رواية اليتيمة للكاتبة روز الفياض الفصل الخامس
ظليت افكر يصير واحد يدعي على ابوه لو ميصير اريد ادعي عليه لان هو السبب بكل شي مو زين بحياتي.
رحت اتوضيت ورجعت لغرفتي كعدت اصلي وادعي وبقيت هيج لحدما راحوا.
دك هو الباب وفتحه اني مسحت دموعي وسويت نفسي بعدني اصلي هو دخل خله مصطفى عالفراش وطلع..
كمت اني رحت يم ابني مثل كل يوم اباوعله نايم واحاجيه واتوسل بي من يكبر ميذبني بالشارع ويقدر تعبي وكل الذل اللي شفته بحياتي اريده ينسيناه ويعوضني عن كل هاي الناس المؤذيه...
بقيت طول الليل اتكلب مااكدر انام كلما اتذكر حجيها اكره ابوي ومرت ابوي واكرههم اهل محمد كلهم واكره نفسي، لان ضعيفه ومالي احد...
اجه موعد السنويه مال محمد الله يرحمه وماادري اروح لو لا ماادري شسوي هو من اجه بالليل كال: باجر نروح للسنويه مال محمد الله يرحمه العصر.
لمى: يعني عادي اروح؟
علي: اي عادي انتي ام ابنه طبيعي تكونين موجوده بس انتي هسه كدامهم متزوجه من شخص ثاني وهسه كلها تسألج شلونج وشلون وضعج...
اني راسا كتله: اعرف اعرف لتخاف، كلشي، تمام وطبيعي وعادي.
علي: عفيه عليج.
رحنه ومثل مااتوقع هو كل شويه وحده من كرايبهم تجي تسألني واجاوبها بس انقهرت حيييل من سمعت وحده من كرايبهم تكول: صدوك متستحي المن جايه بعد موتت الولد واتزوجت اخوه حتى قبل متدور السنه مالته..
اخته ترد عليها: احنه زوجناها خفنه عالولد المتزوجين منها لتروح تلزك لواحد منهم وتهجم بيته.
باوعتلها اني كتلها حسبي الله ونعم الوكيل...
رحت كعدت بالاخير مصطفى عد عمامه بره سمعت نسوان حمويني يسولفون بيناتهم وحده تكول للثانيه: حظها شكبره بس ماتت اتزوجت واتزوجت احسن واحد بيهم بيته ابحده وراتبه خير من الله يصرف عليها وعلى ابنها.
ترد عليها الثانيه: يمعوده همزين من اتزوجت وراحت خلصنه منها جنت خايفه لاتبقى على كلبنه بالبيت وتالي يزوجوها رجلي لو رجلج وهم يكومون ويكعدون يكولون حلوة.
ترجع ترد عليها: اي هي صدوك حلوة مصيبه صابتها.
ضجت كمت رحت كعدت يم باب المطبخ بلكي اول ميخلصون يجي ويكول نروح.
وره شويه امه كعدت يمي تباوعلي بعدين كالت: شنو ماكو شي ماحبلتي؟
انصدمت من سؤالها رغم جنت متوقعه يسألون هيج اسأله.
لمى: لا.
ام محمد: اي احسن ابنج بعد زغير خل يكبر شويه بس عود اكول حتى تربطين علي وميروح من ايدج بعدين.
لمى: الله كريم اذا يريد يتزوج بعد كيفه ماامنعه هذا شرع الله.
ام محمد: طاح حظج مو مال بيت ورجال شنو شرع الله شنو كيفه.
سكتت شرد عليها عبالها اني مرتاحه وكلشي طبيعي ماادري تدري بس تسوي نفسها متدري ومتعرف شي اذا راد يتزوج اني مااكدر امنعه حقه شنو باي صفه امنعه اني مااحبه ولا هو يشتهيني اصلا بس شيسوي ابتله بلوه بيه وابني ساعات افكر هم خطيه هو شنو ذنبه وساعات افكر اذا صدوك راد يتزوج شنو راح يكون مصيري اني وابني وين نروح وين ننطي وجهنه.
خلصوا اني كمت وكفت يم الباب بلكي اشوفه واكوله نروح ماكو تعبت ومااريد ارجع ادخل جوه اكيد ديحجون علي.
كعدت بالحوش وره شويه دخل هو شايل مصطفى اني كمت.
علي: شعندج هنا؟
لمى: منتظرتك؟
علي: ليش شكو؟
لمى: ماكو شي بس علمود نروح.
علي: تمام يالله كومي.
لمى: انطيني مصطفى عنك.
علي: لا خلي اليوم مشبعت منه كل عد جده وعمامه.
دخلوا حمويني سلموا عليه ووصوا علي كلوله: ليش متبقون اليوم هنا شوراكم رايحين.
باوعلي هو هزيت راسي لا هو هم كللهم: لا منكدر وباجر عندي دوام غير مره.
كلوله: دير بالك عليها تره خوش بنيه مشفنه منها شي من الصبح لليل تشتغل ومالها علاقه بالقال والقيل والبنات مو مقصرين وياها يحبوها حب لان يغارون ههههه.
هو سكت محجه شي سلم عليهم واترخص وخله ايده وره ظهري حتى اطلع.
استحيت وطلعت صعد بالسياره وانطاني مصطفى وصلنه للبيت ونزلنه دخلت عالسريع بدلت ملابسي وملابس مصطفى ونومته ورحت سألت اذا جوعان لو يريد جاي كال لا اارخصت ورحت نمت.
ثاني يوم من رجع من الدوام: كال اليوم صديقي وزوجته يردون يجونه.
لمى: اي اهلا وسهلا بيهم.
علي: متنزعين الاسود؟
لمى: ليش؟
علي: مو خلص دارت السنه؟
لمى: حتى لو دارت ميقبلون عيب؟
علي: ليش ميقبلون؟ واصلا انتي على اعتبار زوجتي يعني محد اله حق يحكمج غيري نزعيه واذا احد حجه ذبيها براسي كولي علي ميقبل.
سكتت استحيت وفعلا اني مخنوكه منه بس مهما يكون هو جان زوجي الله يرحمه حتى لو ميحبني ومااحبه الناس مترحم ميعرفون الوضع بينه شلون جان.
بالليل اندك الجرس اكيد اجه صديقه وزوجته لبست حجابي بعد ميقبل بدون حجاب وخليت شووويه مكياج وطلعت رحت للمطبخ طلعت العصير ومعجنات وهو دخل ياخذهم باوعلي وبعدين كال: ليش منزعتيه؟
لمى: مااكدر.
علي: جنتي تحبي؟
سكتت خاف احجي وميعجبه الحجي بعدين كلت احجي احسن ميكول تحكرني.
لمى: لا.
هو رفع حواجبه اتفاجأ.
علي: لعد ليش متكدرين؟
لمى: لان محد يعرف بالوضع الجان بينه هسه يكولون شبسرعه نسته جان يحبها ومدللها يسووني جنت اميره مثل البارحه.
علي: البارحه شنو شصار؟ شكلولج؟
شورطني وحجيت هو مينحجي يمه شي يظل يلح لحد ميعرف الموضوع شنو.
علي: مااحب احجي ومد يرد عليه. يالله بعدين نحجي هسه روحي نزعي الاسود لان هم جايين يباركولنه لان دارت السنه مجانوا يكدرون قبل يجون يباركولنه.
رحت نزعت ملابسي ولبست فستان مشجر نيلي وابيض وبي ورد زغار وردي طويل وعدل وبي فتحه من كدام عالرجل ولبست حجاب وردي فاتح.
ورحت دخلت للهول وسلمت هو مدنك من وصلت يمه اجت عينه على رجلي طالعه من الفتحه ورفع راسه باوعلي افتشلت واستحيت.
كعدت يمه سولفنه وضحكنه اتونست بيهم زوجة صديقه حبابه كعدوا تقريبا ساعتين وبعدين راحوا.
رحت اني نزعت ملابسي ولبست بيجامه تيشيرت بني والبيجامه بيضا وكلها فراشات بني وبرتقالي.
رحت اسوي عشا بس كعد مصطفى شلته ورجعت للمطبخ يبجي دخل هو شافه يبجي اخذه للهول يحبه حيل سبحان الله الله سخرله عمه يمكن الله مرزقه باطفال حتى يحب مصطفى الحمدلله على كل حال.
كملت العشا ووديته يمه واخذت مصطفى منه لان ميخلي ياكل.
رحت للمطبخ كعدت اكل واوكل مصطفى شويه اضوكه الاكل.
خلص جاب الصينيه للمطبخ خلاها عالسنك ودار على مصطفى باسه بعدين كال: اكو جاي؟
لمى: اي ان شاءالله هسه اصبلك واجيبه.
علي: انطيني صوفي عنج.