رواية العروسة والشلة الموكوسة للكاتبة ياسمين علاء الدين الفصل السابع
زياد قاعد مع صاحبه سمير في شقته
زياد: نفذ تهديده وسحب الفلوس اللي كانت في حسابي.
سمير: انت ذكي اوي يا زياد. ما تروح ياعم وعيش معاه في الفيلا. حد يكره.
زياد انا. مبحبش حد يلوي دراعي
سمير: انت تسميها كده ليه. دي ليلي هناك. يعني هتعرف تلطف وتعطف معاها. وهتقرب منها براحتك. روح يا زياد بدل ما حد من اخواتك يقرب من ابوك ويلهف كل حاجه.
زياد لا. مش رايح.
سمير: براحتك انا قولت رأي. بس قولي كده هتصرف منين وانت مش بتشتغل. ده حتى حسابك اللي في البنك كان بتاع ابوك.
زياد: هستلف منك مبلغ لحد ما اشوف هعمل ايه
ضحك سمير: هههه. تستلف مني انا. كان على عيني. بس انا اصلا معيش. ده انا ابويا قالب عليا وقالي لو منزلتش الشغل مش هيصرف عليا.
زياد: امشي يا سمير من وشي. مش ناقص.
مع مهند كان في الجيم بيجري على المكنه
المدرب: مهند. كانت عايزك في موضوع
مهند: خير
المدرب اشتراك الجيم خلص ولازم تجدده
مهند يومين كده وهجبلك الفلوس
المدرب: مينفعش. عشان صاحب المكان عايز يدفع الايجار.
مهند: ماشي. مع السلام يا كوتش
خد شنطته وخرج والمدرب كلم شفيق السكرتير
المدرب: خرج من الجيم. ومردش عليا.
شفيق: هيرجع تاني هو ملوش مكان. منصور بيه بيشكرك
طبعا دي كلها اؤامر من منصور.
مهند رجع شقه مامته ومسك صورتها
: وحشاني اوي يا امي. من غيرك اتمرمطت. وجعان. والراجل اللي اسمه ابويا سحب كل الفلوس اللي كانت في حسابي
قام فتح التلاجه واكل كل اللي فيها.
مهند: لسه جعان تاني. ومعيش فلوس اجيب اكل.
مع عمار
كان بيسوق عربيته في مزمار السباق وبيحاول يخرج كل الغضب اللي في قلبه
خلص وكان مرتضي وكيل أعماله: مالك يا عمار. مش في الموود انهارده
عمار: مفيش. هو انا معايا سيوله كام في حسابي
مرتضي انا كنت ماجل الكلام في الموضوع ده. بس احنا محتاجين فلوس. عشان ندفع ايجار المخزن بتاع العربيات ده غير أن فلوسك كلها اتسحبت من الحساب.
عمار: كلم الشركات اللي كانت عايزاني اعمل الاعلانات. انا موافق.
مرتضي: ايه اللي حصل. انت كنت رافض
عمار: لازم اجيب فلوس.
مرتضي: اديني نص ساعه وارد عليك
عمار قعد وهو بيفكر عارف انه غلطان عشان معتمدش على نفسه من الاول
مرتضي رجع وقاله: محدش راضي يعمل اعلانات. العروض اتسحبت اما انت اتاخرت عليهم بالرد واتعقدو مع متسابقين تانين.
عمار: انت عايز كام
مرتضي: مش اقل من 10 الف منك. انا ممكن ادفعهم
عمار: لا. انا اللي هدفعهم وهحاسب الفريق
مرتضي: ازاي.
عمار: دي مشكلتي وانا هتصرف.
مشي عمار وخد مفتاح المخزن اللي فيه العربيات واضطر يبيع منهم كذا واحده وصفي الفريق اللي كان بيشتغل معاه في السباقات
مرتضي: انا مش هامشي يا عمار.
عمار: ده مرتب الشهر بتاعك. انا هسيب موضوع السباقات.
مرتضي: انا معاك في اي حاجه. شوف انت هتشتغل ايه وانا معاك
عمار: انت ذنبك ايه
مرتضي: دي عشره عمر. مش بسهوله كده هنبعها.
بعد اسبوع كانت الدنيا بتضيق اكتر على الثلاثه لانهم متعودين يصرفو وبس.
منصور: اعمل اي تاني يا زينب. دماغهم ناشفه
زينب: فعلا. متوقعتش أنهم يستحملو كل ده
شفيق: عمار بيه ببشتغل ميكانيكى عربيات. تخيل يا باشا. وله مهند باشا بقي بيدرب في جيم وكمان بيشتغل شيال. وزياد بيه باع الشقه بتاعته وقاعد بيصرف من فلوسها في فندق
زينب: اول واحد هيجي هو زياد.
ليلي: انا هدخل واحاول اقنعهم.
منصور: ازاي
ليلي: معرفش بس هحاول وخلاص.
راحت لزياد اول واحد كانت دقنه طويله وقاعد في اوضه بفندق مش بيخرج منها
ليلي زياد. اخبارك ايه
زياد: زي ما انتي شايفه. بابا هو اللي بعتك مش كده
ليلي: مش مهم مين اللي باعتني المهم دلوقتي تقوم معايا عشان ترجع بيتك
زياد: لا. ده مش بيتي وله هيكون
ليلي: هيكون يا زياد. باباك عارف انه غلط في حقكم وعايز يبدا معاكم من اول وجديد. امسك في الفرصه وعيش ايامك معاه. هو مش هيعيش قد اللي عاشاه.
زياد: انتي بتتفرجي على افلام هندي كتير
ليلي: لا، تركي. قوم ياض واحلق دقنك. واستحمي
زياد: خليكي متمشيش
ليلي: ورايا كام مشوار. هقبلك في البيت بليل
زياد: ماشي. سلام يا لولو
ليلي لولو في عينك. سلام
خرجت ليلي وكانت منصور وقالتله أن زياد اقتنع.
راحت لمهند
ليلي: اخبارك يا وحش.
مهند: الحمد لله
ليلي: مش معقول. مهند انت عيان. مالك هادي ليه، اوعي تكون عقلت أمتي
مهند: لا. ده انا جعان عشان كده هادي
ليلي: خضتني عليك يا راجل. يلا تعال
مهند فين
ليلي: البيت. ماما عامله انهارده طاجن باميه إنما ايه زي الفل
مهند: انا اتبهدلت اوي ي ليلي. بقيت اكل مره واحده في اليوم.
ليلي يا كبدي يابني. تعال وانا اكلك. باباك بيحبك وخايف عليك. اديله فرصه يعبر عن حبه ليك ويغير الغلط اللي عمله
مهند سكت
ليلي: يلا روح الحق الطاجن وهو سخن.
مهند: انتي مش جايه معايا
ليلي: لا لسه. عندي مش هحصلك على البيت. باي.
خدت عنوان الورشه اللي بيشتغل فيها عمار.
ليلي: الله ينور يا بشمهندس
عمار خرج من تحت العربيه: بتعملي ايه هنا
ليلي: جايه اشوفك واتكلم معاك، اخبار الشغل ايه
عمار: عايزه ايه يا ليلي
ليلي: عايزاك ترجع معايا البيت. باباك محتاجك جنبه
عمار: وهو كان فين اما كنت أنا محتاجه جنبي
ليلي: عمار. ده والدك. مفروض مش انت اللي هتحاسبه
عمار: ليه.
ليلي: ربنا قال (ولا تقل لهم أوف)
عمار: وربنا قال كمان (واما اليتيم فلا تقهر).
مسك أيدها ودخلها الورشه: امي ماتت وانا عمري خمس سنين. منصور بيه جابلي مربيه وقالها تربيني. كان بيجي كل شهر مره واحده يرمي فلوس ويمشي. مكنش موجود في حياتي
ليلي: انا مش بقول أنه مش غلطان. بس في رجاله مش بتسال على اولادهم. لا فلوس وله غيره.
عمار: انا منتظر ايه منك. هو بياكلك ومعيشك عيشه متحلميش بيها. لازم تكوني في صفه.
ليلي: انا مش هرد عليك. عشان عارفه انك مضايق حاليا. بس يا عمار. اللي فات خلاص ده ماضي. لازم تفكر في مستقبلك. مستقبلك جنب ولدك. هو محتاجك.
عمار: انا مش عايزه. انا خلاص بعت العربيات واشتريت الورشه دي. وبشتغل فيها
ليلي: هضيع حلمك. انا عارفه أن حلمك تكون اشهر متسابق سيارات.
عمار: حلم ضاع وهعمل حلم غيره.
ليلي: وليه يضيع. باباك بس عايزك جنبه وهتكمل في طريقك. ده مش مكانك يا عمار. اسمعني. انا فاهمه انك مضايق منه. بس
عمار: انتي مش فاهمه وله هتفهمي. عشان انتي مش في مكاني. روحي يا ليلي عيشي في الفيلا. انا مش جاي. وقولي لمنصور بيه لو بشحت مش هاجي
ليلي: جرب يا عمار صدقني مش هتندم. اديله فرصه وحاول انك تسامحه
عمار: مش هيحصل. قلبي عمره ما هيسامحه.
ليلي: جرب
عمار: اطلعي بره ي ليلي. ومتجيش هنا تاني.
خرجت ليلي وهي مضايقه من عمار. بس هو مجاش بالكلام والذوق يجي بالعافيه
ووقفت قدام الورشه. عمار: مش قولتلك امشي
ليلي: انا واقفه في شاع الحكومه انت اشتريت الشارع
عمار: يارب صبرني. انت هبله يا بت
ليلي: بس متقولش هبله. عشان معملهاش معاك
عمار: هي ايه دي
ليلي مسكت طوبه من الشارع. عمار: امشي يا بت العبي بعيد مش عايز هبل
ليلي حدفت الطوبه وجت في العربيه
عمار: كسرتي الفانوس
ليلي: فانوس رمضان. هههههه.
عمار: ليلتك مش معديه
جري وراها وهي بتجري: عيب عليك يا بشمهندس. تجري ورايا في الشارع
عمار: قسما بالله يا ليلي. لتتعلقي
ليلي: متقدرش تعمل حاجه
استخبت ورا واحده تخينه: الحقيني. عايز يضربني
الست: في ايه يا بني. حرام عليك البت بتترعش
عمار: لو سمحتي. سبيني اتعامل معاها. البت دي عايزه تتربي
الست: يا بني اتفاهم معاها بالعقل.
ليلي: يرضيكي يا خالتي. عايز بضربني وانا لسه في شهر العسل
عمار اتصدم: عسل ايه.
ليلي: كمان بيستنكر مني. يرضيكي يا خالتي.
عمار: ليلي. بلاش هبل.
الست: يا بني بلاش عنف واتكلم معاها براحه. الراجل ميمدش أيده على ست
عمار: وله اعرفها دي كدابه
ليلي: كده يا عمار. اخص عليك. بعد قصه حب خمس سنين تعمل فيا كده عشان حرقت الاكل، طيب واللي في بطني.
الست: انتي حامل يا بنتي. يابني ليه كده. انت عايز الواد يتربي في الشارع
عمار: دي كدابه
ليلي: هتروح من ربنا فين. يا قاسي
عمار: بقي كده يا ليلي. ماشي.
الست: خلاص يا بني. اعتبرها هبله وغلطت
ليلي: مين الهبله يا وليه. لمي نفسك
الست: شوف البت أم لسان طويل. ليه حق يضربك
ليلي: محدش يقدر يضربني.
الست: اضربها. تستاهل الضرب
ليلي: بقي كده. طيب محدش هيضرب غيرك يا وليه يا حشريه
لسه هتضربها كان عملر مسكها: انتي مجنونه
ليلي: سبني يا عمار. هضربها براحه مش هعورها
عمار: اتلمي بقي. عشان دي لو مسكتك هتكسرك انتي مش شايفه قد. ايه
ليلي: أتصدق اه. دي ممكن تسفلتني. امسكني كويس.
عمار ضحك عليها.