رواية اليتيمة للكاتبة روز الفياض الفصل الثالث
يادوب خلصت ردت ارتاح كعد مصطفى رحت ارضعه وقفلت بابا الغرفه رضعته ونومته ردت ادخل اسبح بس مااكدر ادخل للحمام واعوفه وحده بقيت انتظر بلكي يجي من التعب والجوع نمت محسيت الا والباب اندك رحت فتحته...
علي: تعالي اتغدي..
راح للمطبخ اباوعله اني هم رحت وراه باوعت للساعه ب4..
لكيته متسوك وخال المسواك عالسنك وجايب غدا بس على كدي شكله متغدي بره ميريد يكعد وياكل وياي شكد جنت جوعانه بس انسدت شهيتي حسيت عبالك بيه مرض معدي محد يريدني.
لميت المسواك وغسلته وخليت كل حاجه بمكانها وخليت الاكل بالفرن ورجعت لغرفتي.
هو ماادري وينه يمكن بغرفته لان بابه مسدود.
وره شويه دك الباب طلعتله.
علي: مصطفى نايم؟
لمى: اي نايم.
علي: زين تعالي للهول شويه.
راح للهول واني رحت وراه كعد واني هم كعدت بالطرف ودنكت هو هم مدنك.
علي: اني الصبح اطلع للدوام وارجع ب3يوميه ماعدا الجمعه والسبت فاذا تحتاجين اي شي الج او لابنج اتصلي حتى اجيبه وياي من ارجع من الدوام.
لمى: ان شاءالله...
علي: اكتبي بورقو كل الشغلات اللي يحتاجها البيت اني لان كل النهار بره مااحتاج شي فالبيت فارغ، ليش متغديتي؟
لمى: مااشتهي مشكور..
علي: شوفي اني مااعرف شنو قصتج وشنو فلمج بس تره هالطفل انتي مسؤوله عنه وماله ذنب. انتي ترضعي من صدرج؟
استحيت من سؤاله هزيت راسي اي..
علي: معناها لازم تاكلين وتبطلين انانيه فكري بي شويه..
انغثيت حيل وانقهرت حتى هذا الغريب الميعرفني ماعندي حظ وياه، ويني ووين الانانيه..
كمت رحت لغرفتي وسديت الباب وكعدت يم مصطفى اباوعله واحاجيه بكلبي بس لا انت هم تطلع مثل هاي الناس متريدني ومتحبني بس لا انت هم من تكبر تشوفني ثكيله عليك وتطردني.
طلعت ورقه وقلم كتبت الاشياء اللي ناقصها البيت وطلعت خليت الورقه عالميز يم التلفزيون هو جان بغرفته ورجعت خليت راسي نمت كعدت على صوت مصطفى غسلتله وغيرتله ورضعته وبعدين اخذته بالهول هو طلع من غرفته شافني رجع لغرفته.
كمت اني دكيت عليه الباب فتحه كتله: اريد اسبح كلي غبار من التنظيف بس مااكدر اخلي مصطفى وحده ممكن تكعد يمه هو راضع ومغسل ومبدل بس تكعد يمه ربع ساعه مو اكثر.
هز راسه اي اشرتله اني عالهول هو راح يمه اني رحت اخذت ملابسي ودخلت للحمام سبحت عالسريع واتوضيت، وطلعت لكيته مخلي بحضنه اتدنيت اخذه منه.
علي: خليه مشطي شعرج وبعدين تعالي اخذيه..
رحت مشطت بسرعه ورجعت لكيته مخلي عالقنفه ومتمدد يمه ونايم باوعتله شكله ميشبه محمد شكله حلو بس محمد احسن منه عالاقل جان ميغثني بحجيه او يجرحني لان اصلا مجان يحجي وياي الا اذا يريد شي..
استغليت الفرصه رحت صليت ورجعت ماادري اكعده لو اخليه نايم بقيت كاعده اباوعلهم بعدين كمت للثلاجه بحوشت طلعت شغلات حتى اسويهم للعشا بس ماادري هو يرجع يتعشى هنا لو بره.
المهم جهزت العشا وكملت هو كعد دخل للمطبخ باوع كال: لتحسبين حسابي اني ارجع متأخر اتعشى بره تعالي انطيني رقمج واخذي رقمي خاف تحتاجين شي اتصلي.
رحت انطيته رقمي واخذت رقمه ورجعت كملت العشا سويت تبسي هو لبس وطلع باوع للاكل كال: شنو هذا؟
لمى: تبسي..
طلع، بقيت، اني ومصطفى وحدنه صارت الساعه 10 وهو ماكو كمت اني اتعشيت وراها اخذت مصطفى للغرفه خليته عالجربايه وفرشت البطانيه بالكاع نمت عليها.
ماادري بيش الساعه دك الباب كعدت فتحته انطاني علاكه وباوع على البطانيه بالكاع بس ماعلق..
علي: مصطفى نايم؟
لمى: اي نايم.
هز راسه وراح اني سديت الباب باوعت للساعه ب12 فتحت العلاكه بيها حفاظات وحليب لمصطفى وحلويات ورصيد إلى خليتهم وطلعت اتشكر منه شفته بالمطبخ يحوس.
لمى: تحتاج شي؟
علي: لأ..
لمى: شكرا عالاغراض.
علي: العفو.
رجعت لغرفتي وسديت الباب رجع دك الباب فتحته.
علي: اكلج بقى تبسي من العشا؟
ابتسمت..
لمى: اي بقى هسه اسخنه الك.
راح هو للهول واني طلعت الاكل من الثلاجه وخبز وخيار وطماطه وركي ووديته يمه للهول.
علي: مشكوره روحي نامي اني اشيل الصينينه.
لمى: متريد جاي؟
علي: خلص روحي نامي اني من اخلص اسوي.
رحت خليت القوري عالنار وسويت جاي وخليت الشكر بالكوب حتى بس يصبه..
رحت نمت ووقتت الموبايل ب7حتى الصبح اكعد اسويله ريوك..
بالليل مصطفى كل شويه يكعد والصبح كوه كعدت من دك التليفون جريت روحي كوه.
صليت ورحت جهزت الريوك وسويت جاي طلع هو من غرفته مبدل دخل للمطبخ باوعلي باوع للاكل.
علي: شمكعدج من الصبح؟ تره اني مااتريك الصبح..
لمى: ليش بعد اني سويت حرام نعمة..
سحب الكرسي وكعد يتريك اني كمت رحت لغرفتي حتى ياكل براحته..
من خلص دك باب الغرفه فتحته.
علي: اني رايح بس ميخالف اشوف مصطفى شويه؟
لمى: اي ان شاءالله.
شلت مصطفى وانطتهيا اخذه وراح للهول رحت وراه لكيته مخليه بحضنه ويبوسه مبين يحب الاطفال شويه وانطانياه وراح.
اخذته رضعته وغيرتله ونومته ونمت كعدت ب12 صليت وخلصت ورحت طبخت الغدا...
صارت ب2 نومت مصطفى واتغديت وبعدين اتصلت بهدى اختي حجيت وياها شويه.
بعدين كمت غسلت ملابس وطلعت غسلت الحوش ب3ونص رجع هو اني بالهول كاعده.
علي: السلام عليكم.
لمى: وعليكم السلام.
راح لغرفته بدل وطلع راح يغسل ورجع لغرفته يصلي بعدين طلع.
لمى: تتغدا؟
علي: لا اريد انام.
كمت رحت لغرفتي اخذت مصطفى سبحته ورضعته.
دك الباب فتحته.
علي: سمعت صوت مصطفى لتنومينه خلي شويه عندي..
لمى: اي مو سبحته فبجى..
انطيتهيا اخذه لغرفته بقيت بحدي بالغرفه نمت ماكعدت الا وكت الاذان.
طلعت اركض للهول اشوف مصطفى ماكو معناها بقى يمه بغرفته يمكن ناموا اثنينهم.
رحت اتوضيت، وصليت وكعدت انتظر يطلع من الغرفه.
سمعت صوت مصطفى كعد يبجي طلع هو شايله اخذته منه غسلتله ورضعته هو صلى وكعد بالهول.
لمى: تتغدا؟
علي: يالله اوكي.
كمت صبيتله وجبته يمه بالهول وسويت جاي ورحت لغرفتي.
استمر هالوضع شهرين وباجر موعد التلقيح مال مصطفى، انتظرته بالليل يرجع حتى اكله رجع ب11 صبيتله عشا ورحت خليته يمه ورحت سويت جاي وجبته يمه كتله: باجر موعد التلقيح مال مصطفى.
علي: ادري حاسب حسابي الصبح اورح للدوام اترخص وارجع اخذكم ان شاءالله.
لمى: ان شاءالله.
الصبح كعدت كالمعتاد جهزت الريوك اتريك وراح اني كمت لبست ولبست مصطفى ورضعته وخليت شال على شعري وهو اجه طلعنه رحنه لقحناه بس مرجعنه للبيت اخذنه للمول اول مره اروح للمول واشوفه..
اشتره عربانة طفل لمصطفى وكريكود وجربايه وملابس هوايه شغلات اشتره.