رواية جريمة عشق فصول خاصة للكاتبة مريم نصار الفصل الثاني
آرين وقفت وقالت بجمود: - أوكي أنا بقى زعلانة منكم ولما يوصل باباكم هو كمان هيزعل منكم جدًا.
كيان بصت لآرين بحزن وقالت: مامي هو ده فستان كنزي بجد؟
آرين زعلت علشانها وقعدت ومسكت إيديها وقالت بحنان: - أيوة ياحبيبتي! ده فستان أختك، بس أنا متأكدة إنك مكنتيش تعرفي مش كده؟
كيان نزلت وشها في الأرض وهزت راسها: لأ مكنتش أعرف.
آرين مسدت على شعرها وقالت: - وبعدين يعني هو الفستان اللي هيخليكم حلوين أنتوا حلوين من غير حاجة، وكمان بابي لما اتصل وكلمني من يومين قالي متشتريش للبنات أي حاجة هو لما يجي هياخدنا ونشتري أجمل فساتين للعيد ليكم.
كنزي نزلت راسها في الأرض وقالت: بس أنا بحب فستاني عشان بابي دايما يقولي حلو عليكي ياكنزي.
آرين ابتسمت: خلاص البسيه ياحبيبتي، أختك كيان كده كده عندها فستان جميل قوي بابي بيحبه عليها هتلبسه مش كدا ياكيو؟
كيان هزت راسها: لأ مش فاكرة.
آرين: طيب بابي دايما يقولك بحب أنهي لون عليكي ياكيو؟
كيان حطت إيدها تحت دقنها بتفكر وشهقت بفرحة وقالت: - الأحمر أيوة فستاني الأحمر المنفوش زي العروسة.
آرين: أيوه هو ده فعلًا وأنا مجهزة لكل واحدة فيكم كل حاجة آدم بيحبها عليكم أوكي!
كنزي وكيان هزوا راسهم بفرحة: أوكي.
آرين: يلا كل واحدة تعتذر للتانية! ومسمعش فيكم حد يقول كدابة أو هتروحي النار؛ لأن كده حرام وغلط، ولو ناناه مريم الكبيرة سمعت بحاجة زي دي هتزعل جدااا، أنتوا عايزينها تزعل من كنزي وكيان؟
هزوا راسهم بسرعة: لأ لأ لأ.
آرين: برافو عليكم يلا سمعوني بقى الأختين الحلوين هيقولوا إيه.
كنزي ببراءة: سوري ياكيو أنا آسفة وأنتي مش هتروحي النار، أنتي هتبقى معايا في الجنة مع بابي ومامي وكل العيلة.
كيان: وأنا كمان آسفة ياكنزي وأنتي مش كدابة، أنتي أختي حبيبتي.
كنزي: خلاص لو عايزة الفستان خديه كده كده بابي بيحبنا من غير حاجة.
كيان: لأ خلاص، أنا هلبس فستاني الأحمر وأنتي البسي ده هنبقى حلوين قوي شبه ريبونزل أنا وأنتي.
كنزي ضحكت ببراءة: ماشي وأنا عشان متزعليش هديكي من الحاجة الحلوة اللي بابي هيجبهالي.
كيان: وأنا كمان. يلا نلبس بقى عشان بابي وحشني!
آرين مبتسمة بسعادة وأخدتهم في حضنها، وغمضت عينيها ونفسها تفتح تلاقي آدم واقف قدام عينيها؛ هي بتتقوى بيه.
فهد العدوي بغيرة: خلااااث ابعدوا عن ماما!
آرين ضحكت: وأخدته في حضنها معاهم وباستهم وقالت: يلا علشان الكل يلبس ويجهز.
فيلا مصطفى عزيز.
الكل متجمع حوالين مصطفى على كنبة الليفنج.
هنا: بتذمر. أنا متأكدة أنه ملقب منك ياولد أنت.
مصطفى: بصلها وقال. ياحجه انتي مالك ومالي من ساعة ما شوفتيني وانتي كرهاني. أنا واحد مريض ياعالم سيبوني في حالي.
هنا شهقت وقالت. ياحاجه؟ اااخ يناري منك أنت!
چود بقلق: مصطفى أنا چود يامصطفى ركز الله يخليك!
مصطفى هز كتفه وقال: مش فاكرك.
مريم خبطت على خده بخوف وقالت: مصطفى ياحبيبي أنا أمك حبيبتك، أنا روما أنت على طول تقولي كده.
مصطفى حاول يفتكر ومسك راسه وقال: بردو مش فاكر حاجة، أنا مين أنا عايز افتكر أنا مين!
كريم بغيظ: الله يخرب بيت الهندي! عليا النعمة بيمثل؛ واحد وقع على ضهره يقفد الذاكرة! ليه مخهُ في الفقره الخامسه؟ أنتوا هتجنوني!
مصطفى بيتألم وماسك راسه وقال: - جرا إيه ياجدع أنت من ساعة ما فقدت الذاكرة وأنت مش طايقني! هو أنت عندك عقدة وهتطلعها عليا!
ماتسيبني في اللي أنا فيه ياعم أنت. آااه ياااني ياترى أنا مين؟
أحمد ولا محمد محمود ولا مصطفى؟
متجوز ولا مطلق ولا يمكن سنجل بائس؟ مخلف ولا مش مخلف؟
كريم: متخلف. أنت متخلف!
مريم: وبعدين ياكريم! ده بدل ما تتصل بأبوك ونشوف هنعمل ايه في المصيبة دي.
كريم خبط كف على كف: لا اله الا الله. لا اله الا الله! أنتي ياماما بتصدقيه بردو رغم كل المقالب اللي معيشنا فيها العبيط ده! ياماما الواد ده عنده حالة نفسية لازم يروح بتعالج.
چود شهقت: هتروح أبو العزايم يامصطفى!
ليليان غصب عنها ضحكت.
مصطفى بص لهاندا وقال: وأنتي ياحلوة تبقى مين؟
هاندا كشرت عينيها وقالت: بااابي أنت مش عارفني!
مصطفى كشر عينيه وقال: - بابي! يااااه يا مانت كريم يارب. أنا طلعت بابي كمان!
طارق: بابا أنت نسيتنا بجد ولا بتشتغلنا؟
مصطفى بتعجب: بابا تاني؟ يااااه يامانت كريم يارب طلعت بابا تاني!
مريم مشوشة ومش قادرة تعرف ده مقلب ولا حقيقة.
چود هزت مصطفى جامد وقالت: - مصطفاااااه فوووووق بقى! أنا چود مراااتك. أنا تراب القمر يامصطفى الله يخليك ررررركز بقى!
كريم وليليان ومريم كشروا عينيهم بتعجب: تراب القمر!
مصطفى عقد حواجبه وقال بتعجب: - تراب الإيه؟ تراب القمر! وده يطلع إيه ده كمان؟
چود حست بالإحراج لكن قالت: إحم تراب القمر ده لقبي منك، أنت على طول بتقولي كده.
مصطفى بسخرية: بزمتك ده كلام يدخل العقل! فيه حد يقول لقب زي ده؟ أنتي مفكراني مجنون وهصدق اللي أنتي بتقوليه ده! أنا صحيح فقدت الذاكرة بس أنا لسه بعقلي يا آنسة أنتي ولا يا مدام! قولتي اسمك إيه؟
چود بحيرة: ينهار مالوش علاقة بأي حاجة في أي حاجة! هو ده بجد ولا حقيقي ولا اي بالظبط؟ مصطفاااااه فوووووق بقى!
أشرف داخل الفيلا راجع من صلاة العصر وقال: - السلام عليكم!
كلهم تنحوا ولفوا ليه وردوا بتلعثم: و. وعليكم السلام! إحم.
مصطفى قام بسرعة وجري عليه: وعليك السلام ورحمة الله وبركاته! جدو أشرف الغالي حمدالله على السلامة تقبل الله منك!
أشرف ابتسم: الله يسلمك يامصطفى، ومنك يسيدي!
الكل واقف وفاتح بقُه بدهشة مريم همست: يخربيت كدا عمرك ما هتتغير! كريم عنده حق.
ليليان: ده باينه مرار طافح استلقى وعدك بقى من چود.
كريم: مش قولتلكم بيمثل، ياريته فقدها أكتر واحد هيكون فرحان أنا والله.
أشرف بعدم فهم: هو في إيه؟
جود صكت على أسنانها وقالت: مصطفااااه!
أشرف اتفزع: بسم الله الرحمن الرحيم! إيه ياچود يابنتي في ايه؟
چود قبضت على إيديها وقالت بتوعد: - سلامتك ياجدو! أنا بس كنت عايزة مصطفى يطلع يغير البدلة وأنا هطلع معاه اجهزله هدومه.
مصطفى ضحك ببلاهة: لأ لأ مالوش لزوم أنا...
چود قاطعته بتهديد وحزم: قدامي يامصطفى!
مصطفى بص لمريم وهمس: الحقيني ياروما!
مريم رفعت حاجبها ومسكت راسها بتقلد مصطفى وقالت: - روما مين؟ مش فاكرة حاجة!
وضحكت بشماتة وقالت: أنت مكانك في مستشفى أبو العزايم.
سابتهم وراحت المطبخ بتضحك.
أشرف بحزم: هو في ايه؟
ليليان بسرعة: أنا هقولك كل حاجة ياجدو اتفضل استريح!
في جناح مصطفى
مصطفى بيجري من چود وطلع وقف على السرير وقال: - خلاص يابت ياجود استهدى بالله! خلاص ياوحش الكون!
چود حدفته بالمخدة وقالت: - خلاااااااص! دنا هقرقشك بسناني! بقى أنت تعمل فيا كده؟
وبتقلده: ياترى أنا أحمد ولا محمد ولا محمود ولا مصطفى؟ متجوز ولا سنجل بائس؟
أنا بقى هخليك مطلق وتعَول يامصطفى باشا! إن ماوريتك. انزل هنا انزززززل!
مصطفى: يابت أنا صايم فرهدتي أمي! يابت خلاص ده كان فقدان ذاكرة مؤقت ياعبيطة.
چود حطت أيدها في جنبها وقالت: - نعمممم فقدان إيه ياعينيا. مؤؤؤؤؤقت! أنا بقى هخليه دااااايم.
مصطفى خبط كف على كف وقال: - لا حول ولا قوة إلا بالله! هو الواحد مايعرفش يهزر في أم البيت ده؟ أروح أأجر ناس يعني علشان أهزر معاهم! ماخلاص ياست الكتكوتة. مش أحسن من الفقدان اللي بجد ولا إيه؟
چود بتريقة: يااااريت كان بجد! على الأقل كنت هعلمك من أول وجديد على أيدي. وروح ياخويا أجر ناس بس على الله يستحملوك!
الحمد لله اعترفت على نفسك إن مفيش عبيط يقول لمراته تراب القمر وتراب الزفت؛ علشان تعرف نفسك يابتاع كوثر يابتاع القردة!
مصطفى: لأ مسمحلكيش! كوثر هتفضل كوثر رغم أنف الحاقدين، واعملي حسابك تاني يوم العيد هنروح نزورها أنا وأنتي والولاد!
چود عوجت بقها ومردتش عليه.
مصطفى نزل ووقف قدامها: خلاص بقى يا تراب القمر! والله هي جات كدا مكنش في دماغي مقلب النهاردة، خلاص بقى العيد بكرة كل سنة وأنتي عيدي ياعم.
چود بصت بعيد وكاتمة الضحكة وقالت بتريقة: - لأ رومانسي قوي!
مصطفى بضحكة: أبدًا والله أنا شوفت كارت معايدة على النت ومكتوب عليه كل سنة وأنتي عيدي قولت أقولهالك وخلاص هههههههه.
چود صكت على أسنانها ومسكت المخدة وخبطتها في وشه.
مصطفى بضحكة: عنيفة أنتي!
في فيلا السيوفي، في الصالون.
طارق قاعد وقدامه سبت على الترابيزة ومتزين بالورد وأكياس قماش صغيرة بيحط فيها العيدية للأحفاد و مكتوب عليها عيد فطر مُبارك واسم كل حفيد في كل العيلة.
طارق نفخ بغيظ ومسك كيس وحط فيه مبلغ واتكلم بنرفزة: مش عارف أنا إيه اللي بعمله ده! لازم أسمع كلامها يعني! شغل حريم فاضية، ما كُنا بنحط في إيد العيل من دول العيدية ويعدها قبل ما يختفي من قدامي، جيل مهبب وحريم عايزة الوأد!
رنا ماشية في الصالة وسمعته وفتحت عينيها بدهشة وهمست: حريم عايزه الوأد!
لا اله الا الله الراجل ده كل شوية في حال! لما أروح أشوفه ماله ده كمان.
طارق: لأ وكمان كاتبين على الكيس اسم العيل بالكنية حمزة ياسين جمال، وجنات السيوفي، وروضة الجوهري، يسلام شغل جامد على أبوه! ده الشيطان متسلسل دلوقتي وبيسقف برجليه للحريم، أما خيبة والله!
رنا شهقت بهمس وقالت: هو بيكلم نفسه ولا بيعمل إيه ده؟
إحم. إيه ياطارق بتعمل إيه؟ ومالك شكلك مضايق ليه كفالله الشر!
طارق حدف الكيس في السبت وقال: - وأنا إيه اللي هينرفزني ياست الهوانم! مش انتي وأم مراد عايزين تفرحوا العيال؟ فرحوهم واجلطوني انا!
رنا: هييييه. ألف بعد الشر عليك يا أبو فهد!
وقعدت جمبه وقالت: - مالك بس هو أنا ولا أم مراد جينا جمبك ولا عملنا حاجه؟
طارق بنرفزة: أبدًا ياختي أنتوا ملايكة ماشيين على الأرض. حوشي يابت جناحاتك أنتي وهي بتخبط في وشي!
رنا ضحكت وقالت: إنشالله متحرم من خفة دمك يا أبو فهد بس وحد الله كده وفهمني.
طارق: أفهمك إيه ياولية أنتي؟ أنتي وهي بتخترعوا حاجات تافهة قال إيه! هنحط العيدية للأحفاد في كيس قماش ونسيبهم في السبت يدوروا على العيدية بمعرفتهم!
وأنا مال أمي أنا، أنا ناقص وجع دماغ!
رنا طبطبت عليه وقالت: - طيب خلاص. ده اللي مضايقك يعني؟ ولا تضايق نفسك ياحبيبي! أنا و رودي و كارما لما تيجي هنوزع العيدية في الأكياس، وبعدين ياطارق العيد فرحة ومريم قالت نفسها تفرح العيال بعد ما صاموا الشهر وشجعناهم، وقالت إن أبو مراد هيعمل كده وأحنا كلنا بعد صلاة العيد زي كل سنة هنطلع من المسجد على بيت العيلة هناك نقضي اليوم يبقى بقى هو يقدم العيدية كده وأنت لأ؟
طارق: آااه يختي! لأ أنا مش عايز أنا حر هو لما ابن العدوي يعمل حاجه لازم أعمل زيه؟
رنا بغيظ مكبت: آاه ياني منك! لأ أنا مقولتش كده وأبو مراد أصلًا بيبص للي يفرح أحفاده، وزي ما قولتلك دي فكرة مريم وعجبتنا كلنا وكل العيلة هتعمل كده، وأنت الأسد ماينفعش تبقى أقل من أي حد. ولا ايه يا أسد؟
طارق قام وقف وقال: - كُلي عقلي بالكلام ياختي كُلي! أنا رايح المسجد هقعد فيه أستغفر وأدعى ربنا بطولة البال وإني أتحمل صنف الحريم، وسعي كده!
رنا اتخضت واتحركت.
طارق سابها وماشي ورنا خبطت كف على كف.
طارق من غير ما يبصلها قال بسخرية: - ومتنسيش كيس عيدية للإمبراطور وأميرته!
فيلا خالد الشرقاوي، في جناح سيف وحياة
سيف بضجر: بقولك إيه ياحياة أنا راجع من الميناء تعبان وقرفان فأنتي اهدي كده واعقلي!
حياة بغيظ: والله! قرفان وتعبان! وأنا اللي الجو عندي ربيع وبديع مش كده؟
وأنا عاقلة مش شايفني مجنونة! مش عايز توديني المول قول مش هوديكي وخلاص، مالوش لازمة كلامك ده. أنت أصلًا مبقتش فاضيلي.
وحطت إيدها على بطنها.
سيف فك الجرافت ونفخ ومسح وشه وقال: - طيب اهدي وبطلي نرفزتك دي، ياحياة والله غصب عني؛ الفترة اللي فاتت كلها شغل متلتل على دماغي، وبابا سايب كل حاجة في الشركة عليا أنا والدنيا صيام، ووالله أنا خايف عليكي!
وكمان النهاردة المول هيبقى زحمة جدًا وأنتي حامل ياحبيبتى وفي آخر شهر وتعبانة.
حياة بعند: وفر خوفك لنفسك. أنا من حقي أختار لبس العيد بتاعي!
سيف: حقك طبعًا! وأنا هبعت أجيب ليكي موديلات فساتين هتعجبك جدًا، تختاري وأنتي قاعدة مرتاحة.
حياة بإصرار و شاروت صوبعها في وشه وقالت: - اعمل حسابك إننا رايحين المول بعد الفطار أوكي يا سيف ياشرقاوي! وإلا هقول لعمو خالد وهو مبيرفضليش طلب. سي يو!
وسابته وخرجت.
سيف مط شفايفه وقال: - سي يو! ماشي يابنت سليم بدر الدين أنتي حرة يكش تولدي في المول! أهو هيجي برزقه بردو.
الغروب جه وخلاص الكل بيودع شهر الرحمة والمغفرة، في اللي زعلان وعيونه كلها دموع بوداعه، وفي اللي فرحان لأنه رايح وسايب وراه فرحة لينا تجبر بخاطرنا، وفي اللي بيدعي من قلبه بالعتق والعفو.
كل الأطفال بتجري وبتلعب وبتودع الهلال وكلهم بيتفقوا هيعملوا أيه بكرة بعد صلاة العيد.
أميرة آدم قاعدة على سجادة الصلاة ورافعة أيديها وبتدعي بكل جوارحها، وسمعت حان الآن موعد صلاة المغرب، نزلت دموعها ويعالم هيكون في رمضان تاني في عمرها ولا خلاص كده.
خبطت زينب وقدمت ليها العصير والتمر وخرجت، مريم مسحت دموعها وقالت الدعاء وكسرت صيامها وكملت الدعاء ليها ولأهل المملكة وجميع المسلمين، نور فتحت الباب ودخلت ووراها رينو وكل بنات العيله وزينب وكل البنات. والأطفال من البنات.
تالين وقفت في المقدمة وصلت بيهم، ووقت السجود كل واحدة تاهت في دعائها بخشوع وذل وطلبت من ربنا كل امنياتها.
الكل خرج من المسجد وبيسلموا على بعض ووصلوا المملكة، وبدأ الكل يتجمع في حب آل العدوي الشباب في مكان قاعدين والسيدات في مكان لوحدهم.
آدم شاور ليهم: يلا بسم الله!
الكل بدأ يفطر لكن آدم قلبه مشغول على أحفاده، حتى مراد لاحظ وقال: إيه ياحج مبتاكلش ليه؟
آدم همس وقال: - أنت متأكد إن آدم و آركان خرجوا من المطار؟
مراد ابتسم وقال: - أيوة ياحج اطمن بالله متفكر كتير وكل يلا بسم الله!
آدم بهدوء: أنا لسه واخد علاج الضغط، هستنى شوية.
مراد ابتسم لخوف أبوه على حفيده.
مريم قاعدة على الفطار وسألت بتعجب: - الله! فين آرين وباري يابنات؟
تالين بتحط الأكل في الطبق لجدتها وقالت: - واقفين في الجنينة مستنيين أبيه آدم و آركان.
مريم بصت للسما وقالت: - يااارب تُسر قلوبنا بقدومهم ويوصلوا بالسلامة!
قدام باب الفيلا الداخلي
آرين واقفة وعينيها على بوابة الفيلا، وكانت لابسة فستان فيروزي رقيق وحجاب ونقاب أبيض، وماسكة فهد أبنها و كنزي وكيان واقفين قدامها منتظرين وصول الديزل.
باري واقفة جمبها وكانت لابسة فستان أزرق وحجاب أوف وايت وشايلة جنات وصقر واقف جمبها وقالت:
أنا خلاص هتجنن هما اتأخروا ليه؟
آرين نفخت بتوتر ولهفة: مش عارفة يا باري، بجد مبقاش عندي صبر، نفسي أشوفهم قوي. أنت فين بقى يا آدم!
بعد لحظات بوابة المملكة اتفتحت.
كنزي: فتحت عينيها بفرحة كبيره وصرخت وقالت: - باااااابي.
آرين رفعت عينيها بلهفه وهمست بدقة قلب: - آدم.
فيلا سليم بدر الدين.
سليم وفتون وآمان وجنى قاعدين على السفره بيفطرو.
فتون: بابتسامه، كل عام وانتم بخير ياحبايبي.
امان: أبتسم. وحضرتك بخير ياست الكل.
جنى: بحماس. وحضرتك بخير ياماما. أنا مبسوطه قوي إن ده تاني عيد ليا معاكم.
فتون: طبعاً ياحبيبتي انتي فرحة البيت كله ياجنى. وجبتي أجمل حفيد لينا ربنا يباركلنا فيه عُدي روح قلبي.
جنى: حبيبتي ربنا ما يحرمناش من وجودك انتي وبابا سليم.
فتون: بصت ل سليم وقالت. سليم أنت ساكت ليه؟
سليم: أبتسم وقال. بفطر ياروحي أنا مستمتع بمكرونة الصلصه البيضا وخصوصاً لو من إيدك. يبقى الصمت في حرم الجمال جمال. ولا إيه؟
فتون: ضحكت بسعاده. وقالت. بألف هنا، بس مش هتقولي بقى انت مخبي عليا إيه؟ بقالك يومين حاسه إن في حاجه مش طبيعيه.
سليم: مط شفايفه وقال أمم. حاجة إيه؟ أبدا مفيش أي حاجه.
فتون: بصتله بشرز/ آه وأنت بردو هتقول؟ لكن انا مسيري هعرف.
وبصت لابنها وقالت. أنت قولي يا آمان ياحبيبي، نزلتوا الشركه تلات ايام ورا بعض ليه؟ وكمان انهردا المفروض كان أجازه.
آمان: أيوه يا ماما أصل الم!
سليم: بص لامان بتحذير وهز راسه ليه لأ!
آمان: هز راسه بتفهم وقال. إحم أبدا دي مناقصه كانت مهمه جدا ونزلنا انهردا نشوف شوية شغل مهم كده. حضرتك عارفه القطاع الخاص مافيهوش إجازات كتير. عادي يعني. إحم.
فتون: أخدت قطعة مكرونه وبصتلهم وقالت بتوعد. لا بجد! ماااشي مسيري هعرف أنتوا مخبيين عني إيه؟
سليم: من غير ما يبصلها قال. أسبوع بالظبط وهتعرفي. ارتاحي ومتفكريش كتير.
جنى: همست لامان وقالت. حبيبي.
آمان: نعم ياحياتي.
جنى: هو احنا هنقضي العيد بكره فين؟
آمان: بياكل وقال. بابا قال إن الامبراطور عازمنا كلنا في مملكة العدوي أول يوم.
جنى: بانبهار. وااااو مملكة العدوي!
فيلا العدوي.
قدام الفيلا عربيه تبع شغل آدم و آركان وقفت. والشباب نزلوا. والعربيه اتحركت.
اركان: شال الشنطه ع ضهرو وقال. حمدلله ع السلامه يا ديزل.
آدم مراد: رفع الشنطه ع كتفه وقال. الله يسلمك.
اركان: يااااه قد ايه البيت بالمملكة بكل حاجه وحشاني.
هارون بيفطر وقام فتح البوابه و اسقبلهم وداخلين.
آدم مراد: عينيه بتراقب لآخر مرمى بصره وعايز يشوف ضيه بفارغ الصبر.
اركان: عينيه ف كل مكان بتدور على باري.
آدم مراد: ماشي في الجنينه وأخيراً لمح ضيه. وكنزه وكيانه. وضحك وشاور بايدية لبناته.
كنزي: فتحت عينيها بفرحة كبيره وصرخت وقالت.
باااااابي.
آرين: رفعت عينيها بلهفه وهمست بدقة قلب/ آدم. والضحكه مع الدمعه عرفت طريقها رغم فرحتها.
كنزي وكيان جريوا بسرعه على أبوهم. وصقر السيوفي جري وسبقهم ونط في حضن آركان وقال.
بابا باباا وحشتني قوي يابابا.
اركان: شاله ولف بيه وبيضحك وقال. ولا ياصقر ايه الحلاوه دي ياض. أنت اللي وحشني موووت.
آدم مراد: نزل الشنطه ع الأرض. ونزل ع ركبه وفتح أيديه لبناته.
كنزي وكيان بيجروا واترموا الاتنين في حضنه بمرح وحماس وشغف كبير.
كنزي: بسعاده باااابي بااابي
كيان: بتضحك وبتتنطت في حضنه وقالت. باااابي حبيبي.
فهد العدوي: بيفك ايدو من ايد آرين وعايز يجري يستقبل أبوه وخاله.
آدم مراد: شالهم الاتنين وقال باشتياق. وحشتوني قوي ياحبايب بابي.
اركان: قرب من باري.
باري: ضحكت بدموع وجريت استخبت في حضنه.
اركان: ضمها بحب كبير. وهمس ليها وقال. باري وحشتيني.
باري: بدموع الفرح. أنت كمان ي اركان وحشتني خالص. بجد انا فرحانه قوي إني شوفتك قدامي.
آرين: مش قادره تصبر أكتر من كدا. ورغم تنبيه آدم ليها متجريش في أي مكان. لكن جنون الحب كان أكبر من تحملها. وسمعت لصوت قلبها. وجريت وقالت بصوت مسموع. آدااام.
آدم مراد: على عكس غيرته الشديدة لكن استسلم وهو كمان من اشتياقه سمع لصوت لهفة قلبه ليها. ونزل بناته وقدم خطوتين. وفتح أيديه ليها وشالها في حضنه ولف بيها.
آرين: كلبشت فيه كأنها بتحلم وخايفه تصحى م الحلم.
آدم مراد: نزلها ومسك أيديها وبص في عينيها.
آرين: رفعت عينيها وبصت ليه وساكته.
آدم مراد: أبتسم، وقرب منها وباس جبينها وهمس ليها وقال.
ضي آدم.
آرين: غمضت عينيها. واترمت تاني في حضنه. وعيطت باحتياح وقالت.
اتاخرت قوي المرادي يا آدم، أنا مش عارفه اتقوى غير بيك.
آدم مراد: مسك وشها بأيديه وهز راسه ليها وقال. آرين العدوي متعيطش اتفقنا. وبعدين أنا لو مسافر وبعيد عندك بأميال جسمي بس هو اللي بعيد عنك، لكن روحي مش مفرقاكي لحظه واحدة.
ارين: ضحكت بدموع.
فهد العدوي: قاطع كلامهم. ومسك بنطلون آدم وقال. بابا بابا سيب ماما وكلمني أنا.
آدم مراد: ضحك وشاله وقعد يبوس فيه وضمه لقلبه. وكنزي وكيان كل واحده حاضنه ابوها والفرحة كملت بوجوده.
تالين بصت على الباب وقالت آرين وباري كانوا واقفين هناك. ثواني ياتيتة هروح أشوفهم يمكن أبيه آدم جه.
مراد الجوهري: دخل يجري وقال. ماما ناناه خالو آدم جه خالو آدم جه.
الكل سمع مراد الصغير.
مريم وفريحه ورينو وميرو وتالين قاموا بسرعه واتحركوا يستقبلوهم بلهفة قلب مشتاق.
آدم: قام بهدوء بلهفة متدراية.
مراد وفهد وسفيان ومحمد وباقي الشباب قاموا.
آدم مراد داخل وشايل فهد وماسك أيد آرين. و آركان سلم على آرين وداخل بيدور على جنات ف وسط الموجودين. وباري طلعت فوق تجيبها.
آدم مراد: شاف أميرة المملكة ونزل ابنه وقرب منها وباس على أيديها وراسها واطمن عليها.
ف نفس الوقت آركان قرب من رينو وسلم عليها بلهفة كبيره.
مريم اطمنت على آدم كالعاده بخوفها وقلقها وقلبها الكبير.
رينو: بنفس القلق اطمنت على آركان.
آدم مراد: قرب من فريحه وباس جبينها وقال. وحشتيني يا امي.
فريحه: ضمته بفرحة العيد وقلبها بيضحك وبيبكي بشعور مختلف.
آدم: فتح ايديه لحفيدو وأبتسم وقال. آركان حفيدي الهُمام.
آركان: حضن جدو وسلم عليه. وحشتني قوي يابابا.
آدم: ضمه لقلبه وربت على ضهرو وقال. حمدلله ع السلامه يا حبيب جدك.
آدم مراد: سلم على أبوه وقال. اخبارك ايه ياسيادة اللوا.
مراد: خبط على كتفه بقوه وهزار وقال. أبوك دلوقتي بقى 100 فل و 14 حمدالله على سلامتك يا ديزل.
آركان: سلم ع فهد وقال. الحج اللي وحشني.
فهد: ضمه لقلبه بقوه. وقال. نورت الدنيا كلها يا ياسيادة الملازم.
آدم مراد: وقف قدام جدو، وأبتسم.
آدم: هز راسه ليه بأنه يقرب منه.
آدم مراد: حضن جدو بحب كبير. وغمض عينيه وقال. بابا آدم وحشني جدا.
آدم: بتنهيدة حب. ربت على ضهرو وقال. حمدالله على سلامتك ياحفيدي الغالي.
آدم مراد: باس ع أيدو وقال. كل عام وحضرتك بخير.
آدم: ربت على كتفه بابتسامه وقال. كل عام وانت منور المملكة.
تالين: بدموع أبيه آدم. أبيه آدم.
آدم مراد: لف ليها. وراح عندها بسرعه وضمها لقلبه وقال. تالي حبيبتي وحشتيني جدا ياروحي.
تالين: بدموع الفرح. وحضرتك وحشتني قوي يا أبيه حمدلله ع السلامه.
د/محمد: طيب إيه؟ مش هنسلم إحنا كمان على أبطالنا ولا إيه؟
آركان: بمزاح. يسلام ونتصور سلفي كمان ادكتور ينفع؟
د/محمد: بضحكه. ينفع جدا طبعآ. تعالي يابكاش تعالى والله الدنيا نورت بيك يا آركان.
آركان: حضنه. حبيبي أنت يادكتور والله.
زين: ألف حمدالله على السلامه يا آدم.
آدم مراد: حبيبي ياعمي أخبارك إيه؟
زين: بفضل الله زي الفل.
ميرو: بسعادة. طيب وانا مش هتطمن عليا؟
آدم مراد: ضمها وباس جبينها وقال. انتي قبل الكل طبعا. وأبتسم.
تيم: حمدلله ع السلامه يا آدم باشا.
آدم مراد: حضنوا بعض. وقال الله يسلمك يادكتور.
تيم: وانت ياض يا آركان عملت حس للبيت من أول ما دخلت.
آركان: حاوط امه. وقال بضحكه وكبرياء. علشان تعرفوا قيمتي بس.
باري: نزلت وشايله جنات. وقالت جنات اهى يا ريكو.
آركان: قلبه دق. وقال. بسم الله. وشالها بين أيديه وباس جبينها وقال. جنتي حبيبتي وروح قلبي.
سفيان: منور المملكة ومصر كلها يا آدم.
آدم مراد: أبتسم حبيبي يا سفيان تسلم.
آرين وقفت جمب آدم. والضحكه بترقص في عينيها.
آدم مراد: مسك كف أيدها وضغط عليه بلين.
آرين: قلبها زادت دقاته.
فهد العدوي: رفع أيديه وقال. شيلني يا بابا.
آدم مراد: أبتسم وقال. تعالى ياحبيبي. وشاله.
كنزي وكيان جريوا على فهد ومبسوطين.
فهد: أبتسم وحاوطهم.
مريم: بسرعه يا تالين هاتي عصير لاحفادي بسرعه زمانهم عطشانين يانور عيني.
تالين: حاضر يا تيتة.
آريان: بعد ما سلم عليهم طيب ايه مش هنكمل فطارنا ولا ايه؟
آركان: بنهم. اه والله أنا واقع م الجوع متسحرناش كويس.
آدم مراد: هز راسه بيأس وقال. اه وانت هتقولي؟
آركان: بعند اه أقولك أي يعني؟ 12 بيضه وعلبتين جبنه وخمسه زبادي وربع لانشون ورومي. هيعملوا ايه يعني احنا بنشقى وجايين من سفر.
الكل ضحك.
آدم: اتنهد براحة بال. وشاور بايدو على السفره وقال. كده اكتملت عيلتي يلا الكل يفطر.
آدم مراد شايل فهد وبناته حواليه. و آركان شال صقر على حجرو وقعدوا وسط ترحاب كبير وبدأت كل العيله تفطر والضحكه والسعاده على وشهم.
واكتملت العيله مع إكتمال الشهر!
وبعد وقت.
أدو فرض صلاة العشاء والتكبيرات والتبريكات بين الأهل والأصدقاء والاحباب.
فيلا السيوفي.
طارق وفارس راجعين من صلاة العشاء والتكبيرات في كل بيت وشارع.
رنا: بسعاده. حمدالله على سلامتك يابو فهد.
طارق: بضحكه. الله يسلمك يام الغاليين. وكل عام وانتي متربعه في قلبي ياوليا.
رنا: بضحكه. وأنت متربع في حياتنا كلها ياحبيبي.
فارس: باس ع راسها وقال. كل عام وانتي بخير ياست الناس كلهم. وعيد فطر مبارك عليكي وعلينا ياحبيبتي.
رنا: ربتت ع صدرو وقالت بحب. كل عام وانت الذريه الطيبه لقلبي ياروح قلبي ربنا ما يحرمنيش من دخلتك عليا أبدا يافارس يابني.
فارس: حبيبتي يا امي أهم حاجة تكوني راضيه علينا.
رنا: عيونها لمعت وقالت. راضيه بس! دنا راضيه وراضيه وراضيه من هنا لآخر العمر. عليك أنت وفريحه وفهد.
فهد: من على الباب قال بابتسامه. إبن الحلال عند ذكر أسمه بيبان.
رنا: بفرحه. فهد ابني. تعالى ياحبيبي. كل عام وانت بخير يانور عيني.
فهد: دخل ومعاه رينو وقالوا السلام عليكم.
ردو عليهم وعليكم السلام.
فهد: حضن طارق وباس على أيدو وقال. عيدك مبارك ياحج.
طارق: ربت على كتفه وقال. عيدك مبارك ياحبيب أبوك.
وأبتسم وقال لرينو. تعالي يابنت الغالي جايه تاخدي العيديه مش كده؟
رينو: بضحكه. طبعآ لازم اخدها من حضرتك أول واحده. كل سنه وحضرتك طيب يابابا. والسنه الجايه إن شاء الله تكون في زيارة الحبيب المصطفى.
طارق: أبتسم وحضنها وقال. صل الله عليه وسلم. حبيبتي يارينو أحلا دعوة منك يابنت العدوي. ومش خساره فيكي كيس.
رنا: ضحكت.
رينو: بعدم فهم كيس ايه؟
طارق: بسخريه. كيس من الدنانير.
فهد: ضحك. وقرب من أمه. وباس جبينها وضمها لقلبه. وباس على أيديها وقال. كل سنه وانتي طيبه ومعانا ومنورانا ياست الكل.
رنا: مسدت ع خدو وقالت. كل سنه وانت حسك في الدنيا وربنا مايحرمنيش من دخلتك عليا أبدا يانور العين.
رينو: كل سنه وانت طيب يا سيادة السفير.
فارس: بيحضن فهد وقال. وحضرتك طيبه يا دكتوره.
فهد: عامل ايه يافارس.
فارس: حبيبي يافهد أنا بخير.
رينو: فين رودي أنا جايه مخصوص أسلم عليها.
رنا: بضحكه. من الصبح وهي بتعمل اختراع في المطبخ بمناسبة العيد. روحيلها يمكن تظهر وتبان.
رينو: بضحكه حاضر بعد اذنكم.
طارق: بص ع الباب وقال. اومال آيان فين؟ عند تيم بردو؟
فهد: قعد وقال. لأ هو هيروح مع تيم. مش عندو وبس. لأ هو لازق معاهم.
كلهم قعدوا.
رنا: هيروح فين؟ وبعدين آدم و آركان مجوش ليه؟
فهد: جايين كمان شويه. لأن آدم قال ل آرين متجبيش لبس العيد لكنزي وكيان وهيبقى هو ينزل معاها المول يجيبوا كل حاجه. ف تيم قال خلاص نبقى نجيب لجنى معاهم بالمرة. قام بقى سي آيان قال هو كمان خلاص هبقى اشتري مع جنى. وسايبهم في البيت بيلبسوا. و آدم و اركان هيعدوا على هنا يسلموا عليكم قبل ما يخرجوا.
رنا: بابتسامه. حبيبي يا آيان بس لو يبطل عصبيه. هيبقى زي العسل.
فارس: بضحكه وهو يعني هيجيبوا من برة. عندك ماشاء سلسال العصبيه ممتد.
رينو: بصوت عالى استني بس ياروووودي
رودي: خارجه. وشايله صينية تقديم وفيها تشكيله من حلويات العيد بيتي فور وكحك وبسكويت. وقالت بحماس.
استنى ايه؟ عتلاق لازم يدقوا اختراعاتي. هو أنا سموني الشيف من شوية ولا ايه؟
فارس: اتخض من شكلها والدقيق مبهدل هدومها وجبينها وخدها. وقال بدهشه. في ايه يارودي!
رينو: قفلت بوقها وجريت على المطبخ ورفعت النقاب. وطلعت كل حاجه من بوقها في الباسكت وبتكح. وشربت ماية بسرعه. وقالت وهي بتنهج.
استحاله تكون دي حلاويات العيد؟ ربنا يستر قولتلك استني يارودي.
رودي: حطت الصنيه قدامهم وباصه لفارس وبتضحك وقالت. الشيف بوراك بيمسي.
فارس: بص على الحلويات وفتح عينيه بانبهار من شكلها اللي يفتح النفس.
رودي: اذيك ياسيادة اللوا. كل سنه وانت طيب يا باشا.
فهد: أبتسم. وانتي طيبه يا دكتوره. وماشاء الله واضح قد ايه إنك تعبتي في الحجات دي.
طارق: بفخر. رودي بنتي أحسن واحده تعمل بيتي فور وكحك وحلويات العيد.
رينو: من بين أسنانها. متمجدهاش قوي يا بابا.
طارق: لأ وكمان إيه؟ البسكوت اللي رودي بتعمله متدوقش زيه في أي مكان. حاجة كده مسك.
رودي: بثقه. حبيبي ياطاروق. أنا بس بحب أسعد غيري. هعمل ايه بس.
رينو: نفخت بتوتر. أستر يارب. وشدتها من دراعها وقالت.
رودي تعالي معايا جوه ضروري.
رودي: بعدين بعدين أنا عارفه تلاقيكي عايزاني أعمل حسابك في شوية تاخديهم معاكي للعيله. بس لا تقلقي. أنا عامله حسابي للكل دنا من الصبح راشقه ف المطبخ.
طارق: بفخر. هي دي رودي مرات ابني اللي ديما مشرفاني.
رودي: اله! يلا ياجدعان بسم الله. أمسك يافهد خد يافارس. دوقي يا رنوش. وأنت ياطاروق ليك نصيب الأسد. كل ودوق بقى وقولي اي رأيك في الجمدان.
رينو: هزت راسها لفهد أنه مايكلش حاجه. ومش عارفه تتكلم.
فارس: أخد قطعة كحك وقال. دي أول مرة هدوق الكحك الاصلي من أيد مراتي. ده كفايه شكله بس. تسلم ايدك مقدما.
طارق: لأ انا هاخد حتة بيتي فور. بيدوب في البق كده وانا بحبه قوي.
فهد: بضحكه. خلاص وانا هدوق البسكويت ومتأكد من كلام الحج أنه هيبقى خرافه. وفتح بوقه وأكل قطعه. وقفل بوقه وتنح ومتكلمش.
فارس: فتح عينيه بصدمه وباصص على رودي وساكت.
رنا: حاولت متبينش لكن شرقت وكحت ورينو لحقتها بالماية.
طارق: حط البيتي فور ف بوقه. وفتح عينيه ع الآخر.
رودي: بصت لرينو وقالت. شوفتي مزبهلين إزاي من الجمدان. اومال إيه يابنتي هو أي حد يعمل حلويات؟ دنا بفكر أعمل قناه وابقى يتيوبر. واكتبه بعنوان/ شيف بوراك بيدجرح التماسي متجيش على قلبي ياقاسي.
فارس: حرك بؤبؤ عينيه وبص ع أخوه اللي وشه بيفسر قد ايه أنه عايز يوصل لأقرب باسكت.
وشاف طارق حاطط ايدو على بوقه وكأنه بيدور ع حاجه وقعت منه. وبص ع رنا اللي بتكح وتمسح بوقها بالمنديل.
رينو: بغيظ. مسكت أيد رودي وقالت. جمدان إيه وزفت إيه على دماغك انتي كمان. قولتلك استني يارودي انتي استعجلتي قبل ما انطق حرف واحد واقولك رأي في العك اللي انتي عملاه.
رودي: كشرت عينيها وقالت. عك ولسه هتتكلم اتخضت هي ورينو.
طارق: بسرعه طلع البيتي فور من بوقه وقال بنرفزه. ايه العك والقرف ده!
فهد: رفع ايدو وقام بسرعه ودخل المطبخ. وفارس وراه.
طارق: مسك القعطه في أيدو وقال ده مش بيتي فور. ده بيتي طوب أو بيتي حجر أنا أول مرة أشوف زلط عليه شوكولاته.
رنا: كتمت الضحكه
رودي: عوجت بقها وقالت. أهو هيبدأو يطلعوا في الجمدان القطط الفطسانه. علشان ياكلو عني العيديه بس على مين؟ دنا رودي والأجر عالله.
طارق: بتريقه. قطط فطسانه! لأ يختي خدي اطفحي بنفسك من عمايل ايديكي وشوفي الجمدان مابتكسرش ليه. ماهو جمدان فعلاً. امسسسسسكي.
رودي: بثقه. اخدت قطعة وجت تقطمها. متقطمتش وناشفه زي الحجر. وضحكت ببلاها وقالت.
إحم. دي تلاقيها حتة ديكور محطوطه بالغلط. استنى هشوف غيرها. أو. أحم. او ندوق البسكويت. اه ندوق البسكويت.
واخدت قطعة وكان مالح ومعلهوش سكر خالص.
وبلعتها بالعافيه تداري كسفتها. وضحكت وهي بتكح. وقالت.
دي تلاقيها وقعت في برطمان الملح بالغلط. نشوف الكحك بقى. وطلع ناشف جدا.
وبصت ليهم وقالت. أممم حاجه عظمه.
فهد: جه ومعاه كوباية ماية. وفارس حاطط أيدو ع خدو من ضرسه اللي وجعه.
طارق: بغيظ. اه وأنا عمال انفخ فيكي يختي. اتاريكي جايبه حجاره ومشكلاها.
وبعدها كشر عينيه وقال بتفكير.
امممم ايوووه ايوووه أنا فهمت انتي عايزه تكسري صف سنانا علشان تسترزقي من ورانا صح يابت!
كلهم ضحكوا.