رواية اليتيمة للكاتبة روز الفياض الفصل الثالث عشر
محجيت ولاعلقت.
عصب مني هو وضاج كال: احجي شي كولي بيني اي ردة فعل.
لمى: ماادري اخاف.
علي: انتي زوجتي بكل الحالات خايفه من شنو بعد.
لمى: تطلع متحبني بعدين واتندم هالمره معناها انطيكم مصطفى واروح لبيت ابوي حتى لو ميردوني عالاقل بيت ابوي محد اله فضل علي ومصطفى انتوا اهله يعني متقصرون وياه.
علي: اني بكل الحالات جنت لازم اتزوج بيوم من الايام بس بوقتها جنت ممفكر بالموضوع من كلي ابوي الله يرحمه عليج اني مشايفج قبل ولا اعرفج وانتي زوجة اخوي فاكيد ارفض يجوز منتفق يجوز متعجبيني وصعبه مو بس عالمره حتى عالرجال يتزوج زوجة اخو بس اتزوجنه واجيتي هنا عجبتيني وعجبني كل شي بيج شكلج اخلاقج تصرفاتج نور الله يرحمها جنت احبها واتزوجتها لان حبيتها ولحد الان احبها منسيتها هاي عشرة وعمر مو يوم ويومين واكيد راح تبقى بكلبي معزتها بس انتي بالعكس اتزوجتج وبعدين حبيتج اني اذا اريد اتزوج اكدر اتزوج وانتي تعرفين وادري لو قررت انتي مراح تعترضين بس اني متزوج ومرتاح بزواجي مااريد زواج ثاني. هو الزواج يكولون مثل الركيه انت وحظك هوايه يتزوجون عن حب بس بعدين يتفاجأون بأطباع وتصرفات بعضهم وتبدي المشاكل. بس احنه بالعكس عرفنه اطباع بعض وصفات بعض وعرفنه عيوب بعض ونقاط الضعف لان صارلنه اكثر من سنه مسوين معايشه بنفس البيت بس كل واحد وحده انطيني وانطي لنفسج فرصه اذا زواجج الاول كان مو مثل مااتمنيتي مو معناتها الثاني نفس الشي.
لمى: الله كريم.
علي: يعني شنو؟
لمى: يعني ان شاءالله.
علي: ان شاءالله شنو؟
لمى: ان شاءالله خير.
علي: صار ساعه احجي حتى ريكي نشف وانتي بس هذا ردج.
ابتسمت حصرتني الضحكه اول مره اشوفه متحمس بس استحي شحجي شنو اكوله.
لمى: شتريد تسمع.
علي: كاظم الساهر انا وليلى.
ضحكت هو ابتسم كال: والله برودج راح يموتني اني تعبان صار3 ايام منايم ومحروك كلبي وصار ساعه احجي واشرح واحاول بكل طريقه اوصلج مشاعري بدون متفهميها غلط وانتي جايتني شتريد تسمع.
لمى: هههه.
علي: والله. اريد اسمع اوكي موافقه اريد اسمع اني هم احبك اريد اسمع انت زوجي واني زوجتك كلي إلك اريد اسمع حبيبي حياتي عمري كلبي اي شي حلو يبين مشارعج يبين موافقتج.
ضحكت غصبن عني استحي مااعرف احجي هيج لان عمره محمد محجه ويايه هيج حجي ولا حسسني اني مهمه بحياته.
لمى: اوكي موافقه. بس بشرط.
علي: خير؟
لمى: نأجل موضوع الحمل شويه.
علي: لا ماكو تأجيل اذا الله مكاتبلنه طفل ثاني مو مشكله بس احنه نرفض نعمه من الله لا مااقبل اني احب الاطفال واذا الله رزقنه اريد اثنين ولد واثنين بنات. ماله داعي تخافين هذا زواج والتزام مو لعبه حتى تخافين باجر اكولج الله وياج مااحبج.
سكتت واتحسرت كتله: وبعد شي. موضوع محمد.
علي: شبي؟
لمى: متفتحه بعد. لابخير ولابشر اذا بدينه حياة جديده مااريد كل شويه تسألني عنه لو تكلي واكف بيني وبينج.
علي: بعد اكو شي؟ عندج بعد شروط طلبات.
لمى: لاسلامتك.
علي: الله يسلمج.
دك تليفونه اخوانه جايين جايبيلنه غدا همه طابخين ثواب لابوه الله يرحمه واندك الباب طلع هو راح يفتح الباب كمت اني رحت شفت مصطفى بعد نايم رحت لغرفتي اتمددت بعدني نعسانه مشبعانه نوم.
اسمع صوت اخوانه دخلوا طلعت سلمت عليهم ورجعت للغرفه اتغطيت ونمت.
حسيت احد شبكني كمزت لكيته هو.
علي: اسم الله شبيج خفتي.
لمى: خوفتني.
علي: معبالي غافيه شبسرعه نمتي.
لمى: منمت البارحه.
علي: تعالي نامي يمي.
شكد فشله شكد احراج رجعت خليت راسي عالمخده وانطيته ظهري ولميت شعري ورفعته مااعرف انام الا وشعري مفتوح.
شبكني واتدنه بجسمه حيل يمي استحيت.
علي: شعرج حلو لتكصي.
حسيت كلبي يركع مثل الطبل.
علي: انتي حلوه.
لمى: شكرا.
علي: كل شي بيج حلو.
لمى: شكرا
علي: اني مداحجي حتى تكولين شكرا اني اعبرلج عن مشاعري.
ابتسمت كتله: اوكي عبر براحتك.
علي: ههه. يالله نامي.
لمى: مااكدر انام وانت يمي هيج.
علي: كيفج اني مااكوم بعد هذا مكاني بعدين هي الجربايه زغيره ام نفر يعني شسوي.
لمى: خوش عذر.
علي: راح انام نعسااان انتي كيفج لتنامين بس متكومين.
لمى: ومصطفى؟
علي: نايم حبيبي خليه ماعليه شي.
لمى: يبقى وحده؟
علي: هو يحب ينام هناك واني احب انام هنا.
لمى: هههه اوكي نام.
علي: نعساان بس مااكدر انام ممصدك ابوي اتوفى عبالك حلم.
لمى: الله يرحمه هذا امر الله ادعيله واقراله الفاتحه.
بجى كعدت ودرت عليه.
لمى: اذكر الله مو هيج كول الله يرحمه.
بجى هوايه بعدين سكت كال: صعبه ادخل للبيت ومااشوفه.
لمى: الله يرحمه. كوم غسل واتوضا هسه يأذن حتى اصبلك غدا ونام براحتك.
علي: لا اذا كعد مصطفى بعد ميخلينه انام.
لمى: معناها نام خل اروح اشوف مصطفى.
علي: لا عوفي نايم نامي يمي.
نمنه مكعدنه الا المغرب.
الايام بسرعه تركض اليوم الاربعينيه ويردون يرحون للنجف جنت اتمنى اروح ولامره رايحه لامي الله يرحمها.
الصبح قبل لنروحلهم كتله: علي بالليل تطلعون للنجف ان شاءالله؟
علي: ان شاءالله.
لمى: اريد اروح وياكم.
علي: ليش شيوديج اتعبين ومصطفى هم يتعب من نخلص العشا بالليل اوديج يم هدى.
لمى: اريد اروح لامي مرايحتلها ولا مره.
هو جان يباوع بموبايله باوعلي.
علي: تعالي يمي.
كعدت يمه باس خدي وخله ايده وره ظهري.
علي: عندج عبايه مال راس؟
لمى: لا ماعندي بس البس من خاله.
علي: ماشي.
خله ايده على جتفي وشبكني كلي: من نرجع ان شاءالله تنامون يمي بالغرفه الجبيره والثانيه نسويها لمصطفى بس يكبر شويه لازم ينام بغرفه وحده.
لمى: الله كريم.
علي: شنو جانوا يدلعوج من جنتي زغيره
ضحكت كتله: لولو.
ضحك كال: معناها منا وهيج اسميج لولو بس بيني وبينج. زين لولو احنه نروح بسيارتنه لو تردين ترحين ويه البنات.
لمى: لا ياريت بسيارتنه شسوي رايحه ويه البنات.
علي: متحبيهم؟
لمى: لا مو مااحبهم مو لهدرجه؟
علي: بس مبين متحبيهم.
لمى: همه يضوجون مني. مااعرف ليش.
علي: يغارون. لتخلين بالج يمهم. خليهم يحجون شيردون خل يحجون.
لمى: حجيهم يغث.
علي: مثل شنو يعني؟
لمى: يعني حجي مو حلو يغث.
علي: اي اعرف بس شنو يكولون يعني؟
لمى: يعني مثلا همزين اتزوجت وخلصنه منها لو باقيه جان واحد من ازواجنه يمكن اتزوجها.
علي: اي وشنو يعني ليش تضوجين.
لمى: لان مو ماعندي كرامه حتى اذب نفسي على واحد منهم حتى يتزوجني هم بالنسبه إلى اخواني عيب من يفكرون بيه لو بيهم هيج كالوا مجبوره اتزوج بس مو هيج مو لهدرجه.
حجيت بعصبيه وسكتت حجيهم يقهر واسلوبه لا مبالي يقهر اكثر.
علي: المفروض تفرحين يغارون منج لان حلوه احلى منهم حقهم.
شبكني حيل كال: حبيبتي ماكو شي يستحق تغثين نفسج علموده خصوصا هيج مواضيع همه النسوان هاي سوالفهم بس غيبه وحسد خليهم يحجون براحتهم.
حسيت كلبي مثل الجهال الزغار يدك بسرعه من كلي حبيبتي محد كايلياها الا هدى وسرى وهسه هو والها طعم غير لان منه طعم مختلف.
علي: لو اعرف بس وين تصفنين.
لمى: وياك.
علي: زين شكلت؟
لمى: حبيبتي.
ضحك ورجع شبكني كال: معناها حبيبتي وحياتي عمري كلبي شتحبين تسمعين بعد كل الحجي الحلو راح تسمعي.
ضحكت كتله: حسب الطلب يعني. مااريد بس حجي وتمثيل.
علي: لا اني مااعرف امثل راح تسمعين مني بس اللي احس بي.