رواية اليتيمة للكاتبة روز الفياض الفصل الأول
اني لمى عمري 20سنه ارمله وحامل بطفلي الاول واتوفى محمد زوجي بحادث سياره اتزوجت عمري 18 جنت بالسادس علمي من بطلتني مرت ابوي حتى اخدمها اني حلوه وملفته للنظر طويله وبيضا وكصيبتي لنهاية ظهري ملامحي حلوه جسمي مرتب بس حظي زفت عكس شكلي تماما.
عندي اثنين خوات اكبر مني اتزوجوا حتى يخلصون من ابوي ومرته ابوي جان ظالم مابي محنه وجان بس صياح وضرب والبركه بمرته.
جان حسره علي الفلس من جان بالسنه حسنه ابوي ينطيني مصرف جان يختفي مرته تاخذه وشحدي اشتكي حتى ضرب انضرب جنت انجب واسكت.
هوايه جانوا يجون يخطبوني بس ابويه جان ميقبل لان منو يخدم مرته وهي ماعدها خلفة بس هالمره جان ابن صديقه كيف وفرح واني هم اريد اشرد بروحي العزيزه من هالعيشه..
اتزوجت محمد ملحكت اعرفه زين سنتين واتوفى وخلال هالسنتين جنت زوجه بس وقت الحاجه صح مجان يصيح ولا يغلط ولا يضرب وجان ينطيني مصرف و ماله علاقه ميهمه اي شي يخصني جان يجيني وقت اللي يريد حاجته فقط ومن يخلص جان ينطيني ظهره وينام ولامره كلي كلمه حلوه كل الناس جانت تكلي حلوه الا هو ولامره فتح موضوع وياي وسولفنه مثل الاغراب بس جنت اكول حمدي ربج عالاقل ماكو ضرب وينطيج مصرف تلبسين براحتج جنت عايشه بنعيم بالنسبه لبيت ابوي..
جنت اسمع من زوجة حماي انو هو جان يحب وحده من كرايبهم اسمها نرجس بس اتزوجت واحد ثاني والظاهر لحد مااتوفى جان يحبها وجنت اكول اصبر يمكن يحس يتغير او يحبني بس ماكو فايده.
اتحملت وسكتت لان وين اروح امي متوفيه وخواتي كل وحده متزوجه بيهم ويه عيال وابوي اذا ارجع يذبحني.
وحتى عد عيالي مجانوا يحبوني دائما جنت غريبه ابو محمد جان زين بس امه وخواته جانوا ميحبوني اني الوحيده غريبه من الجناين وحده فوك ساكنه والثانيه يمي غرفتها ووحده متوفيه الله يرحمها مشايفتها بس جانت ساكنه بيت بحدها.
جنت عدهم خدامه بس هالمره براتب وجانوا خواته يسمعوني كلام واسكت مجان عندي احد اشتكيله بس سجادتي جنت اكوم اصلي صلاة الليل وافكر المثلي شنو فايدته بالحياة؟ ليش الله خالقني؟ محد يريدني لا اب لا زوج لاعيال شنو فايدة حياتي الى ان حملت كلت يمكن هالطفل هو اللي يعوضني ويعزني ويخلي قيمه بين الناس من يكبر بعدين بس دخلت بالشهر السادس اتوفى محمد، ورجعت افكر باجر شنو مصيري وين اروح من تخلص العده منو يستقبلني ووياي طفل بعد كم شهر؟
حتى شهاده جامعيه ماعندي تفيدني اشتغل عالاقل اصرف على نفسي وعلى ابني لان من توفى ظليت حسره علي الفلس محد يذكرني حتى للدكتور محد يوديني.
بقت ايام واجيب وتنتهي العده واني التفكير موتني..
بالليل جنت متمدده بغرفتي واندك الباب كعدت فتحته جانوا ام محمد وابوه دخلوا وسدوا الباب اني كلت خلص يردوني اروح لبيت ابوي بعد العده كم يوم وتخلص..
ابو محمد: ها بنيتي نايمه؟
لمى: لاعمو كاعده منين يجيني نوم.
ام محمد: ليش حبوبه متنامين؟ شناقصج؟ مرتاحه تاكلين وتمسحين ايدج بالحايط.
ابو محمد: مو وكته هالحجي ام محمد هسه خلينه نعرف، نحجي بموضوعنه.
اني سكتت كالمعتاد متعوده منو يجي يسمعني حجي ويهيني، لو يضربني عادي صرت حتى ماابجي بس انقهر اموت من القهر.
ام محمد: احجي عيني منو لازمك بلغها خوما جايين ناخذ رايها احنه هم عوزها تتعافى وتتبطر علينه.
ابو محمد: عمي انتي راح تخلص العده فد جم يوم ومن تخلص ميجوز تبقين عدنه زحمه البيت، بي ولد شباب ونسوانهم مراح يقبلن تبقين هنا، وانتي بنيه زغيره وماشاءالله جمالج عليه العين.
ام محمد: بدون مقدمات انتي راح تتزوجين علي حماج انتي حامل بحفيدنه خوما نخليج تاخذينه وترحين. علي زوجته اتوفت من زماان وميريد يتزوج بعد بس احنه نقنعه خوما نخلي الولد يربى عد اهلج هو انتي وميردوج وحسره عليج اللكمه عدهم مو بعد ابنه.
بقيت ساكته مصدومه واباوع بوجوهم والدمعة بطرف عيني..
ابو محمد: هذا احسن حل ياعمي انتي يتيمه حتى بوجود ابوج احنه شفنه هذا احسن حل لان اذا مقبلتي معناها احنه الطفل ناخذه وانتي لازم ترجعين لبيت ابوج او احد من كرايبج.
ظليت ساكته بالبدايه بس بعدين فكرت احسنلي من ما ارجع لابوي ومرته ويذلوني وميريدون الطفل..
ظليت كاعده للصبح افكر ماعندي اصلا حل ثاني.
علي اني مااعرفه شفته بس بالفاتحه مال محمد لان مجان يحجي ويه اهله، بس شلون اذا مقبل هو بيه وين اروح وين انطي وجهي ياربي لاتذلني اكثر متت، من هالعيشه كلها ذل ومهانه..
رجعت كلت الله كريم ربي ميقصر حاشاه مفوضه امري لله.
ثاني يوم اتصل ابو محمد بعلي وكله يجي جانوا الولد موجودين واني بغرفتي وسمعت صياح وعياط بس مااكدر اطلع لان الولد هنا واني لساتني بالعده.
اسمع صوت ام محمد تكله اعتبرها خدامه وعندك بالبيت تخدمك بلكمتها والطفل هو ابن اخوك يعني ابنك.
متت من القهر من حجيهم ليش هيج يعني اني مو بشر الله اكبر ربي شنو الذنب الاذنبته حتى هيج تكون حياتي.
اسمع حماي يكوله لوما متزوج اني اتزوجها انت لو شايفها متكول لا بالعكس تركصلها بجفيه ههههه.
لعد شبي حظي زوجي مات وهو ميحبني.
ماادري شنو النتيجه بس شكله علي مقبل.
وراها بكم يوم طلعت من غرفتي اساعد زوجة حماي بالتنظيف والطبخ طلعت اغسل الحوش قبل ليجون الولد مااريدهم يشوفوني ولا اشوفهم مااريد مشاكل ويه نسوانهم..
غسلت الحوش وكملت وصلت للباب وانفتح الباب دخل علي حماي اني جمدت بمكاني استحيت جنت لابسه دشداشه سوده نزلت الحجاب على وجهي اني مو محجبه بس لان حزينه جنت اغطي شعري ساعات بشال وميصير يشوفوني واني بالعده.
هو من شافني دنك وسلم ودخل جوه.
خلصت اني ودخلت رحت لغرفتي وسديت الباب.
وراها سمعت صوتهم عالي بس مطلعت كلت مالي علاقه بيهم.
بعدين اجه ابو محمد دك الباب ودخل كلي: بنيتي اذا انتي موافقه بس تخلص العده نعقدلكم عند السيد.
لمى: ان شاءالله.
ابو محمد: يعني موافقه؟
لمى: ليش هو اني عندي مكان اروحله انت كلت اني يتيمه..
ثاني يوم العصر اجه علي اني كعدت انتظر قرارهم سولفوا واتفقوا وبعدين اجوا بلغوني على كولتهم بقيت مدنكه حصرتني البجيه حسيت نفسي ذليله حيل ومالي اي قيمه بالضبط مثل الخدامه بكيفهم يقررون مصيري ومالي حق اعترض.