قصص و روايات - قصص رومانسية :

رواية حارة العشق للكاتبة سلسبيل كوبك الفصل السادس

رواية حارة العشق للكاتبة سلسبيل كوبك الفصل السادس

رواية حارة العشق للكاتبة سلسبيل كوبك الفصل السادس

نور قامت غيرت هدومها و نزلت ركبت عربيتها و بدأت تتمشي بعربيتها...
و فجأة جت عربية بسرعة كبيرة خبطت فيها نور صرخت و عربيتها اتقلبت كذا مرة.
الناس بدأت تتجمع و حاولوا يطلعوا نور من العربية و نقلوها بعربية الاسعاف لاقرب مستشفي.
الاستقبال خدت حاجات نور و من ضمنهم تليفونها فتحته و جابت آخر رقم اتصلت بيه نور و كان رقم رامي.
الخط اتفتح...
رامي: ايه يا نور لسة قافل معاكي من نص ساعة.

موظفة الاستقبال: أستاذ رامي معايا.
رامي(باستغراب): ايوه مين؟!
موظفة الاستقبال: هدي من مستشفي. صاحبة التليفون ده عملت حادثة من وقت بسيط و هي دلوقتي في اوضة الاشعة.
رامي(بخضة): مستشفي! انا جاي.
رامي خرج جري من مكتبه و ركب عربيته ساق بسرعة كبيرة علشان يوصل للمستشفي و كان خايف ليكون حصلها حاجة.
رامي بعد فترة وقف قدام المستشفي اللي نور فيها و نزل بسرعة دخل الاستقبال.
رامي: نور الجندي.

رامي: حد لسة مكلمني من الاستقبال.
هدي: ايوه انا يا فندم. هي حاليا اتنقلت لاوضة رقم 405.
رامي(بقلق): شكرا.
رامي جري علي الاوضة اللي نور موجودة فيها و كان الدكتور لسة بيخرج من الاوضة.
رامي(بقلق): لو سمحت الحالة اللي جوا اخبارها ايه؟!
الدكتور: حضرتك تقرب للمريضة ايه؟!
رامي: تبقي مراتي.

الدكتور: هي الحمدلله مفيش خطر عليها مجرد خدوش و ايديها الشمال اتجبست و بعد فترة ممكن تبقي تيجي تشيل الجبس، و هي حاليا واخدة حقنة مهدئة و نايمة.
الدكتور: متقلقش مفيش خطر.
رامي(بقلق): شكرا يا دكتور. ممكن ادخلها؟!
الدكتور: اتفضل.
الدكتور مشي و رامي دخل لاوضة نور و قرب الكرسي اللي موجود في الاوضة ناحية سريرها و مسك ايديها و باسها.
كان صعب عليه انه يشوفها بالمنظر ده و دموعه نزلت خوفا عليها.

رامي فضل قاعد جمب نور لغاية ما هي بدأت تفوق,فتحت عينيها ببطء لقت حد ماسك ايديها بصت لقت رامي حاطط رأسه علي السرير و ماسك ايديها جامد.
نور(بخفوت): رامي.
رامي قام بسرعة اول ما سمع صوتها و قرب منها.
رامي: انتي كويسة؟! حاسة بحاجة؟! انادي الدكتور؟!
نور(بابتسامة بسيطة): متقلقش انا بخير.
رامي باس رأس نور و قعد جمبها تاني علي الكرسي.
رامي: انتي نزلتي ازاي؟! و كمان مقولتيش ليا.
نور: كنت حاسة بملل و نزلت.

رامي: عاجبك يعني اللي انتي فيه دلوقتي؟! عاجبك اللي حصل؟!
نور: آسفة يا رامي بس.
رامي: حسابنا لما تخفي يا نور.
نور: انا آسفة بجد بس كنت حاسة بملل و زهقانة بقالي كتير مخرجتش سامحني يا رامي.
رامي: هروح انادي الدكتور.
رامي خرج بره اوضة نور و مسح عينه و راح ينادي الدكتور,نور كانت زعلانة علي زعل رامي منها و عيونها دمعت و كانت هتعيط.
الباب خبط و رامي دخل و بعده الدكتور و بدأ يفحص نور.

الدكتور: هتقعد هنا 48 ساعة تحت ملاحظتنا و بعدها تقدر تأخدها مع الرعاية و الاهتمام.
رامي: تمام شكرا يا دكتور.
الدكتور خرج و رامي كان هيخرج بس وقف لما نور نادت عليه.
نور: هتروح فين؟! هتسبني؟!
رامي غمض عيونه بتعب و رجع قعد جمب نور علي الكرسي بصمت تام,نور مسكت ايده...
نور: هتقدر تخاصمني؟!
رامي لا رد.
نور: ههون عليك؟!
رامي لا رد.
نور: خلاص مبقتش تحبني؟!
رامي لا رد.
نور(بدموع): مبقتش تحبني يا رامي؟!

رامي غمض عيونه و فتحهم شد نور ل حضنه و باس رأسها و نور حضنته بأيديها السليمة.
رامي: كنتي لازم تقوليلي كنت انا هخرجك و ابقي معاكي لكن حرام عليكي وقعتي قلبي يا نور.
نور(بدموع): آسفة.
رامي ملس بايده علي شعر نور و باس رأسها,و بدأوا هما الاتنين يتكلموا كتير لغاية ما نور نامت تاني و هي بتستمع لصوت رامي.
رامي ابتسم لما نور نامت و طفي نور الاوضة فضل قاعد معاها في الاوضة صاحي.

-في مكان تاني...
في بيت العربي.
زينة: عدنان.
عدنان: ايه يا زينة؟!
زينة: مبقتش تقعد معانا زي الاول.
عدنان: عندي شغل مش ببقي فاضي.
زينة: طب كنت عايزاك في موضوع.
عدنان: قولي.
زينة: كنت عايزاك تكلم بابا يوافق إني أشتغل.
عدنان حط ايده علي خد زينة و بصلها بهدوء.
عدنان: و إنتي مش ناقصك حاجة يا زينة علشان تشتغلي و كمان الحاج شهاب عمره ما هيوافق علي شئ زي ده حتى لو انا وافقت و كمان انا أصلا مش موافق.

عدنان: خليكي هنا معززة مكرمة بدل ما تتبهدلي في الشغل و انا مقبلش أن اختي تتبهدل في الشغل.
زينة: ما م.
عدنان(بمقاطعة,حدة): خلص الكلام في الموضوع ده يا زينة.
عدنان ساب زينة و خرج قابل قاسم و هو داخل...
قاسم: مالك متضايق ليه؟!
عدنان: مفيش يا قاسم. عقل اختك زينة.
عدنان ساب قاسم و مشي,قاسم دخل لقي زينة واقفة مكان ما عدنان كان سايبها...
قاسم: في ايه يا زينة ماله عدنان و ايه اللي حصل؟!

زينة: عايزة اشتغل يا قاسم.
قاسم: و انتي عارفة رأي بابا و عدنان و حتى عمر و كذلك انا يا حبيبتي انتي عايشة هنا معززة مكرمة محدش يقدر يؤمرك بحاجة. لكن الله اعلم الشغل هيبقي مرمطة ازاي...
قاسم: ربنا يهديكي يا زينة شيلي الفكرة دي من بالك.
زينة(بحزن): حاضر.
قاسم: قوليلي هتعملوا ايه غداء النهاردة؟!
زينة(بحزن): معرفش لسة...
زينة سابت قاسم و دخلت لاوضة عهد.

عمر كان خارج من اوضته و رايح ناحية الباب لقي قاسم في النص بصله و فرد ايده.
عمر: أهلا أهلا بالدكتور بتاعنا.
قاسم(بضيق): مش ناقص تريقة يا عمر...
عمر: ليه بس يا دكتور قاسم مش قد المقام علشان نتكلم معاك و لا مش قد المقام...
قاسم: انت هتغير من أسلوبك ده امتي؟!
قاسم: ده انت حتى أكبر مني المفروض تبقي العاقل.
قاسم ساب عمر و دخل اوضته و عمر بص مكانه بغل و خرج بره البيت كله.

عهد(بعصبية): بت متعصبنيش ما هما رفضوا هتحاولي تاني ازاي و ليه؟!
زينة(بضيق): انا عايزة اشتغل يا عهد انا مدرستش علشان اقعد كدة زي البومة في البيت.
عهد: و الله انتي من غير أي حاجة انتي اصلا بومة.
زينة رمت علي عهد المخدة بعصبية و بصتلها بضيق.
زينة: ما تفهموني يا خلق بقي عايزة اشتغل.
زينة: عايزة يبقي عندي كرير.
عهد: ايه! كرير و تطلع مين كرير دي يا حلوة؟!
زينة: اخرسي يا جاهلة.

عهد: بت انتي احمدي ربك ان ابوكي قِبل يخلينا ندرس اصلا و نتعلم.
زينة: لو يكمل جميله بقي و يخليني اشتغل.
عهد: و بنت شهاب العربي تشتغل ليه؟!
زينة: اوف مش هتفهميني خالص.
زينة سابت عهد و خرجت بره اوضتها و هي متعصبة.
زينة طلعت للبلكونة اللي في اوضتها و لمحت يوسف و هو في الفرن اللي ابتسم ليها و هي ابتسمت ليه و جريت علي اوضتها قفلت البلكونة و قعدت علي السرير حاطة ايديها علي قلبها.

-في مكان تاني...
عند غصون.
غصون: يلا يا غيث.
غيث: اوف اهو جيت مش عارف دروس ايه اللي عايزاني اروحها.
غيث: و كمان المكان هنا وحش مستحيل تلاقي سنتر نضيف...
غصون: بطل غرور ياض.
غصون: و كمان تجربة جديدة.
غصون: مش يلا بقي و لا ايه؟!
غيث: اعفيني يا غصون انا.
غصون: و تضيع سنة من عمرك لا طبعا.
غيث: اوف بقي.
غصون: قدامي.
غيث و غصون خرجوا من شقتهم,في نفس اللحظة كانت شهد خارجة من شقة ام عبده.
شهد: علي فين يا اختي؟!

غصون(ببرود): مكان ما انا عاوزة. يلا يا غيث.
شهد بصت بغضب ل غصون اللي اتجاهلتها و بدأت تنزل علي السلالم,شهد زقت غصون من علي السلالم.
غصون(بصريخ): آآه.
غصون بدأت تدحرج علي سلالم البيت و غيث خاف عليها فنزل جري وراها لغاية ما وقعت من علي آخر سلمة.
منار كانت في الوقت داخلة البيت مستنية غصون صرخت اول ما شافتها مرمية علي السلم.
منار(بخضة): يالهوي يا مُري.

منار جريت علي غصون و كذلك غيث,غصون كان في كدمة في رأسها و جرح بسيط في ايديها و بين الوعي و اللاوعي.
غيث(بهدوء مصطنع): امسكيها كدة يا منار.
غيث بِعد عن غصون اللي مسكت ايده بضعف و هو سابها و طلع ناحية شهد و ضربها بوكس في وشها بكل غضبه.
غصون(بضعف): امسكيه يا منار.
منار جريت علي غيث بِعدته عن شهد اللي كانت مصدومة من جراءته,ام عبده كانت واقفة بتراقب من ورا الباب.

منار: اهدي يا غيث أختك دلوقتي عايزين نسندها. و كمان عيب تضرب حرمة يا ابني.
غيث(بغضب): مش حذرتك قبل كدة من أنك تقربي لاختي. مش بتفهمي ليه؟!
غيث(بغضب): و قسما بربي لو شوفتك قريبة منها تاني ساعتها مش هضمن تصرفي.
منار: امشي يا ست شهد امشي.
منار و غيث نزلوا سندوا غصون اللي كانت حاسة بوجع في كل جسمها,شهد بصتلها بشماتة و نزلت خرجت بره البيت.
غيث: حاسة بوجع؟!
غصون: بسيط.

دخلوا غصون البيت تاني و هما معاها قعدوها علي الكنبة...
غصون(بوجع): آه.
منار: منها لله.
غيث(بغضب): و ربي لو كانت قدامي الفرصة اعلم علي وشها كان زماني عملت.
غصون: انا كويسة اهو يا منار، خدي غيث و انزلي احجزي الدروس ليه.
غيث: خليها يوم تاني.
غصون: لا دلوقتي، يلا يا منار.
غيث(بعصبية): ما قولت لا يا غصون.
غصون: و انا قولت اه. آه.
منار: حتى و انتي بتتوجعي بتقاوحي(بتعاندي)؟!

غصون: يلا بس اسمعي الكلام، علشان خاطري يا غيث.
غيث و منار بعد اصرار غصون خرجوا هما الاتنين بره الشقة و منار خدته علشان تشوفله المدرسين...
غصون قعدت مكانها و بدأت دموعها تنزل غصب عنها و كانت حاسة بوجع في جسمها.
بعد فترة,غصون لقت الباب بيخبط قامت بتعب و راحت ناحية الباب و هي بتنسد علي اي حاجة قدامها و مسحت دموعها بسرعة.

غصون فتحت الباب لقت قدامها عدنان بصتله باستغراب,و عدنان برضو استغرب من الجرح اللي في وشها و التعب و الارهاق اللي باين عليها و آثار العياط اللي باينة عليها.
عدنان: ا.
غصون: نعم.
عدنان: اتفضلي.
غصون: ايه ده؟!
عدنان: ده نصيبك.
غصون: من ايه؟!
عدنان: كل فترة بوزع حاجات بسيطة زي دي لاهل المنطقة يعني.
غصون بصت للشنطة و بصت ل عدنان و الرؤية بقت مشوشة و كانت هتقع بس مسكت في الباب و حاولت تفتح عينيها.

غصون(بتعب): شك كك را مم ش عا اايز زة(شكرا مش عايزة).
عدنان: انتي كويسة؟!
غصون(بتعب): أنت ليه أربعة؟!
غصون كانت هتقع ل ورا بس عدنان مسك ايديها و سندها بايده علي الباب.
عدنان: فين اخوكي؟!
غصون(بتعب): م عع ممن ننا ار(مع منار).
عدنان مسك تليفونه و هو ماسك ايد غصون علشان متقعش,اتصل ب منار.
بعد فترة بسيطة الخط اتفتح.
عدنان: منار.
منار: الو يا اسطا عدنان في حاجة؟!
عدنان: معاكي غيث اخو الانسة غصون؟!

منار: ايوه في حاجة؟!
عدنان: الانسة غصون تعبانة. تعالي انتي و اخوها علشان مش عارف اتصرف.
منار: حاضر حاضر اهو بسرعة...
منار: اسقيها ماية بسكر.
عدنان(بحدة): انجزي يا منار دقيقة و الاقيكي واقفة قدامي.
عدنان راح ناحية شقة ام عبده و خبط علي الباب.
ام عبده: اسطا عدنان نعم؟!
ام عبده لقت غصون قاعدة في الارض و ساندة بضهرها علي الباب و بتحاول تفتح عينيها.
عدنان: روحي نادي للدكتور عادل انجزي. تليفونه مغلق.

ام عبده: حاضر.
ام عبده بصت ل غصون و بعدها بصت ل عدنان و دخلت حطت الطرحة علي شعرها و نزلت تنادي الدكتور,عدنان قرب من غصون و لقاها خلاص بتغيب عن الوعي.
عدنان شاف نبضها لقاه سريع جدا,سمع صوت غيث و هو بيجري علي السلم لغاية ما وصل ليه.
غيث(بلهفة): غصون غصون.
غيث(بلهفة): غصون مالك طمنيني عليكي؟!
عدنان: ساعدني ادخلها جوا شقتكم.
عدنان و غيث سندوا غصون و دخلوا الشقة حطوا غصون في اوضتها علي سريرها...

دقيقتين و كانت ام عبده جت بالدكتور عادل.
منار: الحقها يا دكتور.
عادل دخل لاوضة غصون و بدأ يفحصها.
عدنان: ها يا دكتور؟!
عادل: الواضح كدة انها مش بتأكل بقالها فترة. و الباين من جرح رأسها انها اتخبطت او وقعت و مع عدم الاكل أثر عليها...
عادل: لازم تتغذي و دي شوية ?يتامينات ليها. بالشفاء.
عدنان: تعالي اوصلك.
عدنان حاسب الدكتور عادل و نزل ل تحت اشتري الدواء من الصيدلية و طلع تاني ليهم.

منار: كان مستخبي ليها بس فين يا رب؟!
غيث(بغضب): و ربي لو حصلها حاجة مش هرحم الزفتة اللي اسمها شهد.
عدنان(باستغراب): شهد!
ام عبده(بتوتر): ها! مين جاب سيرة شهد يا اسطا عدنان مفيش حاجة.
غيث: لا متكدبيش.
غيث: الزفتة إلى اسمها شهد زقت اختي غصون من علي السلم.
عدنان(بحدة): منار الكلام ده صحيح؟!

منار(بتوتر): انا شوفت غصون واقعة علي السلالم يا اسطا عدنان، و مش بعيدة علي شهد انت عارف انها طالما مش بتحب حد بتعمل فيه ايه.
عدنان: ده الدواء و شوية أكل لما تفوق ابقي خليها تأخد الدواء.
عدنان: عن اذنكم، الف سلامة.
عدنان سابهم و خرج بره البيت...

-في مكان تاني...
عند شهد.
شهد: و هي بتدحرج قدامي كدة يا بت يا اماني كنت مبسوطة اوي.
اماني: هي عملتلك ايه يا شهد؟!
اماني: حرام عليكي. دي لسة جديدة و معملتش ليكي حاجة وحشة.
شهد: و لما اشوفها ماشية مع عدنان الساعة 1 بليل اسميه ده ايه.
اماني: متنسيش انها جديدة هتلاقيها نزلت و تاهت. في ايه يا شهد؟!
اماني: حرام عليكي اللي عملتيه في البت. و كمان شوفتي اخوها عمل ايه في وشك.

شهد بصت لاماني بغضب و حطت ايديها مكان الكدمة اللي في وشها بسبب بوكس غيث.
الباب خبط.
اماني: روحي شوفي لو حد من زباينك يا اختي.
شهد قامت و حطت الطرحة علي شعرها بشكل عشوائي و فتحت الباب لقت اللي ماسكها من رقبتها.
شهد(بخضة): سي عدنان!
عدنان(بحدة): انتي مش هتبطلي لعب زيك.
عدنان بِعد ايده عن شهد و دخل البيت و وقف قدامها.
عدنان: هي عملتلك ايه؟!
شهد: هي اشتكت ليك؟!

عدنان: ملكيش دعوة يا شهد، ردي عليا هي عملتلك ايه؟!
عدنان: البنت في حماية الحاج شهاب و حمايتي بتدخلي في حياتها ليه، بتوقعيها ليه؟!
عدنان: انتي عايزة منها ايه؟!
شهد: دي بت مشيها شمال يا سي عدنان. متصدقش كلامها.
عدنان لمس الكدمة اللي في وش شهد و هي اتأوهت.
عدنان(بسخرية): واضح ان اخوها علم عليكي مش كدة.
شهد بصت ل عدنان بغيظ مكتوم و هو مال علي ودنها و اتكلم بهمس.

عدنان(بهمس): شهد انتي مجرد احتياطي مركونة علي الرف لوقت الفراغ و بس، و انسي اني ابص ليكي و انتي عارفة كويسة انتي ايه بالنسبة ليا او بمعني اصح لشباب المنطقة كلهم.
عدنان زق شهد ل ورا و خرج بره شقتها و هي قفلت الباب و وقعت في الارض بتعيط.

-في مكان تاني.
عند منار.
منار: بس يخربيتها يا ابويا.
عيسي: يا بنتي قولتي مليون مرة انها جميلة.
منار: مش قادرة اصدق الجمال الرباني ده.
منار: بس منها لله الست شهد زقتها من علي السلالم ربنا ينتقم منها.
عيسي: ربنا يبعد عننا الناس الوحشة يا بنتي.
منار: يا رب، من ساعة ما دخلت المنطقة و هي عُرضة لاي حد رايح و جاي يضايقها.
عيسي: ربنا يحميها.
منار: يا رب يا بابا.
منار: اه يا بابا هي كانت طالبة مني طلب.

عيسي: قولي يا بنتي.
منار: كانت عايزاني اشوف ليها شغل تفتكر ممكن تشتغل ايه؟!
عيسي: المكتبة تحت امرها لو عايزة تيجي تقعد فيها تنور.
منار: ربنا يخليك يا بابا.
منار حضنت عيسي و باست خده و هي مبسوطة انها قدرت تلاقي شغل ل غصون.

-عدي النهار كله و كل الاحوال يعتبر ماشية طبيعية.
عند غصون.
غصون فاقت من نومها بتعب و قعدت نص قاعدة علي السرير و اتاوهت.
غصون بصت حواليها لقت غيث نايم جمبها و ماسك ايديها,باست رأسها و قامت من جمبها.
غصون(بوجع): آه.
غصون(بوجع): حرام عليكي انا عملت ليكي حاجة يا زفتة الطين انتي.
غصون دخلت الحمام غسلت وشها و خرجت دخلت المطبخ كلت حاجة بسيطة جدا.

غصون دخلت اوضتها و خدت هدوم ليها و خرجت للاوضة التانية تغير هدومها.
غصون خرجت للبلكونة لقت في صمت تام و في نسمة هواء حلوة جابت كرسي و قعدت فيها.
غصون لقت موبايلها بيرن استغربت لقته رامي.
الخط اتفتح.
غصون: الو.
رامي: نايمة و لا صاحية؟!
غصون: صاحية.
رامي: طب اسمعيني.
غصون: ايه؟!
رامي: الزفت وليد بدأ يتحرك و مش هيهدئ الا لما يلاقيكي.
غصون: و هنعمل ايه؟!
رامي: هنضطر نقطع الكلام ما بينا خالص لفترة بسيطة...

غصون: طيب. هو عمل ليكم حاجة؟!
رامي: نور عملت حادثة...
غصون(بقلق): هي عاملة ايه دلوقتي طمني عليها؟!
رامي: متقلقيش بخير. شوية خدوش.
غصون(بقلق و دموع): بعتذر يا رامي بعتذر جدا.
رامي: يا هبلة احنا اخوات، و انا متأكد ان نور لو كانت مكانك كنتي هتعملي كل اللازم علشان تحميها.
رامي: طمنيني ايه اخبارك و اخبار غيث؟! الفلوس ماشية تمام؟!
غصون: اه الحمدلله متقلقش.
رامي: نور نايمة دلوقتي و انا مش جايلي نوم خالص.

غصون: و لا انا اصلا لسة صاحية.
رامي: فاكرة لما كنا احنا التلاتة نتسابق مين بيسوق علي العجلة بتاعته اسرع من التاني.
غصون: و طبعا كنت دايما بفوز عليك انت و نور.
رامي(بضحك): لا و نور كانت تزعل و تقولك انتي بتغشي.
غصون: و لا يوم ما اتعرفنا علي بعض في المدرسة.
رامي: احم ضربتيني قلم مش قادر انساه لحد دلوقتي.
غصون: انا يا ابني ده انا كنت نسمة هواء كدة محدش يحس بيها.
رامي: اه اه عارف.

الاتنين بدأوا يتكلموا و يضحكوا,و كانت غصون بقالها كتير مضحكتش من قلبها.
و في نفس اللحظة كان عدنان بيعدي من نفس شارع غصون و سمع صوت ضحك عالي رفع رأسه لمح غصون و هي بتضحك بقوة مش مهتمية بالناس النايمة اللي حواليها...
عدنان لمح شابين واقفين فوق السطح بيتفرجوا علي غصون و علي شكلها.
عدنان دخل العمارة و طلع ل بيت غصون و خبط عليه...
غصون(باستغراب,لنفسها): مين هيجي دلوقتي؟!
رامي: معايا يا غصون؟!

غصون: اه اه معاك.
رامي: طب هقفل انا.
غصون: اه ماشي ماشي.
غصون قامت بسرعة و فتحت الباب لقت عدنان اللي واقف قدامها و ملامحه حادة.
عدنان لما شاف لبسها كامل اتصدم.
غصون كانت لابسة شورت ابيض قصير و فوقه تي شيرت بحمالة رفيعة علي الكتف باللون الازرق و قصير لغاية الخصر واسعة.
غصون(بقلق): في حاجة؟!
عدنان(بحدة): انتي ازاي تفتحي بالمنظر ده؟! انتي اتجننتي؟!

غصون بصت علي لبسها و بصت ل عدنان و قفلت الباب في وشه,غصون جريت علي اوضتها لبست شال حطته علي جسمها من فوق و خرجت فتحت الباب و طلعت رأسها بس من الباب.
غصون: عايز ايه؟!
عدنان: بعد كدة لما تقفي في البلكونة يا ريت تراعي الناس اللي نايمة. و يا ريت تكوني عارفة ان في ناس بتبقي علي السطح و هيفضلوا يبصولك و انتي بالمنظر ده و ممكن توصل انهم يصوروكي. حافظي علي نفسك يا بنت الناس.

عدنان بص ل غصون و سابها و نزل رجع بيته.
غصون قفلت الباب و اتنهدت و دخلت نامت جمب غيث تاني بعد ما قفلت البلكونة بتاعتها.

-في الصباح الباكر...
كانت غصون نزلت تشتري طلبات و تاهت و بدأت تمشي في المنطقة لغاية ما وصلت ل مكان فاضي خالص و بعيد عن الحارة.
شخص: غصون.
غصون لفت بسرعة لقت شخص ماسك مسدسه و حاطه في وشها,فتحت عينيها علي آخرهم و رجعت ل ورا كذا خطوة.
شخص: مش هتقدري تهربي.
غصون(بخوف): في ايه؟!
غصون(بخوف): عايز مني ايه؟!
فجأة غصون لقت عدنان بقي واقف قدامها.

و فجأة سمعوا صوت رصاصة طالعة من مسدس الشخص اللي قدام عدنان و غصون.
غصون اتنفضت و وقعت و...

الفصل التالي
جميع الفصول
روايات الكاتب
روايات مشابهة