رواية اليتيمة للكاتبة روز الفياض الفصل الرابع
بالمول شافه صديقه واجه سلم عليه وعلي حسيت صديقه اتفاجأ من كله زوجتي.
طبعا هو محد يعرف بالموضوع وهو اصلا مجبور شيحجي بعد وشيكول.
رجعنه للبيت نزلت اني ومصطفى ونزل هو الاغراض دخلت للغرفه وبدلت ملابسي هو خله الاغراض يم باب الغرفه.
طلعت دخلتهم هو راح اتوضا وصلى اني، هم رحت اتوضيت، ورجعت صليت بعدين سويت غدا عالسريع وصبيت وصحتله يتغدا ورحت رتبت الاغراض اللي اشتراهم لمصطفى خلصت ورحت غسلت باوعت بالمطبخ هو جان يريد يسوي جاي كتله: خلص روح انت اني اسويه واجيبه.
راح بالهول اني كعدت اتغديت وخلص الجاي صبيته ووديته اله.
لمى: مشكور.
علي: على شنو؟
لمى: على كل شي.
سكت محجه شي اني رحت غسلت الماعين ورتبت المطبخ اجه هو جاب كوب الجاي خلاه عالطاوله.
علي: انتي ليش مو محجبه؟
استغربت من سؤاله..
لمى: ماادري يعني ابوي مو مهم عنده ومحمد الله يرحمه هم مجان عنده مهم.
علي: عد ابوج عادي بس محمد شلون قبل تبقين بدون حجاب؟
لمى: هو الله يرحمه جان..
سكتت شحجي مات وراح الله يرحمه هسه اني شحجاني خل انجب واسكت احسن ماله داعي هالحجي هسه.
علي: شبي شجان؟
يستهزأ حسيت من صوته انقهرت.
لمى: الله يرحمه خلص ماله داعي بعد..
علي: شنو على كيفج نحجي وعلى كيفج نسكت؟.
ظليت ساكته السكوت احسن بكل الحالات راح اترزل ويسمعني حجي يغث.
علي: من احجي وياج تجاوبين متحكريني.
عصبت وضجت وانقهرت هذا ماعنده احساس شكد مااحاول احترمه واتأقلم وياه اكرهه مينجرع ماعنده اسلوب مثل امه، نفس الاسلوب والتعالي..
لمى: اي شتريد احجي شكول تريد البس حجاب خلص البس مو مشكلة..
علي: اي طبعا تلبسين انتي مو تصلين شلون هيج شعرج طويل وطالع من الحجاب. ومو هذا سؤالي سألتج عن محمد شبي؟
لزمت نفسي كوه حتى احجي، بدون بجي بس اول ماحجيت صبت، دموعي..
لمى: مابي بس جان مثلك هيج الفرق الوحيد انه مجان ميغلط وميضرب، وميسمعني حجي لو يتعمد يجرحني مو محبة بيه لااا، بس لان مو مهمه عنده مجان يحبني ولامعتبرني زوجه بس وقت الحاجه ومن ياخذ حاجته جان ميعرفني بعد، والاتعس جان ينطيني فلوس من يخلص ويشبع عبالك وحده من ذني المو زينات مو زوجته هذا جان اخوك هيج يعاملني..
ظليت ابجي حيل حسيت عبالك جرح جديد وخله ايده عليه بكل قوته اذاني باسلوبه واستهزاءه، وخلاني احجي حجي محاجيته لاحد وحتى مااحب اتذكره او افكر بي اني مستسلمه لوضعي شما يكون قابله ومفوضه امري لله سبحانه وتعالى لان ماعندي بديل بس المشكله محد تاركني بحالي من، واحد لواحد مستلميني اهانات وحجي.
هو محجه شي ولا علق بقى واكف شويه وبعدين راح لغرفته اني هم غسلت وجهي ورحت لغرفتي وسديت الباب وكعدت بجيت ريحت كلبي طلعت الضيم اللي بكلبي كله.
بعدين كعد مصطفى والتهيت وياه بقى كاعد خليته بكاروكه واتمددت على الجربايه اباوعله لحدما غفيت.
كعدت رضعت مصطفى ونومته بعدين رحت اتوضيت وصليت هو الظاهر طالع سويت عشا بعدين كعدت كويت الملابس وخليت ملابسه بغرفته وملابسنه خليتهم بكنتورنه اني ومصطفى واتعشيت ورحت بغرفتي رجعت نمت حسيت باب المطبخ انفتح وانطبك حيل وراها بشويه كمت رحت للمطبخ اسخن عشاه كملته وسويت جاي ودخل هو سلم وكعد اني رديت بهدوء ولاكأنه اكو شي ورحت للهول انتظره يخلص حتى اغسل الماعين واروح انام.
خلص وراح غسل واجه بالهول اني كمت غسلت الماعين وصبيتله جاي ووديته اله اخذه وكلي كعدي..
نعسانه ومالي خلك احجي، واسمع موشح وانغث بهالليل.
امنيتي يوم انام بدون مااكون مقهورة ومغثوثه ومظلومه وباجيه..
كعدت كالمعتاد بالطرف البعيد مباوعتله هو هم ميشتهي يباوعلي.
علي: شوفي، احنه وضعنه غير عن المتزوجين اني مااعرف شي عنج ولا انتي اني جنت متزوج وزوجتي توفت الله يرحمها وتزوجتها لان جنت احبها ولحد الان.
لمى: الله يرحمها.
اني مدنكه بس شفته بطرف عيني باوعلي فتره وبعدين كال: مجنت مفكر اتزوج بعدها وحتى لو مفكر فاكيد مو انتي.
انقهرت يوميه وعاد علي هاي الجمله ساعدني ياربي اتحمل خليني اتحمل اخاف اسوي بنفسي شي من كد الضغط اخاف يخلص صبري.
بقيت ساكته ومدنكه وخايفه من رد فعلي حجه حجي يغث اكثر بس ماباليد حيلة.
علي: ليش ساكته؟
لمى: شتريد تسمع تريدني اتوسل بيك وابجي واكولك ليش؟ مو مهم عندي المهم عندي اني وابني ابيت اسمه بيته حتى لو بس بالاسم المهم ابني يكبر ابيت مو بالشارع المهم ماارجع لبيت ابوي لان اكيد راح يرجعون ابني وانحرم منه. واحتمال يزوجني مثل المره الفاتت واحد لايحبني ولايريدني يحب، وحده ثانيه لحدما اتوفى..
ولو هسه نفس الوضع متغير هوايه بس بدل ما عائله كامله تسمعني حجي بي مغثه هسه نفر واحد وهذا موعتب ولا لوم بالعكس اني ممنونه منك هوايه ومااكدر اجازيك وماعندي شي اجازيك بي بس على كولت امك اعتبرني خدامه بلكمتي اغسلك وانظفلك واطبخلك بس هذا اللي اكدر اقدمه الك وممتوقعه منك شي اكثر.
حسيت روحي طلعت من حجيت شهالذله ياربي مالي قيمه مالي حوبه عندك..
لشوكت ابقى اني هيج شكد صعبه كلمة خدامه بلكمتي شكد ذله حسبي الله ونعم الوكيل باللي جان السبب..
سكت هو شويه بعدين اتنهد و كال: مو قصدي اسمعج حجي يغث بس بصراحه مااعرف شلون اتعامل وياج مااعرف انتي شنو ابالج وشنو جنتي متوقعه من هالزواج.
مجاوبته ماعندي طاقه بعد احجي اذا احجي ابجي ومااريد ابجي لان هالوضع مو جديد ولو مينحمل بس شسوي هذا حظي من الدنيا ربي اله بيها حكمه.
علي: مو قصدي اهينج او اقلل من قيمتج من كتلج حتى اذا اريد اتزوج مااتزوجج انتي، بس قصدي انتي زوجة اخوي صعبة مجرد التفكير يخليني احس نفسي خاين ومو رجال يعني مدام محمد بينه انتي بالنسبه إلى امانه عندي ومصطفى ابني اكيد لان جنه نتمنى اني وزوجتي يصير عدنه طفل بس الله مراد بقينه 5سنوات والله مرزقنه.
لمى: الله يرحمها.
علي: اذا ضوجتج بحجايه فآني اعتذر مو بقصدي..
لمى: عادي ميحتاج تعتذر اني متعوده.
علي: انتي هسه تنحسبين علي اني اي شي ترديه او تحتاجيه تطلبيه مني..
واني راح امشيلج مصرف يجوز تحتاجين تشترين شي او يعجبج شي.
واني ممحتاج خدامه اكدر اخدم نفسي انتي ممجبوره تطبخين وتنظفين وهو هذا بيتج صار لان بيت ابنج.
كمت اني وكتله: مشكور جزاك الله خير بس ميحتاج مصرف ممحتاجه شي وكافي عليك مصاريف مصطفى، تصبح على خير..
درت اريد اطلع كال: انتي منو كلج محمد جان يحب وحده ثانيه؟
درت عليه باوعتله كتله: مو مهم.
علي: وليش سكتي واتحملتي اذا تعرفين ميحبج ويحب وحده غيرج؟.
لمى: لنفس السبب اللي خلاني اقبل بهالوضع وياك، ماعندي احد اروحله وين اروح؟
منو يستقبلني؟ اني على كولت عمي ابو محمد يتيمه حتى بوجود ابوي.
سكتت وطلعت مااكدر ابقى بعد واجاوب على اسئلته وافتح دفاتر دافنتها بكلبي واريد انساها بكل طريقه.
رحت لغرفتي وسديت الباب واتذكرت امي الله يرحمها وبجيت حيل بجيت، اتمنيتها موجوده واشكيلها من الناس ومن اللي سووا بيه ومن كل القهر اشفته بحياتي من اتوفت لليوم..
وراها بكم يوم اجو جيرانه يسلمون لان يسمعون حركه بالبيت بالنهار وسمعوا بموضوع زواجنه من طلعوا كال: انتي ليش متنزعين الاسود مو المفروض توج جايبه وتوج متزوجه؟
لمى: اني بدون شي مخالصه من الحجي مو بعد انزع الاسود..
بعدين شغلة الولاده صارت قديمه والزواج هم مو حقيقي ليش بعد انزع الاسود هيج احسن عالاقل اتكفى الشر..
بقينه 6شهور نفس وضعنه اني بالبيت اطلع بس من يودي مصطفى للتلقيح وخواتي كل شهر يجوني مره ميردون علي يضوج من زياراتهم.
اهل محمد جانوا مرات يجون حتى يشوفون مصطفى ويجيبوله العاب وملابس بس طبعا اسلوبهم نفسه ميحبوني الى ان مره اجونه وجان علي كاعد وامه وابوه واخته واني رحت سويتلهم جاي ورجعت رأسا اخته كالت: شلونها وياك هاي خو مشالعه كلبك؟ اذا تضوجك ذبها اباب اهلها حتى تعرف الله حق وتحمد الله عالنعمه.
اني رأسا دمعت عيوني ودرت عليه وباوعتله منتظرة رده وخايفه يصدمني، هو مدنك يشرب الجاي.
علي: هاي اسمها لمى، من تحجين عنها لو وياها تحجين بأحترام وادب لان زوجة اخوج ومااقبل احد يحجي وياها هيج افتهمتي؟
واذا اهلها ميردوها مو مهم لان اني اريدها وهي اصلا هسه مسؤوله مني متحتاج اهلها بعد.
اني رحت للمطبخ بسرعة حسيت معدتي ظلت تكلب على كدما انغثيت صدوك هو رده جان قوي ويريح الكلب لان اول مره احد يدافع عني بس بقيت مقهوره لان فشلتني كدامه..