رواية النور والكابوس للكاتبة سلسبيل كوبك الفصل الخامس عشر
شكري غصب عنه ضغط علي الزناد ناحية باسل و الكل اتفاجئ لما لقي وجد وقفت قدام باسل و الرصاصة صابتها هي.
وجد فتحت عينيها علي الاخر من الالم و عيونها دمعت باسل حاوط وشها من ورا و فجأة وقعت علي الارض بين ايدين باسل.
وجد(بدموع): عرفت اني بحبك.
وجد بصت ل باسل و بدأت تفقد وعيها تدريجيا.
باسل(بصوت عالي): وجد!
شكري كان مصدوم سليم ضربه برجله فوقع في الارض.
سليم: الامن بسرعة.
نرمين: باسل لازم ننقلها المستشفي.
كارما(بدموع): دي بتنزف.
باسل بص لوجد بصدمة و شالها بين ايديه و الموظفين وسعوا الطريق ليه.
باسل كان بيمشي بسرعة كبيرة و كارما و نرمين وراه.
باسل بص علي وجد اللي مغمي عليها رفعها ليه.
باسل(لنفسه,بخوف): مش لازم تموتي مش لازم.
باسل خرج من الشركة و الحارس فتح باب العربية ليه و باسل حط وجد في الكرسي اللي ورا و نرمين قعدت و خلت رأسها علي رجليها.
باسل لف بسرعة ركب مكان السواق و جمبه كارما و بدأ يسوق بسرعة كبيرة.
نرمين: اهدي يا باسل هنعمل حادثة...
باسل بص علي وجد و زود من سرعته و كارما كانت بتعيط.
بعد فترة باسل وقف قدام اقرب مستشفي لقاها قدامه...
باسل: كارما انزلي جيبي نقالة بسرعة.
باسل راح ناحية وجد و شالها بين ايديه و دخل المستشفي كانت كارما جابت دكتور و نقالة و باسل حط وجد علي النقالة.
باسل(بعصبية): عايزها كويسة فاهم.
الدكتور(بتوتر): حاضر...
نقلوا وجد لاوضة الطؤاري علطول و نرمين و كارما قعدوا علي الكراسي اللي موجودة و باسل كان رايح جاي و متوتر...
تليفون باسل رن، الخط اتفتح.
سليم: ايه الاخبار؟!
باسل: الدكاترة خدوها. و انت؟!
سليم: انا وديته للمكان بتاعنا...
باسل: هجيلك لما اطمن عليها.
سليم: طيب انا هروح علي هناك ابقي طمني.
باسل: طيب.
باسل وقف و سند رأسه علي الحيطة و غمض عينه.
وجد(بدموع): عرفت اني بحبك.
باسل مكنش قادر ينسي نظراتها و دموعها و فتح عينه بتعب.
نرمين: اهدي يا باسل هتبقي بخير صدقني.
باسل: ان شاء الله.
كارما(بدموع): شوفتها خدت الرصاصة ازاي يا باسل؟! بتحبك اوي.
باسل عيونه دمعت و نرمين حضنته جامد و غمضت عينيها و هي بتفكر في حاجة...
الدكتور: باسل بيه.
باسل: ايه فاقت؟!
الدكتور: لا هي هتفوق علي بليل هي حاليا بس.
باسل(بحدة): انطق مالها؟!
الدكتور: مفيش مفيش هي كويسة هننقلها اوضة عادية.
الدكتور هرب من قدام باسل و باسل بص علي وجد و هي خارجة علي نقالة و دخلوها اوضة عادية...
باسل: روحوا انتوا.
كارما: بس.
باسل(بحدة): نرمين خدي كارما من هنا.
نرمين: طيب بس اهدي انت. يلا يا كارما.
نرمين مسكت ايد كارما و خرجوا بره المستشفي,باسل بص علي وجد من ورا ازاز اوضتها.
باسل(بتنهيدة): ليه كدة؟!
باسل وقف و هو مربع ايده و بيبص علي وجد.
-في مكان تاني...
عند ياسين...
ياسين: فيها ايه يا احمد؟!
احمد: يا جدي بيتصرف من دماغه مش عامل حسابه لحد.
ياسين: احمد سيبه براحته.
احمد: طيب براحتك.
ياسين: ايه اخبار الشغل معاك؟!
احمد: احسن الحمدلله.
ياسين: هتسافر؟!
احمد: ايوه.
ياسين: امتي؟!
احمد: النهاردة بليل.
ياسين: طيب ربنا معاك. تعالي نرجع.
احمد: طيب.
تليفون احمد رن.
احمد: جدو روح انت و انا جاي وراك.
ياسين: طيب.
الخط اتفتح.
احمد: خير؟!
كارما: ممكن نتقابل!؟
احمد: لازم اسافر مش فاضي...
كارما: كنت انا كمان هسافر عموما خلاص لما ترجع. عن اذنك.
احمد: استني هتسافري فين؟!
كارما: اسكندرية، و انت؟!
احمد: ملكيش فيه.
كارما(بغيظ): تصدق اني غلطانة اني عايزة اعتذرلك علشان الاساءة اللي قولتها ليك.
كارما(بغيظ): و و و علفكرة بقي انت شبه خلة السنان و كمان انت عامل زي البهلوان.
كارما: و من غير سلام.
كارما قفلت في وش احمد اللي اتصدم من كلامها و حط التليفون في جيبه.
عند كارما...
كارما رمت التليفون بغيظ علي السرير و قعدت عليه.
كارما: كنت هقوله علي وجد و كمان كنت هعتذر بس هو ميستحقش.
كارما(بغيظ): اشوف فيك يوم.
الباب خبط...
كارما: ادخل.
مريم: ايه اللي حصل يا كارما؟! مش المفروض كنتوا تيجوا كلكم و معاكم وجد؟!
كارما: ما وجد اتضربت بالنار.
مريم(بخضة): ايه ازاي؟!
كارما حكت اللي حصل في الشركة لمريم.
مريم: يعني وجد خدت الرصاصة بدل باسل؟!
كارما: بالظبط كدة يا ماما، لو شوفتيها و هي بتقف قدامه و بتدافع عنه بجد.
كارما: و الا لما وقعت في الارض و باسل صرخ عليها كانوا عشاق اوي يا ماما.
مريم: ربنا يخليهم لبعض.
كارما: يا رب.
مريم: طب يلا قومي جهزي نفسك. و انا هكلم باسل.
كارما: طيب.
مريم سابت كارما و خرجت بره الاوضة مسكت تليفونها و اتصلت ب باسل.
الخط اتفتح...
باسل: ايه يا امي؟!
مريم: اللي حصل حقيقي؟!
باسل: ايوه.
مريم: و هي اخبارها ايه دلوقتي؟!
باسل: لسة مفاقتش.
مريم: طب و اهلها؟!
باسل: هتصرف انا.
مريم: طب خليك معاها لغاية ما تفوق.
باسل: تمام.
مريم: تحبني اجي؟!
باسل: لا.
مريم: طب انت كويس؟!
باسل: اه.
مريم: طيب. ا.
باسل: اقفلي يا امي هي بدأت تفوق هكلمك بعدين.
باسل قفل مع مريم و حط التليفون في جيبه و دخل لاوضة وجد لقاها بتحرك رأسها.
باسل: وجد.
وجد فتحت عينيها ببطء و غمضتهم تاني لغاية ما فتحتهم و باسل كان مايل عليها.
باسل: انتي كويسة؟! سمعاني؟!
وجد(بتعب): اه.
باسل: انادي الدكتور؟!
وجد مسكت ايد باسل بايديها السليمة.
وجد: تؤ انا بخير.
باسل: طب تحبي اعملك حاجة؟!
وجد: لا، قصي؟!
باسل(بضيق): ايه جاب سيرته دلوقتي؟!
وجد: اكيد اتصل يا باسل و هيقلق.
باسل: متخافيش هتصرف انا، ليه عملتي كدة؟!
وجد: لغاية دلوقتي و معرفتش يا باسل...
باسل: مش كدة يا وجد لدرجة انك تموتي نفسك مفكرتيش بروحي في غيابك.
وجد(بتعب): مفكرتش غير اني ممكن اخسرك و انا مش عايزة اخسرك.
باسل باس رأس وجد و قرب من ودنها.
باسل: بحبك يا وجدي.
وجد: و انا كمان...
باسل: هروح انادي الدكتور يطمن عليكي.
وجد: لا عايزاك جمبي.
باسل ابتسم لوجد و قعد جمبها و بدأ يملس علي شعرها بهدوء...
وجد: قولت لعائلتي؟!
باسل: هقولهم انك معايا و هنتأخر.
وجد: ممكن تروحني.
باسل: لا ا.
وجد: باسل.
باسل: نعم؟!
وجد: عايزة اروح و كمان مش فاضل غير كام يوم علي الفرح و لازم اكون بجهز.
وجد: روحني.
باسل: لا طبعا انا هأجل الفرح.
وجد: لا لا علشان خاطري.
باسل(بغمزة): شكلك مستعجلة انتي كمان.
وجد(بغيظ): لا طبعا يا رخم.
باسل(بضحك): خلاص متضايقيش كدة.
باسل: جعانة؟!
وجد: اوي.
باسل: طيب هروح اشتري اكل ليكي.
وجد: لا خليك معايا انا مش...
الممرضة دخلت علشان تطمن علي وجد لقتها صاحية.
ممرضة: حضرتك فوقتي؟!
وجد: اه.
الممرضة: حمدلله علي السلامة...
وجد: الله يسلمك.
الممرضة بدأت تفحص وجد و باسل واقف حاطط ايده في جيبه.
ممرضة: حضرتك احسن حاليا؟! و الحمدلله الاصابة مش كبيرة.
وجد: شكرا.
ممرضة: علي ايه ده واجبي. المهم الراحة التامة.
وجد: اكيد، شكرا.
وجد: اقدر اخرج امتي؟!
ممرضة: دي الدكتور يحددها هروح اناديه.
وجد: طيب.
باسل: ايه يا حبيبتي عايزة تخرجي بدري ليه؟!
وجد: مبحبش المستشفيات بحس مكان للموت.
باسل: بعد الشر عليكي يا حبيبتي.
باسل: هسأل الدكتور تقدري تخرجي في اقرب وقت امتي.
الدكتور: مساء الخير، حمدلله بالسلامة يا انسة وجد.
وجد: الله يسلمك يا دكتور.
الدكتور شاف قيم وجد و بص ليها و عمل كذا فحص صغير كدة ليها.
دكتور: لو خدتي الدؤاء في الميعاد يبقي تخرجي كمان يومين كدة لو محصلش تدهور.
وجد: يومين ايه انا عايزة امشي دلوقتي.
دكتور: افندم! ده خطر عليكي...
وجد: ما تتكلم يا باسل.
باسل: دكتور شوف اللي مناسب ليها و لصحتها.
دكتور: تفضل بس يومين.
وجد(بضيق): لا مش هقعد هنا ساعة كمان عايزة امشي يا باسل اتصرف.
باسل: وجد حبيبتي ده علشان مصلحتك.
وجد(بضيق): لا يعني لا مش هقعد هنا...
باسل(بحدة): وجد متهزريش.
وجد(بضيق): باسل مشيني من هنا.
دكتور: احم انسة وجد براحة علشان صحتك.
باسل: وجد.
وجد: انا نفسيتي مش هتبقي مرتاحة طول ما انا هنا.
دكتور: طب خلاص هكتبلك علي خروج بكرة.
وجد: دلوقتي.
باسل(بحدة): عنادك ده هيفيدك بايه؟!
وجد: باسل انا عايزة امشي من هنا و بس كدة.
وجد حست بوجع في ايديها استحملته.
وجد: ها؟!
دكتور: ا.
وجد: خروج.
باسل(بحدة): وجد.
وجد(بضيق): مش هسمع كلام حد و عايزة امشي من هنا فورا.
وجد قامت وقفت علشان تمشي بس باسل مسك دراعها و شدها ناحيته.
باسل: اهدي كدة و قولي انا هديت. اقعدي.
باسل: و انت اكتب ليها علي خروج.
دكتور: يا باسل بيه...
باسل(بتحذير): اسمع الكلام...
دكتور(لنفسه): ربنا يتوب عليا.
دكتور: حاضر.
الدكتور كتب خروج ل وجد و وجد غيرت هدومها و مشيت مع باسل ل بره المستشفي.
باسل(بضيق): تسمحيلي اشيلك و لا مينفعش؟!
وجد: انا بخير يا باسل مفيش داعي.
باسل(بضيق): انا غلطان اني طاوعتك.
وجد: بحبك.
باسل ابتسم لوجد و شدها لحضنه وجد اتوجعت.
باسل: انتي كويسة؟!
وجد: ايوه.
باسل فتح باب العربية لوجد و وجد ركبت العربية و باسل لف و ركب مكان السواق و بدأ يسوق ناحية القصر...
بعد فترة باسل وقف قدام القصر باسل حضن وجد و باس خدها.
باسل: هكلمك.
وجد: طيب.
باسل: بس متناميش و انتي بتكلميني زي كل مرة.
وجد(بخجل): الله صوتك بينيمني.
باسل(بضحك): و ده ازاي ده؟!
وجد: هو كدة بقي.
باسل: خلاص يا حبيبتي نامي انتي و بكرة نبقي نتكلم.
وجد: طيب.
باسل: تصبحي علي خير.
وجد: و انت من اهله.
باسل(برفعة حاجب): هو سعد ده واقف لينا كدة ليه؟!
وجد: متأخدش في بالك هو غريب في نفسه كدة...
باسل: طيب يا حبيبتي.
وجد كانت هتنزل بس باسل شدها ناحيته و قرب منها و حاوط وشها بين ايديه...
وجد(بتعب): باسل انا تعبانة عن اذنك تصبح علي خير...
وجد باست باسل علي خده و سابته و نزلت باسل شاور ليها و هي دخلت القصر و سعد دخل وراها,باسل مشي ل سليم.
سعد: هتفضلي فعلا مصدقة؟!
وجد كانت في قمة تعبها و دراعها واجعها و مكنتش مركزة.
وجد: قصدك ايه؟!
سعد: انتي مصدقة مشاعره.
وجد: اكيد يعني و كمان يا سعد ده بقي جوزي.
سعد: وجد بس لسة في فرصة تطلقي منه...
سعد قرب من وجد و مسك ايديها وجد كانت بين الوعي و اللاوعي و وقعت بين ايدين سعد.
سعد(بقلق): وجد وجد. فتحي عينك وجد ردي عليا.
سعد وطي و شال وجد بين ايديه و راح للقصر خلي حد من الحراس يرن الجرس...
رانيا: ايه في ايه؟!
رانيا(بشهقة): ست وجد.
سعد: وسعي كدة.
سعد دخل القصر و حط وجد علي الكنبة.
سعد: اجري بسرعة جيبي برفان.
رانيا: اه صح.
رانيا جريت علي اوضة وجد جابت برفيوم و نزلت ل سعد تحت ودته البرفيوم.
سعد رش علي ايده و بدأ يشمم وجد و هي بدأت عينيها ترعش و تتحرك يمين و شمال...
سعد: وجد فتحي عينك. سمعاني اتصل بالدكتور.
وجد: تؤ لا محدش يتصل بحد.
وجد قامت اتعدلت بمساعدة رانيا و قعدت.
وجد: شكرا ليكم. تعالي يا رانيا عايزة اطلع اوضتي.
رانيا: تعالي يا هانم.
رانيا ساعدت وجد و طلعوا اوضة وجد رانيا قعدت وجد علي السرير و لقت ان الجاكت مقطوع.
رانيا: ماله الجاكت يا استاذة؟!
وجد: هقولك بس متقوليش لحد.
رانيا: قولي.
وجد: خدت رصاصة.
رانيا(بشهقة): ايه؟!
وجد: هشششش اهدي.
رانيا: طب ازاي؟! حضرتك كويسة طيب؟!
وجد: حاسة بوجع بسيط.
وجد: ساعديني يا رانيا.
رانيا: حاضر...
وجد: هاتي علبة الاسعافات من الحمام غيريلي علي الجرح.
رانيا بدأت تغير علي الجرح بتاع وجد و وجد تتوجع كل مرة و بعدها رانيا ساعدت وجد تغير هدومها.
وجد لبست بنطلون اخضر و فوقه تي شيرت نبيتي بكم و سيبت شعرها علي ضهرها.
رانيا: تحبي اعملك تأكلي؟!
وجد(بتعب): لا بس خليني انام و محدش يصحيني.
رانيا: حاضر يا هانم، الف سلامة عليكي.
وجد(بتعب): متقوليش لحد...
رانيا: حاضر...
رانيا سابت وجد و مشيت و وجد نامت علي السرير بتعب كانت حاسة بتقل في دماغها نامت بسرعة.
-في الصباح الباكر...
في الاسكندرية.
كان احمد وصل من الصبح بدري لانه سافر الفجر,احمد وصل للفندق اللي هيقيم فيه.
مدير: نورتنا يا احمد بيه زادنا شرف. اتفضل معايا.
احمد: طيب.
احمد راح مع المدير لاوضته و دخلها.
مدير: شنطة حضرتك دقيقتين و تبقي هنا.
احمد: شكرا.
مدير: تؤمر بأي حاجة يا فندم؟!
احمد: لا.
الموظف دخل بشنطة احمد و حطها و مشي و المدير مشي وراه و قفل الباب.
احمد دخل رمي نفسه بتعب علي السرير...
-بعد فترة.
احمد صحي بعد فترة من نومه و قام غير هدومه و خرج بره اوضته.
احمد نزل تحت للفندق و كان خارج ل بره.
بنت: لو سمحت حجز باسم كارما المهدي.
احمد لف بسرعة و لمح كارما و هي واقفة عند مكتب الاستقبال و لفت لقت احمد واقف و باصص ليها.
الاتنين فضلوا يبصوا لبعض فترة و بدأ كل واحد يمشي باتجاه التاني و هو غير مدرك للوضع.
كارما: انت ازاي؟!
احمد لا رد.
موظفة: انسة كارما اتفضلي مفتاح حضرتك.
كارما: شكرا...
كارما خدت المفتاح و راحت لاحمد تاني.
احمد(برفعة حاجب): ايه؟!
كارما: ايه؟!
احمد(بسخرية): بعني ايه موقفك مع واحد شبه خلة السنان؟!
كارما(بضيق): انت اللي عصبتني ساعتها.
احمد: بس صدفة حلوة. عن اذنك ورايا شغل.
كارما مسكت في دراع احمد قبل ما يمشي و احمد بصلها باستفهام و هي اتوترت.
كارما: خلاص روح.
احمد(برفعة حاجب): ايه كنتي عايزاني اقعد معاكي مثلا.
كارما(برفعة حاجب): دماغك راحت لفين. انا كنت هقول.
احمد: ايوه كنتي هتقولي ايه بقي؟!
كارما: احم بما اننا نسايب ايه رأيك نتصاحب؟!
احمد: جرئية حبيت النقطة دي فيكي، بس سؤال.
كارما: قول.
احمد: اي نوع من الصحوبية؟!
كارما رفعت ايديها علشان تضرب احمد بس هو مسك ايديها...
احمد: ايدك الحلوة دي خليها جمبك.
كارما: انت اللي تفكيرك منحرف زيك.
احمد: ماشي يا ستي متشكر. يلا شوفي رايحة فين.
كارما سابت احمد و مشيت و هي في قمة غضبها و طلعت اوضتها.
احمد خرج بره الفندق و بعدها افتكر انه نسي ملف مهم في الفندق فطلع لاوضته...
عند كارما...
كارما كانت قاعدة علي كرسي و مربوطة باحبال و في حاجة علي بوقها و عمالة تتحرك بعنف...
شاب: اهدي يا حلوة علشان نعرف نشوف شغلنا معاكي.
شاب2: تفتكر دي تنفع لاي حاجة غير حاجة واحدة.
شاب(بضحك): عندك حق بس نأخد اللي الباشا عايزه الاول.
كارما قعدت تصرخ بصوت مكتوم.
شاب(بضحك): صرخي اكتر صرخي يلا.
كارما قعدت تهز نفسها بالكرسي كتير و رجعت بالكرسي كذا خطوة...
شاب2: دور كويس هناك.
كارما حاولت كتير برأسها توقع ال?ازة اللي موجودة علي الترابيزة لغاية ما وقعتها.
شاب: يا بنت ال.
شاب2: اخرسي مش عايز نفس.
الباب خبط.
الشاب الاول بص ل كارما و مسكها من شعرها.
شاب: لو طلعتي نفس هقتلك.
الشاب التاني راح ناحية الباب و فتحه...
شاب2: افندم!
احمد(برفعة حاجب): انت بتعمل ايه هنا؟!
شاب2: انت مالك و انت مين اصلا؟!
احمد(بضيق): فين كارما؟!
شاب2: معرفش حد بالاسم ده.
احمد: و ده ازاي يعني؟! دي اوضة كارما المهدي.
شاب2: ملكش دعوة ابعد عني.
الشاب كان هيقفل الباب بس احمد مسكه من هدومه و زقه لورا ضربه بوكس في وشه.
الشاب الاول راح ناحيته و ضربه علي رأسه بس احمد لف ليه و مسك ال?ازة اللي لقاها في وشه و ضرب بيها الشاب الاول علي رأسه بغضب.
احمد لف ناحية كارما و راح ناحيتها بسرعة و بدأ يفك الحبل و كارما بتعيط,احمد شال اللصق اللي علي بوقها.
كارما قعدت تعيط و حضنت احمد و احمد حاوطها بايده و قعد يملس علي شعرها بهدوء.
احمد: اهدي اهدي خلاص حصل خير.
كارما(بعياط): كانوا عايزين. كانوا.
احمد(بضيق): خلاص اهدي متقلقيش هطلب ليهم البوليس متقلقيش. اهدي انتي و بطلي عياط...
كارما فضلت ماسكة في احمد لغاية ما غصب عنها عينيها وجعتها و غمضتها و بدون وعي نامت و جسمها تقل و احمد حس ب ده...
احمد(بقلق): كارما كارما...
احمد وطي و شال كارما بين ايديه و لقي انتظام التنفس عندها راح لاوضته و حط كارما علي سريره بهدوء.
احمد نزل و كلم امن الفندق و المدير و عمل مشكلة كبيرة و طلبوا البوليس.
احمد راح شركته بعد ما اطمن علي كارما تاني...
-في مكان تاني...
عند وجد...
وجد كانت نايمة علي سريرها لقت الباب بيخبط و التليفون بيرن في نفس الوقت.
وجد صحيت من النوم متضايقة.
وجد(بزعيق): مين علي الباب؟!
قصي: انا يا وجد.
وجد(بضيق): خير يا قصي؟!
قصي: ادخل؟!
وجد: ادخل...
قصي: صباح الخير...
وجد: صباح النور.
قصي: انتي كويسة فيكي حاجة؟!
وجد(برفعة حاجب): اه بس ليه بتسأل؟!
قصي: حلمت حلم وحش.
وجد: حبيبي لا انا بخير متقلقش...
قصي: مين الرخم اللي بيتصل عليكي؟!
وجد: متقولش عليه رخم...
قصي: اووووه حبيب القلب بقي.
وجد: روح نام يا قصي انا تعبانة مش فاضيالك.
قصي: لسة صاحي من النوم، عموما يلا انزلي تحت دي امك عاملة حفلة.
وجد: بمناسبة؟!
قصي: نسيتي الفرح قرب اوي يا مزتي.
وجد: اه صح نسيت.
قصي: طب يلا اسيبك تردي علي حبيب القلب براحتك.
وجد: يا رخم.
قصي ضحك علي وجد و سابها و خرج بره اوضتها.
وجد مسكت التليفون و اتصلت ب باسل، الخط اتفتح.
باسل: جنابك مش بتردي ليه كنت هلبس و اجيلك دلوقتي.
وجد: كنت بكلم قصي، ا.
باسل: ربنا يأخد قصي يا شيخة.
وجد: بعد الشر قصي ده اخويا يا باسل قولتلك متدعيش عليه...
باسل: طيب يا وجد، صباح الخير.
وجد: صباح النور.
باسل: اخبار جرحك ايه حاسة بوجع؟!
وجد: تؤ انا بخير.
باسل: طيب يا حبيبتي.
وجد: طيب.
باسل: بالنسبة للقاعة و الفرح و البيت متشغليش بالك باي حاجة خالص...
وجد: حاضر يا حبيبي.
باسل: قولتي ايه؟!
وجد: قولت حاضر يلا اقفل باي.
وجد قفلت في وش باسل و حضنت المخدة بايديها بس دراعها وجعها اوي...
وجد: اوف بقي ده انت جيت في وقت مش لازم تيجي فيه خالص.
عدت الايام و جه يوم فرح وجد و باسل...
كان الكل في قمة سعادته و بالاخص وجد و باسل,الكل بيتشغل و بيطلع احسن ما عنده علشان الفرح,وجد نزلت لفت مع ماجدة علشان الحاجات اللي ناقصاها,باسل بيخلص شغله بسرعة قبل الفرح,ثريا كانت بعيدة عنهم الفترة دي,احمد و كارما رجعوا من الاسكندرية بعد ما كل واحد خلص شغله,و كل الترتيبات كانت جاهزة.
وجد: كدة اتفقنا يا استاذ محمود و الفلوس اهي اتقسمت بالعدل.
ليلي: شكرا يا استاذة وجد.
وجد: لا عادي.
وجد: تقدر تمشي يا استاذ محمود.
محمود: طيب.
ليلي: مش عايزة اشوف خلقتك خالص.
وجد: ليلي اهدي بقي.
محمود: و لا اعرفك.
محمود سابهم و مشي و وجد كانت حاسة بوجع بسيط في دراعها.
وجد: انتي معزومة علي فرحي النهاردة.
ليلي(بصدمة): انتي النهاردة كنتي بتشتغلي و الليلة فرحك.
وجد(بابتسامة): ايوه.
ليلي: انتي في عقلك يا بنتي؟!
وجد(برفعة حاجب): بت احترمي نفسك انا اكبر منك.
ليلي: خلاص اسفة، طب هو فين و لا هاجي ازاي؟!
وجد: هبعتلك اخويا بعربيته. انا عارفة عنوانك.
ليلي: اشطا يا معلم.
وجد: بت انا مش فاضيالك.
ليلي: اتمختري يا عروسة.
تليفون وجد رن.
وجد: طيب يلا امشي.
وجد و ليلي خرجوا بره اوضة المكتب...
وجد: نهال زي ما عرفتك وزعي الدعوات عليهم.
نهال: حاضر يا هانم.
وجد: شكرا يا روحي.
الخط اتفتح.
وجد: الو يا باسل.
باسل(بحدة): برضو عملتي اللي في دماغك يا وجد؟!
وجد: كان في قضية لازم اخلصها يا باسل. خلاص بقي معلش.
باسل(بحدة): كلامي مش بيتسمع ليه يا وجد؟!
وجد: باسل خلاص متكبرش الموضوع.
باسل(بحدة): طيب يا وجد حسابك في بيتنا...
وجد: همشي يا باسل.
باسل: امشي.
وجد: انت مش هتيجي تبدل البدل من الايد اليمين للشمال.
باسل: مش هعرف عندي حاجات كتيرة ناقصة لازم اعملها.
وجد: طيب متقلقش.
باسل: خلي بالك من نفسك.
وجد: طيب و انت كمان.
باسل: هقابلك بليل يا عروستي.
وجد: باي يا جميل.
باسل: بسبب الجملة دي انتي مراتي دلوقتي.
وجد و باسل ضحكوا و وجد كانت بتسوق و هي بتكلم باسل.
باسل: باي يلا يا حبيبتي هقابلك بليل.
وجد: باي.
وجد وصلت للقصر و نزلت لمحت سعد و هو واقف بيدخن.
وجد راحت ناحيته و شدت منه السيجارة و رمتها و داست عليها بالجذمة بتاعتها...
وجد(بحدة): انت ايه هتضيع مستقبلك يعني؟!
سعد(ببرود): افندم؟!
وجد(بحدة): انت ايه اللي بتعمله ده؟! انت مجنون؟
وجد كانت هتتكلم بس لقوا قصي بينادي علي سعد من فوق...
قصي(بصوت عالي): اتصل بالدكتور بسرعة.
وجد دخلت لجوا و هي بتجري لقت عطيات في وشها.
وجد(بقلق): ايه اللي حصل؟!
عطيات: في مصيبة.