رواية اليتيمة للكاتبة روز الفياض الفصل الثامن
بالليل راحوا اني كمت لميت الاغراض ورتبت البيت وغسلت الماعين والكلاصات هو اخذ مصطفى ينومه لان الساعه صارت ب12وهو يلعب خلصت رحت لغرفتي لكيته منوم مصطفى ومخليه بفراشه اني هم سديت الباب وبدلت ملابسي لبست دشداشه قطنيه قصيره حمره وبيها نقط بيضا وفتحت شعري من انام افتحه ماارتاح بالكصيبه.
اتمددت اشوف صور العيد ميلاد بالتليفون ودزيتهم لهدى وسرى هدى مكدرت تجي لان انتقلت ابيتها وملتهيه وسرى مريضه افلاونزا عدها واصلا همه ميحبون يلتقون ويه اهل محمد.
دك الباب كمت فتحته باوعلي استحيت من دشداشتي صح هي جوه الركبه بس استحيت لان دلعتها جبيره شويه.
علي: تعالي شويه.
راح اني اخذت شال خليته على جتفي ولفيته على صدري ولفيت شعري شلون ماكان ورحت وراه للهول.
دخلت هو جان كاعد يكلب بالقنوات مال التلفزيون اني كعدت.
خلص ودار علي كلي: ليش هيجي حجيتي كدام اهلي؟
اني نسيت ظليت افكر شنو حجيت.
لمى: شنو حجيت؟
علي: يعني متذكرين؟ من سألتج امي عالحمل؟
لمى: هاا اي اتذكرت بس اني مقصدي شي يعني حجيت بعفويه ابد مقاصده شي رغم هي احرجتني للمره الثانيه بس اني رديت على سؤالها من سألتني اذا عندي مشكله كتلها ماعندي يعني شنو المفروض اجاوب.
ومتوقعت راح تسألك.
علي: شوكت سألتج اول مره؟
لمى: بالسنويه مال محمد الله يرحمه.
علي: وشكلتيلها؟
لمى: كتلها الله كريم.
علي: يعني هسه كدامهم المشكله عندي اني السبب مني.
لمى: والله مو قصدي حجيت عادي يعني متوقعت تسألك او حتى تسألني كدام الكل.
كام راح لغرفته اني بقيت بمكاني كلت الحمدلله عدت سلامات ماكو مغثه.
رجع رفعت راسي باوعتله واكف على راسي كال: انتي خليتيني بوضع مو حلو وماادري شسوي.
لمى: تره الموضوع مو مستاهل كل هالعصبيه.
علي: بنظرج مو مستاهل.
ظليت ساكته ومحرجه اني شحجاني بس ماادري بي هيج راح يضوج يعني مبين مو من هالنوع إلى يهتم لكلام الناس او اهله.
راح لغرفته بدون ميحجي اني هم رحت لغرفتي وسديت الباب ظليت الليل كله افكر اخر شي دزيت مسج لهدى ردت لان جانت كاعده.
هدى: شعندج كاعده صوفي منايم لهسه؟
لمى: ياريت على صوفي سويتلي مشكله.
هدى: صخام شسويتي؟
لمى: والله مو اني السبب امه السبب هي تلح لزكت كلما تشوفني تسألني.
هدى: لج منو وكعتي كلبي ام منو؟
حجيتلها الصار.
هدى: مو كتلج ونصحتج متسمعين الكلام كتلج خوش ولد ومناقصه شي وباجر اذا يريد يتزوج بس يأشر على احلى بنيه شابه وممتزوجه لا ارمله ولا عدها طفل تجي ركض بس انتي متسمعين الكلام. كتلج هو زوجج واصلا حرام عليكم انتو متزوجين زواج شرعي واصولي حرام عليكم اللي دتسووا انتي متفكرين اذا يتزوج وحده ثانيه شلون شنو مصيرج انتي وابنج ليش تخربين حياتج اذا تكولين خوش رجال شتردين اكثر.
لمى: اكول ثور تكول حلبوه. اكولها ميحبني وميريدني وميشتهيني ويحب زوجته تكولي نصحتج اكولها يوميه يكولي اذا اتزوج فاكيد مو انتي تكلي تخربين حياتج ياحياة لخاطر ربج هي هم تسميها حياة من اتزوج واحد يحب وحده ثانيه واعيد نفس القصه العشتها ويه محمد ونفس المأساة.
هدى: ميصير هيج شنو هي حياة لو شنو اكعدي واحجي وياه مبيها شي هاذي حياتج كوليله تريدني لو لا واذا تردين اني احجي وياه وافتهم منه.
لمى: اتخبلتي صار بعقلج شي من كل عقلج؟ بعدين اني شنو كتلج المره الماضيه كتلج اذا هو يشوف محمد واكف بينه اني اشوف زوجته يعني ماعندي استعداد اجازف لان هالمره اذا قبلت بهيج وضع معناها راح ابقى هيج مدى الحياة نفس وضعي ويه محمد وماعندي قدره اتحمل نفس الاهانات ونفس الاسلوب خليني على كولتهم خدامه بلكمتي احسن مما اذل نفسي لشخص ميشوفني اصلا وابقى متندمه لاخر عمري.
هدى: والله اني اشوفج هيج راح تبقين متندمه. تره مبيها شي اذا تحبي تتقربين منه.
لمى: روحي هدى روحي نامي الظاهر من كدما نعسانه ظليتي تسحبين بث خارجي.
هدى: لا والله احجي صدوك معقوله محبيتي صارلكم سنه ابيت واحد حتى لو محبيتي اكيد اتعودتي عليه.
لمى: اكيد اتعودت عليه طبيعي.
هدى: خلص معناها اتحركي حسسي تره التعود اقوى من المحبه سأليني اني مو جنت احب عمار الحب جنون بس ممكن يخف او ينتهي بس التعود اقوى لان من تتعودين على شخص او حاجه ترتاحين عليها حتى لو مو زينه ومتكدرين تعوفي او تغيري تحبي مثل ماهو.
لمى: هو اني بدون هالسوالف واموري داجه خدامه جبت عمري بكل بيت ادخله كل شي اسويلهم ومحد يحبني ترديني اني هسه احب واتخبل وينشلع كلبي اكثر اني ناقصه قهر.
هدى: ليش حبيبتي تفكرين هيج انتي بعدج شابه بعز شبابج هسه عمرج راح يصير 21 اللي بكدج عايشه ومتونسه بحياتها اللي بالكليه واللي متزوجه واللي موظفه.
لمى: انتي كلتيها البنات مو اني. اني الله مقاسملي ادخل كليه واكمل دراستي مثل البنات ولا اتزوج مثل البنات ولااحب مثل البنات ولا احد يحبني مثل البنات واليقهرني كلها تشوفني حلوه وكل رجال يشوفني يتمناني الا إلى الله قاسمهم إلى لايحبوني ولا يشتهوني بعيشة الله.
هدى: اوف على حظج ياحبيبتي همه يكولون الحلوه ماعدها حظ.
لمى: وهم ياريت خالصه. ياريتني مشفت الحلاة بلكي يكعد حظي مثل بنات الناس بس شكول الحمدلله والشكر اذا هو ويه ابوي ماعندي حظ وياه شلون ويه الناس الغريبه.
حجينه هوايه بقينه نحجي يمكن للساعه2 ونص وبعدين بقيت كاعده افكر بحجيها.
شلون ورطه شلون ياربي اذا صدوك يريد يتزوج شسوي حقه وعاذرته ومالي حق احجي او اعترض بس شلون منو إلى ابني ابنهم اكيد ميتركوا بس اني منو اصلا يريدني وين اروح ياربي مالي غير بيت ابوي ومرت ابوي مهما يكون اسمه بيت ابوي محد اله فضل علي بس شلون بابني ميتحملونه وراح انذل عدهم علموده ويمكن متقبل بي وتكلي ودي لاهل ابوه.
شلون اذا اخذوه شلون اتحمل شلون اعيش بدونه المن اعيش بعد همه اصلا اذا رحت لبيت ابوي ياخذوه مستحيل يقبلون يخلوا عندي.
ظليت ابجي محتاره شسوي شنو الحل صحيح هو خوش انسان بس شلون اتورط من جديد بهيج وضع يعني محمد مجنت اعرف بي يحب وحده ثانيه بس علي اعرف بي يحب زوجته الله يرحمها وحتى لو ميحبها ميحبني واكثر من مره كلي محمد بينج وبيني يعني حتى لو جان عندي امل اكطعه وهو اصلا شيحب بيه لا شهاده لا اهل وعزوه لا اخوان لا اب بي خير كلما اتذكر ابوي اموت من القهر من اتوفى محمد لليوم صار سنه ولافد يوم سأل عني بالتليفون حتى مو يجي.
بقيت كاعده للفجر أذن انتظرته يروح يتوضا ويرجع يالله رحت اتوضيت مااريد يشوفني يجوز بعده معصب ويسمعني حجايه.
صليت ونمت الصبح كعدت كالمعتاد سويتله ريوك وجاي بس متريك طلع.
خلصناها هالايام سكته قليل يحجي ويايه
وره فتره يمكن شهر عزمونه اهله على عشا بس اني جنت افلاونزا قويه ومصخنه فما رحت بقيت بالبيت ونمت هو اخذ مصطفى وراح.
ماادري بيش الساعه حسيت بحركه يمي فزيت شفته يحط مصطفى بفراشه.
كعدت وعدلت ملابسي شلون دخل للغرفه بدون ميدك الباب يجوز دكه واني محسيت كال: شلون صرتي بعدج مصخنه؟
لمى: الحمدلله. شويه احسن.
اني جنت مصخنه لدرجة عيوني احس تطلع منها حراره وبلاعيمي تأذيني وعظامي كلها تأذيني جسمي مكسر احسه.
كعد يمي عالجربايه استحيت واستغربت ممسويها قبل واصلا محبيتها مااريد اظلمه بس هدى خلت براسي هالفكره يحبني بس ياخوفي ميحبني بس يريد مثل اخو وقت الحاجه وبعدين ميعرفني.
واصلا حتى اذا راد هيج شكدر احجي لو الومه لو اعاتبه هو شمسفاد من وجودي هم يريد مقابل عالتعب والمسؤوليه اللي متحملها بوجودنه بحياته.
علي: شبيج تباوعيلي.
لمى: مستغربه.
علي: شنو؟
لمى: ماادري بس اول مره تدخل لغرفتي بدون متدك الباب.
علي: عادي لان اتوقعت نايمه مردت اكعدج.