه بالليل للفندق جنت تعباانه من الطريق بس وصلت غسلت وبدلت و رحت نمت.
ب12 دك التليفون حيدر: الو؟
مروه: الو??.
حيدر: لج مااكدر ارجعها هي تعرف كولش زين اني احبج..
والطفل اتفقنه يبقى عدها فتره وبعدين الله كريم.
مروه: امم.
حيدر: شنو امم؟ انتي نايمه؟
مروه: جنت بس انت كعدتني. وبعدين؟
حيدر: بعدين، اريد احاول من جديد وياج بلكي الله يهديج وتحبيني.
مروه: هههه، ههههه، والله انت مو صاحي.
حيدر: ليش؟ لان اركض وراج واتوسل بيج لو مملكيج وجه جان حبيتيني.
مروه: هههه انت مامليت متعبت من هالموضوع؟
حيدر: ياريت امل واتعب. ياريت. حتى اتزوج واستقر تعبت إلى بكدي جهاله بالمدارس..
كلهم اصدقائي اتزوجوا من قديم الزمان والبارحه من شافوج وسمعونه نحجي كالوا عمي احنه نروح نحجي وياها ونقنعها..
مروه: ماادري حيدر، ماادري، الله كريم الموضوع مو سهل مااريد استعجل.
حيدر: لج بت الاوادم اكولها شيبت عجزت يمكن اذا اتزوج ثاني يوم اموت.
مروه: هههه اسم الله عليك، لعد المن تريد تورطني.
حيدر: مااموت لحد مانتزوج يالله عيني تظل وراج هههه، مروه، احبج، حسي عاد تعبتيني.
ثاني يوم اجه للفندق وحجينه وسولفنه وحجت خاله وياه.
خلصت اجازتنه ورجعت للدوام.
وره فتره سمعت من منال انه عبدالله مسافر لاستراليا ماحسيت بشي. لان من زمااان انكطعت اخباره.
ادري اهله مقبلوا يرجع يخطبني من جديد وعاذرته لان استسلم..
اكو شي اكبر مني ومنه. واقوى مني منه. اسمه عادات وتقاليد مجتمع واهل..
زينب جابت بنيه سموها نوره يافرحتنه بيها جنت ارجع من الدوام طيران علمود العب وياها لان بس يرجع فرات ياخذها ويصعد.
لهسه مااحجي وياه ساعات اتمنى احجي وياه بس كرامتي متسمحلي الوحيد إلى مابرر موقفه ولادافع عن نفسه ولاحتى حاول يعتذر.
حيدر جان مرات يجي بحجة يشوف نوره، بس ادري بي يجي علمودي علمود يشوفني.
بقينه نتواصل بالتليفون تواصل عادي والكل ملاحظ انه اكو تقارب بينه بس محد يحجي كلهم يخافون يفتحون الموضوع.
ساره جابت وبقى الولد عدها سماه حيدر (أحمد) على اسم اخوي احمد الله يرحمه.
بعد مرور اكثر من تلث سنوات.
اليوم خطوبة حسين بنادي الاطباء جان بس هو بي قاعه للمناسبات بذاك الوقت.
رحنه اني وزينب للصالون لبست بدله اوف وايت وسويت شعري كيرلي ومكياج وردي.
بيومها ركصنه واتونسنه مرت عمي كالت: المفروض تركصين لحسين مثلما ركصتي لفرات.
زينب: ايييي اي عفيه ركصي.
راحت للدي جي كلتلهم نريد اغنية ام كلثوم سيرة الحب، وركصت جنت فرحان لحسين مثل فرات ويمكن اكثر.
زينب: كافي عمي ليحسدوج، كلها صافنه عليج اليوم بدعتي هم شكل وهم ركص وهم شعر..
كون نوره تطلع عليج اشو لهسه كرعه ههههه.
مروه: هههه فدووه للكرعه، تطلع احلى بعد بس صبريلها تكبر شويه وشوفي الجمال هاي حبيبة عمتها.
بالليل رجعنه للبيت وبقينه اني وزينب ناخذ صور بالموبايل وبالكاميرا مره اني مره هي مره نوره كل شويه نخليلها حمره ونصورها متعجبين بيها..
جنه كاعدين بالديوانيه ومحد من الولد موجود بس فرات فوك. وحسين ويه خطيبته وابوي وعمي ماادري وين امي بغرفتها ويمها مرت عمي وخالتي يسولفون.
حيدر: سلام.
كمزنه زينب صرخت واني حضنت نوره.
هو ظل يضحك.
زينب: شوكت اجيت ماسمعنه صوتك من دخلت خوفتنه.
اني سحبت شال زينب وغطيت نفسي بي لان فستاني مصلخ.
حيدر: مروه شلونج؟
مروه: الحمدلله.
ظل يباوعلي استحيت.
مروه: اتفضل ليش واكف، اني من رخصتكم اروح ابدل ملابسي.
رحت بدلت وسمعت صوت ابوي وعمي اجو وفرات نزل، كلهم بالديوانيه يحجون ويضحكون طلعت سلمت على عمي وكعدت.
حيدر كاعد يسولف ويه فرات بس كل شويه يباوعلي وزينب راحت تبدل وخلت نوره يمي.
عمي: مروه بابا شلونج؟
مروه: زينه عمو الحمدلله.
عمي: باباتي انتي بنيتي مثل زنوبه وبمعزتها. احنه منريد نفتح دفاتر قديمه ونريد ننساها. بس المشكله هالولد كبر ونريد نفرح بي بس لو انتي لو ميريد لو هالمركب لوما اركب شنسويله، شتكولين بالله؟
اتفاجأت واستحيت كلهم كاعدين متت من المستحه راسأ باوعت لحيدر حتى هو شكله اتفاجأ مامتوقع الحجي اللي كاله عمي..
ظل يباوعلي منتظر مني جواب دنكت حسيت بالاحراج صار هدوء كلها سكتت.
اجه فرات كعد يمي وخله ايده على جتفي وباس راسي كلي: هالمره محد يجبرج انتي بكيفج وشتكولين احنه موافقين.
طاحت دمعتي بقيت مدنكه حضني وبس حضني بجيت شكد جنت مشتاقتله (3) سنوات واكثر مرت على اللي صار ولحد الان مااحجي وياه (3)سنوات جنت حاقده عليه وشايله بكلبي حقد اسود تجاهه.
فرات: لج احجي كطعتي كلبنه؟ ترديه لو نطرده؟
هزيت راسي اي موافقه صرت افكر مثل تفكيرهم، اللي اعرفه احسن من اللي مااعرفه..
وابن عمي احسن من الغريب..
جان لازم استوعب من البدايه واستسلم لواقعي..
واني يمكن هم قسيت على حيدر وماحاولت احبه وانطيه مجال وفرصه..
مو مهم بعد هسه احبه لو مااحبه المهم استمر بحياتي واعيش واخلي الماضي وره ظهري.
فرات: يعني شنو نطرده؟
هزيت راسي لا.
ضحكوا كلهم رجع حضني ظليت مدنكه استحي ارفع راسي ادري بحيدر يباوعلي.
عمي: معناها نقرا الفاتحه.
قرينه الفاتحه ومرت عمي ظلت تهلهل وخالتي تهلهل نزلت زينب مستغربه: شبيكم شعدكم تهلهلون بهالليل؟
مرت عمي: خطبنه لاخوج.
زينب: يا اخوي منو اخوي؟ شوكت؟
فرات: شوف الذكاااء، كم اخ انتي عندج هو بس هذا هههه.
زينب: اي وشلون؟ ومنو؟ وشوكت؟
عمي: خطبناله إلى يريدها بعد منو.
سكتت هي بعدين التفتت عليه باوعتلي كالت: جذذذذب????؟
ضحكنه بعدين اجت باركتلي وراحت باركت لحيدر.
حيدر طول الوقت ساكت لحدما فرات كله: ياابه انت اشو ساكت اخاف هالمره انت إلى مقابل هههه جنت خابصنه وماكل راسنه احبها واحبها هسه من صارت صدوك اخرسيت هههه.
حيدر: غير الواحد من يخطب يكون مستحي هسه اني دامثل دور المستحي لان ابوي وعمي كاعدين هم خل يكومون وشوف شلون احرك الجو اليوم.
خربنه من الضحك بعدين فرات كله: تره هالمره نريد كعدة زلم مو عبالك مثل ذيج المره.
حيدر: اي بس باجر كون مو اكثر.
فرات: ههههههه خرب يومك شنو تريد حجه.
اجه حسين كله فرات: بهاليومين خطوبة اختك وكعدة الزلم حتى تحضر نفسك.
حسين: يااختي؟
ضحكنه كولنه لان مثل رد فعل زينب.
فرح من حجاله فرات بارك لحيدر: ارتاحيت هسه؟ بس اذا اتزوجتوا لتجون هنا بعد عالاقل فد سنه حتى نرتاح منكم ومن دوختكم.
حيدر: يابه احنه بس خل نتزوج بعد لا اعرفكم ولاتعرفوني حتى اختكم انسوها.
بعدين باركلي وباسني كلي: هالمره كون بأرادتج؟
هزيت راسي اي..