رواية اليتيمة للكاتبة روز الفياض الفصل الخامس عشر والأخير
دخلت للبيت فتحت الجياسه طلعت قميص النوم الابيض صدوك يخبل من فوك صاير مثل اليلك من كدام والظهر كل لاستيك وكم الخصر كل كسرات ناعمه وكولش كلوش ومن جوه تور شفاف وبي بالطرف كركش ومفتوح من كدام من الخصر ليجوه عبالك بدله.
وواحد ثاني وردي قصير ووياه روب طويل.
ومكياج وعطور وملابس داخليه فيكه مال عرايس وشورتات وتيشيرتات وجرجف ابيض وبي ورد احمر.
خليتهم بالكنتور كلت من يجي يالله يجوز غير رأيه رحت اسوي عشا من خلصت رحت بالهول دزلي مسج (شلونها عروستي).
كلت معناها ديذكرني خاف ناسيه.
رحت خليت مكياج قوي مدام يريد عروس عيوني كبار خططتهم وخليت حمره لون عنابي وخليت عطر.
الساعه 10 رجع دخل اني جنت اعشي مصطفى بلكي ينام.
ظل واكف يباوعلي كال: السلام عليكم.
لمى: وعليكم السلام.
كمت خليت الصحن بالسنك هو باس مصطفى وشاله واجه شبكني من وره.
علي: ماما حلوه؟
يحجي ويه مصطفى باس جتفي كال: جوعان اروح اغسل وانتي صبي العشا.
لمى: ان شاءالله.
راح غسل وبدل ورجع يتعشى كعدت اتعشى وياه كال: لولو ليش متلبسين حلقه؟
لمى: ضاعت.
علي: شوكت؟
لمى: من زماان.
علي: وليش مشتريتي غيرها؟
لمى: ليش اشتري والمن.
سكتت مردت ينفتح موضوع محمد هو هم سكت يمكن فهم.
خلصنه عشا كام غسل وراح للهول اني كمت غسلت الماعين ونظفت المطبخ ورتبته ورحت يمه كعدت كعدنه نباوع عالتلفزيون.
علي: اليوم انام بغرفتنه بس هالفتره بعدين اجيب غرفة نوم جديده. ونجيب غرفه لمصطفى.
لمى: ان شاءالله.
بقينه نسولف شويه لحدما نام مصطفى الساعه ب12 ونص.
اني نعست ظليت كل شويه اتثاوب.
علي: نعستي نروح انام؟
لمى: اي والله نعست.
كام هو طفى التلفزيون والاضويه ويشوف الباب مقفول لو لا اني رحت لغرفتي لبست قميص النوم الابيض شكد جنت مستحيه بس.
فتحت شعري وخليت عطر وطوخت الحمره فتح الباب هو ظل واكف يباوعلي متت من المستحه دخل كال: مو كلنه بعد ذيج غرفتج.
لمى: اي ميخالف بس اشيائي واغراضي ملابسي هنا.
لزمني من ايدي ورحنه لغرفتنه على كولته لكيته فارش الغرفة فرش عرس ضحكت كتله: هاي منين جبتها؟
علي: اشتريتها العصر بس بقت بالسياره هسه رحت نزلتها وفرشتها.
لمى: حلوه.
علي: بعد اكو شي دقيقه بس.
طلع من الجراره علبه بيها حلقه لبسنياها كال: متنزعيها لا بالبيت ولابالطلعه بس كون تكفي لاصبعج.
لمى: ان شاءالله. شكرا.
شبكني حيل كال: العفو بس اني هم اريد البس حلقه حتى ارتاح من المعجبات.
ضحكت شبكته حسيت هذا اقل شي ممكن اشكره بي على احترامه إلى.
علي: اول مره تشبكيني.
ابتسمت كال: شنو هالشعر الحلو هذا.
حجينه شويه عن الجو والكهرباء وعن مصطفى بعدين كال: حبيبتي بردانه؟
اني صدوك جنت بردانه سحبت الغطا اتغطيت.
علي: لا تعالي يمي اني ادفيج.
شبكني حيل الغرفه ظلمه بس لايت النوم مشتعل.
علي: انتي شكد حلوه.
ضحكت حيل.
علي: شبيج؟
لمى: هالمره زادت عليها كلمة شكد.
ضحك كال: زين نغيرها تخبلين.
محجيت شي استحي كال: كل شي بيج حلو. شعرج وجهج عيونج طولج جسمج كله حلو بس احلى شي.
دنك باسني على كيف وباوعلي كال: لولو تحبيني؟
لمى: اتصور احبك.
علي: هههه معناها تحبيني.
يلعب بشعري ويتحسس وجهي وشفتي باسني هالمره بقوه ومد ايده جوه القميص لخصري رفع راسه باوعلي بعدين استلم جسمي بوس لحد رجلي.
اول مره احس واحد يحبني صدوك ويسمعني كلام حلو اول مره احس احب واحد وهو يحبني معقوله هاي اني معقوله الدنيا قررت تتعدل شويه ويايه.
بليلتها حسيت نفسي فعلا عروس اول مره اتزوج جان كولش رقيق وبقى شابكني للصبح كعدنه على صوت مصطفى الساعه 10دفع الباب ودخل اجه يمنه اني نعسانه بقيت مغمضه هو باس خدي كلي: لولوتي صوفي جوعان.
مجاوبت كال: زين بس سويله حليب ورجعي نامي.
كمت بالكوه سويتله حليب وغسلتله وغيرتله ورجعت نمت هو نايم مصطفى اجه يمه نام دار هو شبكني وباس جتفي كال: صباخ الخير حبيبتي.
لمى: لا ماكو اريد انام.
علي: لا كافي الظهر نامي هسه اني هم جوعان مو بس مصطفى.
لمى: بس شويه.
علي: مو اذا تبقين الشويه تصير هوايه مااضمن نفسي ومصطفى كاعد ميجوز.
التفتت باوعتله كتله: عفيه بس شويه دقيقتين.
علي: مو اكثر من دقيقتين. اني رايح قبلج اسبح اريد اطلع الكه الريوك جاهز.
لمى: اوكي.
باس شفتي على كيف وراح.
رجعت نمت مصطفى يمي يشرب حليب خلص وكلي: ماما.
كعدت بسته كتله: توتو حبيبي وين بابا؟
نزل راح يركض للحمام رحت وراه اباوعله فتح علي الباب شافنه واكفين كال: شبيكم؟
لمى: ماكو بس سألته وين بابا اجه يركض للحمام يعرفك هنا.
ضحك هو وشاله وباسه.
علي: حبيب بابا انت. روح بابا.
باوعلي كلي: ها نتريك؟
لمى: لا.
علي: ليش؟
لمى: جنت نايمه و.
علي: ونسيتي الريوك؟ عفيه.
ضحكت كتله: هسه دقايق بس.
علي: لا خلص انتي روحي غسلي اني اسوي جاي وبيض عيون.
لمى: والله؟
علي: اي شبيج متعجبه.
لمى: معقوله؟
علي: ليش؟
لمى: اول مره احد يسوي بمكاني حاجه هيج يعني بهالبساطه.
علي: هههه هسه اغير رأيي واضربج بوري.
لمى: عادي اصلا اني مو متعوده عالدلال والراحه.
نزل مصطفى وشبكني كال: اتدللي شكد متريدين وسوي اللي يعجبج هذا بيتج والقاضي راضي.
لمى: ياقاضي.
علي: اني.
لمى: القاضي هذا اول واحد يسحسسني اني انسانه مو سلعه إلى قيمه ولوجودي فايده غير الخدمه والاهانه.
بست خده كتله: اتمنى اكدر اجازيك بس ماعندي شي اكدر اجازيك بي.
باسني كلي: شلون مالج قيمه ومالج فايده شوفي حياتج من مرحله لمرحله وصلتج إلى معناها انتي الج قيمه جبيره بحياتي.
وعيب وحده تكول لزوجها اجازيك تجازيني على شنو اني المفروض اعتذر لان جان المفروض احسسج انتي زوجتي من اول يوم شنو ذنبج انتي.
شبكته كتله: علي؟
علي: همم؟
لمى: اخاف احسد نفسي.
علي: ههههه قل اعوذ برب الفلق.
باوعتله كتله: يمكن احبك.
ضحك كال: يمكن؟ يعني مو اكيد. معقوله اني محبوب تره انتي اكثر وحده طولت ويايه لهسه محبتني هههه.
لمى: زين اغسل واجي نتناقش بهالموضوع بسته ودخلت للحمام سبحت وطلعت لكيته صدوك مسوي جاي وبيض عيون.
علي: اتريكي اول وبعدين مشطي شعرج.
لمى: الله شكد احب البيض عيون بس مااعرف اسوي.
علي: تره كل شي اعرف اسوي مو بس بيض.
لمى: زين كم وحده حبيت بحياتك.
ضحك كال: هسه ليش الاحراج هذا؟
لمى: ليش؟
علي: هههه بالابتدائيه وحده بت المعلمه. وبالمتوسطه وحده والاعداديه جنت معجب ببنيه بمنطقتنه بس اتزوجت قبل لاتعرف اني معجب بيها ههههه.
لمى: ماشاءالله توزع مشاعر.
علي: بعدين بالكليه عجبوني بنات هوايه بس اني مو من النوع اللي يروح ويصارح بنات بس جانوا هوايه بنات معجبات بيه يخلولي ارقامهم عالسياره.
لمى: لعد شلون حبيت نور.
سكت هو بعدين كال: نور بعدين اتعرفت عليها بالدوام اول مااتوظفت بس هي اللي اتقربتلي مو اني هي جريئه مو مثلج هادئه جانت خوش بنيه ولطيفه وحلوه بس انتي احلى.
لمى: الله يرحمها.
علي: انتي الوحيده اللي اني صارحتها باعجابي بيها لان اعرفج ماممكن تطلع منج وتعترفين تحبيني.
لمى: اني وضعي مختلف.
علي: واني وضعي مختلف.
لمى: بس الرجال مو مثل المره.
علي: ليش شنو ماعنده احساس.
لمى: لا بس الرجال كل شي اله مباح المجتمع يسمحله بس المره كل شي ممنوع وعيب حتى المشاعر.
خلصنه وكمنه رحت امشط شعري اجه هو للغرفه شبكني كلي: لولوتي.
لمى: نعم؟
علي: نصلي وبعدين نروح لاهلي.
لمى: ان شاءالله. معناها انت سوي شنو تريد واني راح انظف لحدما تصير الصلاه.
علي: تعالي وين رايحه ياتنظيف هسه وكته.
لمى: ليش؟ شكو؟
علي: مو كلتي سوي شنو تريد؟ اريدج.
لمى: مصطفى كاعد.
علي: زين خليه ديباوع افلام كارتون بالهول. بسرعه بس بوسه وحده.
باسني ورجع باسني ومره ثالثه ورابعه.
علي: البوسه متروي تعطش اكثر.
لمى: كافي خل اروح كلت وحده؟
علي: اعتبريني جذاب ولو نيتي جانت وحده بس انتي وحده متكفي وياج.
استحيت حسيت خدودي صارت حمر.
لمى: يالله خل اروح اخلص شغلي.
دنك عض اذني على كيف مدري شصاربيه علي: من اخلص اني شغلي يالله.
بقيت نايمه على ايده وشابكني بالايد الثانيه بعدين كال: لولو؟
لمى: نعم؟
علي: شنو امنياتج؟
لمى: حاليا؟ بس تحبني وتبقى تحبني متتغير بيوم ويايه واذا الله رزقنه اطفال تبقى تحب مصطفى متحبه اقل منهم.
علي: احبج مو كلنه لتخافين ومصطفى ابني ماكو احد ممكن يغير هالشي. بس اني اقصد امنيات جنتي تتمنيها قبل ومتحققت.
درت عليه باوعلته كتله: هوايه امنيات ولا وحده تحققت.
طاحت دمعتي كتله: كل وكت اله امنيه جنت اتمنى اكمل دراسه وادخل جامعه واتخرج. جنت اتمنى عندي اخوان عندي ظهري استند عليه لو احتاجيت.
وجنت اتمنى من من اتزوجوا خواتي وراحوا وبقيت وحدي اني هم اتزوج واخلص من مرت ابوي وظلمها. ومن اتزوجت محمد جنت اتمنى يعوضني عن التعب والعذاب اللي شفته ابيت ابوي. ومن اتزوجنه وشفته عكس اللي اتمنيته ظليت اتمنى يحبني.
ومن اتوفى اتمنيت ابوي يجي ياخذني ويكول بنتي تبقى ابيتي معززه مكرمه واي شي تحتاجه هي وابنها اني حاضر. ومن جانوا يقنعوك تتزوجني ومتقبل اتذكر خاله من كلتلك حتى اذا متريدها اعتبرها خدامه بلكمتها. سكتت شويه جريت نفس حيل حتى ماابجي بعدين كتله اتمنيت لو عندي مكان او احد اروحله بدون ماافكر مكان مااكون بي خدامه بلكمتي ومااكون بي ثكيله على احد. ومن اتزوجنه اتمنيت تكون مختلف مو مثل محمد. ومن اجيت هنا وكتلي اني حتى لو ردت اتزوج مااتزوج وحده مثلج اتمنيت لو ميته ويه امي من ذاك الوقت ولا سامعه منك هالحجي وشايفه كل هالذله بحياتي لوصلتي لهنا شكد حسيت نفسي رخيصه ومالي قيمه ومنبوذه. ومن سافرت وخليتنه اتمنيت من جنت تتصل لو بس تكلي شلونج حتى اعرف تحبني لو خلص مليتنه. ودائما جنت اتمنى امي موجوده واحط راسي بحظنها واشتكيلها من الناس.
شبكني حيل وباس كصتي كلي: حبيتي كل هذا صار ماضي انسيه لتفكرين بي وكتلج اني قبل انتي مو خدامه انتي زوجتي اني اعوضج ان شاءالله اني اخوج وابوج وامج وزوجج وكل اللي ترديه لان انتي غاليه عندي مو رخيصه واذا انتي ميته اني اتزوج منو لعد؟ واصلا لان احبج جنت مااكدر اسألج واحجي وياج من اتصل لان مااريد افقد السيطره على نفسي جنت اريدج تفكرين براحتج وتعرفين شنو تحسين واني نفس الشي من وره 3 اسابيع خلص كطعت الاجازه ورجعت مكدرت اتحمل بعد اكثر جنت ناوي اجي اخذج من بيت هدى ونجي لبيتنه بس بالطريق اتصلوا بيه كالوا ابوي اتوفى.
راح احاول احققلج امنية الدراسه اذا الله راد.
شبكته كتله: اذا بيوم من الايام اتندمت لانك اتزوجتني مو تذبني بالشارع وتحرمني من ابني ماعندي غيره اموت بدونه اعتبرني خدامه بلكمتي قابله.
علي: اوكفي اوكفي شهالحجي شنو اتندمت شنو احنه نلعب هنا؟ شنو شايفتني ماعندي غيره واذبج بالشارع لو ماعندي مخافة الله حتى احرمج من ابنج وكلمة خدامه اذا ذكرتيها بعد ازعل. انتي حبيبتي شلون اتندم اصلا يمكن لو شايفج قبل منتزوج جان اني كلتلهم اريد اتزوجها.
لمى: مو صحيح هو انت جنت متطيقني.
علي: والله شبيج. مو مااطيقج بس جنت احس اذا اتقرب منج راح احبج وجنت متصور بعدج تحبين محمد من اشوفج بالبيت تشتغلين ترحين وتجين اكول شكد جميله معقوله الله انطاني هيج بنيه حتى تكون زوجتي هيج بدون شروط ومقدمات وتعب بس شلون اتقربلج اخاف متقبلين لهذا السبب جنت اسألج عن علاقتج بمحمد.
لمى: يعني واخيرا اتحققتلي امنيه.
علي: شنو؟
لمى: اتزوج واحد يحبني واحبه واستقر ومااخاف من باجر.
علي: كل اللي تتمني واكدر اسوي الج راح اسوي ماراح اقصر ان شاءالله.
لمى: الله يخليلياك يارب.
شبكته وبست خده.
علي: يعني هاي رشوه؟
ضحكت كتله: يعني الا رشوه؟
علي: طبعا واريد رشوه ثكيله هاي متكفي.
كمت رحت سبحت وصليت وجهزنه نفسنه ورحنه لاهله.
دخلنه وسلمنه وكعدنه كلي: ابقي يمي لتكعدين بعيد.
بقيت كاعده يمه امه تخزرني بعدين كالت: اني شوصيتج البارحه؟
لمى: شوصيتيني؟
ام محمد: مو كلتلج زينب؟
لمى: اي بس رحنه للبيت كبل مقبل علي نمر هنا.
علي: شكو شوصيتيها؟
ام محمد: شغلة نسوان.
علي: يعني ميصير اعرف؟
ام محمد: لا ميصير.
علي: معناها متسويها اذا اني مااعرف شنو مو مسموحلها تسوي اي شي بدون علمي وموافقتي ومو مبرية الذمه لا انتي ولا هي اذا تعرفين مااقبل وتخليها تسوي.
ام محمد: على كيفك على كيفك دومك ماعندك تفاهم كله حامي متنطي مجال جنت اريدها تروح لمره تدوس ظهرها حتى تحبل.
علي: والله راح تخبليني هي مو عدها طفل بعد من شنو خايفه واذا علمودي اعتبريني ميصير عندي اطفال بهالحاله شتسوين اذا طلع العيب مني؟ بعدين مصطفى بعده ممكمل سنتين خطيه واني مدام عندي مصطفى بعد مو مهم اذا مصار عندي اطفال.
يحجي بهدوء بس حسيته عصبي من خلص كام كلي: يالله كومي نروح.
كمت هو شال مصطفى وطلع واني طلعت وراه طلع ورانه حماي حجه وياه هدأ شويه بس مقبل يرجع يدخل.
رجعنه للبيت بالطريق هو نزل يم مطعم جابلنه غدا اتغدينه ومصطفى نعس نومته واني هم جنت نعسانه بس انقهرت عليه رحت يمه ردت انسي شويه.
لمى: حبيبي؟
علي: نعم؟
لمى: اريد اطلب فد شي.
علي: شنو؟ طلبي.
لمى: اريد مكينة مال خياطه.
باوعلي كال: تعرفين تخيطين؟
لمى: يعني مو كولش بس احتاجها هوايه بدل ما على اقل شي لازم خياطه.
علي: صار. بعد شنو تردين؟
لمى: اريد انام يمك.
علي: تعالي.
شبكته اني ونمنه العصر كعد هو باسني من خدي كلي: ابقي نايمه مدام صوفي نايم اني طالع مااتأخر فد ساعه وارجع.
بقيت نايمه بعدين حسيت بي رجع فتحت عيوني اجه يمي.
علي: لولو يالله كعدي كافي نوم اريدج بشغله.
لمى: شنو؟
علي: اذا متكعدين مااكولج.
كعدت كعد يمي كال: جبتلج شي ان شاءالله يعجبج.
طلع محبس وتراجي كلي مجبتلج شي من اتزوجنه وهسه احتاريت شنو اختار مااعرف ذوقج بس جبت محبس وتراجي وكل شهر راح انطيج مبلغ انتي جمعي واشتري اللي تردينه.
شبكته حيل وبسته كتله: مااريد شي كافي انت عندي بالدنيا كلها.
علي: بعد اكو شي خليته بغرفتج الزغيره.
لمى: شنو؟
علي: انتي روحي شوفي.
رحت للغرفه الثانيه شفت مكينة الخياطه فرحت حيل.
رجعت ركض شبكته وبسته كتله: شكرا حبيبي. صدوك راح احسد نفسي.
ضحك وشبكني كال: لو ادري من زمااان جايب مكينه مدام هيج.
تمت