رواية اليتيمة للكاتبة روز الفياض الفصل التاسع
لمى: مو مشكله.
علي: يالله تصبحين على خير.
لمى: اجمعين.
راح وسد الباب اني كمت قفلته وراه يمكن نص ساعه دزلي مسج: نمتي لو بعدج كاعده؟ اذا كاعده تعالي اريد احجي وياج بموضوع.
طلعت على كيف وحافيه رحت للهول مشفته كلت معناها بغرفته بس مااتجرأ ادك عليه باب الغرفه رجعت لغرفتي وسديت الباب وقفلته.
وره شويه اجه حاول يفتح باب الغرفه اني كلت يمكن اكو شي لذلك ديلح كمت فتحت الباب كال: مو دزيتلج مسج وقريتي ليش مااجيتي مدام كاعده.
لمى: اجيت بس ملكيتك بالهول.
علي: معناها بالغرفه.
لمى: اعرف بس يعني تشوفها حلوه بحقي اروحلك لغرفتك؟
علي: ليش اني غريب شنو المو حلو يعني؟
لزمني من ايدي وكال: امشي كدامي لتكعدين الولد.
مشيت هو لازمني من زندي استحيت حسيت اليوم ماخذته الميانه.
علي: فوتي اشوف.
دخلت لغرفته كلبي يركع احسه مثل الطبل.
سد الباب اني عرفت الموضوع حسيت صار عندي مغص كلت هدى حجيها صحيح.
علي: اكعدي.
كعدت عالحافه مال الميز تواليت هو بقى واكف يباوعلي.
علي: لمى اريدج.
لمى: نعم؟
علي: اللي سمعتيه.
ظليت ساكته بس اشتعلت بكلبي نار احس هذا الجنت خايفه منه مثل اخوه بالضبط بس اني غبيه جنت متصورته مختلف غير عن محمد جنت احسه محترمني وجنت انقهر عليه لان متحملني ومتحمل ابني بدون مقابل بس طلعت غبيه هذا هو يريد المقابل هسه.
علي: لمى؟ مو احجي وياج؟ انتي زوجتي واني زوجج واريدج.
بس ارمش تطيح دموعي هذا حظي وهاي قسمتي ماادري الصوج بيه لو بيهم بس هسه اجه وقت سداد الدين مقابل كل إلى سواه هو بالضبط لمى عودي نفسج مكتوبه عليج عمرج كل خدامه اكو ناس الله خالقها تخلص عمرها ابتلاءات وانتي الظاهر هيج اتحملي وسوي كل شي لخاطر ابنج وحتى تبقين وياه مياخذوا منج.
كمت راسأ نزعت ملابسي جنت لابسه بدله مال بيت جوه الركبه ونص ردن لونها اسود ومشجره بأخضر نزعتها وبقيت واكفه بس بالاتك بقيت مدنكه كرهت نظراته إلى بقى هو واكف يباوعلي بعدين شبكني حيل اني جسمي قشعر فعلا شعور مااعرف شلون اوصفه من رجل ثاني غير الزوج يلمسج ولو هو زوجي بس لان محسيت انو هو زوجي قبل بس من دافع عني مره كدام اخته.
وتحسين عبالك دتخونين زوجج الاول حتى وهو جان زوج بس بالاسم لان الزواج مشاركه بكل شي المشاعر الهموم امور الحياة اني معشت هيج لا ويه محمد ولا ويه علي ويه الاثنين جنت مجرد شكل وجسم حلو ومثير لازم يستغلون وجوده لاشباع رغبتهم.
اخذني عالجربايه وبدا يبوس بجسمي اني دموعي تنزل بسكته بدون صوت ومغمضه عيوني كام طفى الاضويه كلها ورجعي يمي شبكني وباسني بقى هيج فتره.
بعدين كلي بصوت ناصي: شلون محمد جان يباوع لغيرج.
اني جفلت وهو هم عبالك جان ممنتبه من حجه وهسه انتبه راسأ باوعلي اني هم باوعتله ارتبك حسيته وراد يتصرف كأنه ماكو شي رجع باسني حيل وكال: نورتي.
اني ظليت بس فاتحه عيوني كلت مو هيج مو لهدرجه اني بشر وعندي احساس يعني ضغطت على نفسي وحسيت بالذل والمهانه واني انزع ملابسي علمود ارضيه وادري بي ميحبني بس علمود يشبع رغبته علمود ارد جزء من فضله عليه وعلى ابني مستوى الذل والمهانه ميتصوره بشر من ترجع فضل احد بجسمك وهسه طلع يفكر بأخو وزوجته وبهيج موقف ويلفظ اسمهم كدامي ولا عبالك اني بشر دم ولحم.
هو باوعلي لان حس اتخشبت.
اختنكت بدموعي كوه طلع من الحجي: اني لمى مو نور.
هو راسأ كام اخذ قميصه وطلع من الغرفه وسد الباب حيل.
اني بسرعه كمت لبست فستاني ورحت لغرفتي سديت الباب وقفلته وكعدت ساعه ابجي وساعه الوم نفسي وساعه اهون على نفسي ماادري شسوي بقيت كاعده بفراشي للصبح بس لعبانه نفسي من نفسي حسيت نفسي مثل البنات المو زينات محمد جان يجيني بس وقت حاجته ومن يخلص ينطي ظهره وينام ومن يريد يطلع يخليلي فلوس عالميز وهسه علي يريد يثبت رجولته كدام اهله على حسابي متأكده سمع حجايه من امه بخصوص الحمل.
وجماله نايمه بحضنه ويفكر بزوجته واخو الله يرحمهم ولا عبالك اللي بحضنه بشر.
منمت الا وجه الصبح ومكعدتله الصبح ولا سويتله ريوك محسيت بالوقت بقيت نايمه للساعه 10 حسيت بمصطفى يلعب يمي.
مر شهر كامل اكعد الصبح قبله اسويله ريوك وارجع انام قبل ليطلع من غرفته ونفس الشي بالغدا من يدخل لغرفته اروح اصبله غدا وارجع لغرفتي مااطلع منها الا من يطلع من البيت والعشا ميتعشى بالبيت وميرجع قبل الساعه 12 رجع مثل قبل ميشتهي يشوفني ولا يحب يكعد يمي هو بغرفته واني بغرفتي جنت اطلع صوفي من الغرفه وهو يروحله لغرفته يدفع الباب ويدخل يمه اسمع صوتهم يلعبون سوا.
اشتاقيت لحياتنه الهادئه اللي جانت قبل فتره اشتاقيت يجي بالليل ويجيبلي حلويات مثل الجهال الزغار اشتاقيت من نطلع كل اسبوع نتغدا بره بيوم الجمعه ويشتريلي شعر بنات ويشتريلي شغلات غصب حتى لو ممحتاجتها من يحجيلي ساعات عن دوامه وشغله لو عن اصدقائه بس من اتذكر بعده يحب زوجته واني مجرد جسد وفرصه متتعوض ولازم يستغل وجودها وخدامه بلكمتي ومن اتذكر شلون انتبه انه هو كال اسم زوجته مو اسمي شلون كام وراح طلع من الغرفه وبعد مرجع استرخص واستصغر نفسي.
الشغله اللي ملازم تنسيها لمى انتي زوجة اخوه ومن الاول كلج لتتوقعين شي من هالزواج اخوي واكف بيني وبينج وزوجته هم حتى لو محجه بس كافي من ذكر اسمها جان متخيلج هي وانتي لتنسين نفسج وتعيشين جو مو جوج لتتوهمين يحبج لو معجب بيج انتي اتعودتي كلهم يحبون شكلج وجسمج يحبون وجود خدامه خادمتهم ومدللتهم من كل النواحي هاذي الكلمه لتنسيها مراح يحب وحده مثلج انتي حتى لو اتزوجتي واحد غيره هم نفس الشي عندج طفل معناها راح تكونين خدامه بلكمتج بس خدامه شامله حتى العلاقه الزوجيه.
ظليت طول هالمده معزوله بغرفتي وهو نفس الشي.
فكرت اروح لبيت هدى كم يوم مدام زوجها مسافر انتظرته بالليل يجي حتى اكوله بقيت كاعده بالهول نعست وهو ماكو مصطفى نام وديته بفراشه ورجعت باوعت للساعه ب12 ونص وين صار ظليت يارايحه للمطبخ ياراجعه للهول صارت الساعه 1 وهو ماكو خفت ليكون صاير بي شي واصلا اني وحدي بالبيت شلون لو دخل علي حرامي شسوي كلت خل اتصل بي.
اتصلت بي ميرد رجعت اتصلت بي ميرد ماادري مشغول ماادري ميريد يجاوب ماادري بالطريق وميريد يفتح عليه خط.
رجعت اتصلت مغلق ضجت وخفت ونعست بس شلون انام والباب مفتوح وهو ماكو على منو اتصل اسألمن عنه.
سمعت صوت بالحديقه اتوقعت هو بقيت واكفه بالمطبخ اباوع محد لعد شنو هالصوت خفت هذا اكيد حرامي رحت اخذت ابني وديته جوه الدرج هاذي الفكره الوحيده اللي خطرت ابالي عالاقل اذا دخل بلكي ميشوفه وميأذيه رحت للمطبخ كعدت عالكرسي كبال الباب حتى اذا يدخل اشوفه هو اصلا شكدر اسويله بس من خوفي ماادري شسوي ظليت اقره آية الكرسي كل شويه رجعت دكيت على علي مغلق ظليت ابجي شيطلع الصبح.
وره شويه سمعت صوت سيارته بره يمكن اجه صوت سيارته بس بقيت بمكاني خاف مو هو اخاف الحرامي افكار غريبه عجيبه خطرت ابالي طلعت الجفجير من الجراره مال الكاونتر هذا السلاح العندي السجينه اخاف منها اخاف يذبحني اني بيها. روزالفياض.