رواية اليتيمة للكاتبة روز الفياض الفصل السابع
كعدت بمكاني بالمطبخ هو يتعشا.
علي: ابنج طالع عليج.
لمى: اي حتى خواتي يكولون يشبهني.
علي: لا قصدي هادئ انتي متفتحين موضوع وتحجين ولاعندج فضول ومتسألين عن اي شي ميخصج ومتدخلين بشي ميخصج بس هم يشبهج هو من ناحية الشكل ابيض وشعره اسود وعيونه كبار وباقي ملامحه ناعمه.
محجيت اتفاجأت مدقق بملامحي رغم مااشوفه يباوعلي وحتى من يباوع بطريقه عاديه ويدنك لو يدور وجهه ميركز.
واني لهسه استحي اباوع بوجهه وانقهر عليه حيل اجته مسؤوليه جبيره ممحصل من ورانه غير بس التعب والاذيه. ماادري شلون اجازيه لو على ابن اخوه هينه لان بالنهايه هو ابنهم ومسؤولين عنه بس المصيبه اني حجر عثره بطريقه وهالشي ممخليني ارتاح. والمشكله جنت اكرهه لان ماعنده اسلوب وياي بس هالفتره الفاتت كلها هو زين وممقصر ويانه بشي الله شاهد اني كلبي مكسور عليه وكلما اشوف صورت زوجته انقهر شكد يحبها مخلي صورتها لهسه يمه وحاسه نفسي ثكيله عليه وماعندي غير بس ادعيله بصلاتي الله يوفقه ويرضى عنه ويجازي كل خير لان اني وابني نعتبر ايتام وهو متكفل بينه.
علي: وين صفنتي؟
لمى: ماكو افكر.
علي: محد يعرف شضامله المستقبل لتفكرين خليها على الله.
لمى: ونعم بالله.
علي: بس فعلا حياتج غريبه وانتي قويه وحده غيرج يمكن متحملت الظروف اللي مريتي بيها يمكن ذبت ابنها وراحت اتزوجت او يمكن مشت بطريق مو زين حتى تعيش حياتها وتخلص من الهم رغم انتي زغيره وحلوه.
لمى: الحمدلله على كل حال.
علي: اييي احجيلي شويه عند علاقتج بمحمد شلون جانت؟
لمى: شحجي؟ ماكو شي اكثر من اللي تعرفه جنت ساعات اصفن اكول اذا ميريدني وميطيقني وميحبني ليش اتزوجني هو رجال مو مثلي يكدر يكول مااريدها ويروح يتزوج غير وحده.
علي: لان اصلا هو جان ميريد غير وحده والوحده اتزوجت وراحت الله يستر عليها فليش يرجع يتزوج ونفس الغلط يتكرر وتجي ضحيه ثانيه والنتيجه وحده يبقى يحب نفس البنيه.
لمى: يعني انت تعرف بالقصه؟ وشكلك تعرف البنيه.
علي: طبعا اعرف وسبب المشكله والزعل اللي جان بيني وبينهم هذا الموضوع.
البنيه تصير بنت خالة نور زوجتي الله يرحمها شافها مره عدنه وانعجب بيها بس للامانه البنيه مجانت رايدته ولاجانت تعرف بالموضوع بالبدايه بس من خطبها مقبلت هو مخلص محاسبه وهي صيدله تريد واحد صيدلاني مثلها حقها كتله كل شي قسمه ونصيب انسى وشوف غير بنيه بس معجبه كلامي زعل.
لمى: وبعدين؟
علي: بعدين ظل يضايقها للبنيه يروحلها للدوام ويحاول يحجي وياها وهي اشتكت لنور ونور بلغتني رحت لبيت اهلي واتعاركت وياه بس المشكله امي وابوي والبنات وكفوا بصفه وكالوا كله من مرتك هي متريده يخطبها محاولت تقنعها.
هي شنو علاقتها حتى متريده يخطبها وشلون تقنعها البنيه مو طفله وزغيره وحقها تريد واحد من مستواها الدراسي.
بعدين وراها بكم شهر سمعت بي خطبج واتزوج وحتى مكلف نفسه يجي يكلي تعال ويانه بالخطبه لو عزمني بالزواج.
بقيت ساكته حسبي الله ونعم الوكيل حياتي راحت وشبابي ضاع لهالسبب.
بس هو شلون يحجي هيج على اخوه يعني اتوفى وراح المفروض ميحجي هيج حتى لا اكرهه ولو اني محبيته حتى اكرهه.
كعد مصطفى اترخصت ورحتله رضعته وبعدين غسلتله وغيرتله وبدلت ملابسه.
اجه هو اخذه يمه كلي: اذا تردين تنامين نامي خلي يمي بس سويله حليب من ينام اجيبه الج باجر عطله خليني اتونس وياه.
سويتله حليب واخذه اتمددت بغرفتي بعدين اتصلت بهدى حجينه وسولفنه شويه بعدين حجيتلها عالحجي اللي حجاه علي عن محمد.
هدى: اخاف اكول شي تخافين لو تضوجين.
لمى: شنو احجي شنو اللي يخوف تتوقعين يقشمرني حتى ياخذون ابني؟
هدى: لا لج وين راح بالج شياخذوا هو ابنج غصبن ماعليهم ميكدرون ياخذوا اصلا.
لمى: لعد شنو؟
هدى: والله اني اشوف مدام كل مره يعيد عليج نفس الجمله مال محمد واكف بيني وبينج وهالحجي اللي حجاه عن اخوه الميت شكله يحبج.
لمى: انتي مخبله اكولج ميشتهي ياكل وياي اول مره يكعد يمي يشرب جاي.
هدى: اي انتي السبب انتي تخلي وترحين تاكلين بالمطبخ هو يجوز ميريد يضغط عليج.
لمى: اوكي عوفينه من الاكل والحجي اذا كل ميحجي يكلي محمد واكف بيني وبينج وانتي زوجة اخوي امانه عندي.
هدى: اي طبعا لعد شيكولج اكثر من هيج ديلمحلج بس انتي دماغج ثخين متفتهمين ديكولج اني اريدج بس المشكله بمحمد.
لمى: صدوك المشكله بمحمد اخ ياربي والله ضحكتيني واني ضايجه ومحمد شنو لازمه بالله.
هدى: صدكيني لهذا السبب حجالج عن موضوع البنيه هسه ليش محجالج قبل لان مجان يحبج ولا يعرفج بس هسه من ظل يحبج واتعود عليج يريد يعرف شكد تحبين اخوه حتى اذا متحبي يتقربلج او اذا تحبي المفروض من تعرفين بهالقصه تضوجين منه.
لمى: اش ولا كلمه زايده بهالموضوع لتخليني افكر تره ابد مو ناقصه تفكير كافي اللي شفته من اخو ومن اهله خليني هيج احسنلي.
هدى: ولشوكت راح يبقى متحملج لا انتي زوجته صدوك ولا انتي طالعه من بيته ومخليته شايف حياته.
لمى: شفايتلي عندي مكان اروحله جان طلعت من زماان.
هدى: ياعمري انتي اتحملي حبيبتي الله يباوع لحالج ياريت لو نخلص بناء بيتنه وتجين عندي.
لمى: يعني علي يفتك مني تبتلين انتي وزوجج؟ واظل اني طول عمري عاله عالناس.
هدى: انتي اختي شلون عاله لتكولين هيج ازعل منج. بعدين فكري شويه بالموضوع يعني هو شكله حلو جسمه مرتب وشاب ووضعه المادي زين يعني هو هسه وممقصر وياج شلون لو صدوك زوجته ويحب ابنج يموت عليه شتردين اكثر يجوز الله يعوضج بي.
لمى: اني شحجي وانتي شتحجين اذا هو لحد الان يحب زوجته الله يرحمها ولحد الان مخلي صورتها بغرفته يعني اذا هو يشوف محمد واكف بيني وبينه اني اشوف زوجته الله يرحمها واكفه بيني وبينه.
هدى: تره اثنينهم راحوا لدار حقهم انتو لا اول ولا اخر اثنين يتزوجون بهالطريقه ولهالسبب هوايه رياجيل يتزوحون زوجات اخوانهم بعد ميتوفون علمود الاطفال بس يعيشون حياتهم عاديه وزواج طبيعي والله يرزقهم بعد اطفال.
هدى: هاي المو مثلي ممجبورين يجوز مو مثلي ماعندي مكان اروحله ومو مثله ميريد يتزوج لان يحب زوجته بس اقنعوه كلوله ابن اخوك حرام وهي اعتبرها خدامه بلكمتها.
ظلت هدى تحجي تعيد وتزيد بنفس الموضوع بعدين راحت واني رحت اشوفهم لكيته نايم ومصطفى يمه يلعب اخذت مصطفى هو كمز كتله: كوم نام بغرفتك احسن من هنا خوش تريد تسهر ويه مصطفى ههه.
ابتسم دار يريد يكعد اني الثوله موخرت بقيت واكفه فمن راد يكعد خله ايده على رجلي يعني مبينه بصوره عفويه بس اني لان هدى قبل شويه مسممه افكاري متت من المستحه وراسا وخرت هو هم استحى وراح لغرفته.
وراها بفتره صادف عيد ميلاد مصطفى سويتله كيكه جبيره وحلوه وجاب هو زينه والعاب وبالونات وحلويات جان فرحان حيل عبالك ابنه صدوك سبحان الله الله لايحرم احد من الذريه ويرزق كل محروم يارب.
اجوا اهله واخوانه وزوجاتهم وخواته سووله عيد ميلاد حلو بعدين من خلصنه امه كاعده كبالي راسأ فاجأتني كدام الكل: وانتي شمنتظره محبلتي لهسه مو علمناج وفهمناج.
ظليت متفاجأه شنو هالحجي وكدام الكاعدين كلهم اخوانه وابوه شكد عيب.
لمى: الله كريم.
ام محمد: ندري بي الله كريم احنه شكايلين بس نعرف نفتهم شنو المشكله العندج حتى نعالجها؟
رديت عليها بعفويه: ماعندي مشكله الحمدلله.
دارت هي عليه كلتله: معناها عندك اذا هي تكول ماعدها مشكله؟
هو راسأ خزرني وكللها: كلشي قسمه ونصيب ماله داعي هالحجي اذا حملت راح تعرفين اكيد.