رواية اليتيمة للكاتبة روز الفياض الفصل الثاني عشر
هم نفس الوضع ثاني يوم وجنت مقهوره حيل على ابو محمد.
ثالث يوم اجيت العصر اني وهدى وجبت مصطفى ويايه حبيبي كلهم يحبوا محبوب وحلو ومرتب وهادئ ظل من واحد لواحد مشفته بعد وظل بالي طلعت للحوش مالتهم بلكي اشوف احد من الولد اسأله عنه او احد من الجهال يروح يشوفه وين عد منو بره.
شفت حماي الزغير سلمت عليه وعزيته وسألته عن مصطفى كال عد ابوه.
عرفت عد علي رجعت دخلت للبيت بقيت لليل اساعد البنات بالتنظيف الناس اغلبها راحت بقوا بس الكرايب والاهل.
الجو جان بي بروده بداية شتا جنت واكفه بالمطبخ اغسل اماعين واستكانات الجاي.
وصافنه افكر ليش ميحبني اكيد اكو بيه شي اللي يخليهم ميحبوني مو معقوله وشلون بيه اذا راد يتزوج وين اروح وشلون انساه معناها بعد خلص صنف الرجال كل لازم اكرهه وانساه وامحيه من حياتي.
سمعت صوته وراي اتجمدت وكع الاستكان من ايدي بس مباوعتله ولا التفتت جنت اغسل بمي بارد لان ماكو حار ايديه زروكة بس محسيت الا من سمعت صوته حسيت جسمي كله جمد.
يحجي ويه خواته وهمه يلعبون ويه مصطفى.
بعدين سمعت صوت مصطفى ورايه مباشرة وهو يكله: هاذي ماما.
خفت التفت يبين على وجهي.
اجه وكف يمي ومد ايده بالمي.
علي: المي بارد شلون تغسلين بي مبردانه؟
لمى: عادي.
اتنفس هو حيل كلي: شلونج؟
لمى: الحمدلله. البقيه بحياتك.
علي: حياتج الباقيه.
خلصت درت اخذ مصطفى منه.
علي: لا خلي خليني اشبع منه مشتاقله حيل.
لمى: هو هم كل ميشوف عمار يركض وراه عباله انت.
علي: وانتي؟
مجاوبته شكد مقهوره منه وحاسه بالظلم من تصرفه.
باوع لوجهي كال: متغيره. خل نطلع بره شويه.
لمى: ليش؟
علي: نحجي براحتنه هنا منكدر.
لمى: شنحجي؟ ماكو شي نحجيه.
علي: لا اكو منو كال ماكو.
طلع وطلعت وراه لكيته كاعد عالكرسي وكفت سحب كرسي يمه كلي: تعالي هنا اكعدي.
كعدت بس كلبي يدك يدك ومستحيه كل شويه واحد من اخوانه يدخل لو يطلع.
لمى: شنو كعدتنه هنا.
علي: واحد مشايف مرته صارله شهر ويريد يشوفها ويكعد وياها يحجي يسولف.
سكت شويه حسيته يباوعلي دنكت استحيت كال: ترجعون وياي اليوم مو؟
لمى: ليش؟
علي: شنو ليش غير نرجع لبيتنه.
مجاوبته هو هم سكت بعدين كال: ابوج بره متردين تسلمين عليه.
باوعتله كتله: موجود؟ سألك عني؟
علي: اي موجود طبعا. وسأل عليج كتله جوه وطول الوقت شايل مصطفى.
بجيت رغم فرحت لان سأل عني.
علي: ليش تبجين مو جنتي تتمنين يسأل عنج هسه المفروض تفرحين.
لمى: ابوك الله يرحمه جان ابوي اكثر منه.
علي: الله يرحمه. هو هم جان يحبج ويوصيني عليج.
هسه متكومين تسلمين عليه خطيه.
باوعتله كتله: هو خطيه؟ اني عشت ماعندي اب وابوي موجود عشت يتيمه وهو موجود عايش واني لاام ولااب مثلي مثل ذول اللي عايشين بالميتم غريبه واني ابيته بيت ابوي طول عمري بكل بيت وبكل مكان جنت خدامه بلكمتي وهو السبب.
لزم ايدي كال: ماكو خدامه بعد لتعيديها هالكلمه انتي زوجتي مو خدامه واذا ابوج غلط انت مو مثله انت طيبه وكلبج جبير ومهما كان هو ابوج يمكن من شاف مصطفى هو حس بغلطه طلعي سلمي عليه هاي كدامج ابوي اتوفه فجأه رغم احنه اتصالحنه بس ضايج متتصورين شكد لان جنت مااحجي وياهم قبل زواجنه.
كام طلع شويه ورجع صاحلي يم الباب رحتله ابوي دخل من شفته ظليت متحنطه.
ابوي: ها بابا لمى شلونج؟
علي خله ايده وره ظهري دفعني على كيف اتدنيت يمه سلمت عليه الدمعه بطرف عيني حسيتها هو حظني واني مثل الجهال الزغار ظليت ابجي بكل قوتي وهو خال ايده على راسي.
كوه سكتت لان مصطفى شافني ابجي خاف ظل يبجي.
علي: كافي بجي لمى خوفتيه.
كعدنه عالكراسي بالحوش اني وابوي وعلي حجينه حجي عادي بعدين ابوي سلم علينه وباسني وباس مصطفى ووصى علي عليه وعلى مصطفى وراح.
اجت هدى كالت: وينج صار ساعه منتظرتج؟ حتى نروح عمار دك علي راح يجي علينه.
علي: لا وين ترحون لمى متروح.
هدى: ها ليش شتسوي باقيه هنا؟
علي: نروح لبيتنه شنو شتشوي باقيه جنج مرتاحه على كعدتها عندج.
هدى: اي والله متونستني صحيح هي متحجي بس من تروح يفرغ علينه البيت.
علي: بالله يمي كاطعه الحجي بيها مجال بس يمج ليش انتي اختها.
هدى: ههه هي هيج من جانت طفله هادئه متحجي حتى عمار يكلي اختج شنو خرسه لو نحجي وياها تحجي لو منحجي هي ساكته وكله كاعده بالغرفه.
خله ايده على جتفي كلها: لا متروح اليوم نرجع لبيتنه.
هدى: براحتكم قابل اني شرايده منها اريد راحتها وسعادتها هي تعبت واتحملت هوايه اريدها تستقر وتعيش حياتها مثل البنات اريدها تكون مرتاحه متفكر اباجر ومتخاف من مستقبلها ومستقبل ابنها.
علي: ان شاءالله راح تكون مرتاحه وسعيده هي تفكر زياده عن اللزم وماادري ليش خايفه.
بقيت واكفه اباوعلهم هي تحجي وهو يرد عليها لحد مااتصل عمار عليها كالت: يالله حبيبتي اجه عمار بره ينتظرني عود تعالي كل اسبوع شي خلي علي يجيبج يمي اتونسي واني هم اضوج وحدي.
لمى: ان شاءالله.
طلعت وطلعت وياها وطلع علي يم عمار وهدى واكفه وياي وره الباب.
هدى: حبيبتي اذا ردتي شي اتصلي بأي وقت وديري بالج على ابنج وزوجج واهتمي بنفسج لتفكرين بعد خليها يم الله.
لمى: ونعم بالله.
راحوا بقيت اباوعلهم من وره الباب بعدين دخلت للبيت ودخل علي وراي صاح: لمى؟ لبسي حتى نروح لان صوفي نعس وتعب اليوم هوايه لعب.
لمى: ان شاءالله.
طلع واني رحت غسلت ولبست حجابي عدل وسلمت عليهم وطلعتله بره.
لكيته بالسياره مخلي مصطفى بحضنه نايم كعدت واخذته بحضني بالطريق كال: خل نوكف يم محل حتى نجيب حليب وحفاظات لصوفي.
شفنه سوبرماركت نزل هو اتسوك ورجع.
وصلنه للبيت فتحلي الباب نزلت بحضني مصطفى كال: دقيقه خل افتح الباب وخليه بغرفتي.
فتح الباب ودخلت البيت كل تراب حسيته وكل شي مثل ماهو معناها جان مسافر مراجع يمكن لحدما اتوفى ابوه.
خليت مصطفى بغرفته.
ورحت لغرفتي نزعت ولبست بجامه سوده وطلعت غسلت وبديت انظف البيت هو دخل المسواك وراح اتمدد يم مصطفى.
بقيت انظف للساعه ب2 بالليل مخليت شي كله غسلته وبدلت الجراجف والمخاد والمناشف خلصت كلت خل اسبح صرت كلي تراب.
دخلت سبحت واتوضيت فد مره وطلعت رحت باوعتلهم نايمين رجعت مشطت شعري وسويته كصيبه شعري صاير طويل ماشاء الله ونشفته بالسشوار عالسريع وكعدت انتظر الاذان مبقاله شي.
سمعت صوت يمكن كعد راح يتوضا أذن صليت وخلصت نعسانه وتعبانه وظهري يأذيني طول النهار لو كاعده لو اشتغل اريد بس اتمدد واريح ظهري بس وراي مصطفى لازم اكعده اغسله واغير حفاظته وابدل ملابسه.
رحت فتحت باب الغرفه على كيف شفته بعده يصلي دخلت اخذت مصطفى وطلعت.
غسلتله وبدلتله ورجعت نومته انفتح الباب اني كمزت كال: ليش اخذتي؟ مو كتلج خلي يمي.
كعدت كتله: مو غسلتله وغيرتله ورضع ونام.
دنك شاله اخذه لغرفته.
اني نمت غفيت بس كل شويه اروح اشوفهم خاف مصطفى يكعد ويعذبه هو تعبان صار 3 ايام العزا.
بقوا نايمين واني نمت والساعه10 ونص كعدت اريد اسوي غدا بس كلت خل انظف الحديقه والكراج اول بعد وكت طلعت خلصت ونظفت ورجعت باوعتلهم نايمين شويه وكعد علي اني بالهول.
علي: صباح الخير.
لمى: صباح النور.
راح غسل ورجع كعد بصفي.
لمى: شعندج كاعده منمتي البارحه ولاخليتينه انام اكو واحد ينظف بالليل.
لمى: مو البيت كله تراب صار شهر ممنظفي كل شي بي تراب.
علي: اي فارغ محد بي اني راجع بالطريق واتصلوا بيه كالوا ابوي اتوفى.
لمى: الله يرحمه.
علي: الله يرحمه
سكتت مااريد اسأله وين رحت وليش رجعت علي: انتي تفكرين اكثر مما تحجين.
لمى: شحجي؟
علي: اي شي.
لمى: اذا احجي تزعل.
علي: لا ماازعل احجي.
هم محجيت شي مامتعوده اعاتب لو اشتكي اني متعوده على اهمال الناس بقت عليه هو.
علي: اني احجي. سافرت حتى اشوف نفسي ارتب افكاري. وانتي هم تفكرين اني مااعرف انتي شنو تحسين تجاهي بس اني احبج.