رواية حب مشروع للكاتبة الشيماء محمد الفصل التاسع
احمد قالها على فكرته وهيا اتصدمت منها جدا
سميه: انت مجنون؟ ايمن هيقتلك مش هيخاصمك لا طبعا الفكره دي مجنونه ومتخلفه
احمد: الفكره دي هتخليهم يتكلموا مع بعض ويرجعوا لبعض
سميه: انت فعلا هتخسر ايمن بفكرتك دي مستعد لده؟
احمد: مستعد هتساعديني؟
سميه: هساعدك بس مش هنعرف ننفذها لوحدنا؟
احمد: طبعا هنحتاج حد معانا شوفي تثقي في مين ورتبيلنا مكان نتقابل فيه كلنا وكلميني واهو معاكي رقمي.
سميه: خلاص ماشي اتفقنا بس صح انت جبت رقمي منين وعرفت مكان شغلي ومواعيدي ازاي؟
احمد: امممم انا ظابط ما تنسيش...
سميه: ايوه يعني جبته منين برضه ولا عينت حد يراقبني؟
احمد: لا لا ابدا، سوري يعني رقمك جبته من تليفون ايمن اما مواعيدك فلاحظت وانتي في المستشفي مواعيدك والمكان عرفته من ايمن وسط الكلام عرضت عليه اني اوصلك وهو رفض بس يا ستي
سميه: اممم كويس انك قولتلي علشان ابقي انبه ايمن ما يثقش فيك بعد كده.
احمد: ليه بس هو انا عملت ايه غلط؟
سميه: نعم؟ اخدت تليفونه من غير اذنه واخدت معلومات خاصه وبتحاول تقرب من اخت مراته كل ده وتقولي عملت ايه غلط؟
احمد: مش يمكن يكون غرضي شريف؟
سميه وقفت: اللي غرضه شريف ما بيسرقش ارقام تليفونات ويوقع صاحبه في الكلام ولولا الظروف اللي احنا فيها ولولا ماما شجعتني اسمعك مكنتش جيت قابلتك ابدا بعد اذنك
احمد وقف: طيب اوصلك؟
سميه: هعتبر نفسي ما سمعتكش.
سابته ومشيت وهو هيموت عليها، من ساعت ما شافها وهو بيحلم بيها ليل ونهار وبيتخيل انها مراته طول الوقت، لازم بقى يفاتح ايمن، بس ازاي وهو اللي هيعملوه ده ممكن يكلفه صحوبيته لايمن.
سميه روحت وحكت لمامتها كل اللي حصل واول ما خلصت اتفاجئت بابوها وراها
عم سعيد: انتو اتجننتوا؟ هبل ايه ده؟ انتو معدش عندكم عقل؟ وانتي ازاي تطلعي تقابلي راجل غريب هاه؟ دي تربيتي ليكي؟
سميه: انا اسفه يابابا بس كنت مضطره وبعدين انت شايف حاله حبيبه؟ كان لازم اعمل حاجه،
عم سعيد: ايمن اللي لازم يعمل مش انتي
حكتله سميه وجهه نظر ايمن وطريقه تفكيره
عم سعيد: صاحبه اللي قالك كده؟
سميه: ايوه ودي الطريقه اللي نقدر نجمعهم مع بعض
عم سعيد: طيب ما نجمعهم عادي زي اي اتنين من غير الجنان ده؟
سميه: طيب جرب يا بابا تجمعهم ولو قدرت واتكلموا وصارحوا بعض يبقى خير لكن لو مقدرتش يبقى تساعدنا
عم سعيد: يا بنتي فكرتكم دي مجنونه ومتخلفه
زينب: جرب طريقتك ولو ما نجحتش يبقى نجرب طريقتهم خلاص؟
عم سعيد: خلاص
عم سعيد راح لحبيبه وحاول يقنعها تقابل ايمن وتقوله على مشاعرها بس رفضت رفض تام.
وقالت لو هو عايزها يجيلها ويطلب منها ترجعله
كلم ايمن كمان وطلب منه يتقابل هو حبيبه يتفقوا ويقرروا هيعملوا ايه بس ايمن كمان اتحجج بشغله وقال انه هيخلي والدته تيجي تشوف طلباتهم بحجه انه مشغول تماما
حاول تاني مع الاتنين بس برضه رفضوا
راح لسميه بنته
عم سعيد: كلمي احمد ده وحدديلنا معاد نتقابل فيه ونشوف اخرت الجنون ايه؟ بس كلمي كمان ام ايمن تبقي معانا وتوافق على جنانكم ده لانها لو موافقتش يبقى بلاش.
سميه كلمت الكل وحددت معاهم يتقابلوا كلهم في نفس الكافيه
عم سعيد وزينب وفاطمه وسميه واحمد
احمد شرحلهم خطته وخلص وكلهم ساكتين
احمد: ايه ساكتين ليه؟
فاطمه: انت عارف انك ممكن تخسر صاحب عمرك في حركه زي دي؟
احمد: ممكن بس اعتقد ان ايمن لما يعرف انا عملت كده ليه هيسامحني
فاطمه: لا ما تعتقدش ادهم مجروح وانت بتضغط على كل جروحه
احمد: لو هيرجعوا لبعض يبقى اي حاجه تانيه مش مهم
سميه بدأ يعجبها احمد وحبه واخلاصه لصاحبه.
عم سعيد: طيب نفرض عملنا كل ده وما اتكلموش؟ يبقى ساعتها موت وخراب ديار
احمد: اعتقد يا عمي ان اي اتنين بيحبوا بعض لو اتواجدوا مع بعض لازم يتكلموا، دي فطره بين الراجل والست ولا ايه؟
عم سعيد: ده في الطبيعي لكن مش في الظروف دي
احمد: عمي الموضوع من اوله لاخره مخاطره وهنخاطر وربنا يستر في النتايج هنعمل اللي نقدر عليه ونقول يارب
عم سعيد: يارب، هتنفذ امتي؟
احمد: اظبط بس كل حاجه وابلغكم ماشي؟ المهم ان الكل معايا؟
احمد بدأ يجهز لخطته المجنونه وهما بيساعدوه
ايمن غرق نفسه في شغله وما بيديش لنفسه اي فرصه للتفكير، مامته كلمته وخلته يرجع البيت واتأسفلها انه زعق او سابها او على صوته
في شغله المدير استدعاه
ايمن: افندم
المدير: فاكرابن سعيد احمد محمد؟
ايمن: فاكره هو ده يتنسي بس ده اتحكم عليه واتسجن خلاص
المدير: للاسف هرب يا ايمن
ايمن: ايه هرب؟ ازاي وامتي؟
المدير: رجالته ساعدوه وانا كلفت كذا ضابط بيحاولو يرجعوه بس المهم دلوقتي انت
ايمن: انا ايه؟ مش فاهم؟
المدير: هو ساب ورقه ليك بيهددك فيها وبيهدد بيتك
ايمن: بيتي؟ فين الورقه دي؟
المدير عطاله الورقه وقراها
انت سبق ودمرت حياتي وبيتي واتسببت في موت ابويا واخدت مني اولادي ومراتي ودلوقتي جه وقت الحساب
اللي انت اخدته مني انا هاخده منك، خلي بالك يا شطور من مراتك واللي في بطنها.
ايمن: وبعدين انا لازم احط حراسه عليها او اجيبها او مش عارف اعمل ايه؟!
المدير: اهم حاجه تهدي انا فعلا حطت حراسه على بيت ابوها وحاليا احمد هيجي وهتشوفوا هتعملوا ايه
احمد خبط ودخل
احمد: خير يا افندم
ايمن: ابن سعيد هرب وبيهددني انه يأذي حبيبه؟
احمد: ايه؟ هرب امتي؟ وازاي ياذيها؟
ايمن: معرفش
احمد: طيب مستني ايه احنا لازم نحط حراسه على بيتها وانت روحلها
ايمن: اروحلها؟
احمد: نقعد بره انا وانتي مش لازم ندخل.
مشيوا الاتنين بس احمد استأذن من ايمن لانه نسي تليفونه فطلع يجيبه واتصل بعم سعيد
احمد: في مشكله حصلت في الشغل ادعيلنا بقى ربنا يسترها لان شكلها هتولع بجد ربنا يستر هنأجل خطتنا شويه ماشي!؟
عم سعيد: في ايه اللي حصل قولي، ..
احمد: لا ما تقلقش
عم سعيد: ما اقلقش امال عربيات البوليس اللي بره دي ايه؟
احمد: حراسه بس المهم خلي بالكم من حبيبه قوي يا الله اقف جنبا واسترها ادعي يا عم سعيد ربنا يستر ايمن مش حمل صدمات تانيه
عم سعيد: صدمات ايه؟ يا ابني فهمني ايه اللي بيحصل؟
احمد: انا اتأخرت لازم انزل لايمن ما تقلقش انت بس ادعي بس ربنا يسترها
احمد نزل لايمن
ايمن: كل ده بتجيب التليفون؟
احمد: يالا بينا
ايمن: كان المفروض نروح ندور على ابن سعيد ده مش نروح نقف حراسه؟
احمد: عندك استعداد تسيب مراتك امانه في ايد حد؟ ساعتها بجد بقى ما تلومش غير نفسك
ايمن: ربنا يسترها يالا دوس بنزين شويه
احمد وهو سايق سرحان هيعمل ايه في خطته وبعدين المشاكل دي ايه؟ ماهما ممكن يرجعوا من الظرف ده كده بس ومالهاش لازمه خطته؟ خوف ايمن على حبيبته كفيل انهم يقعدوا مع بعض يبقى مش لازم خطته، فعلا خطته ملهاش لازمه
فجأه حد ظهر قدامه وداس فرامل والعربيه لفت حوالين نفسها لحد ما وقفت.
احمد اتخبط جامد في دركسيون العربيه وايمن الحزام حماه
نزل ايمن ولف ينزل صاحبه ويطمن عليه احمد كان مغمي عليه
ايمن يدوب فتح الباب طلعلوا اربع رجاله ضخمه واتخانقوا معاه وضربوه على راسه اغمي عليه وشالوه
احمد فتح عنيه ملقاش اثر لايمن واتجنن ومش عارف يعمل ايه؟ راح بسرعه لبيت حبيبه يشوفه راح وسابه ولا ايه؟
اول ما دخل عندهم
عم سعيد: في ايه مالك؟
احمد: حبيبه فين؟
عم سعيد: فوق في اوضتها
احمد: ممكن تتأكد؟
عم سعيد جري على فوق يتأكد ان بنته موجوده؟ فتح الباب والاوضه كانت فاضيه
عم سعيد بينادي بصوته كله: حبيبه حبيبه؟
سهيله: حبيبه خرجت هيا وماما وسميه
عم سعيد: راحو فين؟
سهيله: عندهم معاد مع الدكتوره انت نسيت مش ماما قالتلك في الظهر؟
عم سعيد: اه فعلا نسيت
نزل لاحمد وقاله
احمد: طيب ممكن تتصل بالحاجه تتطمن عليها؟
عم سعيد اتصل بس محدش رد على تليفون حبيبه واتصل على تليفون مراته وردت
عم سعيد: حبيبه فين يا زينب؟
زينب: احنا كشفنا واتطمنا ودخلت الحمام ومعاها سميه وانا مستنياهم اهوه وهنيجي على طول
عم سعيد: طيب طمنيني
احمد: نروح نجيبهم ولا ايه؟
عم سعيد: براحتك
احمد: الافضل نروحلهم وبالمره نشوف ايمن راح فين؟
ايمن بيفتح عنيه مش عارف هو فين؟ بس مربوط على كرسي ومش قادر يتحرك نهائي
في نور خفيف قوي في الاوضه مش مخليه شايف كل اللي حواليه
فجأه سمع صوت حد معاه في الاوضه
ايمن: مين هنا؟ مين هنا؟
## اه اااااه ااااه
ايمن: حبيبه؟ حبيبه؟ حبيبه ردي عليا، حبيبه انتي كويسه؟ حبيبه
ايمن بيحاول يتحرك هيتجنن مراته هنا جنبه وهو متربط
حبيبه: انا تعبانه؟ انا فين؟ اااه
ايمن: في ايه مالك؟
حبيبه بتعيط: اااه.
ايمن: حبيبه ارجوكي قوليلي مالك؟ حبيبه
حبيبه: جسمي بيوجعني وبردانه قوي وايديا بتوجعني اااه
ايمن: طيب تقدري تقومي تجيلي
حبيبه: اااه لأ انا مربوطه، انا فين يا ايمن؟
ايمن: مش عارف، مش عارف احنا فين؟
حبيبه: طيب تعال انت عندي
ايمن حاول يتحرك بس مربوط جامد مش قادر نهائي
ايمن: انا كمان مربوط يا حبيبه
حبيبه: الجو برد قوي، انا بردانه قوي يا ايمن بردانه
بتتكلم كأنها هتنام.
ايمن كان بيعرق لان الاوضه حر جدا ومستغرب هيا ازاي بردانه
ايمن: حبيبه خليكي صاحيه ما تناميش وبعدين الاوضه حر جدا
حبيبه: انت على طول كده ما بتحسش بالبرد ابدا
ايمن: بتبقي في حضني ازاي ابرد وانتي في حضني
حبيبه بتحاول ما تنامش بس بتنام
ايمن: حبيبه كلميني ما تناميش حبيبه
حبيبه: مش قادره هنام شويه وصحيني
ايمن: لا يا بيبه ما تناميش كلميني
حبيبه: اكلمك في ايه؟
ايمن: اي حاجه؟ كنتي فين مثلا قبل ما تيجي هنا؟
حبيبه: كنت عند الدكتورة بطمن على ابننا
ايمن ابتسم وزعل في نفس الوقت كان نفسه يشاركها اللحظات دي، نفسه يكون معاها
ايمن: وعملتي ايه؟ اتطمنتي؟
حبيبه: كان نفسي تكون معايا وتمسك ايدي وانا بشوف ابننا، انا حامل في ولد يا ايمن...
ايمن ما ردش والاتنين سكتوا كتير
حبيبه: انت سكت ليه؟ احنا هنموت هنا صح؟
ايمن: الموت والحياه دي حاجه بتاعت ربنا مش بايدينا
وبعدين هتفرق ايه نموت ولا نعيش؟
حبيبه: على رايك المهم اننا مع بعض نموت او نعيش
ايمن انا خلاص دفيت
ايمن: طيب كويس
سكتوا وحبيبه نامت من التعب او من الاطمئنان ان ايمن معاها وهيحميها
ايمن هيتجنن من التفكير ازاي هيخرج من هنا او هيتصرف ازاي ومش لاقي حل نهائي
ايديه اتعورت من كتر ما بيحاول يفك الحبل
النهار طلع والاوضه نورت شويه بس برضه معرفش اي حاجه جديده
الباب اتفتح ودخل حد مغطي وشه وحبيبه صحيت على فتحت الباب فقعدت مكانها وبصت لجوزها.
الراجل: الفطار اتفضلوا،
ايمن: انتو مين وعايزين ايه؟
الراجل: هو انت مش عارف احنا مين؟ على العموم اول ما الباشا يجي هيجيلك هنا بنفسه ( بص لحبيبه) وهيعرفك هو مين وعايز ايه؟
حبيبه خافت وكشت مكانها وبصت لجوزها
ايمن: لو باقي على حياتك فكني او فك مراتي وخليها تمشي من هنا وانا اوعدك اني هسيبك
الراجل: اههههههه انت بين ايدينا وبعدين مراتك جميله قوي وحرام الجمال ده تاخده لوحدك
ايمن: على جثتي ان حد يلمسها.
الراجل: وماله جثتك جثتك فيها ايه؟ ماهو في الاول وفي الاخر النتيجه واحده فما تستعجلش على جثتك دي، بصي انا فكك تاكلي وتأكليه واياك تحاولي تستظرفي هموتهولك قدام عنيكي فاهمه؟
حبيبه: فاهمه
الراجل فكها فعلا ووقف وري ايمن وفي ايديه مسدسه
حبيبه اخدت الاكل وراحت لايمن
حبيبه: انت متعور في ايديك
ايمن: ما تشغليش بالك انتي
حبيبه: ممكن تفك الحبل ما فوق الجرح لو سمحت اربطه بطريقه تانيه ارجوك.
الراجل: لا يا نحنوحه وبعدين مش هيجراله حاجه انجزي قدامك دقيقتين تاكلي وتأكليه فانجزي
بصت لايمن
ايمن: انا مش عايز كلي انتي
حبيبه: انت محتاج تاكل انت فاهم؟ لازم تكون قوي وبصحتك
ايمن فهم انها عيزاه ياكل علشان يقدر يخرجهم من هنا واكل علشان ما يخيبش املها فيه تاني
اكل ساندوتش وهيا اكلت وبعدها الراجل ربطها تاني
وسابهم وخرج
حاله صمت مسيطره عليهم، كل واحد في احلامه الخاصه وافكاره الخاصه.
حبيبه نفسها تسأله هو بعد ليه؟ وهو نفسه يسألها هيا طلبت الطلاق ليه؟؟
اخر النهار
حبيبه: ايمن انا عايزه اعمل حمام
ايمن: طيب
ايمن نادي على الراجل على امل انه يكون موجود ويسمعهم
وبعد شويه الراجل جاله
ايمن: عايزين حمام ممكن ولا ايه؟
الراجل بيفكر: ثواني هشوف
طلع ورجع بعد شويه.
الراجل: مراتك هتخرج تروح الحمام ولما تخلص هتفضل معانا لحد ما انت تدخل وترجع علشان بس لو حاولت تقل بعقلك وتاخدك البطوله هتحاول تعمل حاجه هنرجعهالك نصين رقبتها مفصوله عن جسمها
الراجل فعلا فك حبيبه واخدها وشويه وجه فك ايمن ودخله الحمام
ايمن حاول يعمل اي حاجه بس الحمام مفيهوش اي مخارج او حتى شبابيك
خاف يعمل اي حاجه فيأذوا مراته بجد.
رجعوه الاوضه تاني جه يربط الحبل على ايديه لقاها متعوره جامد ومعرفش يعمل ايه؟ جابله كلبشات ولبسهاله بدل الحبل
ايمن: مراتي فين؟
الراجل: هنجيبهالك
ايمن: احنا هنفضل هنا لامتي؟
الراجل: لحد ما الباشا يجي
الراجل خرج وجاب حبيبه وربطها تاني
حبيبه: انت كويس؟
ايمن: انا كويس المهم انتي حد ضايقك؟
حبيبه: لأ
فضلوا كتير ساكتين ساعه! اتنين! الفجر بيأذن
حبيبه: انت نايم؟
ايمن: لأ
حبيبه: بتفكر في ايه؟
ايمن: في طريقه نخرج بيها من هنا
حبيبه: انا مش بفكر غير في حاجه واحده
ايمن: ايه هيا؟
حبيبه: انت ليه معدتش عايزني؟ امتي بطلت تحبني؟
ايمن: انا مش عايزك؟ انا بطلت احبك؟ هههههههه
حبيبه: بتضحك ليه؟
ايمن: بضحك ليه؟ اصل انا يا حبيبه اللي بعت ابويا ليكي وطلبت الطلاق صح؟
حبيبه: انا طلبت الطلاق بس انت وديتني بايدك لحد الباب ده وقفلت كل حاجه في وشي فمكنش قدامي غير الباب ده اخبط عليه وانت فتحت.
ايمن: انا ما وصلتكيش لاي حاجه، انا كنت متكتف عاجز مش في ايدي حاجه
حبيبه: انت بتتكلم عن ايه؟ انت ليه وافقت تطلقني؟
ايمن: وانتي ليه طلبتي الطلاق؟ انا مش هجبرك تعيشي معايا غصب عني
حبيبه: زي ما ابويا جبرك تعيش معايا غصب عني؟
ايمن: ابوكي ما جبرنيش ابوكي خيرني وانا اخترت وبعدها انا اخترت اكمل معاكي.
حبيبه: ولما اخترت تكمل ليه بتسيبني؟
ايمن: انتي اللي بتسيبيني انتي
حبيبه: انت سيبتيني الاول، سيبتيني في المستشفي ورفضت تاخدني بيتك، سمعتك وانت بتقول لماما مش عايزها في بيتي ومش هينفع، ورمتني في بيت ابويا ولا سألت عليا يبقى مين ساب مين؟
ايمن: وانا برضه سمعتك، سمعتك وانتي بتكلمي الدكتوره وبتحكيلها اللي حصلك وبتحكيلها ازاي اتحرشوا بيكي وازاي كل شويه ياخدوا جزء منك حاجه ورا حاجه بتضيع وازاي انتي بتناديني وازاي انا معرفتش ارجعك بسرعه، كنتي عيزاني اعمل ايه؟ احط عيني في عينك ازاي؟
حبيبه: وعلشان كده سيبتيني؟ لانهم اتحرشوا بيا،؟ لاني معدتش على قد المستوي؟ معدتش فوق مستوي الشبهات؟ بقيت مشبوهه صح؟ معدتش ملكيه خاصه ليك؟ غيرك شاركك ولو في جزء بسيط من ممتلكاتك؟ وشي كمان كان مليان جروح وشعري وقصوه وشكلي مفيهوش ريحه الجمال؟ فازاي فعلا هتبصلي؟
ايمن: ازاي اقدر اشوف لوم وعتاب في عنيكي هاه؟ مش ازاي هبصلك؟ انا السبب في اللي حصلك انا مكنتش راجل كفايه وحميت بيتي ومراتي ومكنتش حتى ظابط كويس وعرفت ارجعك بسرعه، انا السبب في كل حاجه، وحتى دلوقتي انا السبب؟ ده ذنب شغلي وعلشان كده مقدرتش اواجهك، مقدرتش اقف قصادك واحس ان رجولتي قلت في نظرك او انك فقدتي ثقتك فيا او انك فقدتي احساسك بالامان وانتي معايا؟ كنت محتاج وقت، كنت محتاج وقت اعرف اواجه فيه نفسي واتصالح معاها وبعدها ااقدر اقف قصادك واحاول اخليكي تسامحيني وترجعيلي بس انت فاجئتيني بالطلاق.
حبيبه: انا عمري ما لمتك ابدا ابدا ووعمري ما ثقتي فيك اتهزت، ايمن انا امبارح نمت، نمت بعمق لحد الصبح وانا مخطوفه ومتكتفه عارف ليه؟ لانك انت موجود، لو في حتى سكينه على رقبتي وانت قصادي مش هتهمني! انا الدنيا كلها في كفه وانت لوحدك في كفه، طلبت الطلاق لاني خفت تكون مجبر عليا وتكون مش شايفني لايقه بيك بعد اللي حصل وانك تكون مستعر مني، واني معدتش جميله في نظرك؟ فقلت افتح لك الباب تخرج.
ايمن: هو ده رأيك فيا؟ انا راجل ببص للجمال!؟