قصص و روايات - قصص رومانسية :

رواية النور والكابوس للكاتبة سلسبيل كوبك الفصل الحادي والثلاثون

رواية النور والكابوس للكاتبة سلسبيل كوبك الفصل الحادي والثلاثون

رواية النور والكابوس للكاتبة سلسبيل كوبك الفصل الحادي والثلاثون

بعد مرور اسبوع...
باسل(بغضب): يعني ايه مش موجودة؟! بقالها 6 ايام مختفية انتوا اتجننتوا.
سليم: اهدي يا باسل اكيد هنلاقيها.
عدي: هي آخر مرة كانت في شقة في ال تبع قصي الصياد الساعة 12 بليل.
باسل(بغضب): ما انا عارف ده عايز جديد.
قاسم(بهمس): البت كانت جامدة.
علي(بحدة): قاسم ايه هتفضل قاعد كدة؟!
قاسم: اعمل ايه يعني انزل امشي في الشارع الف عليها مثلا. و كمان هي مش مهمة.

باسل(بغضب): لا مهمة مهمة جدا كمان. ومتنسوش ان اللواء كمال سابها لينا و كمان ازاي تتخطف يعني.
مسعد: ما هي ممكن تكون شكلت خطر بخطفها ده، ممكن يكونوا عرفوا انها هتعمل ل صالحنا.
باسل(بغضب): مش عايز اسمع كلمة من حد.
باسل سابهم و خرج بره اوضة الاجتماعات و خرج بره المقر كله ركب عربيته و ساق بكل غضب...

-في مكان تاني...
عند قصي.
ليلي: أكيد هتلاقوها يا قصي.
قصي(بعصبية): مش عارف يعني راحت فين.
ليلي: اهدي يا حبيبي معلش.
ليلي قامت وقفت حطت ايديها علي كتف قصي و قصي بصلها و عيونه دمعت و حضنها.
ليلي: اكيد هتظهر يا حبيبي.
ليلي باست رأس قصي و شدته لحضنها اكتر.
Flash back.
قصي و ليلي كانوا قاعدين مع بعض بيتكلموا الباب خبط.
ليلي(باستغراب): مين؟!
قصي: ممكن يبقي البواب يا حبيبتي خليكي.

قصي قام وقف و راح ناحية الباب فتحه اتصدم لما لقي وجد قدامه...
قصي(بفرحة و دموع): وجد.
قصي حضن وجد جامد و شالها و ليلي راحت ناحيتهم فرحت لما لقت وجد.
وجد: خلاص يا عم نزلني.
قصي(بفرحة و حزن): وحشتيني اوي انتي كنتي فين يا وجد حرام عليكي ليه عملتي فينا كدة؟!
وجد: ليلي.
وجد حضنت ليلي و ليلي حضنتها جامد.
قصي: تعالي خشي يا حبيبتي تعالي.
وجد و ليلي و قصي دخلوا و قعدوا في الصالة.
قصي: طمنيني عليكي.

وجد بصت ل ليلي و بصت ل قصي.
قصي: قومي يا ليلي اعملي حاجة نشربها.
ليلي: طيب.
ليلي قامت عملت عصير و حطته قدامهم و سابتهم و طلعت اوضتها هي و قصي.
قصي حط ايده علي كتف وجد علشان تتكلم خدت نفس عميق.
وجد(بابتسامة حزينة): بشوف في عيون كل واحد الشغف علشان احكي كنت فين او حصلي ايه.
وجد(بابتسامة حزينة): بص يا عم بقي.

وجد بدأت تحكي ايه اللي حصل معاها و كانت بتحكيها للمرة المليون في دماغها. كانت الاحداث بتتعرض قدامها كأنها فيلم.
وجد بصت ل قصي اللي حضنها بصمت و غمض عيونه بآلم.
قصي: آسف اني مكنتش جمبك.
وجد: و لا يهمك يا حبيبي. حصل خير الايام عدت بخير.
وجد: نادي ليلي عيب نسيبها ده كله فوق.
قصي: طيب.
قصي ساب وجد اللي خرجت للبلكونة خدت نفسها بعمق كانت مش قادرة تتنفس.

قصي طلع ل ليلي لقاها قاعدة بملل راح قعد جمبها و بدأ يعيط بصمت و هي خدته في حضنه.
ليلي: هي مشيت؟!
قصي(بعياط): لا.
ليلي: طب هنزلها عقبال ما تغسل وشك يا حبييبي.
ليلي سابت قصي و نزلت وقفت جمب وجد اللي ابتسمت ليها.
وجد(بابتسامة): مبسوطة معاه؟!
ليلي: الحمدلله.
وجد: لو بتحبيه خليه يعمل العملية.
ليلي: حاضر هحاول.
وجد: متخافيش هيوافق علشان بيحبك. اضغطي انتي بس عليه...
ليلي: حاضر.
قصي(بمرح): اميراتي بيتكلموا في ايه؟!

وجد: هنقتلك ازاي.
قصي: لا متقوليش و اختارتوا ايه؟!
ليلي(بضحك): هنعلقك في النجفة.
قصي: لا موتة شنيعة الصراحة. طب مفيش اختيارات؟!
وجد: هنعلقك في النجفة و لا هنعلقك في النجفة و لا هنعلقك في النجفة؟!
قصي: بسم الله الرحمن الرحيم الاجابة هي محمد رمضان.
التلاتة ضحكوا مع بعض و قعدوا يتكلموا في مواضيع متنوعة...
وجد: استأذن انا.
قصي: لا طبعا هتباتي معانا.

وجد: الايام جاية كتير. بس حاليا عايزة امشي اروح علشان لؤي بيضايق.
قصي: الواد مز.
وجد: متقلقش عرفت اختار.
ليلي: ربنا يجعله من نصيبك لو هو الخير.
وجد: حبيبتي. انا همشي بقي.
قصي: انا زعلان علفكرة.
وجد: ابقي خلي ليلي تصالحك يلا باي.
وجد سابتهم و خرجت بره الشقة و هي بتبتسم عليهم.
قصي: سمعتيها قالت ايه؟!
ليلي(بعدم فهم): قالت ايه؟!
قصي: خليها تصالحك.
ليلي: اه و انت بتقلع التي شيرت ليه؟!

قصي: علشان تصالحيني بتوسع كدة.
ليلي: تصبح علي خير.
ليلي في اقل من لحظة كانت جريت علي اوضتها و قفلت الباب و قصي جري وراها.
قصي: افتحي مفيش الكلام ده.
ليلي: نام علي الكنبة يا حبيبي.
عند وجد.
وجد خرجت بره عمارة قصي و راحت ناحية عربيتها فجأة لقت اللي بيحاول يخنقها بحبل وجد بدأت ترفص برجليها و تضرب علي العربية.
جه شخص من قدام حط منديل فيه مخدر علي وش وجد و وجد وقعت مغمي عليها بين ايديهم.

شخص1(بالروسية): يلا بينا.
الاتنين شالوا وجد و ركبوها عربية سوداء تانية و مشيوا بيها.
Back.
قصي: مين بس هيكون ليه ايد يعمل كدة؟!
ليلي: متقلقش يا حبيبي هنلاقيها ان شاء الله...
قصي: اسبوع الكل بيدور عليها و مش لايقنها يا ليلي.
ليلي: هترجع انا واثقة في ده...
قصي(بدموع): يا رب.

-في مكان تاني...
عند وجد.
وجد كانت مرمية في ارضية اوضة مش نضيفة و قامت مخضوضة و بتشهق لما حد رمي عليها ماية سقعة.
اندروا(بالروسية): ده عقاب اللي يعارضني.
وجد قامت قعدت بتعب و سندت علي الحيطة.
وجد(بتعب,بالانجليزية): قولتلك انا مش بعرف اتكلم روسي متحاولش. علشان كدة كل تهديداتك اللي بتقولها بالروسي مش بتهمني.
اندروا قرب من وجد شدها من شعرها جامد و هي صرخت غصب عنها و بصتله.

اندروا(بالانجليزية): تعرفي اني لغاية دلوقتي مش عايز اشوه وشك ده.
وجد(بتعب,بالانجليزية): التشويه مش تشويه الجسم بس,ف تشويه النفس اصعب بكتير.
اندروا(بالانجليزية,بعصبية): انتي مصنوعة من ايه؟! انتي ازاي كدة؟!
وجد(بلامبالاة,بالانجليزية): مريت بالاسوأ فمتفتكرش انك كدة بتعذبني بأساليبك البدائية.
اندروا رمي وجد علي الارض و رأسها اتخبطت في الارض و زادت من الجرح اللي كان في رأسها.

اندروا(بابتسامة خبيثة,بالروسية): عندك حق. خلينا نتسلي شوية.
اندروا(بصوت عالي,بالروسية): روك.
وجد بصت علي نفسها كان جسمها فيه كدمات بسيطة لكنها كانت بتتوجع حتى من منظرها.
روك دخل ببطء ناحية اندروا و بص علي وجد اتصدم لما لقاها.
روك(بتوتر,بالروسية): نعم.
اندروا(بالروسية): عايزين نستضيفها عندنا و نقدملها واجب الضيافة.
روك(بتوتر,بالروسية): يعني ايه؟!
اندروا(بالروسية): جيب اللي قولتلك تجهزه.

روك خرج بسرعة و بص حواليه لقي كل الحرس شايفينه غمض عينه بغضب و طلع كيس البودرة من ايده و وداه ل اندروا.
اندروا(بالانجليزية): عارفة ايه ده؟!
وجد افتكرت باسل و ابتسمت بسخرية.
وجد(بالانجليزية): متقلقش مجربة.
اندروا قرب من وجد و خلاها تتعاطي المخدرات و هي كانت فقدت كل طاقتها.
روك سابهم و خرج بسرعة بره البيت كله و طلع تليفونه اتصل ب باسل.
الخط اتفتح.
روك: باسل.
باسل(بتعب): عايز ايه يا ادم دلوقتي؟!
روك: وجد.

باسل(بلهفة): عرفت هي فين؟!
روك: ايوه.
باسل(بلهفة): قولي بسرعة فين مكانها؟!
روك: هنا يا باسل.
باسل(بصدمة): هنا فين؟!
روك: مكان ما اندروا موجود في المانيا.
باسل قعد علي الكرسي اللي كان موجود بصدمة.
روك: هجيبهالك الميناء بس باسل بسرعة انا مكنتش اعرف. بس كل اللي اعرفه ان وجد منهارة.
باسل قفل مع ادم و خرج بره مكتبه.
باسل: قاسم جهزهلي الطيارة الخاصة بالطوارئ.
قاسم: طيب.
سليم: هتروح فين؟!
باسل: لقيتها.
سليم: فين؟!

باسل: بعدين بس بعد ما اطمن عليها.
سليم: طيب.
قاسم: ساعة الا ربع و تكون جاهزة.
باسل: طيب هروح اغير هدومي بسرعة.
باسل سابهم و مشي,علي قرب من سليم.
علي: شوفته كدة قبل كدة؟!
سليم(بتنهيدة): الحب يا علي الحب.
علي(بابتسامة باهتة): واضح ان كل واحد بيتعذب في الحب بس تختلف الطريقة...
سليم: عندك حق.
عند ادم...
ادم دخل البيت تاني و قرب من اندروا.
ادم(بالروسية): في موضوع مهم جدا ميشيل عايزك فيه...

اندروا(بالروسية): طيب هروح...
اندروا قام و قرب من وجد اللي منكمشة علي نفسها بتحارب جسمها من انه يرجع يضعف تاني.
اندروا هزها برجله بس هي متحركتش ساباها و مشي هو و رجالته.
ادم قرب من وجد و نزل ل مستواها.
ادم: مدام وجد.
وجد بصتله بأمل و رفعت رأسها ناحيته.
ادم: انا من طرف مصر قومي معايا.
وجد(بضعف): انا مش في مصر؟!
ادم: لا. قومي معايا يلا.

وجد قامت بضعف و هي بتسند علي ادم و خرجت بره البيت بصت بضعف حواليها و بصت علي ادم.
وجد(بضعف): شكرا...
ادم: معملتش غير واجبي اتجاه صاحبي و اتجاهك و كمان انا مكنتش اعرف حاجة عنك لاني كنت بجمع معلومات فبعتذرلك.
وجد: قصدك مين بصاحبك؟!
ادم: باسل قلب الدنيا دي كلها علشان يلاقيكي.
وجد بعدت عن ادم بمسافة بسيطة و مشيت معاه و هي حاسة بصداع كبير في دماغها.
وجد: هنروح فين؟!
ادم: الميناء هيستلموكي.

وجد: شكرا ليك مرة تانية.
ادم فتح باب العربية و وجد ركبت و هو لف ركب و راح ناحية الميناء منتظر وجود باسل.
ادم: هنزل اجيب حاجة دافية نشربها.
وجد: طيب.
ادم نزل علشان يشتري حاجة ل وجد و ليه,وجد رجعت رأسها بتعب و خمول شديد و غمضت عينيها.
بعد كام ساعة...
لقت اللي بيخبط علي ازاز العربية وجد قامت مخضوضة.
ادم: وصلوا.
وجد فتحت باب العربية بضعف و نزلت منها و لقت طيارة لسة هتقف,ادم مسكها و قرب من الطيارة.

باب الطيارة اتفتح و نزل منها باسل بلهفة و خرج.
باسل(بلهفة): وجد.
باسل حاوط وش وجد بين ايديه و باس رأسها.
باسل: انتي كويسة؟!
وجد كل احداث باسل و اندروا اتجمعوا في دماغها و بصت ل باسل بنظرة وجعته اوي كانت بتحمل معني الخذلان و وقعت بين ايدين باسل مستسلمة لظلامها.
باسل(بقلق): وجد وجد.
ادم: ده هيحصل لان اندروا.
باسل(بحدة): اتكلم عمل ايه؟!
ادم: وداها مخدرات.

باسل بص ل وجد و فهم معني نظرتها ليه و شالها و ركب الطيارة.
باسل: خلاص روح انت.
باسل دخل حط وجد علي الكرسي و ربط ليها حزام الامان و قعد جمبها.
باسل(ببرود): يلا.
بعد فترة الطيارة نزلت في ارض مصر و باسل كان طول الطريق ماسك ايد وجد و بيبص ليها.
باسل(بضعف): حقك عليا آسف.
الكابتن: باسل بيه منتظرين حضرتك تنزل.
باسل قام وقف و شال وجد و نزل بيها و دخل العربية نيمها في الكرسي اللي ورا.
باسل: اخرج انا هسوق.

-باسل قعد مكان السواق و بدأ يسوق العربية ناحية بيته و نزل بهدوء من العربية و شال وجد و دخل بيته طلع علي اوضته حطها علي السرير بهدوء شديد و بدأ يغير هدوم وجد ليها.
وجد لبست بنطلون اسود و فوقه تي شيرت بكم باللون الكحلي قصير لغاية الخصر.

باسل نزل ل تحت فتح دولاب صغير متعلق في المطبخ و طلع منه حقنة مضادة و طلع ليها بدأ يغرزها في ايديها و وجد بانت علي ملامحها الالم,باسل رمي الحقنة في سلة الزبالة و باس رأسها و سابها و نزل ل تحت.

-في مكان تاني...
عند سيف.
سيف كان قاعد في مكتبه لقي اللي بيفتح الباب من غير ما يخبط و داخل بغضب شديد.
سيف(بصدمة): في ايه يا لؤي؟! انت ازاي جيت؟!
لؤي(بغضب): هي الهانم مش هنا؟!
سيف(بصدمة): مين قصدك؟!
لؤي(بغضب): وجد هيكون مين اللي مختفية لاكتر من اسبوع اللي مش بترد علي اتصالاتي اللي بتتهرب مني.
سيف(بصدمة): وجد مش موجودة؟! ازاي؟!
لؤي(بغضب): معرفش هتجنني و انت مكنتش بترد علي اتصالاتي فجيت لهنا.

سيف(بغضب): يعني انت جاي تدور علي وجد هنا ما هي لو كانت هنا كنت قولتلك. انت ازاي تسبها؟!
لؤي(بغضب): ما هي اللي مش بتقولي هي راحت فين و لا جاية منين و لا بتعبرني اصلا بتعتبرني وسيلة علشان تغيظ بيها جوزها السابق.
لؤي(بغضب): لدرجة انها جابته المطعم اللي بتغدي فيه علشان يشوفني و يتغاظ. انت متخيل؟!
سيف: وجد مش بالعقلية دي و لو كانت عايزة تعمل كدة كانت قالتلتك من غير ما تتخطبلك.

لؤي(بانفعال): اومال افسر تصرفاتها ازاي؟!
سيف: دلوقتي مش مهم المهم نعرف فين وجد و لو عرفت ان انت اللي مزعلها صدقني هتندم.
سيف: جهز الطيارة هرجع مصر و ظبط الشغل هنا عقبال ما اروح البيت و اجي.
سيف نزل ركب عربيته و كان لؤي في قمة غضبه,سيف رجع بيته و طلع جهز شنطته و غير هدومه و رجع علي الشركة لقي لؤي واقف منتظره.
سيف: لؤي صدقني وجد مش كدة وجد صريحة.

لؤي(بانفعال): يا سيف بيه دي لغاية ما وصلنا مصر مع بعض و لا مرة جت الشغل و اصحي من النوم انزل اسأل عليها يقولي خرجت. و مش بتتكلم معايا و في الاخر ترجع بتقولي ده سر مش هينفع اقولك هي دي عيشة.
سيف(بتنهيدة): مش لما نلاقيها الاول انت حجزت؟!
لؤي: ايوه.
سيف: طيب يلا بينا.

-في مكان تاني...
في قصر الصياد.
القصر مبقاش فيه غير ماجدة و يوسف و نهلة منصف.
نهلة: ايه هتفضلي كدة مش عارفة بنتك فين يا ماجدة؟!
ماجدة: ملكيش دعوة ب بنتي و خليكي في بنتك.
نهلة: علي الاقل بنتي عارفة هي فين الدور و الباقي عليكي.
رانيا(بهمس): هما هيفضلوا كدة كتير؟!
عطيات(بهمس): انا قرفت و عايزة امشي.
رانيا(بهمس): نعمل ايه بس؟!
نهلة(بزعيق): احترمي نفسك يا ماجدة انا ساكتالك من بدري.

ماجدة: انا محترمة غصب عنك و انتي و انتي بتتكلمي معايا تتكلمي بهدوء فاهمة؟!
نهلة(بزعيق): لا مش فاهمة انتي اصلا ام من امتي و انتي كنتي ام ل بنتك؟!
ماجدة(بسخرية): و انتي لما كنتي ام بنتك عملت ايه؟!
نهلة(بزعيق): لا انتي فعلا قاصدة تعصبيني؟!
ماجدة(بسخرية): انتي اللي بدأتي مترجعيش تقولي انتي السبب.
نهلة بصت ل ماجدة بغضب و سابتها و طلعت اوضتها.
ماجدة: يلا جتك القرف عقبال ما تغوري انتي و جوزك من هنا.

يوسف: مساء الخير.
ماجدة: مساء النور.
يوسف: مالك يا حبيبتي؟!
ماجدة: قال الهانم بتعايرني علشان مش عارفين وجد فين.
يوسف: ما انا بعت ناس تدور عليها متشغليش بالك انتي هخلي منصف يتكلم معاها.
يوسف: بس قوليلي مالك حلوة كدة ليه النهاردة؟!
ماجدة: انا علطول حلوة اصلا.
يوسف: طب ما انا عارف، تعالي عايزك في كلمة.
ماجدة: امممم طيب.

يوسف خد ماجدة و طلعوا اوضتهم,بعد فترة جه منصف البيت ملقاش فيه حد دخل اوضة المكتب بتاعته و هو مش طايق نفسه.
عند رانيا...
رانيا اتخنقت فخرجت بره القصر و اتمشت في الجنينة جمب الورد و نزلت ل مستوي وردة و شمتها.
سعد(بحدة): بتعملي ايه هنا؟!
رانيا(بخضة): يا ماما!
رانيا: في ايه حد يعمل اللي انت عملته ده؟!
سعد(ببرود): بتعملي ايه؟!
رانيا(برفعة حاجب): و انت مالك؟!
سعد(ببرود): لا ده انتي لسانك فالت منك.

رانيا: انت لسة شوفت حاجة. كلمة كمان منك و ارفع عليك شبشبي.
سعد بص ل رانيا بعمق و هي اتوترت من نظرته و سابته و مشيت بس سعد مسك ايديها و رجعها مكانها...
سعد: خليكي.
سعد ساب رانيا و مشي و رانيا استغربت تصرفه و كملت مشي في الجنينة هديت و رجعت تاني ل مكانها.

-في مكان تاني...
عند ثريا.
ثريا كانت بتطبق الهدوم اللي هي اتعلمت غسيلهم لقت علي واقف قدام الباب و ساند عليه بضهره و بيبص ليها.
علي: لحد امتي؟!
ثريا: لحد ما تنسي. و لو نسيت انا مش هقدر انسي و لا هقدر اكمل.
علي(بانفعال): ما انتي لازم تنسي دي حاجة الواحد ميحبش يفتكرها. انتي مستكترة علي نفسك انك تفرحي و تنسي.

ثريا: انت قولت قبل كدة انا خونت ثقة اهلي ايه اللي يطمنك انك مش لما تمشي هنا هعمل الغلط نفسه و اعيده، و كمان الشك هيبقي دايما موجود.
علي قرب من ثريا و شدها ناحيته بغضب...
علي: مش هسمحلك مش هسمحلك تعملي الغلط مش هسمحلك تكرريه...
ثريا: يبقي سبني في حالي و انا همشي و ننفصل بهدوء.
علي(بتحدي): يعني ده اخر قرار عندك الطلاق؟
ثريا: اه.
علي(بتحدي): طيب و انا هطلقك بشرط.
ثريا: ايه هو؟!

علي(بتحدي): تلاقي ليا عروسة مناسبة.
ثريا(بصدمة): ايه؟!
ثريا: عايزني الاقيلك عروسة تتجوزها!
علي(بسخرية): اومال هلعب بيها؟!
ثريا: لا مش موافقة اتجوز براحتك لما نتطلق.
علي(بتحدي): يبقي مفيش طلاق ها اختاري.
ثريا(بنفاذ صبر): علي.
علي: براحتك يبقي خليكي كدة علي ذمتي تتعذبي...
ثريا(بضيق): موافقة. بس انا اصلا مش بخرج علشان اشوف حد.
علي: لا ليكي حرية الخروج بس بشرط بأذني و اياكي تكدبي اياكي يا ثريا هتندمي.

ثريا: طيب. ابعد عني بقي.
علي(لنفسه): هنشوف هتستمري في الكدب لغاية امتي يا ثريا؟!
علي ساب ثريا و طلع لاوضته و ثريا قفلت الباب وراه بغضب.
ثريا(بغضب): بقي عايزني انا اختارلك العروسة طيب يا علي الكلب.

-في مكان تاني...
عند نرمين و سليم.
سليم: نرمين.
نرمين: نعم.
سليم: انا قررت اخطب.
نرمين(بابتسامة): بجد الف مبروك.
سليم: هخطب بعد ما نخلص المهمة انا و باسل هخطب بنت اللواء كمال.
نرمين(بابتسامة): مبروك فرحتلك. و فرحانة انك قولت ليا.
سليم: طيب بس متقوليش لحد حتى باسل او ماما.
نرمين: اكيد مبروك يا حبيبي فرحتلك.
نرمين: همشي انا كنت هقابل كارما النهاردة، يلا باي.

نرمين مسكت شنطتها و خرجت بره اوضة المكتب بسرعة و هي حاسة بوجع شديد في جسمها و خرجت بره الشركة كلها.
نرمين مشيت ناحية الجراچ و هي حاطة ايديها علي قلبها و بتعيط...
نرمين(بضعف و عياط): ليه؟!
نرمين قعدت في الارض جمب العربية بتاعتها و هي بتكتم عياطها و شهقاتها العالية.
نرمين(بعياط): يا رب.
نرمين قعدت تعيط كتير لغاية ما استنفذت كل طاقتها في العياط و وقعت مغمي عليها جمب العربية...

-في مكان تاني...
في قصر الانصاري.
جودي(بصوت عالي): يا اهل البيت باركولي.
اسيل: خير سقطتي؟!
جودي: جيد جدا طبعا...
طارق: مبروك. بقولك يا اسيل كنت عايز اخد رأيك في كام حاجة.
اسيل: طيب.
طارق: تعالي.
اسيل: مبروك يا روحي هجيلك كمان شوية.
رضوان: قطتي عملت ايه؟!
جودي(بدموع): دول مهتموش.
رضوان: معلش يا قطتي هتلاقيهم منشغلين.
جودي(بدموع): مش مهم.
سهر: جودي يا حتة سكرة انتي بقولك ايه؟!
جودي: ايه؟!
سهر: خدي.

جودي: ايه دي؟!
سهر: وردة رقيقة زيك يا قمر.
جودي خجلت و حضنت رضوان اللي ضحك بصوت عالي و سهر اتصدمت من تصرف جودي.
اسيل: في ايه؟!
طارق: ايه الضحك ده كله؟!
سهر(بصدمة): بوديها وردة و بقولها وردة رقيقة زيك اتكسفت و حضنت رضوان.
طارق: و هي من المفترض تحضنك انتي و لا رضوان؟!
رضوان: ملكش دعوة...
طارق: انا مالي فعلا.
اسيل: جودي كدة متعرفيش ليه.
جودي(بخجل): علشان انا رقيقة و جميلة صح يا رضوان؟!

رضوان: صح يا قلب رضوان...
سهر: يالهوي طلع عندها دم و بتتكسف زينا.
شريهان: هاي.
اسيل: ازيك يا شريهان؟!
شريهان: عايزة اكيد مصلحة.
اسيل بصت ل شريهان بصدمة و طارق بص ل شريهان بغضب.
طارق(بحدة): انتي اصلا تملكي اللي هي تملكه؟!
جودي(بغضب): ما تحترمي نفسك يا بت ده انتي عايزة يتعلم عليكي بقي علشان تلزمي حدودك...
جودي قربت من شريهان ضربتها قلم جامد.
عصمت(بغضب): جودي.

جودي اتخضت و بصت ل عصمت و حطت عينيها في الارض فورا...
نعمة(بحدة): ينفع كدة يا جودي؟!
جودي: آسفة يا عمتو. آسفة يا عصمت هانم.
عصمت(ببرود): علي الاوضة.
جودي كانت طالعة اوضتها بس عصمت نادتها.
عصمت(ببرود): علي الاوضة اللي تحت.
جودي اتفزعت و استخبت ورا رضوان.
جودي(بعياط): انا آسفة. مش هتتكر تاني بس و النبي بلاش الاوضة دي دي ضلمة و مخيفة.
رضوان: عصمت هانم انا شايف انه ملهوش داعي شريهان غلطت و كذلك جودي و خلاص.

عصمت: كلمة كمان و هتحصلها.
رضوان: ممكن اقعد انا في الاوضة بدالها؟
عصمت(ببرود): لا. هتسمعي الكلام يا جودي و لا؟
جودي مشيت و هي بتعيط جامد ناحية سلم بينزل ل تحت و فتحت باب الاوضة لقتها ضلمة و خافت تدخل بس لقت عصمت وراها دخلت بضعف و هي بتعيط جامد.
اسيل(بدموع): عصمت هانم كدة حرام عليكي حطيني انا مكانها.
عصمت قفلت علي جودي و سابتهم و مشي.

عصمت(ببرود): كلمة كمان و كلكم هتبقوا معاها. كله علي مكانه مش عايزة اشوف حد هنا فاهمين...
عصمت سابتهم و طلعت اوضتها و وراها نعمة تحاول تقنعها,طارق سابهم و مشي.
سهر: هي ازاي كدة حرام؟!
شريهان بصتلهم بشماتة و سابتهم و طلعت اوضتها.
رضوان: اخرسي يا سهر مش عايزينك تبقي معاها اهدي.
اسيل: ماما لو عرفت هتزعق و ممكن عصمت هانم تعملها حاجة...
رضوان: هتصل ب باسل.
رضوان اتصل كذا مرة ب باسل بس التليفون مغلق.

رضوان(بضيق): طب هنعمل ايه؟!
اسيل(بعياط): جودي.
سهر(بضيق): هي ازاي جبارة كدة؟! ربنا يهديها.

-في مكان تاني...
عند كارما.
كارما كانت خارجة من البيت و ركبت عربيتها و راحت المول تشتري هدية ل وجد علشان تسامحها و دخلت المول و خرجت و هي مبسوطة بالهدية و لسة بتتحرك لقت اللي ضربها علي رأسها بحاجة حديدة وقعت في الارض حواليها دم.

الفصل التالي
جميع الفصول
روايات الكاتب
روايات مشابهة