رواية اليتيمة للكاتبة روز الفياض الفصل الثاني
بنفس الليله اني بدت عندي الالام الولاده وودوني للمستشفى جبت ولد همه سموه مصطفى حتى مسألوني اذا ابالي اسم ثاني.
ثاني يوم رجعوني للبيت اتصلت بخواتي هدى وسرى اجو شافوني وباركولي وبقوا يمي شويه بجوا على حالي، وعلى
حالهم من حجيتلهم موضوع علي.
هدى: اني المخبلني ابوي ابد ماعنده احساس ميكول بنتي شلونها شخبارها جابت بعدها عاشت ماتت؟
لمى: الله يسمع منج ياريت اموت واخلص مو اكو يموتون بالولاده لعد شبي حظي.
ظلت سرى تبجي.
سرى: لتكولين هيج اسم الله عليج هو احنه لا ام لا ابو وانوب وحده منه يصير بيها شي منو يبقالنه بعد.
لمى: حبيبتي انتي زوجج خوش انسان واهله طيبين الله يخليهم الج بس اني المن باقيه بس خدامه.
مطولوا البنات يمي شويه وطلعوا ميحبون ام محمد وبناتها لان يسمعوهم حجي.
وراها بكم يوم رحنه عقدنه عند السيد وثاني يوم بالمحكمه رجعنه لكيتهم لامين اغراضي بجنط ومخليهم بالهول.
ام محمد: هاي ملابسج واغراضج كلها بعد ليش تتعطلين.
ظليت صافنه لهدرجة مامتحملين وجودي.
هو ميحجي ولا كلمه ولاحرف ولا حتى يباوعلي واني هم ساكته مااعرفه واعرف بي مغصوب ومجبور والله يعلم شلون راح يكون تعامله وياي اذا اولها حكران هيج.
دنك شال جنطتين وطلع خلاهم بالسياره اني سحبت الجنطه الثالثه وطلعتها وراه اجه هو اخذها خلاها بالسياره دخلت جبت مصطفى وبقيت واكفه مادري شسوي اتمنيت لو ميته ولا هالموقف هذا مفروضه فرض عليه حتى ميشتهي يباوع بوجهي.
علي: صعدي شمنتظره؟
صعدت بالسياره طول الطريق هو ساكت واني هم ساكته رحنه لبيته وصلنه ونزلنه دخل هو الجنط واني واكفه اباوعله شكله عصبي.
فتح الباب واشرلي دخلي دخلت البيت بسيط بس هوسه وخبصه بكل مكان اكو ملابس لو صحون لو شوف شنو.
بقيت واكفه هو دخل الجنط وكعد.
علي: اكعدي..
كعدت على طرف القنفه وبقيت مدنكه مفتشله ومستحيه ومقهوره وكل انواع المشاعر اللي ممكن يحس بيها الانسان من يكون مكسور الجناح وماله احد.
علي: اني مااتزوجتج لان ميت عليج ولا مفكر اتزوج اصلا وحتى لو افكر اتزوج فأكيد مو وحده مثلج بس علمود الطفل لا اكثر ولا اقل يعني موعبالج احنه متزوجين صدوك مجرد زواج عالورق وبس.
شكد سامعه حجي قاسي ويغث بس مو مثل حجيه وحده مثلي شنو يعني شبيه اني مو بشر لو لان مالي احد..
بقيت ساكته مخنوكه وشحجي شكول هو المثلي على كولته شيكدر يحجي.
علي: البيت مو جبير غرفتين وهول غرفتي وغرفتج اختاري وحده وخلي بيها اغراضج والاحسن تاخذين الجبيره علمود انتي والطفل تكفيكم.
هزيت راسي اي.
علي: ليش ساكته معجبج الكلام؟
لمى: لا ممتوقعه غير شي اصلا اعرف انت مجبور ومغصوب وجزاك الله خير قبلت علمود الطفل ومرايده منك شي اكثر..
حسيت الحجي كوه يطلع من بلعومي..
علي: تمام معناها متفقين. روحي رتبي اغراضج واني طالع وراح اقفل الباب من بره.
طلع وقفل الباب واني ظليت بمكاني صافنه بحياتي وين ماشيه بيه الدنيا وين تريد توصلني.
سحبت الجنط وخليتهم بالغرفه الزغيره كافي علي واصلا ذيج غرفته من الاول يمكن جانت غرفته هو وزوجته لان بيها صورتها حلوه جانت الله يرحمها.
رتبت اغراضي بالكنتور وبدلت ملابسي لبست بجامه سوده وسويت شعري كصيبه واتمددت عالجربايه ام نفر بغرفتي وخليت مصطفى يمي جعت والله يعلم شوكت يرجع فكمت فتحت الثلاجه فارغه والمطبخ مابي شي احتاريت شنو اسوي للغدا مالكيت شي فكلت خل انظف عالاقل.
كمت كنست وطلعت تيشيرت قديم عندي سويته وصلة مسح مسحت البيت وغسلت الحمامات وبعدين خليت كل ملابس المطشره بكل مكان بالحمام عبالي عنده غساله طلع ماعنده بديت اغسل بيهم قطعه قطعه بيدي حتى اصابعي ورمت من الفرك.