رواية العشق وقليل منه يكفي للكاتبة نور إسماعيل الفصل السابع والعشرون

رواية العشق وقليل منه يكفي للكاتبة نور إسماعيل الفصل السابع والعشرون

ستااااااند بااااااى، أكشن!
كان يدور المشهد الذي يقوم بتمثيله الممثلون القائمون على الفيلم الذي يعمل عيسي على إخراجه، الساعه تلو الأخرى. المشهد والآخر
تغيير المكان، تغييير الزاوية
ينهض عيسي يشرح وجهة نظره، يعود يجلس على مقعده المخصص له ممسك بمكبر الصوت
يقطع تصوير اللقطه في وقت معين، يعيد الرؤية والكلام والسيناريو
يلوح بيده على ضوء الشمس، يظهر منه وجه آخر حينما تتعثر رؤية مشهد مماثل لما في خياله.

يغضب، يعلو صوته. يضحك حينما يتتعتع احد الممثلين في حفظ مشهده، يصفق حينما يعملون كما أراد على أكمل وجه، هذا هو عيسي العشماوى!
كااااااات، كفاية كدا انهاردة انا فرهدت وانتو
قالها عيسي، ف أجاب احد ممثلين العمل
بكرة خارجى يا عيسوى
اه، فيه استعدادات تانية تمام
ذهب الجميع الى حيث مقصده، يقوم فريق الاعداد بجمع المُعدات والكاميرات والخلفيات.

بينما عيسي مُنهمك في جمع اشياءه ويهم بالرحيل مُتجهاً إلى سيارته ف وجدها تقف أمامه!
وحشتنى!
نظر عيسي مالياً إليها، نورهان، حبيبة قلبه الوحيدة
أو بالأحرى. بذكاء استطاعت ان تكون وحيدة قلبه والأولى والأخيرة
حتى وان كان بينهم البُعدا زاد أميالاً، فما زادهم إلا الشوق حقاً!
نورهان. خير فيه جديد جاية عشانه، فيه اتهام فيه مصيبة حاصله وانا السبب فيها.

اقتربت نورهان تعاتب نفسها بداخلها وتقوم بعض شفتيها ندماً، ووقفت أمامه
عيسي، انا عرفت بغلطتى وجاية مش عاوزة اخسرك
انتِ خسرتينى فعلا يانور
إمتى كُنت قاسي كدا ياعيسي
من ساعة ما وجعتينى
كان غصب عنى
وغصب عنى أنا كمان
هم ليدلف داخل سيارته ف أوقفته وقالت
مانا رجعتلك وسامحتك حتى بعد م اتجسست عليا وعرفت سرّى الل كنت مخبياه
مع ان دا مش من حقك وميخلنيش اسامحك وافقد الثقه فيك.

بس اديتك عُذرك ب أنك عاوز تعرف مالى لأنى سكتت كتير
على صمته ينظر لها عيسي ف اكملت نورهان بجدية مدافعه عن قلبها وعن نفسها في حضرته
وخلاص انت عرفت، وعرفت بجد انك حبتنى بجد ومشكتش فيّا ولا ف اخلاقى زيّه ولا بعدت وظنيت فيّا السوء زى فارس، فضلت جمبي وكملت وكنت مستنى احكى واقول
طب اقول ايه يا عيسي، اقول انى مش بنت بنوت بسبب الحادثة!

انى فقدت عذريتى لما اتكسر الحوض وان المستشفى اتلهت ف والدى وموته ومطلعوش تقرير بأنى كنت عذراء وان انفضت عُذريتى بفعل الكسر!
اقولك ان عشان مفيش دليل وكنت خلاص قربت على فرحى، علاء شكّ انى كنت على علاقه وحشه بحد وهو الل خلانى مش بنت! لمجرد انى كنت بسمحله بتجاوزات معايا لأنى كنت بحبه ومعميه
وفاكراه بيحبنى وبيخاف عليا وعمره م هيشوفنى بنت وحشه، لكن هو اول واحد كسرنى وطفانى.

وحطّم فيّا وبعنى بالرخيص أوى، طبعاً هو قالك كُل دا زائد شوية تاتشات من عنده لأنه بيحب الساسبنس
كُنت عاوزنى اقولك انت كمان جرحى؟! م انت راجل زيهم ياعيسي وراجل فلااح يعنى بتوع اصول وعادات وتقاليد ومش هتصدقنى طالما ممعيش دليل
اقترب عيسي منها ومسح على جانب إحدى وجنتيها ب رفق حنون ونظر لكلتا مُقلتيها وأردف
ودا تانى نصبايه نصبتها عليكِ يانور غير السر بتاعى، أنا مكنتش اعرف حاجه عنك.

ولا قابلت علاء ولا اعرف شكله ولا هكرت فونك وتقدرى تتأكدى من دا
انا بس كُنت عاوزك تطمنى ان مهما كان سرك، انا مش زيّهم. وهفضل جمبك
وبحبك
فغر فاه نورهان مُتفاجئه واتسعت حدقتيها ف ضحك عيسي وقال
وانتِ مشكورة اندلقتِ زى الجردل دلوقت وقولتِ كل الل كنت معرفوش عنك
عيسى، عيسي ازاى
وضع اصابعه فوق شفتيها
شششش، عيسي بيحبك ومستحيل يخذلك او يزود ازمه الثقه عندك ب أنه يهكر فونك او يتجسس عليكِ.

او حتى يسأل واحد مريض زى علاء عن نور حبيبته!
انتِ مُتخلفه يابنتى؟!
اغرورقت عيناها بالدموع وسقطت على وجنتيها ف هم بمسحهم واردف لها
بتعيطِ ليه طيب
نظرت لأسفل تبلل شفتيها وقالت بصوت متهدج خائف
انت طيب بعد ماعرفت منى وو
كأنى معرفتش، انا بحبك يانور، فاهمه؟!
بحبك زى م انتِ كدا، مش حادثه ومشكلة هتغير رأى قلبي فالل سكناه
مش شكّ مريض وكلام وفعل متخلف هيخلونى معرفش نور الل حبتها من جواها إيه.

يعنى لما اعترفت ان كان فيه تجاوزات مع علاء وهو خطيبي وأن.
ايوة غلط، بس مش هلومك لأن واضح انك اتعلمتِ من غلطك بدليل علاقتك بفارس وبيا بعده
محدش منه سمحتيله يلمس ايدك حتى!
نظرت له بتمعن وعيناها تتلألأ حُباً له
أنا والله كنت صُغيره اما حصل كدا مع علاء، ووالله م حد لمسنى وفعلا فقدت عُذريتى فالحادثه
والغبية روان قالت لبعض صحباتها على مشكلتى وقالت لفارس
اهى مودموزيل زحلوقه دى كارثه متنقلة بكل المقاييس.

اسكت مش عرفنا مين سربلها الفيديو
قالتها نورهان ببراءه طفله ف أجابها عيسي
لا والنبي
واحدة من صحاب السوء والشلة بتاعتها الل هي فاكرة انهم بيحبوها، كان بيبعت فارس فيديوهاتها ليها
وكان مصاحب كذا بنت غيرها وهو خاطبها
ايه دا يعنى مطلعتش انا، اخص عليا
قامت نورهان بطرقه في صدره بمعاتبه واردفت
مسامحنى؟!
مسامحك من قبل ماتيجى أصلا، مانا برضو مش إمام جامع
انا قتلت ناس وكنت صغير ومش فاهم، بس اسمه ذنب.

وانتِ ملكيش حق تحاسبينى عالل فات فحياتى من قبلك
زى مانا ماليش حق احاسبك، خصوصا انى عارفك كويس
ابتسمت نورهان وقالت بعينان توحى غراماً
يعنى خلاص، صفحه جديده ونبدء
على بركه الله
تنهد وأردف
معرفش عاملالى عمل وللا ايه يابنت اللذينا
ضحكت نورهان فقام بتقبيل رأسها اثر وقوفهم بالشارع، ف تلفتت نورهان حولها وأردفت خجلة
احنا فالشارع ياعيسي
طب بقولك ايه، اظن كدا بقا مش فاضل اى حاجه تانى
انا عاوز اجى اخطبك، هاه!

ألو، روان عبدالحافظ
كانت تنهض روان إثر غفوتها العميقه واردفت
ايوة
احنا قناة، فريق اعداد برنامج نهاية الليل، حضرتك عندك استعداد للقاء تليفزيونى مع المذيعه..
آخر الاسبوع؟!
اعتدلت روان وانتبهت واردفت بخوف
هو اللقاء دا بخصوص ايه
بخصوص آخر لايف ليكِ على مواقع السوشيال ميديا وكمان البلبله الل حصلت قبلها
بس انا.

استاذة روان، اعتقد بنت فشجاعتك تقدر تطلع تحكى تجربتها لكل بنت تتعلم منها ويكون لنا السبق فاللقاء بيكِ ف إيه رأيك؟
صمتت روان تُفكر، فقاطع المتحدث من فريق اعداد البرنامج
فُرصه كويسة لبنت زيك شجاعه، وفرصه لينا نوعى بنات كتير من جيلك بتجربتك
قامت روان بترجيع خصلات شعرها المبعثرة للخلف تفكر، ومن ثم اردفت
هفكر وأرد ف اقرب وقت
كلمات لطيفة في وقت عشوائي،
إبتسامة في طريق مُزدحم،.

دعوة في ظهر الغيب، كلها أشياء لاتكلف شيئًا، لكنها تخلق سعادة عظيمة
في القلب.!
الف مليووووون مبروك يا نوشا، ايوة بقا دى الأخبار الل تفرح
قالتها احدى زميلات نشوان بالعمل اثناء تناولها لقطعة الشيكولاته التي تقوم نشوان بتوزيعها عليهم بمناسبة خِطبة زين السُلطان مدير الشركه لها، ف ردالاخر وفمه مملوء بالشيكولاته.

عفارم يا مدام نشوان، اهى دى الجوازات حضرتك كسبتِ راجل سُكره وحسب ونسب ووسامه زى م قال الكتاب. وهو كسب جوهرة ادب واخلاق ربنا يهنيكم
تبسمت نشوان وأردفت بخجلها المُعتاد
الله يبارك فيك يا مستر حاتم
ايه عفارم دى يا حاتم هو احنا ايام المماليك
قالها احدهم ساخراً ف هم الزميل بالرد حتى ولج زين مبتسماً يردف الى نشوان
نشوان تعالى عالمكتب عاوزك
الف مبروك يا ريس
نشوان وزعت شيكولاته، حلاوتنا منك ايه بقااا.

قالتها احداهن، فابتسم زين واردف بوجهه البشوش
ياسلام هقول للحسابات ان كُل حد منكم له يومين
مكافأة يا فندم؟
لاء خصم طبعا
ضحك الجميع ف خرجت نشوان تتبعه إلى مكتبه حتى ولجت واغلقت الباب خلفها
ايوة يافندم
التفت زين إليها متعجباً وعقد ذراعيه قائلا
فندم! تانى برضو
وجهها بدا عليه اثار رد فعل طفولى وقالت
مش حضرتك قايلى فندم دى فالشركه
نشوان يا حبيبتي احنا اتخطبنا وبنحضر لجوازنا، حافظه مش فاهمه، اغنيهالك.

ضحكت نشوان بخفوت وخبأت فمها بيدها ف قال لها هو
يومين كدا وهننزل سوا نشوف الشُقق زى م اتفقت مع جوز عمتك
خلاص ماشى بس مش هننزل وحدنا طبعا
رفع زين احد حاجبيه وقال
حتى بعد الخطوبة
ايوة طبعا، انت لسه اجنبي عنى
طيب ياستى انا اصلا كنت عامل حسابي. مش هنخرج وحدنا
عيسي جاى معايا
وانا هقول لحد من البنات برضو ييجى
بنات مين؟
بنات السكن الل انا فيه.

لاء وفرى على نفسك تقولى لحد، انتِ من غير ماتقولى اصلا واحدة منهم جاية ومش انتِ الل هتقوليلها
تعجبت نشوان وبدأات تشعر بالغيرة فقالت بنبرة غيرة انثوية باحته
مين بقا الل جاية معانا من غير م انا اقولها، وانت تعرف بنات سكنى منين؟
ابتسم زين ونظر ب عمق لعيناها
دى غيرة!
شعرت نشوان بالتوتر وقالت متلعثمه تبتعد بعيناها عن عيناه
لاء غيرة ايه انا بسأل بس
لاء غيره، بتغيرى يا نشوان
احمرت وجنتيها وأردفت.

قولى بقا متغيرش الموضوع
ابتسم زين وأردف لها
طيب ياستى عشان قربتِ تبقى قوطاية صغننه خالص، نورهان.
انت الل هتقولها يعنى
قالتها بتعجب ف اردف زين
لاء انا ماليش دعوة، هي جاية مع عيسي
دنى من أذنها بهدوء من فوق الوشاح وهمس بصوت دغدغ احاسيسها
اصلهم غارو مننا. وهيتخطبوا، وانا رايح معاه اخطبهاله
حاولت نشوان تمالك اعصابها ونظرت له مبتسمه وقالت
بجد! انا معرفش الموضوع دا. يعنى نور تعرف عيسي
ضحك زين واردف ساخراً يداعبها.

تعرفه! لاء هما الاتنين ف ملحمه عشق بقالهم فتره زى حالاتنا كدا بس نور كانت بتدى ريق حلو يحلى عليه يومه. انما ناس تانية كانت ع طول دبش على طول لو سمحت على طول تقع والاسعاف بقت راكنه تحت
عبس وجه نشوان ف اكمل زين
بس بحبهم برضو طبعا
كتفت نشوان ذراعيها أمام صدرها واردفت له
قصدك يعنى انى كنت غلط
اقترب اكثر فباعدت هي بخطوات عنه واردف بصوته الحنون
انتِ على طول صح
توترت نشوان وهمت بالرحيل.

طيب انا همشى وأبقا شوف امتى الميعاد المناسب عشان ننزل مع نورهان وعيسي
فى دقيقة اختفت من أمام عيناه اما عنه فهو يعرفها ويحفظها عن ظهر قلب، يعلم ان بكلمه منه يصنع لها الف عالم من الاحلام الجميلة. وب ابتسامه منها تَشع ب دنياه في كل مرة شمس يوم جديد، ف إعتاد دوماً أن من الممُكن ان تشرق كلمة مِنك في قلب أحدهم كما تشرق الشمس بعد الليل، لا تبخل! ,.

من الطبيعي أن تضعف وتلين وتقسى وتتغيَّر، لا مشكلة في عدم التزامك بحال أو فكر او شعور أو مبدأ، أن تغيرك ليس بخطأ، لو أرادك الله ثابتًا طوال حياتك لخلقك حجرًا او من حجر.
كورواسون وشاااى لزوم الفطار. رحلتك الساعه كام؟!
نظرت هدير إلى زميلتها وقالت بفتور
يعنى اقل من ساعه
طالعه مع كابتن مين
سعيد وهبه
هزت زميلتها رأسها متفهمه وقدمت وجبه الافطار أمامها بينما هدير في شرود تام
ف سألتها زميلتها.

حد عارف فالشركه هنا انك اتطلقتِ من صالح؟!
ظلت هدير على تجهمها ف ربتت زميلتها على كتفها وقالت
هدير اتأكدى ان اى حاجة بتحصل لنا بتكون خير، عارفه انك زعلانه. كنت بحس انكم حبيتوا بعض بجد
بس، قدر الله وماشاء فعل، وبعدين واضح ان صالح مش بتاع مسؤولية
فى شرودها اردفت هدير بنبرة تحمل كُل معانى الآسي
انا كُنت بحاول وقعدت أحاول وأحاول، كأنى بزق فحيييط كأنى بحاول احرّك صخر من مكانه.

وهو جماد زى ماهو، اتنازلت وعملت الل لايمكن بنت تعمله
وهو حتى برغم انه حَبنى مش عاوز يضحى، مش عاوز يتنازل
كانت تسمعها زميلتها حتى تُفرغ كُل شعور بداخلها وتستريح من عناءها هذا
دنت منها وقالت في همس
إتأكدتِ أن كُنتِ حامل او لاء؟!
ابتسمت هدير بسخرية وأردفت
ايه الل هيفرق يعنى؟!
لو حامل، ممكن حاجه تخليه يرجع ويتصلح الل بينكم
نظرت هدير الى زميلتها بحزن وقالت بعد تنهيدة طويلة.

تفتكرى يعنى ابنى او بنتى هو الل هيخلى صالح يتعدل؟ ماهو مخلف من واحدة قبل منى
وسابها وكمل ف طيشه وحياته عادى
زفرت زميلتها ب حزن، نظرت هدير الى ساعة اليد خاصتها وهمت بالنهوض للاستعداد ل رحلتها
ف ترجلت حتى رأت صالح من بعيد، تصنعت عدم الاهتمام وضحكت بصوت عالِ وهي تلوح لأحد زملائهم خلف الزجاج وتقول بصوتها الجهور
ازيك يا راامى، هحاول اجيبلك جيفت معايا من الرحلة دى ولو أنك ماتستاهلش.

انصرفت ب كعبها الرنان في أرضيه المطار وخطواتها الواثقه المكابرة وهو خلفها ينظر لها حَسره دون ان تلتفت له.
لطيفه هانم لطفى، وروان وفكرى زوج لطيفه. ونورهان!
فى استقبال عيسي و ووالده واحدى شقيقاته الفتيات وزين.
منورة يا طنط
قالها عيسي الى لطيفه ف ضحكت ضحكه رقيعه فنظر عيسي الى زين وهمس ب أذنه
هى الست دى مفيش حد يلمها؟ اومال عمو زهرى دى ايه كيس مارشميلو؟!
نظر زين إلى الجالسين وهمس ب إذن عيسي.

شكلك وحش بطل همز ولمز، خلى والدك يقول الكلمتين عشان نلحق نروح
انا مش عارف ابويا ساكت ليه، شكله نام اصله منامش فالسكه
نظر عيسي لوالده واردف
بابا، باابااه. صحصح وقول الل حفظتهولك طول الطريق
ضحك الجميع بخفوت فلكز والد عيسي ابنه عيسي بقدمه واردف
ياست ام الدكتورة نورهان احنا يسعدنا ويشرفنا وبصراحه مش هنلاقى احسن ولا افضل ولا خُلق وادب وجمال
خلص يابابا الناس بدأو ينامو
اصبر ياعيسي.

قالتها شقيقة عيسي، ف اكمل والد عيسي
احنا طالبين القرب فالدكتورة ربّة الصون والعفاف الادب والاخلاق والجمال واللباقه والشياكه
والفن والهندسة وحساب المثلثات، يابابا ابوس ايدك دقنى طولت
يابنى مالك متسربع ليه
خلاص خلاص انا اوفرعلى عمو، عيسي عاوز يخطب نورى صح واحنا موافقين وهما بيموتوا فبعض اساسا هييييه
قالتها روان بعفويتها المتلازمه لها ف نظر زين وعيسي الى بعضهم البعض وقال عيسي
مين دى
زوحليقه هانم.

انا هطلب ايد عروستك ليك وللا اقوم
زين تعجب واخذ يكتم ضحكاته وهو يحاول بالامساك ب والد عيسي ويردف الى عيسي
هو عمو متعصب ليه
معرفش بقالى كتير مش قاعد معاهم، باين فيه حد لعب فكتالوجه وانا غايب
همت لطيفه بتقديم الحلوى إليهم وقالت لتخفيف حدة الموقف
يشرفنا طبعا، بس اهم حاجه رأى نور
الجميع نظر الى نورهان ف ابتسمت ونظرت الى عيسي وقالت
أنا موافقه
نظر إليها عيسي وقال بهيام مداعباً إياها
ودينى انا أُمى دعيالى.

اقتربت نورهان في جلستها منه وقالت
ليه يعنى
اقترب عيسي أكثر
عشان القمر دا هيبقا معايا لوحدى
إنت الأجمل
لاء انت بتكدب ياخلف، اجمل ازاى بوحمه السنجاب الل ف وشى دى
إنت قمر يا عيسي وهي الل محلياك ومخلياك متميز
م قولنا بطل حلاوة بقا انا على أخرى
تنحنح زين وأردف يحاول لفت انتباه الجالسون له بدلاً من تتبعهم لمشهد عيسي ونورهان الغرامى المُقام أمامهم الآن.
ياحج عيسي، ياحج عيسي الله يرضى عنك خلينا هنا.

نقرا الفاتحه ونتفق عالشبكه يا مامت العروسة؟!
قالتها شقيقه عيسي ف ابتسمت لطيفه وقالت وهي تنظر إلى فكرى زوجها
ايه رأيك يافكرى
مفيش مانع والف مبروك
قامت شقيقه عيسي ب الزغرودة بصوت عالِ وفي نفس الجلسة اتفق الجميع على كُل شئ وتمت قراءة الفاتحه!
وبعد أيام.
كان الاربعه، زين ونشوان ونورهان وعيسي. فى رحلات استكشافية لمنزل الزوجية
الخاص ب زين ونشوان أولا فالقاهرة، ومن ثم سيبدء عيسي ونورهان بالبحث بعدهم.

بعدما ينتهى التحقيق مع نور بالجامعه وينتهى عيسي من تصوير الفيلم الحالى.
يدخلان شقة. واثنين وثلاثه، هذه غير مُطلة على منظر جميل
هذه صغيرة وتلك غرفه ماريا بها لا تليق بالاميرة الصغيرة!
وسط ضحكات ونكات من عيسي، مغازلات من زين الى نشوان. التقاط عدة صور بواسطه نورهان، تناول غداء جماعى
مدام نشوان الاخ المُريب مهدى دا اخوه الل كان جوزك كان زيه كدا، اصل انا والغلبان دا خوفنا اما شوفنا خلقته.

شعرت نشوان بالاحراج وقالت
لاء مجدى الله يرحمه كان غيره، وبعدين انا حكيت ل زين عنه بس هو مكانش شافه
نظر عيسي متعجباً ناحية زين وهو يأكل فقال زين وهو يهز رأسه
ايوة قالتلى نشوان عليه بس كنت اول مرة اشوفه
مع احترامى ليكِ، تحسيه قتال قتله بنظراته بتوع الارهاب دول
ارادت نشوان تغيير مجرى الحديث فقالت
مكنتش متوقعه خالص ان نورهان وعيسي اصلا يعرفوا بعض
لااااء يا مدام نشوان احنا حُبنا معلم عالاسفلت.

قطعت نورهان قطعة لحم بالسكين أمامها وهي تتحدث
والصدفه زين وعيسي انتيم، وانا ونشوان ساكنين فنفس المكان
ومحدش مننا يعرف حاجه عن التانى
يابنتى دا زيييين، زيييين خليل السُلطان ابو السلاطين يعنى المعلم والكووتش اومال
انتبهت نورهان لأسم زين كاملاً وتذكرت شيئا فعادت الى الذكرى
اميرة، اميرة جواب جايلك من البنك تقريباً
أقبلت أميرة من نورهان وتناولت الخطاب وشكرت نورهان فقالت نورهان.

اسمك اميرة رشيد السُلطان! اسم سينمائي اوى
ابتسمت أميرة لها ورحلت، وفي ذكرى أخرى كانت تحاول اميرة تصليح قفل قلادتها الذهبية
فى الحديقه الصغيرة وجلست إليها نورهان واردفت لها ب اهتمام
بتعملى ايه
بحاول اشوف قفل السلسله هيتصلح ولا اروح لبتاع الدهب يصلحه، كذا مرة تقع منى وآخر مرة ماريا بنت نشوان لاقتهالى
طب هاتيها كدا، احاول اعملها ولو منفعش روحى لبتاع الدهب.

كانت تحاول نورهان ف انفتح القلب المتدلى منها وظهر اسم اميرة وزين منه، ابتسمت نورهان واردفت
زين! دا اسم طليقك؟!
شردت أميرة ب ابتسامه واردفت اليها بنبرات بالغه الشوق
دا اسم اغلى حد كان فحياتى، حبيبي طول العمر
نوور. يانورى
انتبهت نورهان مع صوت عيسي فقال لها
سرحانه ومش بتاكلى فيه ايه؟!
تصنعت نورهان عدم الاكتراث واردفت مبتسمه
لاء انا تمام، الاكل هنا حلو اوى
آه جدا.

ان م فكرت به نورهان وتذكرته كان صحيحاً؟ ستصبح بعدها اعلان حَرب قادمة على هذا العاشقان
وربما الملحمة س تبدء!
برنامج تليفزيونى! اعمليه وش يا بنتى انتِ عبيطه؟!
كانت تحك روان ب شعرها تفكر، ف اردفت هدير بطريقتها العفوية كالعادة
مفيهاش تفكير يا دوجه السى، طبعا لازم تعمليه، اولهم شهرة بس شهرة أنضف من المستنقع القديم بتاعك يا معيزة مااااء ماااء
كانت تنظر روان الى هدير ب تمعن تسمعها ف أكملت هدير.

وفلوس، ومتعرفيش ممكن اللقاء دا يفتح عليكِ أبواب ايه تانية، انتِ عجبتينى ف الل عملتيه
وعجبتنى شجاعتك وقوتك قصاد كُل الناس
كملى يا روان، انتِ هتبقى أدها واحسن من الاول صدقينى
بس يارب تكونى اتعلمتِ
ابتسمت روان الى هدير، ف اردفت إليها
وخلاص كدا مش هترجعوا انتِ وصالح؟!
ارتبكت حركة عينا هدير، ارتبكا خضراوتيها الجميلتان وقالت
انا ف الاول اتنازلت، وكان دا رد التنازل، خلاص يا روان مفيش صالح تانى
فيه هدير وبس.

استمعا لصوت تهليل بالخارج والفتيات يتحدثن ف خرجن يروا مايحدث، واذ بها أميرة قد عادت
من رحلتها الطويلة حاملة حقائبها والهدايا، كانت تقبل نورهان ونشوان بحفاوة وحملت ماريا وقد اغدقت وانهالت عليها بمزيد من القبل الكثيرة.
وحشتونى، وحشتوني بجد واكتشفت انى معرفش اعيش من غيركم فعلا
هرولت روان ناحيتها وهدير وتصيح هدير بطريقتها
مرووووووووشااااا، اهلا يا افندينا نورت مكانك ي اسطا كُل دى غيبة.

حبيت اعرف غلاوتى عندكم واغيب شويتين
اردفت لها نشوان
غيرى هدومك ودخلى الشُنط وانا عاملة حته عشا محصلش
قامت اميرة بقرص احدى وجنتى نشوان قائله
دا بمناسبة الاخبار الحلوة بقا
تدخلت هدير قائله بعفويتها المضحكه
اسكتِ عالاخبار الل فاتتك مقولكييييش، نور ونشوان اتخطبوا وانا اتطلقت وروان اتفضحت وقريب هتطلع عالفضائيات تعمل افلام شيكس
شهقت اميرة بطريقه مضحكه واردفت.

لالالا، يخرب عقلك ياهدير انا هدخل اغير وانتو حضروا القاعدة فالجنينه هجيب هداياكم وجاية حالاً
ذهبن كُل واحدة منهم الى حيث مقصدها، نشوان تعد طعام العشاء. نورهان تقوم بفرش الطاولة وتحضير الزهور، قامت روان بتشغيل الاغانى المُحببة الى اميرة ك صوت فيروز. وقامت هدير بالاتصال ب اقرب محل تطلب بعض المثلجات والعصائر والمياه الغازية.

انتهت اميرة من تبديل ثيابها واخذها ل قسط من الاغتسال المُنغش بمرحاضها الخاص، ولجت الى غُرفتها
حملت الاشياء وخرجت اليهن
دى لماريا
امسكت نشوان بالحقيبه بها الكثير من الملابس الاطفال المخصصه للفتيات في عُمر ماريا طفلة نشوان، فرحت نشوان كثيرا وشكرتها
دا للمقروضه بتاعنا رونى
حقيبه مستحضرات تجميل ماركة عالمية وعطور اخذتها وقفزت بمكانها كعهدها وقالت
وااااااو هدية جاحدة زوحلييييقه يا مروووش
دى لنووور.

حقيبه بها لوحه مرسومه بالوان الشمع لصورة كبيرة تحمل وجه نورهان وبجانبها توقيع يحمل كلمات ل اميرة
اضحكِ يانور ضحكتك قمر زيك
ابتسمت نورهان وقبلت اميرة بخفه في احدى وجنتيها، حملت أميرة حقيبة اخرى واعطتها الى هدير
وفتحتها هدير ل تجد بعض من الملابس التي يرتديها الفتيات في ايام زفافهم الاولى. ابتسمت هدير وصبت سخطها كالعادة.

لا ماهو راح فراس ويا ابوه، قصدى خلاص بخ صالح ابقا البسهم فالمناسبات السعيدة ف اوضتى بقا
ميرسى يا ميرررروو
ودى بقا الل تعبت لحد م لاقيته ل نوشا العروسة
حقيبة اخرجت منها نشوان فستاناً ذهبي اللون مُرصع بالجواهر الرقيقه، ثوب مَلكى حقاً كانت رؤيته تُذهب العقل من شدة جماله، فرحت كثيراً نشوان ل رؤيته وقامت ب احتضان اميرة بعمق وهي تردف لها شكراً وعرفاناً ف أجابت اميرة.

عندنا كام عروسة، البسيه يوم كتب كتابك بقا انا جيباه محجبات اهو متقلقيش
دى احلى هدية جاتنى فحياتى
هاه احكولى اخباركم واحنا بنتعشى
بدأوا في تناول العشاء، كانت تقص هدير حكايتها ومن ثم ماحدث ل روان بالكامل
حتى وصلوا لقصة خِطبة نورهان الجديدة وكانت مفاجأة ب نورهان ان أميرة تعرفه
جالى وانا الل عملتلك الورد، انا مكنتش اعرف انه ليكِ لحد م شوفت الورد عندك
تذكرت نورهان وابتسمت قائله.

يانهار ابيض، ازاى مخدتش بالى من اسم المحل عالكارت
قالت أميرة بحب كعادتها
عيسي شخص مهذب وبيحبك اوى يا نور اوعى تخسريه
ابتسمت نورهان وارجعت خصله شعرها الى الخلف كالعادة وقالت
طبعا عمرى م هخسره، انا م صدقت لاقيته
ربنا يتم لكم ع خير يا قلبي
نظرت أميرة الى نشوان بحملقه مضحكه وقالت
مممم يلا الدور عليكِ ياشيخ نشوان
بللت نشوان شفتيها وقالت.

كتب الكتاب الاسبوع الجاى، وخلاص، بقالى بيت لوحدى ي أميرة مع راجل بيحبنى وبحبه وبيحب ماريا
بعيد عن كل القرف والدوشه والمشاكل والتعب
امسكت روان هاتفها ووجهته ناحية أميرة
ومش بس كدا يا مروووش، دا قمرز قمرززز انا شخصياً كنت بكراش عليه
بس فازت بيه بنت المحظوظه، دى هتعيش ف حب وبوس واحضان يكفوها 100 سنة زحاليييق قدام
انارت هاتفها الى أميرة على صورة زين مع صوت نشوان وهي تقول الى روان.

ياقردة انتِ كمان عارفه زين ومعاكِ صورته، احكيلى عارفاه منين
وقف الزمن! وقفت الساعه، اتسعت حدقة عين أميرة. نهضت من مكانها
إثر ماكانت روان تقص الى نشوان المرة التي رأته بها ورقصت معه في سهرة عيد ميلاد صالح
وأميرة وكأنها لا تسمع أحدا. لاترى احداً كانت نورهان تنتبه معها وعلى الفور تأكدت
وبصوت يملئه الكثير من خيبة الامل قالت اميرة ناظرة الى نشوان
خطيبك الل هيتجوزك زين! زين خليل السُلطان؟!

انتبهن باقِ الفتيات مع اميرة وعبوسها ف كفّوا عن الهَرج والضحك فقالت نشوان مؤكدة
اه هو انتِ تعرفيه
بعينان يملؤهما الدمع بحوراً نظرت أميرة إلى نشوان وابتلعت ريقها قائله.