رواية النور والكابوس للكاتبة سلسبيل كوبك الفصل الرابع والثلاثون
وجد رفعت رأسها في المراية لقت انعكاس صورتها و وراها باسل واقف حاطط ايده في جيبه بهدوء تام ُيُحسد عليه.
وجد لفت بسرعة لما شافته و باسل قرب منها خطوة.
وجد: ايه اللي جابك هنا؟!
باسل: الفستان طلع عليكي حلو.
وجد: انا لبسته علشان تعرف انك مش فارق معايا.
باسل شد وجد من خصرها ناحيته و هي شهقت.
وجد(بحدة): ميصحش كدة انا هتجوز دلوقتي ملكش الحق تلمسني ابعد عني.
وجد(بحدة): ينعل ابو برودك يا شيخ، و الله لو ما سبتنيش لاصوت و الم عليك الناس.
باسل(بهدوء): مجنون اللي يفكر يأخدك من ايدي يا وجد. و انا خليتك تلبسي الفستان ده علشان هنبدأ من الليلة قصتنا الجديدة.
وجد بعدت عن باسل بسرعة و بصتله.
وجد: انت مجنون؟! انا بكرهك افهم؟! انت خلتني مدمنة و ضربتني و طردتني و ذلتني و كدبت عليا و خنتني و الاكبر من ده انك قتلت ابني.
وجد(بدموع): ابني اللي كنت فاكراه انه هيبقي ثمرة حبنا اللي كان الكل شايفه و مخدوع بيه. حتى انا اتخدعت فيك.
وجد(بدموع): اللي كسرني اني خسرت ابني يا باسل و لو سامحتك علي اي حاجة دي مش هسامحك عليها.
وجد(بدموع): انت اللي بعدت استحمل نتيجة اختيارك. انا دفعت علشان اتعلم و دفعت كتير اوي.
وجد(بدموع): جالك قلب تقتل ابنك علشان خاطر انتقام تافه ملهوش اسباب ما بالك لو خيروك بيني و بين الفلوس او اي حاجة تانية.
وجد(بدموع): اطلع بره مش عايزة اشوفك. بكرهك و بكره اني اشوفك يا باسل.
وجد لفت و مسحت دموعها اللي علي اطراف عينيها.
وجد فتحت عينيها علي آخرهم لما لقت باسل قريب منها و حاطط مسدسه في جمبها.
باسل: كنت متأكد انك مش هتيجي معايا بالذوق و هتعاندي.
باسل: كلمة واحدة و ساعتها هتندمي.
وجد مسكت ايديه بالمسدس و حطته علي قلبها.
وجد: اضرب هنا احسن.
وجد: ممكن يحس بذنبه لما حب واحد زيك.
وجد: لو مش هتضرب نار اتفضل اطلع مش فاضية ورايا واحد منتظرني.
باسل: وجد وجودك معايا هي.
وجد: وجودي معاك هيزيد كرهي ليك اكتر وجودي معاك ممكن يوصلني للجنون. سيبني في حالي يا اخي افتكرتك ماضي سبني اعيش حاضري و مستقبلي بطريقة صح...
باسل مسك ايد وجد و شدها ناحيته و هو في قمة عصبيته من كلام وجد.
باسل(بانفعال): و انتي لو نزلتي دلوقتي و كتبتي كتابك هيبقي باطل يا وجد انتي مراتي.
باسل(بانفعال): انا رديتك لعصمتي بعد شهر. عارفة ليه.
باسل(بانفعال): لان دعواتك كلها استجابت لاني مبقتش اعرف انام. لاني كنت كل يوم قلبي بيوجعني. كنت بموت في اليوم الف مرة. كنت مش باسل.
باسل(بانفعال): بصي و اسمعي.
باسل حط ايد وجد علي قلبه و وجد بصتله.
باسل: لو القلب كان بيتكلم كان هيقولك مدي احتياجه ليكي علشان تعالجي جروحه. كان هيقولك مدي اشتياقه ليكي.
باسل: ايوه غلطت و غلطت اوي كمان بس قلبي كان بيتحرق من جوا كان نار و بتتآكل في روحي و جسمي.
باسل بص ل وجد اللي مردتش عليه و بصت في الارض و بِعد عنها.
باسل: قرار رجوعك معايا دلوقتي اجباري مش اختيار.
باسل مسك ايد وجد و خرج بره اوضتها اللي في الفندق و بدأ يمشي بيها بين الممرات,وجد كانت تايهة بسبب كلام باسل فاقت من شرودها لما لقت علي جاي ناحيتهم.
علي: باسل خليك متنزلش تحت في حراسة من اللي اسمه لؤي ده. خلينا نخرج من باب الطوارئ...
وجد(بانفعال): انت بتعمل ايه ابعد ايدك دي عني انا عايزة اعيش حياتي بعيد عنك ابعد كدة.
باسل: تصدقي انا غلطان.
باسل طلع من جيبه منديل حطه علي وش وجد و وجد بصتله و في ثواني كانت مغمي عليها بين ايدين باسل.
علي: هتفوق امتي؟!
باسل: نص ساعة كدة، أمن ليا المكان.
باسل شال وجد بين ايديه مكنش عارف يمشي كويس بسبب الفستان بتاعها.
باسل بدأ يمشي في ممرات تانية و مرضيش يركب الاسانسير و بدأ ينزل علي سلم الطوارئ.
علي: العربية منتظراك بره.
باسل: طيب يا علي شكرا. هبقي اكلمك.
علي: باسل خلي بالك منها هي شافت منك كتير حاولت تسعدها و نصيحة مني بعيد عن عصمت هانم.
علي: ربنا معاك يا صاحبي.
علي ساب باسل و مشي و باسل خرج من باب الطوارئ و لقي عربيته قدام الباب ركب وجد العربية و لف ركب و بدأ يسوق...
في نص الطريق وجد بدأت تفوق و فتحت عينيها لقت نفسها نايمة علي كنبة العربية قامت بسرعة...
وجد(بصريخ): عاااااااااااا يا حيوان انت ازاي تأخدني كدة و تعمل اللي انت عملته ده يا حيوان...
باسل: صرعتيني بصوتك ده الله.
باسل: خدتك لانك ملكي انا و مراتي و متحاوليش تنفي اللي بقوله لاني مروحتش المحكمة و سجلت طلاقنا انا روحت ل مأذون و حكتله بالمختصر و هو قالي ينفع ارجعك لعصمتي فخلاص اهدي بقي...
وجد: و انت فاكر اني هوافق علي الموضوع ده بسهولة؟! تبقي بتحلم انا مش هرجع ليك بكرهك يا عالم يا ناس يا خلق بكرهه.
باسل: انتي لاول مرة هتشوفي اهلي.
وجد(بزعيق): نزلني هنا بقي.
باسل: لا و صوتك ميعلاش فاهمة يا وجد. خناقتنا في اوضتنا.
وجد(بعصبية): ده انا لو مفرجتش عليك امة محمد عليه أفضل الصلاة و السلام مبقاش وجد يا باسل.
باسل وقف قدام القصر و نزل فتح باب وجد و مسك ايديها.
وجد: ابعد عني يا رخم ابعد.
باسل: وجد انا لحد الان هادئ و انتي مشوفتيش قلبتي ربنا ما يورهالك.
وجد: طب مش داخلة وريني هتدخلني ازاي بقي انا مش هدخل معاك في اي حتة...
باسل: ليك حرية الاختيار.
باسل شال وجد اللي قعدت تضربه في كتفه بغضب.
وجد: ده معندكش دم خالص نزلني بقولك عندي رجلين بعرف امشي بيهم علفكرة...
باسل: اهدي بقي يا وجد.
وجد(بحدة): نزلني بقولك...
باسل نزل وجد بضيق و بصلها.
باسل: هتخشي جوا مش عايز اسمع حرف واحد فاهمة. و ابقي افهمك بعدين ايه اللي بيحصل...
وجد: طالما لسة متجوزين فانا عايزة اتطلق و كمان انت خلتني اسيب فرحي و عريسي يا سافل يا حيوان.
باسل مسك ايد وجد و دخل القصر كان الكل متجمع.
عفاف: هو باسل خلانا نتجمع ليه؟!
رضوان: محدش يعرف...
شريهان: مش قادرة استني.
جودي: هو قال كل العائلة و انتي ملكيش لازمة هنا فاحسن تطلعي اوضتك.
اسيل شدت وجد ورا ضهرها لما شافت نظرات عصمت.
عصمت: ا...
طارق: باسل.
كلهم بصوا ناحية باسل اللي دخل و هو ماسك ايد وجد و بيبص ل عصمت و نعمة...
وجد(بضيق): انت جبتني فين؟!
حازم(بهمس): شكله فاق.
جودي(بهمس): و كمان بفستان الفرح.
رضوان(بهمس): شكله خطفها.
عصمت(بهدوء مصطنع): مين دي يا باسل؟!
باسل: وجد مراتي. وجد الانصاري.
وجد كانت بتحاول تشد ايديها من ايد باسل بس لما باسل قال كدة هي رفعت رأسها ناحيته.
لحظة اتنين كان في صمت تام وفجأة عصمت قامت بغضب.
عصمت(بغضب): انت مجنون جايبها لهنا كمان؟!
باسل: هي مراتي و ليها الحق تقعد في المكان اللي انا قاعد فيه.
نعمة(بحدة): هي دي اللي من عائلة الصياد يا باسل؟!
باسل: اه يا عمتو دي وجد يوسف ياسين الصياد و تبقي مراتي مرات باسل الانصاري.
عصمت(بغضب): يا خسارة تربيتي فيك.
عصمت(بغضب): البت دي خلاص كلت دماغك.
شريهان(بصدمة): هي دي مراتك؟! اللي انت بتحبها؟!
باسل بص ل وجد و مسك ايديها و باسها و هز رأسه بمعني اه ل شريهان.
وجد كانت بتحاول تفهم في ايه و ليه عصمت و نعمة باين عليهم الكره ناحيتها كدة...
عصمت(بغضب): قولتهالك مرة لو اختارتها هي يبقي انت اللي بنيت الحاجز مش انا يا باسل.
عصمت(بغضب): ابوك لو كان عايش كان تف عليك و علي تربيتك.
اسيل: احم يا عصمت هانم احنا ماتعملناش معاها علشان نعرف تربيتها و اخلاقها ايه. و كمان معروف عن حضرتك عادلة نوديها فرصة.
وجد(بانفعال): ا.
باسل حط ايده علي بوق وجد و شدها لحضنه اكتر.
عصمت(بغضب): انا قولت كلمتي لانا يا هي قدامك اسبوع يا باسل.
نعمة(بحدة): و انا مستحيل اقعد في مكان و هي فيه.
عصمت: اصبري يا نعمة كمان اسبوع ممكن بدل ما تمشي لوحدك تأخديني معاكي.
عصمت و نعمة طلعوا علي اوضهم، و كان الباقي كلهم بيتبادلوا النظرات لكن محدش اتكلم.
وجد(بحدة): مش هقعد في مكان زي ده الاسود طاغي عليه زي ما هو طاغي علي قلبك و قلوبهم.
عفاف: مبروك يا باسل. عرفت تختار جميلة اوي.
شريهان بصتلهم بغضب و سابتهم و مشيت.
رضوان: مبروك.
وجد(بحدة): انتوا بتباركوا علي ايه؟! بدل ما تتصلوا بالبوليس لانه خاطفني من فرحي.
باسل(ببرود): انتي مراتي و مفيش راجل بيخطف مراته يا وجد...
وجد(بغيظ): انت كل حياتك كدب كدة.
باسل: اه ملكيش فيه.
وجد(بغضب): اا.
باسل: بس بقي.
باسل شد وجد وراه و طلع علي اوضته و وجد كانت هتقع بسبب تقل الفستان و حازم سندها...
حازم: خلي بالك يا باسل.
باسل(بانفعال): ما هي لو تبطل شوية عنادها ده شوية كان زماني بتعامل معاها عادي.
وجد(بحدة): ايوه انا عنيدة ملكش دعوة.
باسل: و انا و انتي و الايام جاية كتير يا وجد.
باسل طلع ب وجد لاوضته اللي لما دخلها لقي شريهان فيها...
شريهان: هي دي بقي اللي انت مبتخلنيش ادخل اوضة جوزي علشانها.
وجد(باستفهام): مين دي؟!
شريهان: انا ال.
باسل(بغضب): علي اوضتك يا شريهان احسن و ربي لاتشوفي الكابوس هيعمل فيكي ايه.
شربهان(بانفعال): حقوقي فين؟! هي دي اللي انت تبيع الدنيا حتى امك علشانها.
وجد: لا لحظة دماغي عملت Error. ام مين؟
شريهان: امه عصمت هانم اللي كانت تحت. اعملي نفسك بقي مش عارفاها.
باسل(بحدة): بره يلا بره.
شريهان: الايام جاية كتير لسة.
شريهان سابتهم و خرجت بره اوضة باسل.
وجد(بسخرية)حتى في دي كدبت. ممكن اعرف كدبت في ايه تاني؟! و لا اعرف ليه ما انت كل حياتك كدب في كدب مش هستغرب.
باسل: عندك هدوم في الدولاب خشي غيري في الحمام.
باسل دخل البلكونة و وجد راحت وراه و هي ماسكة فستانها بايديها...
وجد: انت يا بني ادم انت.
وجد: عايزة امشي. خالو هيقلق عليا.
وجد: هيبقي منظر خالو وحش مينفعش كدة.
وجد: طب اروح انا طيب؟!
وجد: يا بني ادم رد عليا بقي.
وجد: باسل.
وجد شهقت لما باسل شدها ناحيته و حضنها جامد لدرجة ان وجد اتوجعت و محضنتهوش.
باسل(بهمس): مكنش بايدي يا وجدي.
وجد غمضت عينيها و باسل فضل حاضنها,باسل رفع ايده و شال دبوس الشعر بتاع وجد و شعرها نزل علي ضهرها.
باسل دخل ب وجد من البلكونة و لسة بيرفع ايده يفتح سوستة الفستان وجد بعدت عنه بغضب.
وجد: ملكش حاجة عندي انا جاية هنا اجبار.
باسل فتح الدولاب و طلع بيجامة ل وجد حطها علي السرير و دخل الحمام يغير.
وجد قعدت تدبدب في الارض بغضب و راحت ناحية الباب لقته مقفول.
وجد(بغضب): منك لله يا باسل الكلب انت.
باسل خرج من الحمام لقي وجد زي ما هي و وجد فضلت واقفة مكانها...
باسل: خشي غيري هدومك.
وجد: و انت بناءًا علي ايه قررت اني هنام معاك؟!
باسل رجع شعره ل ورا و بيحاول يهدئ نفسه.
باسل: لو هتعرفي تنامي بالفستان نامي.
باسل راح ناحية السرير و قعد عليه مسك موبايله و بدأ يعمل كذا حاجة,وجد راحت ناحيته.
وجد: باسل.
باسل(بهدوء): نعم.
وجد: انت مش بتحبني صح ليه بقي عايز تجبرني اقعد معاك انا مش بحبك و انت مش بتحبني العلاقة فاشلة. خليك عاقل كدة و راكز و سيبني امشي يا عم هسيب مصر كلها و همشي بس ابعد عني.
باسل قوم وجد و قعدها علي السرير و مسك ايديها و بص في عيونها.
باسل(بتنهيدة): لان الواحد مش بيعرف قيمة الحاجة غير لما يخسرها و تزول و انا عرفت قيمتك يا وجد.
وجد(بانفعال): هو حد قالك ان انا مجاني؟!
باسل(بتنهيدة): طب اديني فرصة يا وجد.
وجد: خسرت الحق في ده.
باسل: بكرة نكمل كلامنا انا تعبان.
باسل نام علي السرير و طفي النور اللي جمبه و وجد قامت بغضب و بصت حواليها لقت البيجامة و بصت علي نفسها و علي الفستان و راحت قعدت علي الكنبة معرفتش تنام و لا تقعد.
وجد قامت وقفت بغضب و خدت البيجامة و دخلت الحمام.
وجد حاولت كتير تفتح سوستة الفستان.
وجد: يلا بقي، اوف.
وجد حاولت كذا مرة لغاية ما فتحت سوسته الفستان و اتنهدت و بدأت تغير هدومها...
وجد لبست بيجامة عبارة عن بنطلون باللون البيبي بلو و تي شيرت بأكمام باللون البيبي بلو و الباقي باللون الابيض رفعت شعرها علي شكل كحكة و نزلت كام خصلة علي شعرها.
وجد خرجت حطت الفستان علي الكنبة اللي قدام السرير و قعدت علي الكنبة التانية و ربعت رجليها بملل...
وجد(لنفسها): و بعدهالك يا باسل اطلع بقي من حياتي، ايه اللي غيرك فجأة؟! و هل ده لصالحي و لا ايه؟! و مين الناس اللي مش طيقاني دي؟!
وجد(لنفسها): ايه ام الالغاز اللي انا عايشة فيها دي؟!
وجد فاقت من شرودها علي صوت باسل بصتله لقته بيتقلب في السرير و بيتألم و عمال يطلع اصوات دلالة علي ألمه,وجد قامت ناحيته و حاولت تفوقه.
وجد: باسل باسل.
وجد: يا باسل.
باسل شهق و قام بسرعة من نومه و هو مش قادر يأخد نفسه و وجد حطت ايديها علي كتفه.
وجد: باسل.
باسل حضن وجد من خصرها و بدأ يعيط زي الاطفال,وجد تلقائيا بدأت تطبطب علي كتفه و تملس علي شعره.
وجد: حصل خير اهدي.
باسل(بعياط): انا موجوع اوي.
وجد: حاسس بايده طيب؟!
وجد نزلت لمستوي باسل و بصتله,باسل مسك ايديها و حطها علي قلبه.
باسل(بعياط): متسبنيش مش هقدر اكمل.
وجد لا رد.
وجد: نام دلوقتي و بكرة نتكلم.
باسل مسح دموعه بايده و بص ل وجد.
باسل: ممكن تنامي في حضني؟!
وجد: لا.
باسل: طب طب نامي علي حرف السرير و همسك ايدك بس و مش لازم امسك ايدك بس نامي معايا علي نفس السرير.
باسل: ممكن؟!
وجد راحت ناحية السرير بصمت و نامت علي طرفه,باسل بدأ يغطيها و هي بتبصله باستفهام و بعدها غمضت عينيها و بدأت تنام بعمق.
باسل فضل يتأملها لغاية ما اتاكد انها نامت و مسك ايديها باسها و فضل ماسك في ايديها لغاية ما نام هو كمان...
-في مكان تاني...
عند سيف.
الكل كان واقف علي اعصابه لما طال انتظار وجد و لؤي طلع ليها ملقهاش لقي ورقة محطوطة علي الترابيزة و سيف لحقه...
لؤي(بغضب): وجد.
سيف شد الورقة و فتحها و بدأ يقرأها هو و قصي.
كونكم بتقرأوا الورقة دي يبقي انتوا اكتشفتوا غياب وجد,انا معملتش حاجة غلط انا جيت خدت مراتي قبل ما تقع في الغلط لان جوازها من الزفت اللي اسمه لؤي ده اسمه باطل لان وجد لسة مراتي انا رديتها لعصمتي من اكتر من شهرين و نص فمحدش ليه دخل باللي بيحصل بيني و بين وجد مشاكل هنحلها احنا الاتنين. و اعتبرونا في شهر عسل محدش يتصل بينا,اه بالنسبة للعريس تتعوض بس متخلقش اللي يحاول يقرب من مرات باسل الانصاري,اللي هيعترض طريقي هيندم.
لؤي بدأ يكسر اي حاجة يلاقيها قدامه بغضب و غيظ...
سيف: اهدي يا لؤي.
قصي(بحدة): هو ملهوش كبير و لا ايه؟!
سيف: استني يا قصي اهدي انت كمان.
سيف: احنا اكيد هنتصرف بس بالهدوء العصبية مش هتجيب نتيجة.
ماجدة: هي فين يعني؟!
لؤي(بغضب): اكيد مع الحيوان اللي اسمه باسل ده.
سيف: هنعمل بحث عنه خلاص اهدي اكيد هنلاقيها.
قصي: نشوف الكاميرات الاول.
سيف: مشوا الناس اللي لسة تحت يا قصي.
قصي: طيب.
قصي خرج قابل ليلي اللي حطت ايديها علي كتفه.
ليلي: قصي ليه منفكرش ان ممكن باسل يبقي ندمان بجد.
قصي: لان اللي يقدر يجرح مرة يجرح تاني يا ليلي.
قصي نزل تحت و اعتذر للي موجودين و الكل بدأ يمشي تحت صدمتهم و استغرابهم الشديد.
قاسم: دي تلاقيها هربت دي مع عشيقها.
مسعد: يعني في عملية و لا مفيش دي اهم حاجة.
عدي: هنعرف بكرة، هو فين علي و فين باسل بيه؟!
قاسم: باسل بيه ليه يا ابني قول باسل بس هو موجود اصلا. و كمان هو عامل زي فرقع لوز بيتنطط كل شوية في حتة.
عصام: قاسم احترم نفسك باسل القائد بتاعنا و صاحبنا و بلاش غلط. يلا علشان نروح.
الاربعة ركبوا عربيتهم و كل واحد رجع ل بيته.
عصام رجع بيته لقي تالا فيكتوريا منتظراه.
تالا(بالروسية): حبيبي وحشتني.
تالا حضنت عصام جامد و عصام حضنها و باس رأسها.
عصام(بالروسية): و انتي كمان يا تالا. و بطلي تتكلمي روسي.
تالا(بعربي مكسر): بحاول يا عصام.
عصام(بحب): انا بحب اسمي منك اوي بتقوليه بطريقة مميزة و فريدة.
تالا ابتسمت بخجل و حضنت عصام.
-عصام و تالا كتبوا كتابهم و عاشوا مع والدة عصام.
انا مكنتش بذكرهم في الاحداث كتير لانهم ملهمش دور اساسي في الرواية...
-في مكان تاني...
عند كارما.
كارما كانت بتضحك مع احمد في المستشفي و كان صوت ضحكها عالي.
احمد: كارما وطي صوتك شوية.
كارما: ما انت اللي بتضحكني الله.
احمد: طيب.
كارما: يالهوي علي الطفل بتاعي.
احمد: متقوليش طفل.
كارما: طب امشي بقي يا طفل علشان سليم زمانه جاي يتطمن عليا.
احمد: لا ما انا قررت اني هستناه النهاردة هفاتحه في موضوعنا.
كارما: انت اتجننت؟! لا لا يا احمد بلاش.
كارما: علشان خاطري.
احمد: في ايه يا كارما؟! مالك؟!
كارما: بلاش النهاردة خليها لما اطلع من المستشفي و ابقي كويسة و تيجي تتقدم ليا...
احمد: تمام يا كارما رغبتك. همشي دلوقتي.
كارما: احمد متزعلش مني.
احمد: مش زعلان.
احمد باس رأس كارما و سابها و خرج و بعد فترة دخل سليم علشان يتطمن علي كارما...
سليم: حبيبتي عاملة ايه؟!
كارما: الحمدلله.
سليم: شدي حيلك علشان بكرة الصبح هرجعك البيت ماما عايزة تجيلك بس مرضتيش اخليها تيجي.
كارما: مالك متضايق ليه؟!
سليم: هكون متضايق من ايه يعني؟!
كارما: سليم باين عليك انك متضايق بس بتحاول تخبي.
سليم: كارما انا مش متضايق.
كارما: سليم.
سليم: نعم...
كارما(بتوتر): لو احمد جه اتقدملي هتوافق؟!
سليم: لما يبقي يجي يا كارما.
كارما(بتوتر): يعني في امل انك توافق؟!
سليم: علي حسب و هنتناقش انا و باسل.
كارما(لنفسها بفرحة): في امل.
كارما: طيب انا بس كان مجرد سؤال.
سليم: هو عرف اللي حصلك؟!
كارما(بارتباك): لا معرفش.
سليم: انتوا لسة بتتكلموا؟
كارما: بقالنا فترة مش بنتكلم.
سليم(بلامبالاة): طيب.
سليم قرب من كارما و كارما رجعت ل ورا.
سليم(بخبث): اومال ليه شامم ريحة برفيوم رجالي غير ريحتي؟!
كارما(بارتباك): ده الدكتور كان عندي قبل ما انت تيجي و كان بيكشف عليا هتلاقي دي ريحته.
الباب خبط و الدكتور دخل كارما غمضت عينيها بخوف و ارتباك.
سليم: خير يا دكتور؟!
الدكتور: جاي افحص الانسة كارما علشان ممرتش عليها النهاردة خالص.
سليم بص ل كارما و كارما ابتسمت ليه بارتباك.
سليم: طيب يا دكتور.
الدكتور بدأ يفحص كارما و كارما مغمضة عينيها علشان متبصش ل سليم.
الدكتور: تمام احسن بكتير عن اذنكم.
سليم: شكرا يا دكتور.
كارما(بارتباك): ا.
سليم: الدكتور التاني هو اللي جه يتطمن عليا هتلاقيه مقالش للدكتور ده صح.
كارما: ايوه ايوه صح.
سليم: طيب يا كارما يا حبيبتي و انا مصدقك.
سليم: و هبات معاكي النهاردة للصبح.
سليم راح نام علي الكنبة و كارما شهقت.
سليم: مالك حاسة بوجع؟!
كارما: لا هنام اهو.
بعد فترة تليفون كارما رن...
سليم(بنوم): مين يا كارما؟!
كارما(بتوتر): دي ماما.
سليم بص في الساعة لقي ان الساعة 3 الفجر و بص ل كارما و غمض عيونه بهدوء.
سليم: طيب ابقي سلمي عليها.
كارما: لا ما هي خلاص قفلت هنام بقي.
سليم: طيب.
كارما غمضت عينيها و نامت و سليم كان صاحي و ابتسم علي تصرفات اخته و نام بعمق.
-في مكان تاني...
عند علي.
علي وصل البيت في وقت متأخر و دخل ملقاش ثريا دخل اوضتها لقاها نايمة و مودية ضهرها للباب.
علي قرب من ثريا نام جمبها و حضنها من ضهرها و باس كتفها.
ثريا: علي؟!
علي: لا شبحي.
ثريا: اقوم احضرلك العشاء؟!
علي: استني.
ثريا: ايه؟!
علي: موحشكيش قصي و احمد و وجد؟!
ثريا: لو انا وحشتهم كانوا جم ليا.
علي قام وقف من علي السرير و راح ناحية ثريا اللي قامت من علي السرير و وقفت و هي باصة في الارض.
علي مسك ايد ثريا و باسها بهدوء.
علي: متعرفيش ظروف حد فيهم. و علفكرة شكلك حلو.
ثريا رفعت عينيها في عين علي اللي ابتسم ليها و هي دموعها نزلت تلقائي,علي مسح دموعها ببطء و باس رأسها.
علي: معاش و لا كان اللي يخليكي تعيطي و انا موجود.
ثريا: انا ا.
علي: ثريا.
ثريا: نعم.
علي: عارف انه مش سهل عليا اتجاوز غلطتك بس بحاول.
ثريا(بدموع و ضعف): ليه؟!
علي: لاني حبيتك يا ثريا لاني شوفت جانبك الحلو يا ثريا اللي انتي مكتشفتهوش في نفسك.
ثريا اتصدمت من رد علي و غصب عنها فقدت توازنها و هي واقفة و مال جسمها بس علي لحقها.
علي: حاسبي.
ثريا(بتوهان): بتحب مين؟!
علي: بحبك انتي.
ثريا(بتوهان): انا! انت متأكد؟! انت مش ندمان؟!
علي: لو رجع الزمن تاني كنت هحبك برضو.
ثريا عيطت و هي في حضن علي و علي قرب منها و (لخيالكوا)و.
-في مكان تاني...
عند وجد.
وجد كانت نايمة و فاقت لما حست نفسها عايزة تشرب و قامت قعدت علي السرير لقت باسل ماسك ايديها جامد.
وجد بدأت تسحب ايديها من بين ايدين باسل و بصت حواليها علشان تشرب ملقتش ماية.
وجد(بضيق): اوف بقي.
وجد قامت ببطء و راحت ناحية الباب لقته مقفول بدأت تبص حواليها علشان تلاقي المفتاح قربت من باسل لقته مرمي جمب السرير,وجد وطت مسكت المفتاح و راحت ناحية الباب فتحته و خرجت.
وجد(بخضة): بسم الله الرحمن الرحيم. ايه السواد ده الله يخرب بيتكم.
وجد بدأت تمشي في ممر و كانت في اضواء خافتة جدا و بدأت تنزل السلالم بحذر و قعدت تتمشي في القصر علشان توصل للمطبخ.
وجد(بضيق): و بعدين في ام المتاهة دي.
وجد لقت المطبخ اخيرا و دخلته فتحت التلاجة و جابت ازازة ماية.
وجد بدأت تشرب من الازازة و خلصت و خدتها و كانت طالعة تاني لاوضتها هي و باسل.
وجد: لما نشوف اخرتها.
وجد كانت طالعة السلالم لفت انتباهها ضوء جاي من ممر جمب السلالم.
وجد مشيت بهدوء ناحية الممر ده و لقت باب اوضة ازاز بس هي مش شايفة حاجة خالص غير انعكاس صورتها.
وجد(بملل): دول ناس فاضية.
وجد كانت هتمشي سمعت صوت حد في الاوضة دي قربت ودانها شوية علشان تسمع و لفت وراها تتاكد ان مفيش حد غيرها.
وجد لفت لقت عصمت في وشها صرخت جامد و الازازة وقعت في الارض.
وجد من خضتها رجعت ل ورا و وقعت في الارض.
في ثواني بدأت انوار القصر تتفتح و اصوات حوالين وجد بس هي نظرها ناحية عصمت اللي بتبص ليها بجمود.
باسل(بقلق): حبيبتي انتي كويسة؟!
باسل حاوط وش وجد بين ايديه و وجد بلعت ريقها بتوتر و هي بتبص ل عصمت.
اسيل: انتي كويسة؟!
باسل(بقلق): وجد متقلقنيش عليكي انتي بتعملي هنا؟!
وجد(بتوتر): مكنتش بعمل حاجة كنت عطشانة نزلت اشرب...
نعمة(بسخرية): بيت اهلك هو.
عصمت(ببرود): و هو ده يفسر وقوفك قدام الاوضة دي لمدة تلت دقايق؟!
وجد بصت حواليها بتوتر و باسل كان بيبص علي وجد و عصمت و لاحظ جرح في رجل وجد.
باسل: امي هي متعرفش القوانين هنا ملهوش داعي اللي حصل، خلاص حصل خير.
باسل باس رأس وجد و وطي شالها بين ايديه وطلع علي اوضته.
طارق: شوفتوا وشها كان عامل ازاي؟!
جودي: يا حرام كانت مخضوضة.
سهر: بس كانت جميلة.
رضوان و الباقي ما عدا نعمة و شريهان و عصمت ضحكوا.
اسيل: طبعا لازم تكون حلوة في كل حالاتها هو باسل بيختار اي حد لازم حد فريد من نوعه كدة.
نعمة(بحدة): يلا كل واحد علي اوضته مش عايز اسمع صوت او نفس حد.
عفاف: الساعة 6 يا نعمة مفيش داعي للنوم كدة كدة كلها ساعة و نصحي.
عصمت سابتهم و طلعت علي اوضتها,و كل واحد بدأ يطلع علي اوضته يغير هدومه و يستعد ل يومه.
عند باسل.
باسل قعد وجد علي السرير و دخل الحمام و خرج كانت في ايده علبة الاسعافات الاولية و قعد قدام وجد حط رجليها علي ركبته و بدأ يطهر جرحها.
وجد كانت شاردة في نظرات عصمت مفاقتش الا لما باسل حضنها بعدت عنه بسرعة.
باسل: ايه اللي حصل؟!
وجد: قولتلك كنت عطشانة نزلت اشرب و بعدها توهت في ام قصر الاشباح اللي انا فيه ده...
باسل: ا.
وجد: انا عايزة ارجع بيتي مش عايزة اقعد هنا.
باسل قرب من وجد و حط ايده علي خدها و بصلها.
باسل: اهلك عارفين انك هنا معايا بصفتك مراتي فمتحاوليش...
باسل: و كمان انتي لسة مشوفتيش حد و لا اتعاملتي معاه علشان تحكمي عليه.
وجد(بضيق): مش كفاية اللهو الخفي اللي كانت تحت دي.
باسل(بهدوء): وجد متغلطيش دي امي.
وجد(بانفعال شديد): انا عايزة اعرف ليه عملت فيا كدة؟!
باسل(بهدوء): اهدي يا وجد ليه الانفعال المفاجئ ده انا متعود علي وجد تانية خالص.
وجد(بانفعال): ماتت وجد القديمة ماتت قتلتها و قتلت روحها بايدك.
الباب خبط.
اسيل(بابتسامة): صباح الخير.
باسل(بابتسامة): صباح النور يا وردتي.
وجد(بضيق): صباح الخير.
اسيل(بابتسامة): معرفتش اتعرف عليكي كويس امبارح انا اسيل.
وجد: وجد.
اسيل: عارفة يا قمر باسل مكنش بيبطل كلام عنك.
وجد بصت لاسيل و باسل بضيق و قعدت علي السرير و ربعت رجليها و حطت دقنها علي خدها.
وجد(بلامبالاة): و يا تري كان بيحكيلك ازاي هينتقم مني و.
اسيل: متلمهوش يا وجد.
وجد(بانفعال): هو انا بقيت المذنبة دلوقتي في ايه بقي متعقلوا الكلام شوية.
وجد(بانفعال): هي الايه معكوسة عندكوا في ام قصر الاشباح ده و لا ايه.
باسل: اسيل روحي انتي و انا هجيب وجد و انزل.
اسيل: لا انا همشي لازم اروح الكلية بتاعتي هجيب ورق مهم. يلا هشوفك بليل.
اسيل باست وجد علي خدها و حضنت باسل و سابتهم و خرجت بره الاوضة,باسل لف ل وجد لقاها بتبصله بغضب.
باسل راح ناحية الدولاب و اختار طقم لوجد حطه علي السرير و سابها و دخل الحمام.
باسل خرج بسرعة من حمامه لما سمع صوت تكسير جاي من الاوضة باسل لقي وجد بدأت تكسر كل حاجة في الاوضة.
الكل من تحت سمعوا صوت التكسير طلعوا بقلق لقوا وجد بتكسر كل حاجة في الاوضة و باسل ساند علي الدولاب ببرود و مربع ايده.
وجد(بصريخ): لك و اللعنة طلقني.
وجد(بصريخ): بكرهك بكرهك.
وجد وقعت في الارض من كتر التعب.
وجد(بدموع): عن اي حب بتتكلم ها مفيش حبيب بيأذي حبيبه و انت مكتفتش بأذيتي و بس انت قتلت روحي و قتلت ابني اللي مكملش شهر في بطني انا بكرهك.
الكل اتصدموا من كلام وجد عن قتل ابنها و بصوا ل باسل.
عصمت(بهدوء): و انتي كنتي عايزاه يجيب ليا حفيد من نسل عائلة الصياد علشان يبقي ابن و لا بنت...
وجد قامت بانفعال و هسيترية و بصت ل عصمت.
وجد(بانفعال): انا عملتلك ايه انا اول مرة اشوفك كانت امبارح انا مالي مالي باللي عائلته عملته.
وجد(بانفعال): ده انا حتى معرفش عملوا ايه بتحاسبوني علي ذنب حتى معرفهوش.
عصمت(بلامبالاة): مش عارفة محروقة كدة علي ايه؟!
وجد بصت حواليه و لقت تحفة حادة مسكتها و كانت رايحة ناحية عصمت بغضب بس باسل شالها من خصرها و بعدها عنهم.
وجد(بصريخ): سبني سبني. لك و اللعنة علي قلبي اللي حبك. حبك لعنة حبك كابوس. سبني.
باسل نزلها في الارض و فضل حاضنها من ضهرها و بيهمس في ودانها بكلام حنين علشان يهديها.
الكل كان واقف بيبصوا علي وجد و باسل و في اللي اشفقوا علي وجد.
وجد كانت بتصارع نفسها علشان متنهارش بس محستش بنفسها و هي بيغمي عليها بين ايدين باسل.
باسل(بحدة): كله بره.
باسل شال وجد و حطها علي السرير بهدوء و كان الكل بدأ ينسحب من قدام باسل و عصمت بصت علي وجد و سابتها و مشيت.
باسل قعد جمب وجد و مسك ايديها و بدأ يعيط زي الاطفال و يشهق و قعد يتكلم كتير بكلام وجد مسمعتهوش لانها كانت مغيبة تماما.
تحت.
رضوان: اسيل كنتي تعرفي؟!
اسيل: لا.
طارق: ازاي باسل يعمل كدة هي حصلت؟!
حازم: محدش عارف و اكيد العقربة دي هي اللي عملت كدة معاه.
عصمت(بغضب): انت مجنون؟!
حازم اتخض من عصمت و رجع ل ورا خطوتين.
عصمت(بغضب): قدامك ثواني و الاقيك في الاوضة اللي تحت.
حازم بص ليها و في ثواني و نزل ل تحت و دخل الاوضة و هو متضايق من تحكمات عصمت ب الكل.
جودي: يا مرات عمو.
عصمت(بحدة): ايه عايزة تحصليه؟!
طارق(بحدة و همس): اخرسي و تعالي ورايا.
طارق شد جودي وراه بعيد عن عصمت علشان متدخلهاش الاوضة تاني.
عصمت(بحدة): يلا كله علي السفرة.
الكل هرب من قدام عصمت و جبروتها و نزلوا ل تحت.
بعد فترة عند باسل.
باسل كان قاعد جمب وجد لغاية ما بدأت تفوق و الباب خبط.
باسل: ادخل.
خدامة: باسل بيه في شخص اسمه سيف النجار منتظر حضرتك تحت.
وجد ركزت في الاسم و قامت اتعدلت بسرعة...
وجد(بلهفة): خالو.
باسل: استني غيري هدومك الاول و حصليني.
وجد: وسع كدة.
باسل: قولت غيري هدومك الاول.
وجد(بضيق): طيب.
باسل مسك الجاكت بتاعه و نزل ل تحت,وجد قامت و غيرت هدومها بسرعة.
وجد لبست جيبة باللون الاسود لغاية بعد الركبة واسعة و فوقها تي شيرت بكم باللون الابيض و لبست صندل بكعب اسود و سيبت شعرها علي ضهرها.
وجد خرجت بره الاوضة بسرعة و نزلت ل تحت.
سيف(بحدة): انت بقي؟!
سيف ضرب باسل بوكس في وشه بغضب,باسل متحركش.
سيف بدأ يضرب باسل كذا مرة بغضب و عصمت كانت هتتكلم باسل شاور للكل بأنه يسكت.
سيف(بغضب): و غلاوة وجد عندي لادفعك التمن غالي.
لؤي(بغضب): سيبه يا سيف بيه.
لؤي كان هيمسك باسل من قميصه بس باسل مسك دراعه و تناه ورا ضهره و ضغط عليه جامد و لؤي بدأ يتوجع.
باسل(بغضب مكتوم): مش اي حد بسمحله يقرب مني متحاولش.
باسل ضرب لؤي برجله و لؤي وقع في الارض و قام وقف بغضب...
نعمة(بحدة): انتوا اتجننتوا جايين لحد عندنا و تضربوه كمان. هي دي اصول!؟
سيف(بغضب): و هو اللي الزفت ده عمله اصول؟!
سيف(بغضب): فين وجد؟!
باسل: بس انا بحبها و.
سيف(بسخرية): بتحبها! اللي زيك بيعرف يحب اصلا؟!
باسل: اجبرتني علي اني اتعلمه و احبها.
سيف: ده انت ا.
باسل: كانت غلطة ملهاش هي اي ذنب و مستعد اعمل اي حاجة علشان خاطرها.
سيف: تموت علشانها؟!
وجد كانت رايحة ناحية سيف بس وقفت فجأة لما سمعت جملة سيف و كانت منتظرة اجابة باسل.
باسل(بثقة): اموت علشانها.
سيف طلع مسدسه من ورا ضهره و حطه في وش باسل.
سيف: و لو سألت عن سيف النجار هتعرف انه مش بيقول اي كلام و خلاص.
سيف ضغط علي الزناد و باسل غمض عيونه و كل العائلة وقفت مندهشة من اللي بيحصل.
عصمت(بصوت عالي): باسل.
باسل فتح عيونه لما محسش بأي حاجة لقي وجد واقفة قدامه و التي شيرت بتاعها غرقان دم.