رواية حارة العشق للكاتبة سلسبيل كوبك الفصل الثاني والعشرون

رواية حارة العشق للكاتبة سلسبيل كوبك الفصل الثاني والعشرون

جه ميعاد الزيارات و الكل خرج إلا غصون فضلت مكانها.
ضابطة: في زيارة علشانك.
غصون(بهدوء): شكرا مش عايزة.
ظابطة: مش هتستفادي حاجة من اللي عاملاها دي خليهم يتواصلوا معاكي علشان يساعدوكي.
غصون(بهدوء): لا شكرا.
ضابطة: طب قومي جربي.
الضابطة مسكت غصون و خرجتها بره السجن و ودتها مكان الزيارات.
غصون دخلت و وقعت عينيها علي عدنان اللي قام وقف أول ما شاف غصون حصل تواصل بصري بينهم غصون كانت بتفكر ترجع و لا تفضل.

غصون قربت ناحية عدنان و قعدت قدامه و خدت نفس عميق و بصتله عدنان حاول كتير يتكلم بس مكنش عارف يقول ايه و فضلوا صامتين.
غصون: مش شايفة لازمة للزيارة دي عن اذنك.
عدنان: استني.
عدنان مسك ايد غصون و غصون قعدت و سحبت ايديها من ايدين عدنان.
عدنان: عاملة ايه؟!
غصون(بسخرية): بخير بس الخدمة مش عجباني شوية.
غصون: جاي ليه يا عدنان؟!
عدنان: جاي أشوفك.
غصون: ده انت معملتهاش من شهر جاي دلوقتي...
غصون: عدنان.
عدنان: نعم.

غصون: طلقني انا مش عايزاك.
عدنان لا رد.
عدنان لمح دبلته في ايد غصون لسة فبصلها...
عدنان: بس مش باين.
غصون بصت ناحية ما عدنان بيبص و بصتله بتوتر.
غصون: طلعت ضيقة و مش عارفة أقلعها بس مش أكتر لو عرفت أقلعها كنت قلعتها.
عدنان: مصدقك أنك لو كنتي عايزة تقلعيها كنتي قلعتيها بس مش مصدق أنها ضيقة و معرفتيش تقلعيها...
غصون: جاي ليه يا عدنان؟!
عدنان: جاي لمراتي.
غصون: المجرمة...

عدنان: تؤ مراتي اللي كان بينا ذكريات حلوة و ذكريات وحشة و كلنا مع بعض في طبق واحد.
غصون: أرجع لداليا يا عدنان يارا محتاجاكم انتوا الاتنين. و انا طلقني لأني حتى لو خرجت من هنا مش هكمل معاك...
عدنان: مش هحاسبك علي كلامك دلوقتي.
غصون: مفيش كلام دلوقتي و لا بعدين.
عدنان: بس انتي حبتيني.

غصون: لا مجرد تعود اتعودت علي وجودك بس عادي ما في يوم من الأيام ماما و بابا كانوا في حياتي و سابوني و مشيوا اتعودت علي غيابهم و كذلك هتعود علي نسيانك يا عدنان.
عدنان: هتقدري؟!
غصون: قدرت.
عدنان: ده هيريحك؟!
غصون: أيوه.
الضابطة: الزيارة انتهت.
غصون قامت وقفت و كذلك عدنان اللي قرب من غصون و حط ايده علي خدها و نزل لمستواها باس رأسها و مال علي ودنها.
عدنان(بهمس): عيونك فضحاكي يا غصون.

عدنان رفع رأسه و اتقابلت عيونه بعيون غصون اللي اتملت بالدموع و سابته و مشيت، عدنان اتنهد و خرج بره السجن.
غصون رجعت مكانها و قعدت علي السرير بتاعها و غمضت عينيها بدأت تفتكر أحداث.
Flash back.
عدي: آنسة غصون.
غصون: اتفضل يا مستر عدي.
عدي: عايز أقولك أنك رائعة بمعني الكلمة قدرتي تقفي مكان جابر بيه و تعملي اللي هو معملهوش.
غصون: متشكرة عن اذنك.
عدي: احم ممكن لحظة بس.
غصون: اتفضل.

عدي: مش هنا تيجي بس معايا في مكان.
غصون: ليه؟!
عدي: هتعرفي.
غصون(باستغراب): تمام.
غصون مسكت شنطتها و خرجت مع عدي لبره الشركة لقته فتح ليها باب العربية.
عدي: المكان قريب من هنا علفكرة بس علشان رجلك متتعبش.
غصون(بابتسامة خفيفة): تمام.
غصون ركبت في عربية عدي و عدي لف بسرعة و هو مبسوط و ركب و بدأ يسوق ناحية المكان اللي عايزه...
عدي(بابتسامة): تعرفي أنه شكلك حلو.
غصون(برفعة حاجب): اعتبرها معاكسة.

عدي(بابتسامة): حتى كدة شكلك حلو.
غصون غصب عنها ضحكت و بصتله بطرف عينيها و و قعدت تبص علي الناس و هي ماشية من شباك العربية.
عدي وقف العربية و لف فتح باب العربية لغصون اللي ابتسمت ليه و شكرته و نزلت من العربية.
عدي: غمضي عينك.
غصون: بدأت اشك في حاجة.
عدي: غمضي عينك بس...
غصون غمضت عينيها و مشيت مع عدي لغاية ما لقته وقف فوقفت هي كمان.
عدي: فتحي عينك.

غصون فتحت عينيها لقت مكان متزين علي أعلي مستوي و فيه بلالين.
غصون: مش قولتلك بدأت أشك في حاجة.
عدي نزل علي ركبته بسرعة و مسك ايد غصون.
عدي: من غير أي مقدمات انا عايزك و بحبك...
غصون لا رد.
عدي: خدي وقتك و فكري براحتك.
عدي: انتي متعرفنيش كويس هنتخطب بس الاول و نتعرف و بعدها نتجوز.
غصون: ده انت سريع اوي. عموما المواضيع بتكون محتاجة تفكير هفكر و أقولك عن اذنك...
عدي: مش هتتغدي.

غصون: مرتبطة بميعاد غداء تاني عن اذنك.
غصون سابت عدي و هي بتحمد ربنا انها مشيت من قدامه و ركبت تاكسي و رجعت البيت.
غصون لقت رامي و نور عندها في الفيلا بتاعتها اللي والدها سابها ليها هي و غيث قبل ما يتوفي.
غصون(بتنهيدة): أخيرا.
رامي: مالك جاية خلصانة ليه؟!
غصون: اللي اسمه عدي ده.
رامي: ماله؟!
غصون: طلب ايدي النهاردة.
نور: هتتجوزي يا بت؟!
غصون: اخرسي حبة انتي كمان.
نور: نفسي أشوفك بالأبيض بقي امتي هخلص منك.

غصون: لو عايزة تجوزيني علشان تخلصي مني لا انا اروح انتحر احسن.
رامي: طب و ليه لا؟!
غيث: و ليه اه؟!
رامي: مصيرها تتجوز يا غيث.
غيث: انا عارف بس مين عدي انا معرفهوش.
نور: و لا انا.
رامي: انا اعرفه. كان والده وليد بيه بيشتغل مع والدك جابر يا غصون.
غصون: يعني ابويا و ابوه كانوا صحاب فلازم اتجوزه يعني.
رامي: جربي يا غصون مش هتخسري حاجة لو اتخطبتي يعني.
غصون: هفكر.
رامي: براحتك بس الخطوبة مش هتضر.

نور: اشوي يا عم اشوي.
رامي: اخرسي و قومي جيبي الأطباق من جوا.
نور: اوف حاضر...
غصون: روحت دروسك يا غيث؟!
غيث: اه.
غصون: و التدريب؟!
غيث: تعبت معرفتش اروح.
غصون: طيب. هطلع اغير هدومي تكونوا جهزتوا الغداء.
و عدت الأيام و غصون فكرت في موضوع الخطوبة و وافقت عليها و فعلا جه يوم الخطوبة و اتخطبت غصون لعدي اللي كان مبسوط بموافقة غصون.
غصون(بخنقة): أوووووف مية مرة هقولك يا عدي بطل الغيرة الاو?ر دي.

عدي(بعصبية): و انا طول عمري هقولك مبحبش اشوفك بتتكلمي مع غيري و اقعد ساكت.
غصون(بعصبية): انت عايز تحبسني يعني و لا اقابل ده و لا اخرج هنا و لا اعمل كده و لا اي حاجة ده ايه الخنقة دي.
غصون(بعصبية): أكتر من كدة يبقي انت اللي بتبوظ علاقتنا مش انا...
غصون كانت هتمشي بس عدي جري ناحيتها و حضنها من ضهرها...

عدي: آسف آسف يا حبيبتي خلاص معلش. بس انتي عارفة إني بحبك و بغير عليكي و مقبلش الهواء حتى يعدي من جمبك...
غصون بعدت عن عدي بالعافية و بصتله و سابته و مشيت خرجت بره الشركة رجعت بيتها.
غيث: مالك؟!
غصون: زهقت و مليت من خطوبتي انا و عدي.
غيث: عايزة تتجوزيه يعني؟!
غصون: لا عايزة انهي علاقتنا مش قادرة شخص غريب تصرفاته أغرب حقيقي بخاف و هو موجود جمبي بتصرفاته الغريبة دي.
غيث: عايزة ايه يعني؟!
غصون: هننفصل.

غصون: هو جاي يتعشي بليل عندنا ابقي انت اطلع أوضتك و انا هتكلم معاه و هنهي كل حاجة.
غيث: طيب.
فعلا جه عدي و اول ما شاف غصون صفر و مسك ايديها باسها.
عدي: اجمل بنت عدت في حياتي.
غصون(بابتسامة): شكرا يا عدي.
غصون كانت لابسة فستان باللون الأصفر الهادئ ب ¾ كم و قصير واصل لغاية الركبة و واسع شوية، لبست كوتشي باللون الأبيض و سيبت شعرها علي ضهرها و حطت مكياج خفيف.
غصون: اقعد يا عدي.
غيث: ازيك يا عدي.

عدي: ازيك يا غيث عامل ايه؟!
غيث: الحمدلله بخير.
الخادمة: العشاء جاهز يا هانم.
غصون: تمام يا صبا روحي.
غصون: العشاء يا عدي.
عدي: تمام.
غيث قام راح ناحية السفرة غصون كانت لسة هتروح بس عدي مسك ايديها و شدها ناحيته...
عدي: نسيت اسلم عليكي.
غصون بصت لعدي باستغراب و عدي طلع من جيب الجاكت بتاعه علبة طويلة قطيفة فتحها كانت عبارة عن سلسلة من الألماظ.
عدي مسكها و لبسها لغصون و باس خدها.
عدي: بحبك.

غصون(بابتسامة مصطنعة): العشاء يلا.
غصون سابت عدي و دخلت قعدت جمب غيث علي السفرة و عدي جه قعد و بدأوا هما التلاتة يأكلوا.
غصون: خلاص روحي انتي يا صبا المطبخ.
صبا: تمام يا هانم.
غيث: عن أذنكم.
غيث مشي و متبقاش غير غصون و عدي كانوا بيأكلوا بس غصون سابت الشوكة و السكينة من ايديها و بصت لعدي.
عدي(بابتسامة): بحبك لما تبصي ليا.
غصون: عدي انا قررت حاجة كدة.
عدي: ايه يا حبيبتي؟!

غصون: انا شايفة ان علاقتنا مش كاملة ناقصها حاجة.
عدي: زي ايه مثلا؟!
غصون: معرفش بس علاقتنا مش كاملة يا عدي لا انا قادرة افهمك و لا انت هتقدر تفهمني.
غصون: و أي علاقة لازم يبقي فيها تفاهم يا عدي.
عدي ساب هو كمان الشوكة و السكينة من ايده أو بمعني أصح رماهم علي السفرة و بص لغصون بهدوء مصطنع.
عدي: قصدك تقولي ايه يا غصون؟! ومن غير لف و دوران.
غصون: قصدي إني عايزة ننفصل يا عدي.

في أقل من لحظة غصون ملحقتش تستوعب اللي حصل عدي قدامها ماسكها من رقبتها بعنف و بيبصلها بعيون كلها غضب.
غصون كانت مصدومة و مش مستوعبة اللي بيحصل.
عدي(بغضب): في حد بتحبيه؟!
عدي(بغضب): ردي.
غصون هزت رأسها بمعني لا و مكنتش قادرة تتنفس بسبب ضغط ايد عدي علي رقبتها.
عدي: كويس علشان كنتي هتتسببي في موت حد.
عدي: اسمعي يا غصون انتي مش هتكوني لحد غيري و مش هتتجوزي غيري و هتبقي في بيتي من بكرة.
عدي(بغضب): سمعاني؟!

عدي بِعد عن غصون اللي قعدت تكح كتير و كانت بتتنفس بصعوبة و وقعت علي الأرض.
عدي(بقلق): غصون انتي كويسة؟!
عدي جري علي غصون و قعد يطبطب علي ضهرها و غصون بصاله بنظرات دهشة و خوف.
عدي: خدي اشربي ماية.
غصون شربت من كوباية الماية اللي عدي ماسكها.
غصون(بحدة): ابعد عني انت مجنون.
غصون بِعدت عن عدي و قامت وقفت بعيد عنه...

غصون(بحدة): انت مكانك مش بين البشر مكانك لاما في مستشفي المجانين لاما تحت الأرض مع الناس الميتة اللي زيك بيأذي البشر.
غصون(بحدة): مش هكون ليك و لو آخر شخص موجود علي الارض دي...
غصون(بحدة): كفاية اوي اللي حصل من شوية.
عدي(بغضب): غصون.
غصون(بحدة): بره البيت ده.
غصون قلعت السلسلة اللي لبسها ليها و حدفتها ناحيته و كذلك مع دبلة الخطوبة.
غصون: شخص همجي ابعد كدة.

غصون زقت عدي و سابته و طلعت أوضتها و قفلت الباب قعدت علي سريرها حاسة بخنقة بسبب اللي عدي عمله تحت و كانت لسة هتنام تليفونها رن.
الخط اتفتح.
غصون: ايه يا مراد؟!
مراد: غصون عرفت معلومة مهمة اوي.
غصون: خير؟!
مراد: وليد والد عدي.
غصون: ماله؟!
مراد: اختلس فلوس من الشركة و مش بس كدة زور إمضتك و بدأ يعمل شغل مشبوه...
مراد: مرضتش أقول لرامي انتي عارفاه عصبي.
غصون: حلو ده سيبه ليا.
مراد: هتعملي ايه؟!

غصون: هوقفله شغله و أي ملف تبع اي صفقة هيمر عليا الاول و ده هيمنع لفترة حتى و لو بسيطة انه يشتغل.
غصون: بالنسبة للاختلاس خليه يأخد براحته و انا هندمه في اليوم اللي يفكر يلعب مع بنت جابر الأسيوطي.
مراد: طب و عدي؟!
غصون: أساسا انفصلنا متخافش.
مراد: طيب كويس هقفل انا.
غصون: باي.
عدت أيام بسيطة و عدي مظهرش خالص الفترة دي و غصون مارست حياتها بشكل طبيعي.

غصون كانت قاعدة في كافيه الشركة حاطة رجل علي رجل و بتشرب قوتها بمزاج و ماسكة موبايلها.
غصون رفعت رأسها لقت عدي داخل من باب الشركة و معاه شخص أول ما شافته اتعرفت عليه.
غصون: أكتر شخص ببغضه علي وجه الأرض دي كلها.
فؤاد: غصون ازيك.
غصون(ببرود): كنت كويسة قبل ما اشوفك ده أولا ثانيا متحاولش يا عدي مش هرجعلك و انا اتخطيت الصدمة دي من زمان.
غصون(ببرود): يعني مبقتش أعاني تاني. سامعني يا فؤاد متحاولش.

فؤاد(بخبث): فكريني كدة يا غصون سببتلك ايه في حياتك؟!
غصون: عادي جدا حاولت تغتصبني مش كدة عايزني اتكسر مثلا قدامك او ابان ضعيفة و لسة متأثرة و بخاف لما اشوفك و افتكر لما حاولت تغتصبني و انا عمري 18 سنة...
غصون(ببرود): و لا يفرق معايا. تعرف كل ما أفتكر الموقف ده افتكر ايه.
غصون(بخبث): لما علمت عليك و سببتلك جرح كل ما بتقف قدام المراية بتفتكرني بيه.

غصون: و كمان جابر بيه فاكره اللي بيتك في الحجز شهر كامل اللي جذمته انضف منك قالي جملة جميلة اوي.
غصون: قالي اللي حصل حصل و مش هتقدري تغيريه علشان كدة اتعلمي من الدرس و كمان مش بنت جابر الأسيوطي اللي عيل ميستهلش قرش واحد في سوق الرجالة ضافري أغلي منه يفكر يأذيني أو يخوفني.
غصون سابت عدي و فؤاد و قامت من المكان كله.
فؤاد كان في قمة غضبه من كلام غصون و بص لعدي بغضب شديد.

عدي(ببرود): جيت تعلم عليها علمت هي عليك.
فؤاد حط ايده علي أسفل خده اليمين و رقبته كان جرح عميق بسكينة غصون كانت السبب فيه.
فؤاد(بغضب): يا انا يا هي.
عدي(ببرود): اهدي كدة علي نفسك.
عند غصون.
غصون خرجت بره الشركة ركبت عربيتها و ساقت ناحية المقابر اللي موجود فيها والدها و والدتها قضت النهار كله قدام قبرهم بتعيط و بعد ما خلصت رجعت تاني و كملت شغل تحت نظر عدي.

غصون كانت شاكة بأن عدي بيخطط لحاجة و حاولت تتجاهل الموضوع لغاية ما في يوم عدي اتصل بيها و طلب منها انها تقابله.
غصون نزلت من عربيتها قدام المخزن المهجور اللي عدي طلب يقابلها فيه.
غصون دخلت لقت عدي واقف و مستنيها.
عدي: وحشتيني...
غصون: عايز ايه يا عدي؟!
عدي: عايز أقولك قدامك آخر فرصة ترجعيلي فيها لاما متلوميش غير نفسك بعد كدة...
غصون: تبقي غلطان لو فاكر إني برجع عن قرار قولته.
عدي: بس أحب أقولك حاجة.

غصون: خير؟!
عدي: لو مرجعتيش ليا النهاردة و حالا يبقي اقرأي الفاتحة علي روح أخوكي اللي تحت ايدي دلوقتي و مع رجالتي.
غصون(ببرود): عدي متخلنيش أنهي اليوم بدمك.
عدي: اعمليها.
فجأة غصون طلعت مسدس من ورا ضهرها و وجهته ناحية عدي اللي عمل نفسه متفاجئ.
عدي: جبتيه منين ده؟! المفروض اخاف يعني؟!
غصون: تخاف علي أبوك اللي ممكن أسجنه في أقل من لحظة لانه أختلس فلوس من شركتي و كمان بيعمل أعمال غير قانونية.

عدي: بيأخد فلوس من شركة ابنه متنسيش ان بينا شراكة.
عدي: اما بقي اعمال غير قانونية فهي بأسمك يعني اللي هيضر هو انتي يا غصون.
غصون: لعبتها صح يا عدي.
عدي: متقدريش تقتلني؟!
غصون: لو قولتلك إني جيت هنا مخصوص علشان اقتلك مثلا.
عدي: جربي.

غصون كانت مصوبة بمسدسها ناحية عدي و بتبصله بحدة، فجأة حصل صوت ورا غصون خلاها ترتبك و غصب عنها ضغطت علي الزناد و متعرفش حصل ازاي و امتي أن فؤاد بقي جثة مرمية في الأرض حواليها دم أثر الرصاصة اللي طلعت من مسدس غصون.
غصون شهقت و حطت ايديها علي بوقها و المسدس وقع منها علي الأرض و هي وقعت علي ركبتها أثر الصدمة.
عدي(ببرود): انتي اللي اختارتي.

غصون متعرفش رجعت بيتها ازاي و ايه اللي حصل و ايه اللي هيحصل اول ما دخلت وقعت في الارض.
صبا(بخضة): ست غصون.
صبا(بصوت عالي): عم توفيق.
توفيق: خير يا بنتي؟!
توفيق: لا اله الا الله ايه اللي حصل بس؟!
صبا: و الله ما أعرف.
غيث كان رجع من التدريب في الوقت ده و لقي غصون مرمية في الارض جري عليها بسرعة و حاول يفوقها.
غصون فاقت بعد فترة و بدات تعيط في حضن غيث...
توفيق: ست غصون.
غصون: ايه؟!

توفيق: عدي بيه و رجالته جم تحت.
غصون: مش عايزة أشوف حد.
غيث: حصل ايه يا غصون؟!
توفيق: مصمم.
غصون قامت مسحت دموعها و نزلت لتحت بغضب و راحت ناحية عدي زقته جامد...
غصون: عايز ايه مش كفاية اللي حصل؟!
عدي: جاي أقولك توافقي علي جوازي منك لاما نص ساعة و البوليس هيكون جه و في ايدك الكلبشات.
غيث: في ايه؟!
عدي: هو انت مشوفتش اللي حصل.
عدي: خد شوف.
عدي جاب فيديو عبارة عن قتل غصون لفؤاد.
غيث(بصدمة): غصون.

توفيق: ست غصون ده حقيقي؟!
غصون(بعياط): و الله ما اعرف حصل ازاي اللي كان قدامي عدي مش فؤاد.
عدي: عموما الفيديو زمانه وصل للبوليس دلوقتي. آخر قرار ايه يا غصون؟!
غصون: أبدا يا عدي لو عملت ايه مش هوافق عليك أبدا...
عدي: يبقي هضطر اتحفظ عليكي لغاية ما الظابط يجي.
عدي لسة هيروح ناحية غصون لقي قدامه توفيق و كام حارس من حراس غصون.

حراس عدي قعدوا يضربوا حراس غصون و عدي بيحاول يروح لغصون اللي حاضنة غيث جامد بخوف بس حراس غصون منعوه.
توفيق(بصوت عالي): اهربي يا غصون اهربي.
غصون(بخوف و دموع): لا...
توفيق(بصوت عالي): اهربي يا بنتي يلا بسرعة. اهربي.
غصون(بدموع): يلا يا غيث يلا.
غصون مسكت ايد غيث و بدأت تجري...
عدي(بصوت عالي): بتهرب يا اغبياء...
غصون كانت كل شوية تبص وراها لقت مجموعة من حراس عدي و عدي اللي لابسين بدل سودة بيجروا وراها.

غصون(بخوف): اجري أسرع يلا.
غصون و هي بتجري اتكعبلت و وقعت.
غيث(بخوف): غصون قومي يلا.
غصون رفعت رأسها بخوف لقت حراس عدي اللي بيجروا وراها بقوا قريبين منها,غصون قامت بسرعة و مسكت ايد غيث و طلعت تجري بأقصي ما عندها.
غصون لقت شارع ضلمة دخلته مع غيث و استخبوا فيه.
غصون(و هي بتنهج): اهدي اهدي.
غيث(بخوف): هيمسكونا؟!
غصون(و هي بتنهج): إن شاء الله لا بس انت متعملش أي صوت.

غصون لمحت الأشخاص اللي كانوا بيجروا وراها و هما واقفين قدام الشارع اللي هي فيه.
شخص1: شكلهم هربوا.
شخص2: هنعمل ايه؟!
عدي(بغضب): و ربي لاجيبك يا غصون و لو في آخر الدنيا.
شخص3: يلا نرجع...
عدي قعد يبص حواليه كتير بغضب علي أمل انه يلمح غصون بس معرفش رجع مع الباقي.
غيث: مشيوا يا غصون.
غيث(بقلق): غصون غصون.
غيث لقي غصون مرمية في الارض مغمي عليها...
Back.

غصون فاقت من ذكرياتها علي مغص في بطنها شديد حاولت تتماسك و تتحمل الوجع.

-في مكان تاني...
في بيت العربي.
عمر: احم يا حاج.
شهاب: عايز ايه يا عمر؟!
عمر: كنا متفقين انه بعد شهر بوسف و زينة هيتجوزوا.
شهاب: اه بس عدنان.
عمر: عدنان اول واحد هيرحب بالفكرة دي اكيد مش هيرفض ان أخته تفضل عانس كدة.
شهاب(بتنهيدة): طيب يا عمر.
زينب: عروستك لسة مردتش يا قاسم؟!
قاسم: لا وافقت يا امي بس قولت استني شوية تكون الامور هديت.

قاسم: و كمان حاسس ان في خير هيحصل لان عدنان من شوية اتصل بيا و طلب مني عنوان السجن اللي فيه غصون.
زينب: يا مسهل يا رب.
حنان: بس لو هي خرجت هنقبل بواحدة رد سجون يا شهاب.
شهاب(بهدوء): و ممكن تطلع برئية و ساعتها مش هيبقي عندها و لا سابقة يا حنان.
حنان: يا ريت انا اتمني.
شهاب: جهز الفرح ياعمر انت و قاسم آخر الأسبوع و اتفقوا مع يوسف.
عمر: تمام يا حاج.
عمر قام دخل لأوضة زينة غمز ليها.

عمر: خلاص وافق تتجوزي انتي و حبيب القلب.
زينة(بفرحة): بجد يا عمر؟!
اينة حضنت عمر جامد و هو باس رأسها.
زينة(بحزن): بس برضو.
عمر: ايه يا حزينة؟!
زينة(بحزن): غصون مش هتبقي موجودة حرام زعلانة أوي.
عمر: إن شاء الله هتطلع.
زينة: بس...
عمر: متنكديش علي نفسك يا زينة.

جه ميعاد الفرح و كان الكل مبسوط بفرح زينة و بيظبطوا ليه بقالهم ليالي.
زينة(بابتسامة): شكلي حلو؟!
حنان: قمر يا بنتي.
زينة كانت لابسة فستان باللون الأبيض بكم و طويل و واسع و عليه فصوص كتيرة و لبست جذمة بيضاء و لبست حجاب نفس لون الفستان و لبست تاج شيك يزين رأسها و حطت مكياج خفيف جدا.
زينة خرجت بره أوضتها و معاها عهد و حور صاحبتها لقت قدامها عدنان و عمر و قاسم بأحلي طلة ليهم.

التلاتة راحوا ناحيتها حضنوها و باسوا رأسها.
عمر: خلي بالك من نفسك.
قاسم: خليكي دايما مبسوطة.
عدنان: لو في يوم احتاجتي حاجة قوليلي و متقليش علي جوزك يا زينة أي حاجة عايزاها قوليلي يا قلب أخوكي.
زينة: ربنا يخليكوا ليا.
زينة حضنتهم هما التلاتة و راحت ناحية والدها و باست ايده و هو طبطب علي ضهرها.
شهاب: ربنا يحفظك يا حبيبتي.

زينة حضنت زينب و حنان و خرحت ليوسف اللي كان منتظر اللحظة دي من وقت طويل بعد كتب الكتاب.
يوسف جري علي زينة حضنها جامد و باس رأسها.
يوسف: طلبتك كتير من ربنا و اخيرا رزقني بيكي.
يوسف: ربنا يخليكي ليا.
زينة(بدموع): و انت كمان.
حضروا فرحهم اللي طبعا كان زي فرح غصون و عندنان في الشارع و الكل مبسوط و بعدها يوسف خد زينة و رجع بيته مع والدته عفاف.
عفاف: خشي يا حبيبتي انتي و جوزك.
زينة: اساعدك في حاجة؟!
عفاف: لا.

يوسف: تعالي يا زينة.
يوسف مسك ايد زينة و دخل أوضتها و زينة كانت متوترة من وجود يوسف معاها في نفس الاوضة.
يوسف: هطلع عقبال ما تغيري هدومك.
زينة: تمام.
يوسف خرج و زينة قامت غيرت هدومها و نادت ليوسف اللي دخل ليها و باس رأسها.
يوسف: تقومي تتوضئ علشان نصلي.
زينة: حاضر.
زينة اتوضت و لبست اسدال الصلاة و صلت مع يوسف و يوسف كان مبسوط انها خلاص بقت معاه.

يوسف(بابتسامة): اكتر حاجة بشكر عليها ربنا هو وجودك في حياتي يا زينة...
زينة: و انا كمان.
يوسف حضن زينة جامد و باس خدها و...

عدت أيام تانية علي وجود غصون في السجن و رفضت كل زيارة كانت بتجيلها لغاية ما كانت هتتعرض علي المحكمة تاني فخرجت.
نور(بدموع): غصون.
نور جريت علي غصون حضنتها جامد و قعدت تعيط.
رامي: بس يا عيوطة.
رامي باس رأس غصون و غصون لمحت غيث اللي بيبصلها بعتاب نزلت دمعة منها علي خدها غيث جري عليها و حضنها جامد.
غصون: براحة.
غصون حضنت غيث جامد و باست رأسه.
غصون: عامل ايه؟!
غيث: لو كنت اهمك كنتي قبلتي تشوفيني.

رامي(بهدوء): مش وقته يا غيث.
ضابطة: يلا يا اختي اركبي.
غصون ركبت في عربية الترحيلات و وصلت للمحكمة نزلت و دخلت مع الباقي و طبعا كان في صحافة و غصون رفضت ترد علي أي سؤال و دخلت المحكمة مع رامي و نور و غيث و مراد.
غصون و هي داخلة لمحت آخر شخص ممكن تتوقعه أنه يجي و يحضر الجلسة...