قصص و روايات - قصص رومانسية :

رواية حب مشروع للكاتبة الشيماء محمد الفصل العاشر

رواية حب مشروع للكاتبة الشيماء محمد الفصل العاشر

رواية حب مشروع للكاتبة الشيماء محمد الفصل العاشر

هو انتي متخيله اني كملت معاكي علشان لقيتك جميله؟ جمالك ده كان بونص بس مش اساس
انا حبيتك، حبيت البنت اللي طاعت ابوها ووافقت تتجوز من اختياره واحد ما تعرفوش، حبيت البنت المنتقبه اللي يوم فرحها وعلى الرغم من جمالها إلى انها احتفظت بيه لجوزها بس، حبيت البنت اللي يوم فرحها طلبت من جوزها يقرالها قران وقامت معاه الليل، حبيت اخلاقك واخر حاجه فرقت معايا كان شكلك اللي بتتكلمي عنه ده...

لو انا حبيت شكلك يا حبيبه كنت نمت معاكي من اول يوم مكنتش اديتك فرصه تحبيني اكتر واحبك علشان تكون اول مره لينا حاجه مميزه مش تقضيه واجب وخلاص، انا كنت فاكرك عارفاني اكتر من كده؟ مش انا الراجل اللي يسيب مراته ابدا علشان شعرها ولا كام جرح في وشها ولا ازمه او مشكله اتعرضتلها، انا كنت محتاج وقت بس مجرد وقت، وقت اقف فيه قصادك واقولك انا راجل واستاهلك وانتي مديتينيش الوقت ده.

حبيبه عيطت: انا اسفه اسفه اسفه انا بحبك اكتر من روحي يا ايمن وكل اللي كنت محتاجاه منك هو حضنك اللي بخلت عليا بيه؟
ايمن: انا كنت محتاج الحضن ده اكتر منك يا حبيبه، انا مفارقتكيش نهائي، مفارقتش باب اوضتك ابدا وعيني على طول كانت عليكي واول ما تنامي ادخل واضمك وابوسك واتطمن عليكي بس سامحيني بقى معرفتش اقولك ده...
حبيبه: انت اللي سامحني اني طلبت الطلاق
سكتوا الاتنين شويه.

حبيبه: هو احنا لو خرجنا من هنا هنروح فين؟
ايمن: انت عايزه تروحي فين؟
حبيبه: اي مكان انت فيه؟
ايمن: يبقى لو خرجنا من هنا هنروح بيتنا
هنا سمعوا دربكه كتيره وصوت رصاص وصوت احمد بينادي فايمن رد عليه
ايمن: احمد انا هنا تعال هنا يا احمد
احمد كسر الباب ودخل وفك ايمن بسرعه وجه يفك حبيبه فايمن زقه
ايمن: انا هفكها.

ايمن بيفكها وعنيهم متعلقه ببعض لحد ما فكها قامت لحضنه وهو ضمها قوي، اخدها في حضنه قوي وكأنه غايب سنين عن روحه، وكأنه عيل اخيرا لقي حضن امه اللي غايبه عنه
احمد اتحرج وخرج بره وسابهم
ايمن: وحشتيني قوي قوي
حبيبه: وانت كمان وحشتني، يالا نروح بيتنا
ايمن: يالا بينا
ايمن شالها وخرج وكان احمد مستنيه
احمد: واحد من الظباط هيروحكم وسيبني انا هنا هتصرف ما تقلقش، روح مراتك العيله كلها هتتجنن عليكم في بيتك.

ايمن: خلاص هنروح متشكر يا احمد
ايمن اخد مراته وروح ولقي فعلا الكل مستنيهم في بيت امه
كلهم كانوا زي المجانين، اخدوهم بالحضن واخيرا اتلم شمل العيله كلها...
قعدوا شويه بسيطه وقاموا يروحوا علشان العشاق يبقوا براحتهم واتفقوا يقضوا اليوم مع بعض بكره ويتغدوا كلهم مع بعض احتفالا برجوعهم
حبيبه استأذنت تقوم تغير هدومها وايمن بعدها بدقايق دخل وراها
كانت لسه هتدخل تاخد شاور فاجئها وضمها وهيا عطياله ضهرها.

ايمن: ما تتخيليش انتي وحشاني قد ايه؟
حبيبه: ايمن لو كنا اتطلقنا كنا هنعمل ايه؟
ايمن: كنا هنرجع برضه لبعض، كنا هنتلككك لاي سبب نرجع علشانه لبعض
حبيبه: انا مش عيزاك تبعد عني تاني ابدا
ايمن لفها ليه وحط ايديه على بطنها
ايمن: اللي في بطنك هيربط بينا ديما حته مني وحته منك
حبيبه: فرحان بيه يا ايمن؟
ايمن: طبعا ما تتخيليش قد ايه؟ بس للاسف ظروفه معايا ملطشه حبتين، المهم واحشاني
حبيبه بتوتر: انا هدخل اخد شاور.

سابته وجريت وهو مبسوط انها لسه لحد دلوقتي بتتكسف منه خرج هو كمان اخد شاور ورجع وكانت حبيبه لسه ما خرجتش واستغرب انها طولت قوي كده وخاف لتكون تعبانه
ايمن خبط عليها: حبيبه؟
حبيبه: ايوه يا ايمن
ايمن: في حاجه؟ اتأخرتي قوي
حبيبه سكتت وبعد شويه: لا مفيش هخرج
ايمن استني شويه وبعدها قام
ايمن: حبيبه انا هدخل؟
وفعلا دخل كانت لابسه برنس حمام وبتلف شعرها بفوطه وواقفه قدام المرايه
ايمن: في ايه مالك؟
حبيبه: مفيش.

ايمن قرب وخلاها تبصله: في ايه؟
حبيبه بصت بعيد بس دموع ظهرت في عنيها
ايمن خلاها تبصله تاني: في ايه يا حبيبه؟ لما خبينا على بعض مشاعرنا كنا هنطلق يبقى ما نخبيش على بعض حاجه تانيه ولا ايه؟ مالك قوليلي ايه مضايقك كده؟
حبيبه عيطت في حضنه: انا اسفه يا ايمن
حبيبه شدت الفوطه من على راسها، كانت مكسوفه من شعرها القصير واللي كان اكتر حاجه جوزها بيعشقه فيها.

ايمن: اسفه على ايه؟ حبيبه القصه اللي فاتت دي فاتت وخلصت ووجعتنا وكانت تجربه قاسيه علينا احنا الاتنين بس الحمدلله خرجنا منها كويسين وده المهم اي حاجه تانيه تتعوض، بعدين انا عايز افهم؟ انتي ليه عامله اهميه كبيره قوي لشعرك ايوه كنت بحبه بس مش لدرجه انه لو اتقص حبي ليكي هيقل او هيتهز حتى؟ وبعدين ما انتي كان ممكن تقصيه وتعملي لوك جديد فين المشكله؟

حبيبه: انا اقصه بس مش يتقص غصب عني وبعدين شكلي وحش قوي، كنت بحب اشوف جمالي في عنيك
ايمن: طيب هو انتي خرجتيلي بره وما شفتيش جمالك في عنيا؟ انتي حابسه نفسك هنا تعيطي وسايباني انا اعد النجوم في عز الظهر يرضي ربنا ده؟
حبيبه ضحكت
ايمن: ايوه كده اضحكي خلي الشمس تنور كده بلاش الغيوم والاعاصير دي، وبعدين ثقي شويه بقى في حبي ليكي، انا بحبك سواء بشعرك طويل! قصير! او حتى قرعه خالص
حبيبه: وانا كمان بحبك قوي.

ايمن: طيب انتي بتحبني وانا بحبك وهموت عليكي هنفضل بقى في الحمام كتير؟
خرجوا وفضلوا مع بعض
حبيبه: ايمن هو انا مين خطفني؟
ايمن: جماعه بيخطفوا البنات او ستات او حتى اطفال
حبيبه: كانوا عايزين مني ايه؟ طلبوا فديه منك مثلا؟
ايمن: والله ما اعرف هما كانوا عايزين ايه؟ هما بيبيعوا اطفال لو حد عايز، بيتاجروا في اعضاء، وساعات بيطلبوا فديه، في حالتك انتي معملوش اي حاجه من دول...
حبيبه: ليه؟

ايمن: انتي كنتي عيزاهم يعملوا؟
حبيبه: لا مش القصد بس مستغربه ليه معملوش اي حاجه من دول؟
ايمن: مش عارف
حبيبه اتعدلت وبصتله
حبيبه: حسبت عليك كذبه
ايمن: ليه بقى ان شاءالله؟
حبيبه: علشان انت عارف وبعدين انت فاشل في الكدب اصلا
ايمن: في اوقات كتيره بيكون الكدب حلال ومسموح بيه
حبيبه: اه زي ما بتقولي ان شكلي حلو بشعري ده، ما انا قبلتها وعدتهالك
ايمن: لا ابدا والله، اقسم بالله شكلك عاجبني كده
حبيبه: بجد يا ايمن.

ايمن: انا بحبك في اي وضع وشكل وبعدين انتي حلوه في عنيا ديما
حبيبه: ماشي بس قولي ليه بقى؟
ايمن: كانوا عايزينك لحاجه تانيه؟
حبيبه: حاجه ايه؟
ايمن: كانوا هيهادوكي للي بيسهلهم امورهم
حبيبه: يعمل بيا ايه؟

ايمن اتضايق واتعدل: واحده جميله هيهادوها لواحد مجرم هيعمل بيها ايه يا حبيبه؟ هيعمل اللي كنا بنعمله دلوقتي خلاص عرفتي؟ وبعدين الواحد ده كان بينتقم مني لاني قبضت على ابوه واخد حكم اعدام ده الراجل اللي غلطت وقبضت على ابوكي بداله فهمتي؟ عندك اسئله تانيه
سابها وخرج وقعد جنب امه اللي كانت بتتفرج على التليفزيون
فاطمه: مالك في ايه؟ سيبت مراتك وخرجت ليه؟
ايمن: والنبي ماهي ناقصه يا امي؟
حبيبه خرجت وقعدت جنبه.

حبيبه: مش قصدي اضايقك يا ايمن؟ ماما قوليله حاجه
فاطمه: قالتلك مش قصدها خلاص بقى
ايمن: هو انتي فاهمه قصدها ولا مش قصدها على ايه؟ ولا بتقولي وخلاص
فاطمه: جت لعندك وقالتلك مش قصدها تضايقك يبقى الموضوع هنا انتهي ما نعملش حكايه بقى
ايمن: انتي امي ولا امها؟
فاطمه: انا امكم انتو الاتنين قوم بقى خد مراتك وادخل
ايمن: انا عايز اقعد معاكي شويه
فاطمه: تقعد معايا ليه؟ مراتك مش وحشاك
ايمن: خلاص يا امي هقوم عايزه حاجه.

فاطمه: لا يا حبيبي سلامتك.

ايمن اخد مراته ودخلوا اوضتهم.

تاني يوم اهلها كلهم جم زي ما اتفقوا وحبيبه وفاطمه كانوا في المطبخ من المصبح يجهزوا الغدا واخواتها بيساعدوهم وقبل الغدا حبيبه دخلت تاخد شاور وتغير قبل ما يتغدوا واحمد وابوه يجوا
سميه دخلت عند اختها تساعدها تغير هدومها وتاخد شاور
سميه: اتصالحتوا ولا لسه ناويين على الطلاق؟
حبيبه: لا اتصالحنا، ايمن ما بطلش يحبني ابدا
سميه: عارفه كان باين عليه الحب على طول
حبيبه: انتي ايه المختلف فيكي؟

سميه: أأأ. أنا ولا حاجه.

حبيبه: أ أ أ وفي الاخر ولا حاجه، بنت وشك احمر كده ليه؟ احكي مخبيه ايه؟
سميه: مش مخبيه صدقيني
هربت منها وخرجت بسرعه وشويه واحمد جه يطمن عليهم
سميه كانت فرحانه بمجي احمد ومستغربه من امتي قلبها بيدق كده وليه بيدق لما احمد يجي
احمد دخل هو وابوه والكل رحب بيه جدا وكأنه واحد من العيله
حبيبه قبل ما تخرج نادت لايمن ودخلها
حبيبه: انا مش عايزه البس النقاب يا ايمن ممكن؟

ايمن: دي حاجه ترجعلك انتي براحتك وبعدين احمد زي اخويا وابوه راجل كبير ومحترم وبعدين شافك قبل كده
حبيبه: خلاص يالا
خرجت مع ايمن والكل استغرب انها مش لابسه نقاب بس محدش علق
اتحطت السفره والكل بياكل ويهزر واحمد بيخطف نظرات لسميه وحبيبه لاحظت نظراته لاختها
حبيبه بهمس: ايمن
ايمن: هاه
حبيبه: هو انا بيتهيألي ولا احمد فعلا بيبص لسميه؟
ايمن: لا مش متهيألك، ده سحر بنات عم سعيد
حبيبه: قصدك ايه؟

ايمن: اللي بيشوفكم بيتجنن وبتخطفوا عقله وقلبه وهو من ساعت ما شافها وهو هيتجنن
حبيبه: وهو شافها امتي؟
ايمن: وانتي في المستشفي دخل مره بسرعه وكانت بوشها وملحقتش تلبس النقاب وبعدين الفتره دي اتعاملوا فيها كتير وسيادته واقع في سحرها
حبيبه: سحر بنات عم سعيد؟
ايمن: ايوه بالظبط
خلص الاكل وقاموا قعدوا مع بعض ودار حوار جانبي بين فاطمه وابو احمد عم معتز
احمد بهمس: بقولك.

ايمن: هو النهارده اليوم العالمي للاحاديث الجانبيه ولا ايه؟ المهم قول
احمد: ايه رأيك؟
ايمن: رأيي في ايه؟
احمد شاور على ابوه وفاطمه
ايمن: يا واطي، ، شكلي هقوملك واعملها معاك
احمد: ايه وجه اعتراضك؟ ابويا مش عاجبك؟
ايمن بصله باهتمام: ابوك قالك حاجه ولا انت بتألف؟
احمد: لا مقالش بس هو وحيد وانا شغلي كتير وانت شرحه فليه ما يونسوش بعض ويبقوا سند لبعض
وانت تستقل بحياتك وانا كمان.

ايمن: ما اعتقدش ان امي اصلا ممكن توافق؟ وبعدين ابوك كمان ممكن ما يوافقش
احمد: ابويا هيوافق ده ما بيصدق اي حجه يجي عندكم او يتكلم مع مامتك، انت اعرف رايها ايه وهيا مستعده للفكره نفسها ولا
حبيبه قربت: بتتوشوشو في ايه كده؟
ايمن اخدها جنبه: ولا حاجه يا قلبي
احمد: لما هتموتو على بعض بتتكبروا ليه؟ قال يطلقوا قال؟ اهو الغباء بتاع امثالكم ده يغيظ
ايمن: وانت ايه دخلك بينا قوم ياد بعيد ياد
احمد: ماشي عقبالنا.

قالها بصوت عالي وهو بيبص لسميه اللي قامت دخلت المطبخ تعمل عصير
احمد قال لفاطمه: سميه في المطبخ هو في مشكله لو دخلت ساعدتها؟
فاطمه ابتسمت وفهمته: روح وربنا يقربلك البعيد
احمد: هو انتي ايمن مش زيك ليه؟
دخل وسابهم
عم معتز: مش فاهم وحاسس انه في حوار هنا؟
فاطمه: اعتقد ان احمد معجب باخت حبيبه
معتز: امم هيا حلوه زي اختها؟
فاطمه: بصراحه كلهم احلي من بعض والعيله كويسه وبنات محترمه ياريت ربنا يجعلها من نصيبه.

معتز: طالما قولتي انها كويسه تبقي كويسه ربنا يسعدهم
احمد دخل لسميه اللي اتخضت اول ما شافته
سميه: انت ازاي تدخل هنا انت اتجننت؟
احمد: اه اتجننت وجبت أخرى
سميه: لو حد اخد بالك انك هنا ه
قاطعها احمد: فاطمه اللي بعتاني وداخل قدام الكل اساعدك في ايه؟
سميه: انا مش محتاجه لمساعدتك اطلع بره خليني اعرف هعمل ايه؟

احمد: مش هطلع تعالي نعملهم كوكتيل، انا بعمل كوكتيل تحفه وفي فواكه كتيره اهي، خدي قطعي الكانتلوبايه دي يالا اتحركي
سميه عملت زي ما هو قالها وهو بدأ يعمل، مش عارفه هيا ليه مبسوطه وهو معاها
احمد: ايمن وحبيبه رجعوا لبعض
سميه: اهمم
احمد: عقبالي، قولي امين
سميه: امين اسكت بقى
احمد: بقولك
سميه: قول.

احمد ساب اللي في ايده ووقف قدامها وهيا قلبها بيدق وكأنه هيخرج من مكانه وحاسه ان صوته الناس اللي بره سامعينه وهيجوا عليه
احمد: تتجوزيني؟
سميه مش مصدقه ومش مستوعبه وبتبصله وهو عنيها مجنناه واتمني لو يرفع نقابها يقرى ملامحها
احمد: انا بحبك واعتقد ان انتي لاحظتي ده عايز اعرف رأيك بحيث اكلم ايمن واعرفه وبعدها اكلم ابوكي، ساكته ليه ردي.

سميه بعد شويه مدت ايدها على صدره وزقته بعيد وجريت من قدامه دخلت اوضه حبيبه وقفلت الباب وقلبها طالع نازل هيقف من التوتر بس ابتسامه كبيره اترسمت في وشها
احمد كمل العصير هو وخرجه وكلهم اتفاجؤا بيه
زينب: انت اللي مخرجه؟ امال فين سميه؟
احمد: انا اللي عامله مش بس مخرجه
ايمن: استر يا ستار
احمد: مش عامل حسابك اسكت بقى
احمد اول واحده عطاها زينب: اتفضلي يا ست الكل.

ايمن: على فكره المفروض تبدأ بعم سعيد الاول النمره غلط
احمد مسك مخده من الانتريه وخبط ايمن في وشه
احمد: مالكش دعوه
الكل ضحك وبيهزر
ايمن: البت دي اختفت ليه هقوم اشوفها اخدت مراتي واختفت ليه
ايمن يا دوب قام فاحمد جري وراه واخده على جنب
ايمن: عملت ايه قول؟
احمد: قولتلها تتجوزني وقولتلها اني بحبها بس
ايمن: بس؟ بس؟ ما كنت اخدتلك بوستين بالمره؟ قال بس قال؟
احمد: بحبها المفروض اعمل ايه؟

ايمن: تقولي انا وانا اخلي حبيبه تتكلم معاها ونشوف رأيها ايه مش تقولها هيا
احمد: لازم اعرف الاول رأيها ايه قبل ما اعرف الكل
ايمن: مش الكل بقول انا ومراتي
احمد: ماهو مراتك اختها وتقول لامها وامها تقول لابوها
ايمن: لا طبعا المهم هشوفها جوه بس ما تحطش امل كبير انها توافق
احمد: ليه هيا ممكن ترفض؟
ايمن: ممكن؟ المفروض تقول هيا ممكن توافق؟
احمد: ليه يا ايمن؟

ايمن: دي بنت متدينه منتقبه؟ وانت هاه؟ مقضيها بالطول والعرض ده انا ساعات بتجنن منك وانت مجرد صاحبي وبعدين انا، انا اللي يعني الحمدلله متدين وبقيم ليل وبصلي الحمدلله كل وقت في الجامع ساعات حبيبه بتجننيني، تخيل يا احمد ليله دخلتنا اقمنا الليل وخلتني اقرالها قرآن وبعد الفجر طلبت نكمل للصبح علشان تتكتبلنا عمره، انت هتستحمل ده؟ هتصحيك الفجر وتقولك انزل الجامع هتقولها ايه؟ المفروض يا احمد تشوف الاول انت هتقدر تتحملها ماهو الجواز مش حب وبس لازم التوافق الفكري والاحتماعي والديني.

احمد: محسسني ان انا كافر يا ايمن! اهو ممكن يكون ربنا جعلها سبب في هدايتي وابقي احسن منك
ايمن: افلح وان صدق
احمد: شوف انت بس رأيها ايه؟
ايمن: حبيبه معاها جوه هدخلهم
ايمن دخل لمراته وحبيبه واحمد خرج للعيله بره
عم سعيد: بقولك يا احمد؟
احمد: اتفصل يا عمي
عم سعيد: اهم الحمدلله رجعوا لبعض فالحمد لله انها جت من عند ربنا وزي ما المثل رب ضاره نافعه والحمد لله مش هنحتاج لفكرتك المجنونه
احمد: ههههههه ههههههه.

عم سعيد: انت بتضحك ليه؟
احمد: سوري سوري يا عم سعيد، ماهيا دي فكرتي المجنونه
عم سعيد: مش فاهم قصدك ايه؟
احمد: قصدي ان انا اللي دبرت خطفهم وانا اللي اقنعته ان سعيد المجرم هرب وانا اللي كنت حابسهم الخطف والحبس كله جزء من خطتي ومرضتش اقولكم لانكم مكنتوش هتوافقوا بس اهو الخطه تمت بنجاح باهر واهم رجعوا لبعض وايمن معرفش حاجه ودي اهم نقطه.

احمد لاحظ ان كلهم بيبصوا وراه فقلبه دق وبص لوراه ولقي ايمن واقف وراه في حاله ذهول وصدمه...

الفصل التالي
جميع الفصول
روايات الكاتب
روايات مشابهة