رواية اليتيمة للكاتبة روز الفياض الفصل الحادي عشر
لمى: ممكن اسأل سؤال بس خاص شويه؟
علي: سألي.
لمى: شلون اتوفت زوجتك؟
علي: صار عدها تايفوئيد قوي وهي بنيتها ضعيفه متحملته.
لمى: الله يرحمها.
سكت هو شويه بعدين كام خله مصطفى بالعربانه لان جابوا الاكل.
علي: ها شكلتي؟
لمى: شكلت على شنو؟
علي: معجب بيج واريدج زوجتي بصوره حقيقه.
مجاوبته ساعات جنت اتمنى عندي قدره او موهبه اكدر اقره افكار الناس حتى اعرف شيفكرون من ناحيتي واعرف اذا كلامهم صحيح لو لا.
لمى: انت تشوف الاعجاب كافي؟
علي: ليش لا؟ يعني ماكو واحد اتقدم لوحده لان شافها وعجبته واتزوجوا وكونوا عائله.
لمى: هاي اذا واحد على كولتك شاف وحده يمكن كم مره وانعجب بيها حقه بس احنه صار اكثر من سنه سوه بنفس البيت وجهنا بوجه بعض ومع ذلك انت هسه يالله حسيت نفسك معجب بيه.
علي: ويعني؟
لمى: يعني انت مو معجب بيه بس انت دتوهم نفسك. واني مستحيل اقبل اي زواج حقيقي وكامل بدون ميكون الشخص إلى ارتبط بي يحبني لانه يحبني ورايدني لانه يحبني مو رايدني لان معجب بيه او لان محسوب عليه زواج.
علي: وليش قبلتي بيومها؟
لمى: لان مااكدر اكولك لا انت زوجي حتى لو بس كدام الناس وهذا حقك حتى لو اني مااريد وانت صاحب فضل عليه وعلى ابني وماعندي شي اجازيك بي او ارجع فضلك ومالي عين ارفضلك طلب شلون لو هذا حقك.
علي: شلون متقبلين زواج الا اذا احبج وشلون متكدرين ترفضين؟
خفت احجي بصراحه اكثر من هيج يزعل.
لمى: مااقبل لو جان بيدي الاختيار.
هو ضاج وحسيت وجهه اتغير وسكت محجه شي
علي: يعني مترديني.
لمى: انت دائما تكول محمد واكف بيني وبينج واني اشوف زوجتك الله يرحمها واكفه بيني وبينك.
علي: الوضع مختلف اكو فرق جبير بين محمد وبين نور محمد جان اخويه يعني طبيعي مااتجرأ المس زوجته بس نور غريبه عنج حتى متعرفيها.
لمى: صحيح بس لحد الان هم موجودين بحياتك اثنينهم بعده محمد وبعدك تحب نور.
علي: مو صحيح.
لمى: لا صحيح بدليل اثنينهم انت اتذكرتهم بساعتها. ومحمد مو مهم موضوعه عندي بس نور صعبه انت صحتلي نورتي شتتوقع احس وانت اصلا من كتلك اني مو نور راسا كمت وطلعت شمعناها؟
سكت هو محجه ولاكلمه ولاعلق بعد طول مااحنه كاعدين حتى مااكلنه اخذنه الغدا ويانه للبيت سفري ورجعنه طول الطريق ساكتين.
وصلنه للبيت دخل مصطفى لغرفته كال: خليه عندي.
دخلت لغرفتي بدلت ملابسي لبست بيجامه رصاصي وبيها نقط وردي ورحت غسلت ورجعت ردت انام متغمض عيني افكر بكلامه معجب بيه صدوك لو بس يريد زوجه علمود رغباته ومعجب بيه متكفيني اني طول عمري محرومه من شخص يحبني اريد شخص يحبني يحب ضحكتي يحب شخصيتي اريد شخص يسمعني كلام حلو مثل اللي يحبون صدوك.
اريد احس نفسي مرغوبه مثل البنات بس مو مثل هسه كلمن يشوفني يريدني يتمناني بس بنظراتهم المو حلوه إلى ولجسمي وشكلي لا اريد شخص واحد يحبني من كل كلبه وهو اللي يحسسني بهالمشاعر لان اني احبه وهو يحبني.
دزلي مسج: نمتي؟
لمى: لا ليش مصطفى كعد؟
علي: لا بس اريد احجي وياج.
لمى: اوكي هسه اجي للهول.
اتعمدت اكله للهول.
رحت لكيته كاعد كعدت.
علي: ماادري إلى اسويه صح لو غلط وماادري الكلام اللي كلتي صح لو لا بس اني احس اريدج وبنفس الوقت مااريد اظلمج بس لازم اعرف انتي شنو مشاعرج تجاهي يعني انتي ترديني مثل مااني اريدج لو لا؟
لمى: اريدك او مااريدك النتيجه وحده اني مااريد اتورط واجيب طفل ثاني بعائله مو مستقره مصطفى لو جان محمد موجود اكيد من يكبر راح يحس ويفهم ويعرف ابوه ميحب امه وهسه نفس الشي اذا صار طفل وانت متحبني لان بعدك تحب زوجتك الله يرحمها راح يعيش نفس الوضع واني هم ماعندي استعداد اعيش نفس التجربه واكون زوجه وقت الحاجه بس.
سكت وبعدين كال: اني راح اسافر فتره احتاج اسافر وارتاح.
محجيت شي لان غثني رده لو اقبل لو يسافر ويريد يرتاح على كولته يمكن تعب من مسؤوليتنه لو ضاج من ردي اتوقع يمكن مثل المره الفاتت انزع ملابسي كدامه واقدمله نفسي على طبق من ذهب علمود يرضى.
علي: هدى او سرى يكدرون يجون هنا وياج؟ لو تردين انتي ترحين عدهم.
رغم جنت اني اريد اروح وابقى يم هدى كم يوم بس من كلي انقهرت حسيتها طرده.
لمى: لا اني اروح يم هدى احسن.
علي: خلص معناها جهزي الاشياء اللي تحتاجوها حتى العصر اوديكم.
اتفاجأت وانقهرت حيل رده سريع متحمل اكوله لا راسا قرر يسافر ويخلص من عدنه او يمكن يريد يلوي ايدي على كولتهم يريد يجبرني اقبل يدري مالي احد ومااكدر ابقى طول عمري يم هدى اني وابني.
كمت جهزت ملابسنه واشيائنه حتى ماادري شكد يبقى حتى احسب حسابي اخذ ملابس قليل لو هوايه.
بس راح اخذ هوايه لان جنه هالمره بعد ميتحملنه اكثر.
العصر ودانه لبيت اختي هدى قبل لنوصل كال: اني ماادري شكد اطول اسبوع اسبوعين شهر مااعرف فهذا مصرف الج ولمصطفى واذا احتاجيتوا شي اتصلي او دزي مسج.
اتشكرت منه ونزلت هو نزل الجنط واني اخذت مصطفى دخلنه للحديقه هو مقبل يدخل للبيت كال مستعجل باس مصطفى وخلاه على صدره وبعدين نزله.
علي: ديري بالج عليه وعلى نفسج.
لمى: ان شاءالله.
علي: يالله مع السلامه.
مد ايده يسلم علي مديت ايدي سلمت عليه اول مره يلزم ايدي.
لمى: مع السلامه الله وياك.
راح وخلاني مثل الشخص المنبوذ المريض وبي مرض معدي محد يريده ياريتني مو حلوه حتى لحد يحب شكلي محد يفكر يستغل جسمي محد ينظري نظره وصخه. ياريتني متت ويه امي من ماتت ولا هالعيشه ياريتني متت بمكان زوجته احسنله واحسنلي.
من حجيت لهدى لامتني وكلتلي: كتلج وحذرتج بس انتي كل تفكيرج بالكرامه.
لمى: هي وينها الكرامه بعمري مجان عندي كرامه وين الكرامه من جنت ابيت ابوي خدامه ومرت جانت حتى ضرب تضربني وين الكرامه من جنت عايشه ويه محمد ومتحمله الاهانه والحجي واعرفه يحب غيري وميحبني وهم ساكته وين الكرامه من اتزوجت علي لان ماعندي مكان اروحله ولا عندي اب يسأل عني مثل البنات من اتوفه محمد لحد الان مشايفه ابوي ولا سامعه صوته.
وينها كرامتي انتي كوليلي من صارلي وياه اكثر من سنه ولهسه يحب زوجته ويريدني علمود حاجته مو محبة بيه ومن اني انزع ملابسي اله حتى يرضى لان مالي عين اعترض وارفض ياكرامه التحجين عنها.
هدى: خلص حبيبتي خلص كافي لتحجين هيج مو زين عليج هذا القهر بعدين يصير بيج شي وانتي بعدج شابه وابنج زغير فوضي امرج لله حبي ربج يرتبها لتفكرين بعد.
لمى: ونعم بالله.
بقيت عد هدى لحد الان 3 اسابيع علي جان يتصل بس يسأل على مصطفى واذا محتاجين شي ومو يوميه كل يومين او3 تقريبا.
اني هم مردت اسأله رجعت لو بعدك او انت وين او شوكت ترجع. ماله داعي افرض نفسي عليه هو لو رايدني صدوك جان اقل شي يسألني شلونج شخبارج.
بيت هدى جان جديد مصارلهم كم شهر من بنوه حلو ومرتب بس اني جنت مخنوكه زوجها خوش انسان حباب ومتدين ومرحب بينه بس جنت احس نفسي ثكيله عليهم رغم اعرف ميفكرون هيجي بس هالاحساس دائما عندي بكل مكان اكعد بي مو بس عدهم وجان موقف علي وسفره مأذيني كل ظنوني طلعت صحيحه ميحبني ولامعجب بيه بس كل ماهنالك جان يريد حاجته ويعرف مااكدر ارفض ومن حجيت بصراحه اتغير.
جنت اتمنى يخابر ويسألني شلونج كلش كافيه عندي بس ماكو.
بالليل جنت كاعده اباوع لصور مصطفى ودخلت هدى كالت: لولو اكعدي لج عمار يكول ابو محمد اتوفى.
لمى: شنو؟ ابو محمد يامحمد؟
هدى: محمد اخو علي زوجج بعد منو.
لمى: شوكت؟
هدى: ماادري هسه اتصلوا بعمار الظاهر متوفي العصر.
لمى: لاحول ولاقوة الا بالله الله يرحمه.
ظليت ابجي الليل كله لان بس هو جان زين وياي بذاك البيت هو الوحيد منهم اللي مسمعني حجايه تغث صح جان موقفه سلبي بس مأذاني بقصد.
الصبح اخذنه عمار اني وهدى للعزا وبقيت مصطفى يم اولاد هدى مااريده يشوف البجي ويخاف.
بقينه كاعدين للظهر ورجعنه لان كلبي يم ابني وهدى هم مناك بيتها واولادها.
العصر هم رجعنه وبقينه لليل.
مشفت علي ماادري موجود لو مسافر لو شنو الموضوع بس ممعقوله ميحضر عزا ابوه اكيد اتصلوا بيه وبلغوه.
ثاني يوم جابني عمار الصبح بس اني هدى بقت وسرى اجت ورايه للعزا هي وزوجها.