رواية اليتيمة للكاتبة روز الفياض الفصل السادس
صبيتله جاي وبقى هو ومصطفى بالهول كاعدين باجر جمعه ومصطفى شبعان نوم رحت غسلت ملابسهم وشريتهم بالحديقه وكعدت اتصلت بخواتي حجينه شويه ودخلت نعسانه بدي انام بس مصطفى شبعان نوم رحت اخذه بلكي الله يهدي ويرجع ينام بس مجلب بعمه ميقبل يجي عندي وعمه متونس عليه يلعب وياه.
رحت للغرفه اتمددت ونمت تعبانه وره تقريبا ساعه حسيت الباب انفتح كعدت بقى واكف بالباب كال: كل هذا نوم دكيت الباب كم مره ولاحسيتي وصوفي جوعان خبصني.
كمت بسرعه استحيت نمت وخليت الولد عليه ابتله بي.
اخذت مصطفى وهو راح ينام بقيت كاعده يم مصطفى ميريد ينام يريد يلعب بقيت الليل كل كاعده الساعه ب5 يالله نام كمت صليت ونمت.
الصبح مكعدني بقيت نايمه اني ومصطفى الساعه ب11دك الباب كمت كوه.
فتحت الباب كال: صباح الخير اليوم شقصتكم كعدت من الساعه9 ومنتظركم تكعدون حتى نطلع اليوم جمعه خل نغير جو.
لمى: صباح النور مو البارحه منمنه للساعه 5 يالله نام واني صليت ونمت.
علي: معناها جهزوا نفسكم حتى بالوحده نطلع نروح نتغدا بره.
لمى: ان شاءالله.
طلعنه رحنه اتغدينه بعدين اخذنه للسوك اشترالنه ملابس إلى ولمصطفى كلي: اخذي اللي يعجبج بس الوان مو اسود.
مااخذت شي استحي بس لمصطفى.
علي: ليش مااخذتي شي معجبج شي تردين نروح لغير مكان يمكن يعجبج شي؟
لمى: لا لا ميحتاج عندي هوايه ملابس مشكور.
علي: اذا متاخذين اني اخذلج بس المشكله اخاف ذوقي ميعجبج.
لمى: والله عندي هوايه مااحتاج هدى وسرى جابولي.
علي: ميخالف تحتاجيهم لان طلعاتنه هوايه.
استحيت مااكدر اخذ شي ماصخه حيل شنو ابتله بلوه بينه.
هو من نفسه اختار فستانين وقميص واخذلي وياهم حجابات.
رجعنه للبيت مصطفى نام بالطريق وصلنه للبيت هو دخلنه ودخل الاغراض وراح ماادري وين.
اني خليت مصطفى بفراشه ورحت غسلت ملابس وغسلت الكراج ونظفت الحديقه وكعدت افكر شسوي عشا.
شويه وانفتح الباب دخل هو وكلي دخلي للغرفه شويه.
رحت دخلت وسديت الباب ماادري منو جاي وياه.
وره شويه دك الباب طلعت: خلص طلعي راحوا.
طلعت باوعت شفته جايب غسالة فرحت راح ارتاح من غسل الملابس بأيدي الحمدلله من جابها من نفسه لو عليه مااكله يجيب مستحيل.
علي: ها شرايج هاي حتى ترتاحين متغسلين يوميه بأيدج هالوقت صوفي اوله بي.
لمى: مشكور بس عادي يعني ماعندي مشكله اغسل من يكون نايم.
علي: تحبين تعترضين انتي. اني ماعندي غساله لان متعود اودي ملابس للوندري حتى من جانت نور موجوده.
لمى: الله يرحمها.
علي: باجر الولد يجي يسويلها تأسيسات المي والكهرباء وين تردين نخليها؟
لمى: بالمطبخ اكو مكان.
علي: ان شاءالله.
راح يصلي اني هم رحت اتوضيت وصليت وطلعت اسوي عشا هو بقى بغرفته.
خلصت وكعدت بالمطبخ انتظره يطلع حتى اسأله اذا جوعان اصبله عشا.
وره ساعه تقريبا يالله طلع.
لمى: تتعشى؟
علي: لا مااشتهي.
راح للهول واني رحت للمطبخ كعدت بعدين سخنت الاكل كلت خل اتعشى قبل ليكعد مصطفى صبيت شويه وكعدت اكل دخل هو كال: اكو جاي؟
لمى: اي ان شاءالله هسه اسوي.
كمت سويت جاي ووديته ورجعت اتعشى.
جاب هو كوب الجاي وكعد يمي.
استغربت مو من عوايده يكعد ياكل لو يشرب وياي كله وحده واني وحدي اكيد عنده شي.
علي: مصطفى نايم؟
لمى: اي هسه يكعد ويبقى للصبح يلعب ويخبلني.
علي: ههههه حبيبي هادئ حتى من يلعب.
بس هالايام متنحس شويه لان ديطلع اسنان يمكن هسه وقتها.
لمى: اي صحيح.
علي: تحبي لمى؟
مااتذكر شوكت كال اسمي يمكن اول مره مثل ما هاي اول مره يكعد يشرب جاي او ياكل يمي.
لمى: اكثر من روحي بس هو عندي علموده اني متحمله كل شي وعايشه.
محجه بالبدايه يمكن ضاج من كلامي بس اني مقصدي شي بكلامي.
علي: هو اذا اني هلكد احبه طبيعي انتي تحبي اضعاف حبي اله انتي امه.
لمى: ان شاءالله باجر يكبر ويعوض صبري خير ومينكر فضلك.
حجيت هالكلمتين وسكتت حسيت بغصه شكد الحاجه للناس صعبه الله لايعوز احد لاحد ربي لاتذلني اكثر ربي بكرمك ورحمتك اغنيني عن الناس ولاتحوجني لاحد غيرك ياربي.
علي: اني ممنتظر من احد يعوضني لو يجازيني لان انتو اهلي محد ينتظر جزاء من اهله هذا واجبي مصطفى لان ابني اللي جنت اتمناه وانتي امه مقامج من مقامه معززه مكرمه واي شي تحتاجي اني حاضر مااكدر اكول زوجتي لان مو صحيح هالوضع انتي مجبوره جنتي لان ماكو بديل وبالنسبه إلى اني محمد واكف بيني وبينج.
لمى: الله كريم اني اصلا كرهت الزواج وكرهت الناس وانت حر بحياتك يعني اذا تريد تتزوج وتستقر هذا حقك اني مااتدخل شوكت ما انت نويت او فكرت كول بالنهايه انت شنو ذنبك تتوقف حياتك علمودنه احنه نعيش الله مينسى عبده بالنهايه هو ابنكم وانتو متعوفوا يعني اذا كلش كلش اضطريت انطي مصطفى لبيبيته وجده احسنله.
هالحجايه طلعت غصبن عني عبالك صدوك راح ياخذوا مني وابقى وحدي ومااشوفه اكيد ميخلوني اشوفه اذا اخذوا دمعت عيوني الله ليكولها ولايحرمني منه.
علي: تره دنحجي حجي بسرعه بجيتي مبين تفكرين هوايه وبعدج خايفه انتي هسه متزوجه يعني بمسؤوليتي وتحت حمايتي وابنج ابني مو ابن اخوي محد ياخذه منج شنو متكون الظروف يبقى وياج لان هذا الاحسن اله والج. بعدين اني لو اريد اتزوج جان اتزوجت من زماان بقيت 3 سنوات ونص بدون زواج اشمعنه هسه من اخذتكم عندي افكر بالزواج.
كمت شلت الاغراض والاكل من الطاوله كال: خلي جعت من الحجي.
لمى: يالله هسه اسخنه بس دقيقه.
صبيتله العشا ورحت شفت مصطفى نايم حبيبي رجعت يمه ليكول راحت وحكرتني. روزالفياض.