رواية اليتيمة للكاتبة روز الفياض الفصل العاشر
دخل علي الحمدلله من رجع باوعلي كال: السلام عليكم.
لمى: وعليكم السلام تأخرت ظل بالي اتصل عليك مترد بعدين انغلق.
علي: السياره عطلت بالشارع وشلعت كلبي وتليفوني خلص شحن.
لمى: يالله الحمدلله.
علي: ليش منايمه؟
لمى: وين انام وانت ماكو ظليت خايفه انت ماكو تليفونك مغلق وسمعت صوت بره عبالي حرامي.
علي: والجفجير؟
لمى: ههه سلاحي.
ابتسم كال: يعني بس انتي تخوفين الحرامي بالجفجير.
لمى: شسوي بعد السجينه خفت منها الجفجير أئمن هههه.
علي: مصطفى نايم؟
لمى: اخذته نومته جوه الدرج خل اروح اطلعه.
علي: جوه الدرج شيسوي؟
لمى: حتى ليلكيه الحرامي.
علي: من كل عقلج؟
رحت ركض شلته ووديته بفراشه حبيبي.
رجعت للمطبخ هو كاعد يدخن.
لمى: تتعشا؟
سكت مجاوب بقيت واكفه منتظره طفى الجكاره وداري عليه كال: مااشتهي ومالي خلك وباجر راح ابقى نايم مااريد اروح للدوام لتكعديني.
اني اصلا ولامره مكعدته هو يكعد من نفسه بس ليش شبي اسأله لو اغلس واسكت مااتدخل.
بعدين كلت زحمه عالاقل اسأله مهما صار هو صاحب فضل علي وعلى ابني.
لمى: ليش شصاير؟
علي: مالي خلك ولد صديقنه اتوفى ومالي خلك.
انقهرت عليه خطيه مقهور على صديقه.
لمى: الله يرحمه. متزوج؟
علي: لا.
لمى: الحمدلله عالاقل مخله وراه زوجه واطفال.
باوعلي كال: امه وابوه خطيه مو بس زوجته واطفاله.
لمى: طبعا ابنهم بس قصدي.
علي: اعرف قصدج. بس ليش؟
لمى: شنو ليش؟
علي: اني مقصر وياكم بشي ناقصكم شي اذا ناقصكم شي او محتاجين شي كولي تره اني مااعرف شتريدون وشتتحتاجون انتي متحجين.
لمى: لا لا مو هيج قصدي. بالعكس انت ممقصر بشي ابد ولا ناقصنه شي وممحتاجين شي سلامتك.
علي: لعد شنو؟
لمى: هسه مو وكته هالحجي الساعه بيش صارت كوم غسل وارتاح واذا تريد تتعشى حتى اسخن الاكل.
كام كال: لا مااريد اريد اغسل وانام.
راح لغرفته اني هم رحت وسديت الباب معناها مااكدر افتح وياه موضوع الروحه لبيت هدى هسه لان نفسيته تعبانه وميجوز اروح وابقى كم يوم وهو ضايج وماله خلك.
الصبح كعدت من وكت لان مصطفى كعد يلعب يريد يطلع بس المشكله بس افتحله الباب يروح لعمه وهو كال لتكعدوني.
ظل يبجي موت نفسه من البجي حاولت اسكته بالالعاب وبالتليفون صوته عالي.
دك علي الباب كمت فتحته راسأ طلع مصطفى.
علي: ليش يبجي؟
لمى: يريد يطلع من الغرفه.
علي: وليش متطلعينه خليتي هيج يبجي.
لمى: مو يريد يلعب ويصيح وانت كلت لتكعدوني وتالي كعدناك.
علي: منمت اصلا.
راح للحمام اني رحت خليت الجاي عالطباخ وجهزت الريوك.
خلص واجه كعد وخله مصطفى بحضنه.
خدر الجاي بديت اصبله كال: منمت البارحه كله من وره حجيج البارحه.
اني التفت عليه حتى الجاي وكع على ايدي.
لمى: ليش اني شحجيت؟ مو قصدي شي من اللي فهمته بالعكس اني يمكن محظوظه مو مثل بقيت الارامل ولا ابني مثل باقي الايتام يعني اني انت ابوه واكثر ياريت لو اني مثله ابوي متوفي وعمي صاير ابوي يمكن جان صار عندي اب يسأل عني لو يخاف علي يكول عدله لو ميته بنتي يمكن جان الناس احترمتني وصار عندي حظ وياهم.
محجه شي ولا علق اني صبيت الجاي وخليته يمه ورحت غسلت ورتبت غرفتي وخليت ايدي بمي بارد شويه حركني الجاي.
بعدين بديت انظف ورتبت غرفته خلص اخذ مصطفى وطلعوا بالحديقه يلعب وياه اني كملت تنظيف وكعدت افكر شنو اسوي غدا دخل هو ومصطفى راحوا للهول وشغل التلفزيون وكعد مصطفى واجه يمي سحب الكرسي وكعد.
علي: ليش انتي متسألين عنه؟
لمى: منو؟
علي: ابوج.
لمى: لان من اتوفت امي واتزوج نسى هو ابوي من ساعتها صرت بدون اب مااتذكر يوم سألني شلونج لو شمحتاجه مااتذكر شوكت اخر مره حضني وشبكني جنت طفله زغيره من اتوفت امي الله يرحمها ومن يومها انتهت طفولتي بنفس اليوم خلص صرت جبيره بنظر الكل.
مااكدر احجي بعد كمت راسا للسنك سويت نفسي اغسل ايدي دموعي خنكتني.
علي: انتي ممحتاجتله ولا محتاجه لاحد انتي لو مكمله دراستج يمكن حتى اني محتاجيتيني.
لمى: منو اللي يخليني اكمل اللي بكدي هسه يمكن مرحله رابعه بالجامعه.
علي: جنتي شاطره؟
لمى: الحمدلله جان مستوايه زين ولحد الان محتفظه بالنتائج مالتي.
علي: اي كليه جنتي تتمنين اتدخلين؟
لمى: جنت اتمنى هندسه بس الله ماكتب.
علي: وليش مترجعين تكملين.
لمى: شكمل؟
علي: دراسه غير؟
لمى: ياريت بهالبساطه.
علي: وشنو الصعوبه البيها؟
لمى: يعني هسه اذا اريد اكمل تقبل؟
علي: اي ليش لا بعدج زغيره يجوز تحتاجيها الشهاده وماعندج شي يمنع بس صوفي كملي سادس خارجي وبعدين اذا نجحتي الله كريم.
لمى: لا اذا اكمل سادس وانجح معناها لازم ادخل كليه امنيتي احلم حلم ويتحقق كامل مو بس الجزء العادي والجزء الاهم يروح يختفي بسبب الظروف.
علي: ههههه هاي طلعتي طماعه لو كل شي لو ولاشي.
لمى: اني هيج اذا اريد شي لو كامل كل شي لو ولا شي.
علي: لو ابيض لو اسود ماكو حل وسط هههه.
لمى: لا ماكو.
علي: الله كريم من تبدي السنه الجديده اسألج وان شاءالله تكملين.
لمى: ان شاءالله الله يسمع منك.
علي: نطلع؟
لمى: وين؟ راح اسوي غدا.
علي: لا نطلع ملينه من جو البيت نصلي ونطلع ان شاءالله.
لمى: ان شاءالله.
فعلا لبست مصطفى وبعدين اتوضيت ولبست وصليت وبعدين طلعنه الطريق ازدحام ساعه احنه بالطريق حتى مصطفى نام لان كاعد من الصبح.
وصلنه وكعدنه هو مخلي مصطفى بحضنه كل شويه يبوسه سبحان الله اكو ناس عدها اطفال وتذبها بالشارع متريدها واكو ناس تتمنى لو بس طفل واحد.
علي: انتي اليوم مو كلتي اني ابوه. يعني اذا يكلي بابا تقبلين؟
انقهرت عليه لهدرجه يعني يحبه لهدرجه جانوا يتمنون يصير عدهم طفل سبحان الله انطاني اني طفل ومجنت مفكره بي وهم جانوا يردون طفل وعائله طبيعيه وحلوه يحبها وتحبه ماانطاهم.
لمى: ليش هو عنده اب غيرك محمد الله يرحمه ابوه بالاسم لاشافه ولاعرفه بس انت من اول اسبوع اخذته جنت ابوه تحبه ومدلله مااتصور محمد جان راح يحبه مثلك.
علي: مو لهدرجه ابنه اكيد يفرح بي ويحبه.
لمى: حتى من عرف اني حامل مفرح عادي جان الموضوع ومن اخذت سونار بالشهر الرابع وكالت الدكتوره ولد مفرح.
علي: لمى بعدج ضايجه مني؟
لمى: على شنو؟
علي: على اللي صار.
لمى: عادي نسيت الموضوع.
علي: لا مو عادي احنه لا كعدنه ولاحجينه.
لمى: ميحتاج نحجي بشي اني متعوده دائما من يصير شي استمر بحياتي طبيعي.
علي: بس اني اريد احجي.
سكتت مجاوبته اني مصدكت رجع طبيعي مثل اول يسولف ويضحك مااريد نتذكر هالموضوع خليني مرتاحه بس اليوم من التفكير ومتخيله احنه عائله طبيعيه زوج يحبني واني احبه وعدنه طفل.
علي: لمى انتي مو طفله حتى متعرفين لو متلاحظين نظراتي واعجابي بيج.
اتفاجأت اول مره يحجي هيج ويايه ويحرجني وفكرت لا طفله اني لان فعلا محسيتك بيوم تباوعلي بنظرات من هالنوع.
علي: اني اعترف انو اللي صار جان غلط مو بسبب القرار اللي قررناه باول يوم من اتزوجنه بس لان اني جنت مضغوط هوايه بسبب موضوع الحمل لان الكل يتصور اني عندي مشكله.
لمى: اتوقعت اني الموضوع هيج بس مجنت متوقعه انت من النوع اللي يتأثر بكلام اهله او كلام الناس.
علي: مو مسألة اهلي او الناس لتنسين اني جنت متزوج الله مرزقنه اطفال واثنينه مجان عدنه اي مشكله تمنع الحمل بس مصار هسه الكل يتصورون انتي محملتي لان اني عندي مشكله وماكو رجال يقبل على كرامته هيج شي.