رواية حارة العشق للكاتبة سلسبيل كوبك الفصل الثامن عشر
عدنان مسح دموع غصون و مسح علي شعرها بهدوء و سابها و خرج بره الشقة و نزل ركب عربيته و ساق و هو ماشي لمح يوسف قطع عليه الطريق بعربيته.
عدنان(بهدوء): اركب يا يوسف.
يوسف: اسطا عدنان في حاجة؟!
عدنان(بهدوء): اركب.
يوسف ركب جمب عدنان في عربيته و عدنان ساق بصمت ناحية مكان شبه فاضي و وقف العربية.
عدنان نزل من عربيته و يوسف نزل وراه و قرب منه.
يوسف: في حاجة يا اسطا عدنان؟!
عدنان(ببرود): بقولك ايه يا يوسف؟! تفتكر لما أثق فيك و أدخلك بيتي ده معناه ايه؟!
يوسف(بتوتر): انا عملت حاجة يا اسطا عدنان؟!
عدنان(بحدة): اومال لما تحط عينك علي أختي ده اسميه ايه؟!
يوسف لا رد. بص في الارض باحراج من كلام عدنان.
يوسف: انا عمري ما بصيت للست زينة نظرة مش كويسة انا أمي ربتني ان الايد اللي تتمدلي معضهاش. و انا حافظت علي الست زينة من نفسي و مخونتش ثقتك يا اسطا عدنان انا كنت بخاف احط عيني في عينيها اه لكني بحبها انا لو كنت وحش و اعرف ان الست زينة بتحبني كنت استغلتها بس انا معملتش كدة.
يوسف: انا معملتش حاجة غلط انا حبيت حتى انت يا اسطا عدنان حبيت الست داليا و وقفت قدام الحاج شهاب وكانت لاول مرة تعارض الحاج شهاب.
عدنان غمض عيونه بغضب و فتحهم و لف ليوسف و قرب منه,يوسف بص لعدنان بثقة معرفش جابها منين.
عدنان مسك يوسف من التي شيرت بتاعه.
عدنان: هتقدر تعيش أختي في المستوي اللي هي عايشة فيه دلوقتي؟!
يوسف: لا بس انا هعمل كل حاجة أقدر عليها علشان خاطر أخليها مبسوطة و بتضحك.
عدنان: انا و الحاج شهاب هننتظرك بكرة بليل الساعة 9 تتقدم انت و والدتك و ساعتها نشوف رأي الحاج و العروسة.
يوسف: طب و رأيك انت؟!
عدنان(برفعة حاجب): لسة معرفتهوش.
يوسف: طب و عمر؟!
عدنان: الكلمة كلمة الحاج شهاب يا يوسف.
عدنان ساب يوسف و ركب عربيته و بدأ يسوق ناحية الورشة بتاعته و ساب يوسف يرجع لوحده مشي,تليفون عدنان رن.
الخط اتفتح.
عدنان(بضيق): خير يا داليا؟!
داليا: أنت فين؟!
عدنان: ما كان ما انا موجود.
داليا: بنتك تعبانة أوي.
عدنان(بقلق): خير مالها؟!
داليا: داخل عليها دور برد.
عدنان(بهدوء): الحقي وديها حاجات دافية و هي هتخف يا داليا و لو دي الحجة اللي انتي ناوية تطلعي بيها الايام الجاية فانسي ان بنتي تبقي نقطة ضعفي يا داليا.
داليا(بانفعال): انت مش عايز تفهم ليه أننا بنحب بعض ليه بتكابر البنت محتاجانا مع بعض.
عدنان: لما أرجع نبقي نتكلم في النقطة انا دلوقتي مش فاضي...
داليا(بحدة): ماشي يا عدنان بس قبل مصلحتي و مصلحتك شوف مصلحة بنتك فين.
داليا قفلت مع عدنان و عدنان ساق ناحية الورشة بتاعته و نزل من عربيته و دخل الورشة.
عدنان: ايه الأخبار يا خضير؟!
خضير: الحمدلله كله ماشي يا اسطا عدنان.
عدنان: ورشة الخياطة فيها مشاكل؟!
خضير: الست سمر جت من شوية و قالت ان في تلت ماكينات باظوا...
عدنان: أتصل بحد من الصيانة يروح يصلحهم.
عدنان: و الورشة دي ناقصها حاجة؟!
خضير: شوية قطع غيار.
عدنان: طيب اطلب كل حاجة و قولي الحساب كام في الاخر...
خضير: أوامرك يا اسطا.
عدنان: واقف كدة ليه يا عصفورة؟!
عصفورة: في ورقة ليك.
عدنان: وريني.
عدنان مسك الورقة من عصفورة لقي فيها قلبين و حرف الA...
عدنان(بتنهيدة): الصبر من عندك يا رب.
عمر: سلام عليكم.
عدنان(بضيق): ما هي ناقصة خير يا عمر؟!
عمر(برفعة حاجب): نسيت اتفاقنا؟!
عدنان: لا منستش تعالي جوا نتكلم.
عمر مشي مع عدنان لجوا الورشة و عدنان قعد و جمبه عمر.
عدنان: طلباتك؟!
عمر: 20 باكو.
عدنان: ليه؟!
عمر: ملكش دعوة.
عدنان: و انا اوديك ليه مبلغ كبير زي ده و يا عالم هتصرفه في الحلال و لا في الحرام.
عمر: لا انت هتوديني لان ده اتفاق و مش هتخلف بيه غير إني هسدد بيها ديون حد.
عدنان: وديني يومين أفكر...
عمر: طيب يومين بس أكتر من كدة لا.
عدنان: ماشي.
-عدنان عنده أكتر من ورشة في مجالات مختلفة.
عمر: اه و أبقي سلملي علي غصون.
عدنان(ببرود): عمر بلاش تبقي كدة.
عمر ساب عدنان و مشي و عدنان قام يشوف شغله.
-في مكان تاني.
في بيت العربي.
زينب(بفرحة): حبيبي.
قاسم جري علي مامته حضنها و باس رأسها و ايديها.
قاسم: وحشتيني أوي يا ست الكل.
زينب(بفرحة): أخيرا شوفتك كنت حاسة إني هموت قبل ما أشوفك.
عهد: مالك يا ماما كدة قلبتيها دراما ده هو غاب في حدود أسبوعين.
قاسم: بس يا بت انتي. انا مكنتش عايز أرجع علشانك و الله ده انتي قرف.
عهد: انا! ده انا قمر هو حد في جمالي.
قاسم: بس يا رخمة. اومال فين زينة عدنان عمتو بابا اهل البيت فين يعني؟!
يارا(بحماس): عمو.
يارا جريت علي قاسم اللي اتصدم من وجودها و خدها في حضنها جامد و باس خدها.
قاسم: حبيبة عمو بابي جابك؟!
يارا: لا مامي.
قاسم(باستغراب): داليا جت هنا؟!
داليا: أهلا يا قاسم.
قاسم لف و لقي داليا اتصدم و بعدها بص لزينب و عهد.
قاسم: منورة يا داليا.
داليا: شايفاك مش مرحب بوجودي. يارا حبت تشوف باباها اللي مش مهتم بيها بقاله شهرين و انا جبتها نفسيتها تعبانة هناك و هو هنا متجوز و مدلع نفسه.
قاسم(ببرود): و الله أنتي اللي اختارتي ده من زمان متجيش تعترضي دلوقتي يا داليا هانم.
قاسم(بابتسامة): ايه رأيك يا يارا هخش ارتاح و بعدها أصحي نلعب سوا.
يارا(بابتسامة): ماشي يا عمو.
قاسم: طيب يا حبيبة عمو.
قاسم: اومال فين زينة و عمتو؟!
زينة: انا هنا.
زينة راحت لقاسم اللي حضنها و باس رأسها.
عهد: يا سلام اشمعنا تحضنها و انا لا؟!
قاسم: رخامة و كمان انتي موحشتنيش خالص.
عهد: بقي كدة طيب...
قاسم: ايه هتعملي ايه يعني؟!
زينب(بضحك): خلاص يا عهد بقي.
عهد: طبعا ما هو حبيب أمه.
قاسم: أمي ملكيش دعوة بيها.
عهد: انت ليه رخم؟!
قاسم: ملكيش فيه...
زينب: تحب اجهزلك الغداء؟!
قاسم: لا مش دلوقتي. اومال فين عدنان و بابا علشان عايزهم في موضوع...
زينب: موضوع ايه؟!
عهد: اه صح موضوع ايه؟!
قاسم: انتي بالذات مش هقولك، هدخل اريح يا امي.
زينب: طيب يا حبيبي لما يجي عدنان هقوله انك كنت عايزه.
قاسم: ضروري يا ماما حتى لو نايم صحيني...
زينب: طيب.
يارا: مامي عايزة أروح لبابا.
داليا(بخبث): طيب يا حبيبتي تعالي نلبس و نروحله.
زينة: تروحي فين يا داليا عدنان مبيحبش كدة.
داليا: يارا هي اللي عايزة تشوفه. عن اذنكم بقي.
داليا و يارا كل واحدة فيهم غيرت هدومها و خرجت بره البيت...
عهد: شبه علبة الالوان البت دي ربنا يأخدها.
زينب: حرام تدعي علي حد يا عهد...
عهد: يا ماما دي رخمة أوي يا ماما. هتخرب بيت عدنان تاني.
زينة: هي يومين و ماشية نحاول نستحمل اليومين دول...
زينب: انا هروح اشوف عمتكم هي تعبانة شوية هطمن عليها كدة.
عهد: طيب.
-في مكان تاني...
عند غصون.
غيث بدأ يفوق و غصون مسدت علي شعره ببطء و باست رأسه.
غصون: انت كويس دلوقتي؟!
غيث(بخفوت): الحمدلله.
غصون: ايه اللي حصل يا غيث؟!
غيث(بتوتر و خفوت): لا محصلش حاجة معرفش.
غصون: انا آسفة إني سيبتك هنا لوحدك...
غيث(بخفوت): متعتذريش يا غصون عادي.
غيث: و كمان ما انا كويس أهو قدامك الحمدلله.
غصون(بابتسامة): الحمدلله. حاسس بأيه دلوقتي؟!
غيث: أحسن طالما أنتي جمبي.
غصون: ثبتني ثبتني.
غصون: قوم أغسل وشك عقبال ما أقوم أحضر غداء.
غيث: طيب.
غصون قامت دخلت المطبخ بدأت تشوف هتعمل أكل ايه لقت الباب بيخبط راحت ناحية الباب و فتحته لقت منار اللي خدتها بالاحضان و البوس...
غصون: خلاص خلاص.
منار: وحشاني يا بت.
منار: يا مصيبتي ايه اللي عمل فيكي؟!
غصون: حادثة بسيطة.
منار: و ايه اللي جاب الحرباية داليا هنا؟!
غصون: انتي شوفتيها فين؟!
منار: كانت راحة ورشة اسطا عدنان...
غصون: عدنان!
منار: أيوه انتي متعرفيش هي مين؟!
غصون(بضيق): أعرف طليقة عدنان.
منار: بس انتي لازم تخافي علي نفسك.
غصون: اشمعنا؟!
منار: هي مخلفة و بيربطهم بنت اما انتي لا يا غصون لازم تخلفي من اسطا عدنان علشان ساعتها لو لفت حواليه ميقدرش يطلقك.
غصون: و الله يا منار مبيهمنيش الكلام ده كله...
منار: علشانك هبلة. و كمان هي خلفت البنت انتي خلفي الواد...
غصون: انتي بتفكري ازاي يا بنتي؟!
غصون: انا مش نعمل حاجة من دي سيبي المركب تمشي زي ما هي.
منار: دي لابسة لبس يوقع أجدعها شنبات.
غصون(بضيق): منار انتي جاية تنكدي عليا.
منار: بتغيري عليه؟!
غصون(بضيق): مش جوزي؟!
منار: يبقي تنزلي دلوقتي و متسمحيش ليها تأخده منك.
غصون: انتي بتقولي ايه و كمان لا عايزة أعمل أكل لغيث لانه تعبان.
منار: يا حبة عيني تعبان انا هعمله اكل انتي انزلي.
غصون: ل.
منار شدت غصون و خرجتها بره الشقة.
منار: متسمحيش ليها تأخده منك بالساهل كدة اتحركي من مكانك...
منار: سمعاني يا غصون؟!
غصون: يا بنتي ان.
منار قفلت في وش غصون الباب و هي بتضحك و غصون اتصدمت و بصت حواليها و بعدها بدأت تمشي بره البيت و هي مترددة.
منار: غيث يا غيث...
غيث(بتعب): نعم.
منار: يا حبة عيني ده انت باين انك تعبان اوي هخش أعملك شوربة و لسان عصفور.
غيث: اومال فين غصون؟!
منار: راحت تعمل حاجة ضروري و جاية.
غيث: حاجة ايه؟!
منار: تعالي معايا المطبخ و انا بعمل الاكل احكيلك...
غيث: طيب.
عند غصون.
غصون وصلت للورشة بعد فترة و بدأت تدخل.
غصون: احم لو سمحت عدنان موجود؟!
خضير: مين؟!
غصون: انا ابقي غصون مراته.
خضير: أهلا و سهلا يا ست غصون اتفضلي اتفضلي هو آخر الممر ده ادخلي يمين هتلاقي أوضة هو موجود فيها بس معاه بنته...
غصون: عارفة.
غصون مشيت زي ما خضير قالها و وقفت قدام المكتب كانت هتدخل بس وقفت تسمع الاول...
داليا: تعرف شكلك متغيرش عن زمان لسة وسيم زي ما أنت.
عدنان(ببرود): مش موضوعنا يا داليا.
يارا(بابتسامة): بابي الشيكولاتة دي حلوة أوي.
عدنان: لما تخلصي هجبلك تاني.
داليا: كفاية شيكولاتة هتتعب...
داليا: بس مقولتش ليا لسة بتحب الشيكولاتة و لا؟!
عدنان(ببرود): داليا كل واحد بقي ليه حياته متقرفنيش بيكي و متفضليش تسألي كتير.
يارا(بدموع): بابي ليه مش بتحب مامي؟!
عدنان(بابتسامة): مين قال يا حبيبتي اني مش بحب مامي كفاية بس انها خلفت ليا قمر زيك كدة.
عدنان باس رأس يارا و هي كملت اكل الشيكولاته و الحاجات الحلوة اللي عدنان اشتراها ليها.
داليا: بتحب مراتك؟!
غصون فتحت الباب في اللحظة دي و عدنان اتصدم من وجودها.
عدنان(بقلق): غصون.
عدنان نزل يارا من علي رجله و قرب منها.
عدنان: غيث كويس؟! في حاجة حصلت؟!
غصون: لا مفيش بس جيت أقعد مع جوزي شوية في مشكلة؟!
داليا(بغيظ): و هي لازم دلوقتي و كمان من امتي و عدنان بيقبل ان حد يجي يقعد معاه في الشغل.
غصون: معلش بقي يا روحي أصل انا مش أي حد و عدنان حبيبي مش بيضايق من وجودي هنا خالص...
عدنان رفع حاجبه لغصون اللي بصت بعيد عنه بتوتر.
داليا: بس عدنان كان دايما بيرفض اجي هنا و أقعد معاه.
غصون: ده علشان انتي يا حبيبتي اما انا غير.
غصون قربت من عدنان و مسكت ايده.
غصون: معلش بقي عايزة جوزي في كلمة يا داليا.
داليا(بغيظ): انت هتسمحلها تهيني بالطريقة دي يا عدنان؟!
عدنان(بهدوء): انا شايف انها مغلطتش في حاجة.
داليا(بغيظ): طيب يا عدنان.
داليا مسكت شنطتها و مسكت ايد يارا و خرجت بره الورشة كلها و رجعت البيت...
غصون لاحظت انها لسة ماسكة ايد عدنان كانت هتبعد بعيد عنه بس عدنان شدها ناحيته...
عدنان: ممكن أفهم ايه اللي عملتيه ده؟!
غصون كانت متوترة من قرب عدنان و بتبص في كل حتة غيره.
عدنان(بحدة): غصون ردي عليا و بصيلي.
غصون(بانفعال): ايه كنت عايزني اسيب طليقتك هنا و تفضل تتلزق فيك زي ما بتعمل.
غصون(بتريقة): تعرف شكلك متغيرش عن زمان لسة وسيم زي ما أنت...
عدنان حاول ميضحكش بس مقدرش قعد يضحك علي شكل غصون و هي بتقلد داليا و غصون بصتله بضيق من ضحكهُ عليها.
غصون(بضيق): علفكرة مش مضحك.
عدنان: غيث عامل ايه دلوقتي؟! قدرتي تسيبيه؟!
غصون(بتوتر): ما هو منار جمبه و هي اصلا اللي جابتني هنا.
عدنان(برفعة حاجب): منار!
غصون: أه.
غصون(بانفعال): اياك تقرب.
عدنان وقف مكانه و غصون رجعت لورا كذا خطوة.
غصون: الضحكة اللي علي وشك دي عارفاها كويس رخمة كدة و سمجة.
عدنان(برفعة حاجب): انتي عبيطة يا بت؟!
غصون: انا همشي.
عدنان: غصون ايه اللي جابك هنا لما عرفتي ان داليا طليقتي هنا؟!
غصون وقفت مكانها متوترة من سؤال عدنان.
غصون: انا هروح لغيث.
عدنان مسك غصون من دراعها و بصلها في عينيها.
عدنان: مجاوبتيش.
غصون: و انت برضو مجاوبتش. لسة بتحبها؟!
عدنان: ايه جاب السيرة دي دلوقتي؟!
غصون: زي ما أنت سألت فانا سألت و قبلك كمان من حقي أنك تجاوب علشان انا كمان أجاوب.
عدنان ساب دراع غصون و غصون سابت عدنان و خرجت بره الورشة كلها و رجعت لبيتها القديم.
منار: ها عملتي ايه؟!
غصون: معملتش حاجة...
منار: ايه؟! لا اقعدي احكيلي.
غصون: عايزة إيه يا منار؟!
منار: مالك حصل ايه؟!
غصون: هو عدنان كان بيحب داليا أوي؟!
منار: هو كل اللي أعرفه انه كان بيحبها بس هو اتجوزك انتي و اسطا عدنان مش هيظلمك معاه اكيد.
غصون: فين غيث؟!
منار: كل و بعدها دخل ينام.
غصون(بضيق): انا السبب انا اللي مكنتش مهتمة بيه.
الباب خبط.
غصون راحت فتحت لقت عم سليمان السواق...
غصون: عمو سليمان.
سليمان: ازيك يا بنتي؟! انا جايلك من طرف رامي.
غصون بصتله و بعدها بصت علي منار.
غصون(بصوت واطي): وطي صوتك شوية محدش عارف أي حاجة.
سليمان: رامي بيه باعتلك الفلوس دي و الجواب ده.
غصون(بابتسامة): شكرا.
سليمان: و بيقولك متحاوليش تتصلي بيهم دلوقتي علشان في مراقبة عليهم.
غصون: تمام. هما أحوالهم ايه؟! و نور؟!
سليمان: ست نور بخير و مراد بيه بيشتغل مع رامي بيه في شركتك و شركتهم.
غصون: و عدي جه الشركة؟!
سليمان لا رد.
غصون: قول يا عم سليمان.
سليمان: كل يومين يروح ليهم الشركة و يهددهم.
غصون بصت لسليمان بحزن علي الحال اللي صحابها فيه بسببها.
سليمان: و رفع سلاحه علي رامي.
غصون شهقت بصدمة و منار جت وقفت.
منار: في حاجة يا عم سليمان؟!
سليمان: لا مفيش بس الست غصون كانت ناسية حاجة ليها لما جبتها الحارة دي.
منار(برفعة حاجب): و انت جاي ترجعها دلوقتي؟!
سليمان: كنت مشغول يا منار كنت مشغول. عن اذنك يا ست غصون.
غصون(بابتسامة): مع السلامة.
سليمان مشي و غصون كانت لسة هتقفل الباب طلعت أم عبده من شقتها و حطت ايديها علي وسطها.
ام عبده: ايه يا حبيبتي الفلوس و الجواب بتوع سي رامي ده كمان.
غصون بصتلها بصدمة و سيطر عليها الذهول من تصنت ام عبده.
منار: رامي! مين رامي ده؟!
ام عبده: اسألي الغندورة.
غصون(برفعة حاجب): و انتي مالك مين رامي و لا مين مش رامي و بطلي العادة السيئة بتاعت الناس الفاضية اللي زيك.
غصون: يلا يا منار ده ايه القرف ده؟!
غصون قفلت الباب و ام عبده واقفة و دخلت مع منار.
منار: حكايتك ايه يا غصون؟! في زي حاجة مخبياها.
غصون: مفيش.
منار: حد باعتلك الفلوس دي صح؟!
غصون: لا دي فلوسي بس نسيتها مع عمو سليمان.
منار: طب هقولك كلمتين قبل ما امشي لما وقفتي معايا اول ما جيتي الحارة استجدعتك و شيلتها جِميلة تتردلك في يوم من الايام بس لما عاشرتك فترة حسيتك اختي و مش اي اخت اخت لو طلبت عيوني مترددش لحظة و الله ما بكدب عليكي.
منار: عايزة أقولك اني هنا مهما قولتي عمري ما اطلع سرك لحد ابدا لو هيقطعوا رقبتي.
منار: علشان كدة انا هستناكي انتي اللي بنفسك تيجي تحكيلي.
غصون(بابتسامة): شكرا يا منار شكرا علي كل حاجة عملتيها معايا من ساعة ما دخلت انتي الوحيدة اللي قدرت اثق فيها و طلعتي قد الثقة و انا ممتنة للظروف اللي عرفتني عليكي و علي ناس طيبة غلابة هنا.
غصون حضنت منار و منار حضنتها و دمعت...
منار: بس بقي كدة هعيط و هقلبها نكد و هي مش ناقصة.
غصون(بضحك): خلاص.
منار: حاولي تقربي من اسطا عدنان انا متأكدة انك هتقدري تأخدي قلبه و بسهولة من الحرباية داليا.
غصون: هو عمو عيسي عامل ايه؟!
منار: بيسلم عليكي.
غصون: الله يسلمه.
منار: همشي انا و من فترة لفترة هبقي اجيلك.
غصون: ماشي و ابقي خلي بالك من غيث.
منار: عيوني. يلا همشي انا.
منار سابت غصون و خرجت بره الشقة و رجعت بيتها,غصون قعدت بتعب علي الكنبة و بتفكر في حال غيث.
عدي وقت كبير علي غصون و هي قاعدة و غصب عنها نامت و فاقت مخضوضة علي صوت الباب.
غصون قامت و راحت فتحت الباب لقت عدنان و ماسك في ايده كذا كيس.
عدنان: مش هتوسعي و لا ايه؟!
غصون(بنوم): ادخل.
عدنان دخل و قفل الباب و غصون رجعت قعدت علي الكنبة و في عيونها باين النوم.
عدنان: اومال فين غيث؟!
غصون بصت حواليها و بعدها بصت لعدنان.
غصون(بنوم): معرفش.
عدنان ضحك علي غصون و سابها و دخل لأوضة غيث بعد ما خبط دخل لقي غيث بينشف وشه.
عدنان: ازيك.
غيث: كويس انك جيت علشان تأخد غصون و تروحوا شكلها مجهد أوي و عايزة تنام.
عدنان: بس انا عايز اتكلم معاك.
غيث: قول.
عدنان(بصوت عالي): غصون جهزي العشاء لينا احنا التلاتة.
غصون(بنوم): اه حاضر.
غصون كملت نوم و عدنان قفل الباب و قرب من غيث اللي اتوتر من نظرات عدنان.
عدنان: أكيد انت عارف انا عايز اتكلم معاك في ايه صح و لا اقولك؟!
غيث: لا معرفش عايز ايه؟!
عدنان: الدكتور قال انك اتعاطيت.
غيث(بتوتر): قصدك ايه انا مأخدتش حاجة.
عدنان قرب من غيث و حط ايده علي كتفه.
عدنان: صدقني مش هأذيك أكيد انا بتكلم معاك علي انك اخويا الصغير فيها ايه دي و الاخ الكبير المفروض ينصح أخوه لو شافه بيعمل حاجة غلط.
غيث: كنت مصاحب زياد و غصب عني شربت معاه مرة و هو مشي انا تعبت.
عدنان: هي مرة بس صح؟!
غيث: أيوه.
عدنان: طب مش عايزك تمشي مع زياد ده تاني.
غيث: بس.
عدنان: مفيش بس انت شوفت حصلك ايه بسببه اكيد مش هتروح تصاحبه تاني و بعد كدة مش هتخبي عليا حاجة.
عدنان: مفهوم؟!
غيث: اه بس هو انت قولت لغصون؟!
عدنان: أكيد مش هقولها حاجة زي دي. كفاية انها مشيلة نفسها ذنب أنك تعبت.
عدنان: لو مش خايف علي نفسك خاف علي أختك يا غيث.
غيث(بابتسامة): شكرا.
غيث حضن عدنان و عدنان طبطب علي كتف و خرج لبره لقي غصون زي ما هي نايمة.
عدنان قرب من غصون و بدأ يصحيها بس مصحيتش.
غيث(بقلق): غصون.
عدنان: شكلها غيبوبة سكر.
غيث: الاقراص بتاعتها.
عدنان: روح جيب ماية بسكر بسرعة.
عدنان بدأ يضرب غصون علي خدها بخفة بس مفاقتش غيث جاب لعدنان الماية بسكر و عدنان بدأ يشرب غصون اللي فاقت بعدها بشوية.
غيث(بتنهيدة): الحمدلله.
غصون(بتعب): حصل ايه؟!
عدنان: غيبوبة سكر.
غصون قامت اتعدلت و بصتلهم.
غصون: مالكوا؟!
غيث: كنا خايفين عليكي أوي؟!
غصون: كنتوا!
عدنان(بحدة): يلا يا غصون نمشي غيث بقي كويس و كمان في ضيوف جايين يلا.
غيث: روحي مع عدنان يا غصون.
غصون: طيب.
عدنان: ابقي كُل و اهتم بنفسك يا غيث انا جبتلك اكل يكفيك. يلا يا غصون.
عدنان ساب غصون و نزل لتحت و غصون قربت من غيث حضنته و باست رأسه.
غصون: خلي بالك من نفسك و اتصل بيا علطول لو حصلت حاجة. و اه في فلوس هناك علي الترابيزة خليهم معاك.
غصون: همشي انا يلا.
غصون باست خد غيث و سابته و نزلت لعدنان و ركبت معاه العربية و ساق لغاية ما وصل للبيت.
عدنان: اطلعي كُلي و حضري ليا لبس علشان في ضيوف جايين.
غصون: طيب.
غصون سابت عدنان و نزلت من العربية و دخلت البيت و لسة هتتكلم لقت عدنان وراها و محاوط كتفها بدراعه.
زينب: قلقتنا علي غصون يا ابني...
عدنان: معلش غيث كان تعبان فهي قعدت معاه يا أمي شوية.
يارا: بابي هو انت مبقتش تحبني و لا ايه؟! هي خدتك مني؟!
عدنان بص لداليا و فهم أنها محفظة يارا كام كلمة تقولهم,عدنان كان لسة هيتكلم لقي غصون نزلت لمستوي يارا.
غصون(بابتسامة): لا يا حبيبتي بابي بيحبك دايما و في كل وقت و كمان هو علطول بيحكيلي قد ايه هو ميقدرش يستغني عنك...
غصون: بس برضو بابي لازم يشتغل علشان خاطر يجيب فلوس و بالفلوس يأخدك و يخرجك و يجيبلك لعب.
يارا: بجد يا بابي؟!
عدنان: بجد يا عيون بابي من جوا.
زينب: انا نسيت أقولك يا عدنان قاسم جه و عايزك ضروري.
عدنان: حاضر يا امي بس هو فين الحاج ضروري؟!
زينب: في اوضته ليه في حاجة؟!
عدنان: بعد العشاء جايين ضيوف.
زينب: طيب يا ابني هلحق انضف، يا زينة زينة.
زينة: نعم يا ماما.
زينب: تعالي ساعديني بسرعة في ضيوف جايين و شوفي فين مقصوفة الرقبة عهد تيجي تساعدك.
زينة: حاضر.
عدنان: غصون اطلعي فوق و اعملي زي ما قولتلك.
غصون: حاضر.
عدنان سابهم و راح لأوضة شهاب خبط علي الباب و دخل لما سمع صوت والده.
شهاب: خير يا عدنان؟!
عدنان قرب من شهاب و باس أيده.
عدنان: اسف يا حاج مقصر معاك غصب عني.
شهاب: و لا يهمك. ها في حاجة؟!
عدنان: يوسف.
شهاب: يوسف مين ابن عفاف؟!
عدنان: اه يا حاج.
شهاب: ماله؟!
عدنان: جاي النهاردة.
شهاب: بمناسبة ايه؟!
عدنان: طالب ايد أختي زينة.
شهاب لا رد.
عدنان: هو جالي و طلب مني ميعاد فانا وديته الميعاد ده علي اساس اقول ليك بس انشغلت بتعب اخو غصون.
شهاب: انا هكبرك يا عدنان و مش هرفض القعدة دي بس انت مش شايف ان يوسف مش مناسب لأختك.
عدنان: انا لو كنت شايف انه مش مناسب لأختي يا حاج كنت رفضت من اول ما طلب بس يوسف راجل يُعتمد عليه و يشقي و يتعب بس يأكل أمه و يحميها و شخص زي ده لما يجي يتجوز هتبقي امه و مراته رقم واحد في حياته.
شهاب: هقعد معاه و نشوف. كلمت عمر او قاسم؟!
عدنان: لا يا حاج.
شهاب: طيب شوف قاسم فين و قوله.
عدنان: حاضر عن اذنك.
شهاب: ابعتلي زينب.
عدنان: حاضر.
عدنان خرج و قال لزينب تروح لشهاب,عدنان دخل أوضة قاسم.
قاسم: من غير ما تخبط يعني.
عدنان: اخويا يعني اخش براحتي.
قاسم: هعديها عموما كنت عايزك في موضوع مهم.
عدنان: و انا برضو قول عايز ايه؟!
قاسم: عايز أتجوز.
عدنان: عينك علي حد؟!
قاسم: أيوه.
عدنان: من هنا؟!
قاسم: لا القاهرة.
عدنان: بعد الجلسة النهاردة نبقي نفاتح الحاج.
قاسم: انت عايز ايه؟!
عدنان: في عريس جاي لاختك زينة النهاردة.
قاسم: مين؟!
عدنان: يوسف.
قاسم: اللي بيشتغل في الفرن!
عدنان: ماله الشغل في الفرن يا قاسم طب ما انا كنت بشتغل في الفرن.
قاسم: لا مش كدة بس بتأكد انه هو. عموما اللي انت شايفه اعمله انت اكتر واحد ادري بمصلحتنا كلنا.
عدنان ابتسم لقاسم و قرب منه و حط ايده علي كتفه.
عدنان: اسمها ايه عروستنا؟!
قاسم: عروستنا! لا يا حبيبي خليك في عروستك الجديدة ماسة ليا.
عدنان: غبي، جهز نفسك يلا.
قاسم: اه انا شوفت حاجة كدة.
عدنان: ايه؟!
قاسم: داليا.
عدنان: اممم مالها؟!
قاسم: ايه اللي جابها؟!
عدنان: بتقول اني وحشت يارا اوي.
قايم: بتقول اما الحقيقة؟!
عدنان: عمر و سوسن جابوها علشان يبعدوا غصون و يخربوا بيتي للمرة التانية.
قاسم(بتنهيدة): مش عارف عمر ده بيفكر ازاي.
عدنان: هطلع البس انا.
قاسم: طيب.
عدنان خرج بره اوضة قاسم و لقي زينة و عهد بيروقوا الشقة.
عدنان: عاش يا عهد.
عهد: هو مين اللي جاي؟!
عدنان(و هو بيبص علي زينة): و انتي عايزة تعرفي ليه يلا كملي ترويق و خلي بالك ليارا تتزحلق.
داليا: انا عايزة اتكلم معاك يا عدنان...
عدنان: هي يارا مش عليها مدرسة و لا ايه يا داليا؟!
داليا(بضيق): اه ما احنا هنمشي بكرة.
عدنان: طيب. عن اذنك.
عدنان ساب داليا و طلع لشقته دخل ملقاش غصون و سمع صوت الماية في الحمام عرف انها في الحمام دخل اوضته لقي في هدوم علي السرير و بدأ يغير هدومه.
عدنان لبس بنطلون أسود و فوقه قميص باللون الأبيض و لبس كوتشي باللون الأبيض و حط البرفيوم بتاعه و لبس ساعته السوداء.
عدنان كان واقف قدام المراية بيعدل نفسه غصون دخلت الاوضة شهقت لما لقت عدنان...
غصون: خضتني.
غصون(باحراج): اخرج علشان أغير هدومي...
عدنان: طيب.
عدنان لفت انتباهه الجواب اللي غصون خدته من عم سليمان غصون اتوترت لما لقته باصص عليه.
عدنان: ايه ده؟!
غصون جريت بسرعة علي الجواب و مسكته.
غصون(بتوتر): ده مش حاجة مهمة مجرد ورقة طلبات يعني انا و منار كتبناها.
عدنان(بهدوء): غصون مبحبش الكدب ايه اللي ورا ضهرك ده و ليه خايفة إني اشوفه؟!
غصون(بتوتر و انفعال): انا مش خايفة علفكرة و كمان مش بكدب.
عدنان حاوط خصون بايده و مسك منها الجواب و هي بصتله بخوف و بدأت عينيها تدمع...
غصون: سيبه مش حاجة مهمة قولتلك.
غصون مسكت الجواب و هو في ايد عدنان و عدنان بصلها بحدة.
عدنان(بحدة): طالما مش حاجة مهمة مش عايزاني أشوفه ليه؟! و لا مخبية عليا حاجة؟!
غصون: لا بس مكتوب حاجات يعني شخصية.
الجواب فضل بين ايدين عدنان و غصون و كل واحد باصص للتاني و عدنان عارف أنها بتكدب و هي خايفة ليقرأ اللي مكتوب.