رواية حكم القلب للكاتبة روز الفياض الفصل الأول
مافد يوم حسيت احد من اخواني يراقبني او سأل عني بالكليه والحمدلله ماعندي شي اخاف منه.
بيوم من الايام منال كالت: اريد اروح للطبيه ترحين وياي؟
مروه: ياطبيه؟ شعندج؟
منال: اريد اروح اشوف صديقتي عندي شغله وياها.
مروه: ياصديقه اشو محاجيتلي عنها؟
منال: صديقتي من ايام المدرسه.
مروه: عندج هيج صديقات من مستوى عالي طبيه وهيج شي????؟!
منال: اي شنو الغريب؟
مروه: ماادري يعني احنه ناس على كد حالنه اهل الترجمه ههههه.
منال: ههه هسه ترحين؟
مروه: شيودينه من كل عقلج؟
منال: منتأخر نروح بتكسي بسرعه ونرجع عفيه الله يخليج شغله ضروريه يرضاها ضميرج اروح وحدي؟
مروه: تدرين ماعندي ضمير هههه.
منال: يالله كومي عفيه كومي مدام ماكو بعد محاضرات خل نستغل الفرصه.
مروه: وين نندل؟
منال: باع هاي مستشفى التعليمي غير.
مروه: امري لله كومي بس منتأخر خاف السايق يعوفني ويروح.
منال: ساعة زمان ونرجع والله.
رحنه وصلنه اني جنت خايفه احد يشوفني من اخواني او من قرايبنه.
بقينه واكفين متعرف تسأل منو عن صديقتها بعدين كالت: هذا عبدالله.
مروه: منو عبدالله؟
منال: جيرانه.
مروه: باوعت شفت ولد شكله عادي واكف ويه بنيه ويسولفون ويضحكون.
منال: هذا اخو خالد.
مروه: يا خالد??؟
منال: خالد اللي حجيتلج عنه مره إلى جنت احبه من جنت بالمدرسه وبينه علاقه بس من دخلنه كليه اتغير وكلي احب بنيه ثانيه.
مروه: هااا معناها اخوه هذا هم ديضحك على هاي البنيه هسه.
منال: لا لج عبدالله مو مثله اصلا ولا عبالك اخوان عبدالله مؤدب وماعنده هيج سوالف هاي اكيد زميلته.
وره شويه شافنه عبدالله واجه سلم علينه وعرفتنه منال على بعض ووكف ويانه يسولف هو والبنيه اللي وياه.
بعدين منال سألته عن صديقتها نعمة فعرفتها البنيه اللي وياه وراحوا يدورون عليها بقيت اني واكفه متحنطه لان هو يباوعلي فحجينه عن علاقة منال بأخوه سابقا.
عبدالله: اني مااتصور جانوا يحبون بعض بس جان تعلق جانوا زغار وبعدهم ماخذين الامور بأندفاع وحبوا يعيشون هيج جو وهيج شعور.
مروه: نفس رأيي وكتلها لمنال قبل بس معجبها كلامي لذلك مفتحت الموضوع وياها بعد.
عبدالله: هي شمتوقعه يعني هو هسه يحب وحده ثانيه وحتى فاتح امي بالموضوع وكللها اريد اخطبها ومنال تعرف بهالشي.
مروه: ماعدها عقل متعرف تفكر الميريدني مااريده لو تكون روحي بي.
عبدالله: عفيه هذا الحجي الصح اني هم هذا رأيي.
بقينه نسولف ونحجي جنت احجي بأنسيابيه عبالك اعرفه من زمان حسيته مو من النوع إلى اخجل منه مريح بالحجي وشكله فعلا دكتور وجان عفوي بكلامه وبسيطه ومرح.
عبدالله: شنو تحبين تشربين؟
مروه: لا شكرا جزيلا ولا اي شي اني مستعجله اريد اروح ليروح السايق يعوفني وابقى وحدي واخاف اصعد فورت لو تكسي وحدي.
عبدالله: بعد وكت واذا عالسايق اني اوصلكم.
باوعتله كتله: حتى اخواني يخلون طلقه براسي.
عبدالله: عندج اخوان؟
مروه: 3 الله يخليهم.
عبدالله: وخوات؟
مروه: ماعندي خوات بس اني بنيه اخر العنقود.
عبدالله: يعني انتي المدلله ههه، من شوكت تعرفين منال؟
مروه: من داومت كليه اتعرفت عليها جانت تكعد بالستيج الوراي وجنت مااحبها هههه.
اجت منال وصديقتها وكفوا ويانه شويه بعدين اشرت لمنال نروح فقرروا يطلعون ويانه عبدالله ونعمة للسياره منال ونعمة يمشون كدامنه ويسولفون بحدهم واني امشي وعبدالله يمشي على بعد مسافه مني بدون حجي.
بعدين كلي: مروه رقمي (، ) اذا تحبين وعندج وقت اتصلي نسولف شويه وندردش.
هالفتره بعد السقوط جانت الخطوط الارضيه موجوده وماكو موبايل وره سنه تقريبا يالله نزل الموبايل.
المهم اني من كلي هيج استحيت واتفاجأت من جرأته.
مروه: ان شاءالله.