رواية النور والكابوس للكاتبة سلسبيل كوبك الفصل العشرون
وجد كانت مبسوطة لانها هتقابل حد لانه من ساعة ما رجعت البيت مشافتش حد و لا اتكلمت مع حد غير باسل.
وجد جريت ل تحت و كانت بتجري علي السلالم...
وجد(بصريخ): باسل!
كارما لفت بسرعة و لمحت وجد و هي بتقع من علي السلالم و جريت عليها.
كارما(بخضة): وجد يا وجد.
كارما(بعصبية): جيبوا دكتور بسرعة.
كارما: امل تعالي ساعديني.
وجد كانت مفتحة عينيها بضعف شديد مش قادرة تتحرك حاسة بكل حاجة و سامعة لكن مش بتتحرك.
كارما و امل مسكوا وجد و سندوها و عامر ساعدها و طلعوها اوضتها و نيموها ببطء علي السرير...
عامر: اتصل بباسل بيه؟!
كارما: لا لما نطمن عليها.
بعد فترة بسيطة جه الدكتور و بدأ يفحص وجد.
الدكتور: الحمدلله جت سليمة بس لازم تأخد بالها كويس اوي.
الدكتور: و لازم تعمل تحاليل و اشاعة.
كارما: ليه؟!
الدكتور: المدام حامل.
كارما اتصدمت و كانت مبسوطة اوي,عامر و امل بصوا ل بعض.
الدكتور: عن اذنكم.
وجد كانت نايمة بتعب علي السرير و بدأت تفتح عينيها و بصت لكارما.
وجد(بتعب): ايه؟!
كارما(بغمزة): ده باسل ده طلع سريع.
وجد(بعدم فهم,تعب): ايه مش فاهمة؟!
كارما: مبروك يا عروسة.
وجد(باستغراب): علي ايه يا بنتي؟!
كارما(بابتسامة): انتي حامل.
وجد: طيب.
وجد كانت بتتعدل و بعدها اتصدمت و رفعت رأسها ل كارما.
وجد(بصدمة): انا ايه؟!
وجد بتلقائية حطت ايديها علي بطنها و بصت ل كارما.
وجد(بدموع): يعني انا حامل؟!
كارما قعدت جمب وجد علي السرير و حطت ايديها علي كتفها.
كارما: ايوه الف مليون مبروك، تعالي نفكر في طريقة نقول بيها ل باسل.
وجد شردت في رد فعل باسل.
وجد: مش عارفة.
كارما(بغمزة): البسي فستان شيك كدة و جهزي عشاء حلو و.
وجد: بس انا ازاي حامل و معداش غير اسبوعين يعتبر؟!
كارما: مش قولتلك باسل ده سريع في كل حاجة.
وجد بصت ل كارما و حسست علي بطنها بفرحة و دموع.
كارما قعدت مع وجد طول اليوم و بعدها مشيت.
وجد كانت نايمة بتعب علي سريرها و بعد فترة سمعت صوت باب الاوضة بيتفتح و باسل بيدخل و قعد جمبها باس رأسها.
وجد(بكسل): حمدلله بالسلامة.
باسل: الله يسلمك يا حبيبتي. وحشتيني اوي.
باسل قرب من وجد و (لخيالكوا).
باسل: طمنيني عملتي ايه!؟
وجد(بضحك): وقعت من علي السلالم...
باسل(بصدمة): ايه؟!
وجد: هحكيلك بس قوم غير هدومك بس.
باسل(بقلق): لا احكيلي يا وجد.
وجد سندت علي باسل و قعدت علي السرير نص قعدة و حضنت باسل.
وجد: كنت نازلة علي السلالم و وقعت بس.
باسل: طب انتي كويسة فيكي اي حاجة؟! اتصل بالدكتور؟!
وجد: كارما جابت الدكتور و كشف عليا و قال.
باسل: قال ايه يا حبيبتي؟!
وجد(بخجل): قال اني حامل.
باسل: مين دي اللي حامل؟!
وجد(بفرحة): انا يا باسل.
باسل اتصدم و قام وقف بيحاول يستوعب و بعدها بص ل وجد و قعد يضحك و خدها في حضنه.
باسل: حبيبتي ربنا يخليكي ليا، مكنتش اعرف انه هيحصل بسرعة كدة.
وجد(بخجل): و لا انا. انا مبسوطة، مبسوط؟!
باسل: اكتر منك يا روحي، تسع شهور و هيشرفنا عيل نسخة منك.
باسل باس رأس وجد بفرحة و شالها و دخل بيها اوضة الملابس قعدها علي ترابيزة الاوضة.
باسل: اختاري هلبس ايه؟!
وجد: اممممم البس ده و ده.
باسل: طيب يا حبيبتي.
باسل غير هدومه لبس ترنج بيتي باللون الاسود...
باسل باس رأس وجد و شالها من خصرها و خرج ل بره نيمها علي السرير و نام جمبها.
وجد: ليه اللفة دي يا ابني؟!
باسل: بحبك تبقي معايا في كل لحظة.
وجد: بحبك.
باسل: انا اكتر.
باسل خد وجد في حضنه و شبك صوابعه مع صوابعها و باس ايديها,وجد بدأت تنام في حضنه و باسل فضل باصص عليها يتأملها في صمت.
-في مكان تاني...
عند علي و ثريا...
علي كان قاعد مع صحابه بيضحكوا و بيشربوا سجاير و كحول...
ثريا كانت نايمة و بدأت تفوق و خرجت بره الاوضة كانت راحة المطبخ.
شاب(بسُكر): مين المزة دي يا علي؟!
علي لف و لمح ثريا و هي لابسة بيجامة قصيرة و قام بسرعة و راح ناحيتها...
ثريا(بخضة): ايه؟!
علي(بغضب): اقل من عشر ثواني الاقيكي اختفيتي من قدامي.
ثريا مكنتش مستوعبة اللي بيحصل لقت علي مسكها من دراعها بغضب و دخلها اوضتها و زقها في الارض.
علي قفل الباب عليها بالمفتاح و خرج ل صحابه.
علي(ببرود): امشوا و محدش يجي هنا تاني.
شاب2: في ايه يا عم مالك؟! و مين دي؟!
علي(ببرود): ملكش فيه و محدش يجي هنا تاني زي ما قولت...
صحاب علي بدأوا يخرجوا بعد ما بصوا ل علي بغضب و غيظ,علي قعد بتعب علي الكنبة.
ثريا خبطت علي الباب علي قام ببرود و فتح الباب ليها.
ثريا(بحدة): ممكن افهم ايه اللي عملته ده؟!
علي(ببرود): مش قولتلك مش عايز اسمع صوتك.
ثريا(بحدة): في ايه انا عارفة اني غلطت بس حد سألني حد اتكلم معايا حتى حد حاول يعرف حصل ايه، حكمتوا عليا.
علي(بصوت عالي): و هو ايه اللي ناقص علشان نفهمه؟! بنت و ضيعت شرفها بايديها و في الاخر اتجوزتي واحد يستر عليكي انتي مبسوطة مبسوطة.
علي(بصوت عالي): ردي عليا مبسوطة؟!
ثريا(بعياط و صريخ): لا مش مبسوطة. انا غلطت ايوه غلطت بس انا عمري ما لقيت حضن يحتويني و عمري ما لقيت حد بيقولي الصح و عمري ما لقيت حد بيهتم بيا و عمري ما لقيت حد بيسألني راحة فين و جاية منين و بعمل ايه عمري ما حد جه قالي عندك مشاكل ايه احلها ليكي عمري ما حد جه قالي عاملة ايه النهاردة عمري ما لقيت حد واقف في ضهري عمري ما لقيت حد سهر علشان انا تعبانة وقت ما احتاجت حد كلهم سابوني حد عائلتي و برضو انا معترفة اني غلطانة بس غصب عني افهموا كان غصب عني ذنبي ايه انه عشمني بالجواز و قالي كلام حلو و حب و استدرجني.
علي(ببرود): كل ده كدب كل ده كلام علشان خاطر تشيلي الهم من عليكي شوية. بس انتي في نظري و نظر المجتمع عاهرة باعت جسمها و حتى مأخدتش فلوس كانت بتودي...
علي(ببرود): معتقدش انه جبرك. و يلا غوري من وشي الواحد لما بيشوفك نفسه بتتسد.
علي ساب ثريا و طلع لاوضته قعد علي السرير بتعب,ثريا قفلت الباب و قعدت في الارض تعيط علي اللي هي وصلت ليه.
-في مكان تاني...
في القصر.
كان الكل متجمع علي السفرة بيتعشي و نسيوا حد اسمه ثريا او بمعني اصح بيتناسوا.
ياسين: ايه اخبار الشغل يا يوسف في الشركة؟!
يوسف: كله تمام يا بابا متشغلش بالك. و صفقة باسل ماشية كويس.
ياسين: و انت يا منصف ايه اخبار المصنع؟!
منصف: العمال شغالة فيه متشلش هم انت.
ياسين: طيب.
ياسين: قصي متصلش؟!
نهلة: لا.
ياسين: استر يا رب.
احمد: مساء الخير.
نهلة: مساء النور متعرفش قصي فين يا احمد؟!
احمد: و انا هعرف منين؟! و كمان هو راجل اكيد يقدر يعتمد علي نفسه.
احمد: عن اذنكم.
ياسين: مش هتأكل؟!
احمد: لا اتعشيت بره.
احمد طلع لاوضته و دخل خد دوش و غير هدومه و خرج وقف في البلكونة و طلع تليفونه و اتصل بكارما.
الخط اتفتح.
احمد: مساء الخير.
كارما: مساء النور. عامل ايه؟!
احمد: كويس و انتي؟!
كارما: الحمدلله. ايه اخبار الشغل النهاردة؟!
احمد: ما هو بسببك يا هانم خسرت صفقة مهمة في الشغل.
كارما(بصدمة): بسببي انا؟!
احمد: لا امي.
كارما: امتي ده يا ابني؟!
احمد: لما جيتيلي المكتب الصبح.
كارما(باحراج): انت زعلان مني؟!
احمد: تؤ فداكي.
كارما(باحراج): شكرا.
احمد: قوليلي بقي ا...
سليم: كارما بتكلمي مين؟!
كارما(بتوتر): دي دي ناهد صاحبتي.
سليم(برفعة حاجب): طيب يا كارما بس مالك متوترة ليه؟!
كارما: مين قال كدة انا مش متوترة خالص.
سليم: طيب. انزلي للعشاء.
كارما: حاضر.
سليم: طيب.
سليم نزل و كارما كلمت احمد.
احمد: يلا روحي اتعشي انتي.
كارما: حاضر. استناك؟!
احمد: لا انا هنام تصبحي علي خير.
كارما: و انت من اهله.
احمد: باي.
احمد قفل مع كارما و بص للسماء و غمض عيونه و دخل اوضته قعد علي السرير بتعب و بدأ ينام...
-في مكان تاني...
عند قصي.
قصي: ايوه ارفعوا دي ل فوق.
شاب: قصي هتفتتح امتي؟!
قصي: يومين.
شاب: ربنا معاك.
قصي: المعرض ده هيبقي حياتي كلها يا شهاب. و نجاح كبير ليا.
شهاب: و ليا يا عم متنساش اننا واحد.
قصي: طبعا.
قصي: عايز اكلم وجد...
شهاب: نفسي الاقي تفسير لحبك ل وجد دي.
قصي: اختي و اقرب واحدة ليا هي اللي بتفهمني.
شهاب: طيب يا خفيف كلمها.
قصي: هتكون نايمة و ممكن متردش عليا لاني مسألتش عليها بقالي اسبوعين يعتبر...
شهاب: زي ما بتحكيلي عنها قلبها طيب اكيد هترد.
قصي: ممكن تكون نايمة.
شهاب: يا عم جرب مش هتخسر حاجة...
قصي مسك تليفونه و اتصل بوجد مرة و اتنين.
عند وجد.
وجد كانت نايمة في حضن باسل و قلقت علي صوت الموبايل قامت ببطء من حضن باسل و مسكت الموبايل...
الخط اتفتح.
وجد(بصوت واطي): ايه اللي فكرك بيا يا حيوان مكنت نسيتني؟!
قصي: آسف يا ست البنات.
وجد(بصوت واطي): هعديها المرة دي.
قصي: صحيتك من النوم؟!
وجد(بصوت واطي): مش مهم.
قصي: هو باسل جمبك؟!
وجد(بصوت واطي): اه بس نايم. خليك معايا هقوم من جمبه.
وجد باست رأس باسل و سابته و خرجت بره الاوضة.
وجد: ها يا حبيبي اتكلم.
قصي: ايه اخبارك مع باسل؟!
وجد: بخير.
قصي: عندي ليكي خبر حلو.
وجد: ايه؟!
قصي: هفتتح المعرض بتاعي في يومين.
وجد: حبيبي فرحتلك اوي الف الف مبروك.
وجد: انت تستاهل.
قصي: انتي اهم حاجة عندي تبقي مبسوطة.
وجد: انا بخير. بس.
قصي: ايه؟!
وجد: انت لسة معرفتش صح؟!
قصي: معرفتش ايه؟!
وجد: انا عارفة انه مش وقته بس لاني عارفة انك غيرهم يا قصي و هتفكر بقلبك و هتحاول تسامحها صح.
قصي: هي مين يا وجد؟!
وجد بدأت تحكي اللي حصل ل قصي و هي خايفة من ردة فعله.
قصي(بدموع): يعني ثريا اتدمرت؟!
وجد: انا آسفة اني حكيتلك حاجة زي دي يا قصي بس لازم كنت تعرف انت اخوها و كمان.
قصي(بدموع): و كمان؟!
وجد: الكل اتخلي عنها مش عايزة انا و انت نبقي زيهم يا قصي.
وجد: هي غلطت بس هي ندمانة اينعم الندم مش هيرجع حاجة زي الاول بس ربنا بيغفر لعباده و بيسامح فلازم احنا كمان نسامح يا قصي...
قصي(بدموع): مكنتش اتخيل انا عارف انها بتحب السهر و بتكلم شباب بس مش توصل للدرجة دي.
قصي(بتأنيب): هو انا السبب يا وجد؟! اني مخدتش بالي منها و مهتمتش بيها زيك.
وجد: لا يا قصي هي غلطت.
وجد: متشيلش ذنب يا قصي. هي اينعم غلطت بس برضو مش عايزين نقسي عليها كفاية هما يا قصي.
وجد: هتتعدل.
قصي: و اللي اتجوزها ده اسمه ايه و لا مين؟!
وجد: ده واحد اسمه علي صاحب باسل اتفقوا هيتجوزها لفترة بس.
قصي: طيب. هبقي اعزمها علي الافتتاح.
وجد: بعيدا عن ان الدنيا هتولع بس انا معاك. قصي متكتمش في نفسك و متخلنيش احس بالذنب.
وجد: خليك عاقل و اهدي و متتعبش قلبك. انا حكيتلك لانك اخوها و كان لازم تعرف و مش نخبي عليك.
قصي: طيب يا حبيبتي روحي انتي لباسل علشان ميصحاش من النوم ميلاقكيش.
وجد: طيب خلي بالك من نفسك و لو حسيت بتعب تتصل بيا فاهم. حتى لو الساعة كانت كام.
وجد: ربنا معاك يا حبيبي بحبك.
وجد قفلت مع قصي و هي خايفة عليه و انه ممكن يتعب,وجد قامت و لفت اتخضت لما لقت باسل و كانت هتقع بس مسكت في باسل.
باسل: كنتي بتكلمي مين؟!
وجد: خضتني يا باسل. كنت بكلم قصي.
باسل: هو حبكت يعني دلوقتي؟!
وجد: يا حبيبي هو اتصل و كان بقالنا اسبوعين مش بنتكلم كويس فاتكلمنا.
باسل سند وجد علي ضهر الكنبة و هي حطت ايديها علي كتفه و قربت منه.
وجد(بابتسامة): هقولك للمرة المليون بيبقي شكلك حلو اوي و انت لسة صاحي من النوم.
باسل باس وجد جمب شفايفها و باس رأسها.
باسل: و انتي حلوة في كل الحالات.
وجد(بفرحة): مش مصدقة لغاية دلوقتي اني حامل انا مبسوطة اوي.
وجد(بفرحة): لسة عايزة اقول لماما و بابا و جدو و عمو و مرات عمو و قصي و احمد و كارما و طنط و سليم و نرمين و ليلي و خديجة و ثريا و مين تاني اممم.
وجد: مين تاني يا باسل؟!
باسل: ده كله مش كفاية يعني.
وجد: حاسة اني نسيت حد.
وجد: اه رانيا.
باسل: هتقولي لخدامة يعني؟!
وجد: تؤ رانيا متعتبرش خدامة. رانيا معايا من ساعة ما اتولدت مامتها كانت بتشتغل معانا و بعد ما هي توفت هي شالت مكانها و انا و هي صحاب علطول و من نفس السن يعتبر.
وجد: الحمدلله ان جدو وافق انها ترجع للشغل تاني.
باسل: ما تبطلي رغي شوية و تيجي نطلع فوق.
وجد(برفعة حاجب): هنعمل ايه؟!
باسل: هنام.
باسل مسك ايد وجد و طلعوا لاوضتهم و نيمها علي السرير و لف نام جمبها.
وجد: مالك يا حبيبي؟!
باسل: تعبان شوية.
وجد: الف سلامة عليك.
وجد قامت و مالت علي باسل و باست رأسه و حاوطت رأسه بين ايديها.
وجد: بحبك...
وجد: و لو كان ضغط في الشغل فمعلش يا حبيبي فترة و هتعدي.
وجد: يلا غمض عيونك و نام يا حبيبي و انا جمبك اهو.
وجد حضنت باسل جامد و باسل كان مستمتع بحضنها و غمض عيونه و نام.
وجد(لنفسها): وعدتك اني هعوضك عن امك و اخوك و باباك يا باسل و اتمني فعلا اني اكون بعوضك عن حضنهم عن كلامهم عن امانهم.
وجد(لنفسها): بحبك اوي ربنا يخليك ليا...
عند قصي...
قصي قفل مع وجد و قعد يبص علي المعرض و بدأ يحس بنغزة في قلبه حط ايده علي قلبه بتعب.
قصي(بوجع): آآه.
شهاب: ايه يا عم الحبيب خلصت مع القمورة؟!
قصي: اه.
شهاب: ايه الاخبار؟!
قصي(بوجع): بخير الحمدلله.
شهاب: مالك ماسك قلبك كدة ليه انت حاسس بأيه؟!
قصي(بوجع): نغزة بسيطة متخافش.
شهاب: طب نروح للدكتور؟!
قصي: لا مفيش داعي. يلا نقوم نشوف الشغل في المعرض.
شهاب: يا ابني ارحم نفسك شوية.
قصي: قدامي.
قصي و شهاب قاموا و بدأوا يشرفوا علي اخر اللمسات اللي في المعرض.
شهاب(بخضة): قصي!
قصي وقع في الارض مغمي عليه شهاب قرب منه بقلق و قعد يهزه.
شهاب: قصي يا قصي رد يا ابني فتح عينك...
شهاب(بصوت عالي): اتصلوا بالاسعاف بسرعة.
بعد فترة الاسعاف جت و نقلوا قصي المستشفي و دخلوه اوضة الطوارئ.
شهاب(بقلق): يا رب.
بعد فترة خرج الدكتور من اوضة قصي.
دكتور: الحالة حرجة.
شهاب: طب طب هيفوق يعني هو كويس هيعيش؟!
دكتور: ان شاء الله. في ممرضة هتفضل تشرف عليه طول اليوم متخافش انت.
شهاب: طيب.
شهاب: يعني مفيش ضرر صح؟!
دكتور: ان شاء الله خير متقلقش...
شهاب: طيب.
شهاب قعد و جت الممرضة قعدت في اوضة قصي علشان لو حصل اي تطور او اي تغير في حالته.
-في الصباح الباكر...
عند نرمين.
نرمين كانت نايمة بعمق في السرير بتاعها في بيتها و حست بانفاس حد علي كتفها و وشها فتحت عينيها ببطء و بصت وراها.
نرمين اتخضت و بدأت تصرخ وترجع لورا.
نرمين(بصريخ): انت بتعمل ايه هنا؟!
شاب(بسخرية): مش فكراني؟!
شاب: طلعتلك من السجن يا روح امك و جاي علشان اقتلك.
نرمين(بخوف): لو قربت مني متعرفش هيحصل فيك ايه و اللي حصل زمان هيحصلك تاني و ممكن يوصل لموتك.
شاب: يلا نادي علي سليم نادي علي باسل. ده انا روحي كانت هتطلع علي ايد الكلب سليم.
شاب(بغل): هقتلك و هخليهم يتحسروا عليكي.
نرمين(بحدة): لو ممشتش من هنا سليم هيعمل اللي عمله قبل كدة مليون مرة و بدل ما هيبقي حبس كام سنة هيبقي اعدام او مؤبد...
شاب(بغل): انا جيت احذرك اني بقيت موجود احذري مني.
شاب(بغل): و بلغي باسل و سليم اني رجعت و مش هرحم حد فيكوا.
نرمين كانت بتتنفس بصعوبة و الشاب ده مشي من قدامها بسرعة و هي اترمت علي السرير.
نرمين كانت بتعيط و مش قادرة تأخد نفسها.
-في مكان تاني...
في فيلا باسل.
باسل: حبيبتي انا نازل.
وجد: طيب و انا هروح للقصر.
باسل: مش قولت مفيش خروج من هنا لمدة شهر.
وجد: يا باسل يا حبيبي.
باسل: كسري كلامي كسري.
وجد: بسولة.
باسل(برفعة حاجب): ايه بسولة دي يا بت اتعدلي؟!
وجد حضنت باسل من خصره و هو ابتسم و باس رأسها.
باسل: ضعفت خلاص.
وجد ضحكت و هي في حضن باسل و باسل شدد عليها و هي في حضنه.
باسل: فطرتي؟!
وجد: اه.
باسل: خلاص انزلي انتي انا هستني سليم هيعدي عليا.
وجد: طيب يا حبيبي.
وجد باست خد باسل و سابته و جريت علي اوضة الملابس تغير هدومها.
وجد لبست فستان اسود ب ¾ كم لغاية بعد الركبة ضيق و محدد جسمها و فوقه بالطو باللون الاحمر لغاية قبل الركبة بشوية بكم و الزراير باللون الدهبي و لبست صندل بكعب باللون الدهبي و رفعت شعرها ديل حصان و اختارت شنطة يد باللون الاسود و حطت ميكب خفيف جدا و حطت البرفيوم بتاعها.
وجد خرجت لقت باسل في ايده ملف و بيقرأ فيه.
وجد: انا نازلة يا حبيبي.
باسل: طيب.
وجد بصت ل باسل قبل ما تنزل و خرجت بره البيت و لقت عربية بسواق مستنياها ركبتها و كانت راحة ناحية القصر.
-بعد فترة.
باسل كان قاعد في الفيلا مع سليم بيتكلموا و تليفون باسل رن.
الخط اتفتح...
باسل: الو مين؟!
موظفة: حضرتك استاذ باسل الانصاري؟!
باسل: ايوه مين معايا؟!
موظفة: مدام وجد الصياد زوجة حضرتك جت في حالة اجهاض في مستشفي...
باسل اتصدم و وقع منه التليفون و سليم بصله باستغراب.