رواية اليتيمة للكاتبة روز الفياض الفصل الرابع عشر
رحنه لبيت اهله حتى نطلع وياهم بالليل للنجف دخلنه وسلمنه عالاهل والكرايب والجيران اللي يرحون.
علي: حبيبتي اخذي مصطفى نومي حتى ميتعبه بالطريق هو اصلا نعسان.
لمى: ان شاءالله.
اخذته ورحت انومه اجت زوجة حماي تصير بنت خالتهم اسمها زينب.
زينب: شلونج لمى شخبارج؟
لمى: الحمدلله بخير.
زينب: شلونه علاوي وياج؟
لمى: زين الحمدلله.
زينب: اكولج من نرجع نروح لفد مكان اني وياج.
لمى: وين؟
زينب: خالتي كلتلي اخذج لهاي الحجيه يمنه تدوس على ظهرج علمود الحمل.
لمى: ليش شبي ظهري؟
زينب: حتى يصير عندج حمل بسرعه لو اول زواج الج نكول عادي من تدور السنه يصير حمل بس انتي هذا الثاني وعندج حمل وولاده قبل يعني ماكو عذر روحي للحجيه مخسرانه شي واذا مفادت نروح للدكتوره.
لمى: مراح يقبل علي.
زينب: لا لتكوليله منريده يعرف.
لمى: لا مااكدر مدام هو ميقبل مااروح.
زينب: خالتي تكلب الدنيا اذا مقبلتي هاي اني كتلج هي تريد تشوف اطفاله هو. انتي عندج ولد بس هو شنو ذنبه لتصيرين انانيه تفكرين بس بنفسج.
لمى: ليش اني شمسويتله هذا الشي يم الله اذا الله مقاسمله شسوي يعني؟
سكتت نومة مصطفى وطلعت رحت كعدت يمه كلهم كاعدين ويسولفون كل مجموعه بسالفه هو كاعد يم امه.
علي: ها نام؟
لمى: اي نام.
ام محمد: زينب تريدج روحي شوفيها شتريد منج.
لمى: اعرف خاله جنت يمها.
اتدنه يمي كال بصوت ناصي: شبيج؟
لمى: ماكو شي.
علي: اكو.
ضحكت كتله: ليش متعرف الصبر؟
علي: لان متحجين بدون ملحه.
لمى: من نطلع اكولك هسه مااريد احجي.
حط ايده على جتفي كال: شحجت زينب شتريد منج؟
لمى: شكد تلح كتلك راح تعرف بس نصعد بالسياره احجيلك هسه مينفع.
علي: زين نتعشى ونروح انام.
لمى: يانوم مو راح نطلع مو كلتوا بالليل نطلع حتى نوصل من وقت.
علي: ميخالف شويه نعست.
لمى: معناها نروح وياهم مو بسيارتنه اذا نعسان لتسوق السياره.
علي: خل نتعشى وبعدين نتفاهم.
امه تباوعلنه لان نحجي بصوت ناصي.
لمى: اوكي.
كمت وياهم خلينه العشا واتعشينه وكملنه.
كام هو ماادري وين اني كاعده وامه يمي صاح هو: لولو.
لمى: نعم؟
كمت اريد اروحله كالت امه: لولو مدري على شنو يدلعج لاخلفه لاجهال المن ماخذج ماادري.
متت من القهر وانغثيت حيل وضجت على اساس هو اتزوجني بكيفه لو بكيفي حتى المن ماخذج.
رحتله هو بغرفة امه وابوه دخلت كال: سدي الباب وتعالي.
سديت الباب ورحت يمه كعدت.
علي: قفلتي الباب؟
لمى: لا ليش؟
علي: قفلي هسه كل دقيقه وحده تجي تفتحه.
كمت قفلته ورجعت.
علي: شتريد منج زينب؟
سكتت خفت احجي ويضوج لو يصير عصبي.
علي: انتي تعرفيني مااحب اسأل وماكو جواب.
لمى: خالتي كايلتلها تاخذني لوحده هنا تدوس على ظهري.
علي: تدوس على ظهرج شنو؟
لمى: ماادري. بس علمود الحمل وكلتلي اذا مترحين خالتي تكلب الدنيا عليج وعلي لازم ميعرف.
علي: وشنو كلتيلها؟
لمى: اول مره كلتلها علي مراح يقبل فما اروح كالت خالتي تكول لتكله منريده يعرف واذا مترحين تكلب الدنيا عليج انتي تعرفيها سكتت.
علي: مترحين مو كيفهم ومالج علاقه بحجيهم.
لمى: وخالتي شلون بيها من نرجع اكيد ترزلني وتفشلني كدامهم.
علي: اني اتصرف لتخافين.
لمى: مااريدهم يعرفوني اني حجيتلك.
علي: خلص كتلج اني اتصرف.
لمى: الله كريم.
علي: زين ليش ضايجه بعد.
لمى: ههه انت كاعد حتى تراقبني.
علي: اعرف انتي متحبين تجين هنا واعرف يسمعوج حجي واعرفج من يكون اكو شي مضايقج يبين على وجهج.
لمى: هسه منروح بسيارتنه مو؟
علي: ليش؟
لمى: مو تكول نعسان.
علي: جذب بس اريد اريح جسمي شويه ومااريد اخليج يمهم بره اخاف يفترسوج هههه. تعالي يمي نامي بعد ساعتين يالله نطلع ارتاحي.
نام هو عالجربايه واني هم نمت وبينه مصطفى نايم اني مديت ايدي حضنت مصطفى هو لزم ايدي كال: تعالي هنا.
لمى: وين؟ ومصطفى؟
علي: تعالي. شبي مصطفى نايم حبيبي.
متحركت لان اصلا ماكو مكان اروح يمه وين انام ومصطفى نايم مااريد احركه.
علي: حبيبتي؟
رفعت راسي باوعتله.
علي: تعالي.
ضحكت كمت كعدت يمه.
علي: احجي متجاوبين اصيح تغلسين اتوسل تسكتين بس حبيبتي تسمعين وتجاوبين وتجين.
ضحكت كال: هاي اليريد يخطفج لو يقشمرج بس يكولج حبيبتي.
ضجت من حجايته كتله: اني مو قشمر حتى يقشمروني. البنات إلى يقشمروهم يدخلولهم من باب الخطوبه والزواج واني متزوجه الحمدلله.
علي: اتشاقى وياج شبيج ضجتي.
سكتت كال: حبيبتي؟
لمى: نعم.
ضحك هو حيل كال: هاي اني قشمرتج هسه وخليتج تحجين.
لمى: اذا من شخص احبه مقبوله.
علي: يعني تحبيني؟
اتمددت يمه كتله: ماادري اكو شي بس شنو هو مااعرفه.
ابتسم كال: اي هو هذا معناه تحبيني.
ضحكت كتله: منو كال يجوز اعجاب.
علي: لا عندي معجبات ممحتاج بعد اريد واحد يحبني.
لمى: وين المعجبات بالدوام؟ لو وين؟
علي: شعليج انتي معجبه حالج حالهم ميحقلج تسألين.
لمى: زين شلون اشكالهم اكو وحده حلوه بيهم؟ همه كم وحده؟
ضحك هو كال: هاي متحبيني وهيج انخبصتي وغرتي لعد لو تحبيني الله يعيني.
لمى: علي؟
علي: نعم.
لمى: كول والله تحبني؟
علي: والله احبج.
اتدنه شويه سوالي مكان كال: نامي يمي.
نمت يمه شبكني حيل وخله ايده جوه راسي ورفع راسه باوعلي.
علي: انتي حلوه.
ضحكت كتله: ادري يوميه تعيدها عليه.
باسني على كيف ورفع راسه باوعلي استحيت كولش رجع باسني بس هالمره بقوه. حسيت ديفتح دكم القميص لزمت ايده.
رفع راسه باوعلي كال: مااسوي شي بس احضنج.
استحيت حتى احجي رجع باسني ويتحسس جسمي بعدين رفع راسه باوعلي كال: لمى. اريدج.
لمى: لا لا مو وكتها هسه ومو هنا من نرجع ابيتنه.
علي: شيبصرني.
لمى: اتحمل شويه لخاطري.
علي: اوووف.
باسني هالمره حسيته ديطلع الفرق حتى مكدرت اتنفس لدرجة دفعته.
وخر هو نام يمي وحضني كال: لخاطرج.
سديت اني دكم القميص وانطيته ظهري استحي كال: لا دوري علي اريد وجهج.
درت بس مباوعتله غمضت خله اصبعه على شفتي وظل كل شويه يبوسني برقه.
علي: اني شورطني وكلت وره متخلص الاربعين يالله.
ضحكت كتله: اتحمل هي بقت بس كم ساعه.
علي: اوكي اتحمل بس بشرط.
لمى: شنو؟
علي: اريدج عروس. يمي متلبسين الاسود.
لمى: اليوم تطلع الاربعين كول يالله.
علي: يالله ليش شكايل اني اريد زوجتي تلبس يمي ملون مااريد اسود صح احنه من زماان متزوجين بس مو صدوك فأريد احسج هالمره عروس واحنه متزوجين جديد.
لمى: الله كريم.
رحنه للاربعينيه ورجعنه لبيتنه رأسا مرجعنه لبيت اهله علمود امه متجبرني اروح للحجيه حتى اتدوس على ظهري.
الصبح من رجعنه بقينه نايمين بعدين كعدت نظفت وطبخت وسبحت واتصلت بهدى حجيتلها على التطورات اللي صارت.
هدى: يعني واخيرا ادري شجان منتظر مو من خلص العزا مالت ابو المفروض.
لمى: هو الظاهر جان يريد لحدما يخلص الاربعين يالله حتى يحس نفسه عريس هههه.
هدى: اي حقه المفروض انتي هم اليوم عروس قميص نوم ابيض وشغلات.
لمى: عروسيش يمعوده قابل يوميه.
هدى: لا مو يوميه هذا تعتبري اول زواج ذاك مينحسب عيشي واتونسي لتفكرين بالماضي وتظلين خايفه افتهمتي.
سديت التليفون ويه هدى باوعت للساعه صارت ب5 وهم نايمين رحت سشورت شعري ولفيته صاير طويل للورك ماشاءالله ونزعت الاسود لبست بيجامه لونها اخضر زيتوني والتيشيرت عسكري.
رحت كعدته وكعدت مصطفى حتى يتغدون وشينومهم بالليل.
صبيتله غدا وكعدت يمه اباوعله كال: ليش متاكلين؟
لمى: مو جوعانه.
علي: شوكت كعدتي وطبختي؟
لمى: كعدت ب2 نظفت وطبخت وسبحت.
علي: ليش خليتنه لهسه نايمين.
لمى: كلت تعبان اكيد بعدين باجر جمعه اذا منمت بالليل من وكت باجر نام براحتك.
بعدين لبس وطلع بقينه اني ومصطفى بالبيت اتصلت هدى كالت: جايه بالطريق خو مطالعين.
لمى: لا مطالعين بس اني ومصطفى بالبيت.
هدى: وهو المطلوب.
لمى: ليش شبيج؟
هدى: طلعي فتحيلي الباب مااريد ادخل مستعجله.
طلعت فتحت الباب نزلت هي من السياره.
هدى: ها حبيبتي شلونج؟
لمى: هلو حبيبتي انتي شلونج شبيج شصاير؟
هدى: مصاير شي بس رحت للسوك جبتلج قميص نوم ابيض يخبل وشوية شغلات يالله باي بوسيلي صوفي.
راحت بقيت صافنه هاي اختي مو طبيعيه الله لايحرمني منها كل الحنيه عدها تذكرني بأمي الله يرحمها.