رواية العروسة والشلة الموكوسة للكاتبة ياسمين علاء الدين الفصل الثامن
رجعت ليلي البيت كان مهند وزياد هناك
ليلي: سلامو عليكم يا رجاله.
مهند وهو بياكل: وعليكم السلام. تعالي يا ليلي كلي.
ليلي: الاكل عاجبك
مهند: جدا. كان عندك حق. بجد تسلم ايدك يا طنط
زينب: بالهنا يا حبيبي. وانت يا زياد. كمل أكلك
زياد: كلت يا طنط. شكرا
وقف زياد. زينب: منصور في المكتب عايزك انت ومهند
زياد: ماشي.
مهند وقف: هغسل ايدي واجي وراك.
زينب: مش هتكمل الاكل.
مهند: لا. كفايه. عشان يكون في مكان احلي.
ليلي: ما شاء الله. ده انت نسفت السفره. لسه في مكان
زينب: الله اكبر. انتي بتعدي عليه الاكل. سبيه ياكل براحته.
في المكتب
كان زياد ومهند قدام منصور
منصور مطلوب منكم تنزلو تتابعو الشغل في الشركه والفندق وطبعا المهام هتتوزع عليكم انتم الثلاثه. بس لحد ما عمار يجي. الشغل هيكون بينكم انتم وبس
مهند ؛ نقدر نعرف ايه القرارات المفاجاه دي. ما انت ماسك الشغل واحنا لينا حياتنا.
منصور: انا تعبت يا مهند. وخلاص صحتي مبقتش زي الاول. عايز اطمن أن من بعدي هتعرفو تعيشو. لو معرفتش تديرو الشغل. كل اللي عملته هيضيع. وانتم مش هتعرفو تعيشو. انا كنت شايف الحياه غلط. بس زينب فتحت عيني على الصح. اتمني أننا ننسي اللي فات
زياد: هنبدا الشغل من أمتي
منصور: من بكره. شفيق هيعرفكم بكل حاجه. وانا طبعا هكون معاكم.
مهند بس انا مش فاضي من 9 الصبح ل6 بليل.
منصور: الجيم هيكون بعد الشغل يا مهند. انت دلوقتي هتكون راجل اعمال. اتمني تتصرف على المبدأ ده
خلصو كلام. دخلت الشغاله ومعاه الشاي
ليلي وزينب معاها
ليلي: انهارده في فيلم جامد جاي في التلفزيون
زياد: فيلم ايه
ليلي: إسماعيل يس في الجيش
زياد: مش بتفرج غير على انجليش بس. في نتفلكس هنا
ليلي: على جثتي. القناه دي مش هتشتغل. وهنتفرج كلنا على إسماعيل يس.
مهند: ايه البلطجه دي
ليلي: وانت هتتفرج.
عمار كان قاعد وفجاه دخل ناس وكسرو العربيات وضربوه
وهو بيضرب فيهم بس هما كانو اكتر
مشيو وسابوه واقع في الارض واغمي عليه.
في البيت
ليلي بتضحك على الفيلم ومهند بياكل في سندوتش
ليلي: الفيلم حلو اوي
زياد: ممل. غيري وهاتي حاجه تاني
ليلي: بس ياض. انت كفايه اكل ي مهند.
مهند: خليكي في نفسك. انا بعوض الاكل اللي كان ناقصني
ليلي: انت كان ناقصك اكل. فين ده. ده انت ايدك لوحدها 80 كيلو
مهند: ما شاءالله
وهنا بيتكلمو. كانو منصور نازل من على السلم بيجري
ليلي: في ايه يا عمي
منصور: عمار في المستشفي.
ليلي: ايه ليه.
منصور: مش عارف.
جري على بره. وليلي وراه بس وقفت.
: اخوكم في المستشفي
زياد: ماشي
مهند: ربنا يشفيه
ليلي: انتم مجانين بقولكم اخوكم في المستشفي. قوم انت وهو شوفه
محدش رد عليها. ليلي: انا بجد مش مصدقه. انا كانت امنيه حياتي يكون عندي اخوات. بس الحمد لله اني معنديش
خرجت ورا منصور وراحت معاه على المستشفي.
في المستشفي
الدكتور بيكلم منصور في مكتبه. ليلي دخلت تتطمن على عمار
ليلي: وعمل فيها شبح وانت كتكوت. مين شلفطك كده
عمار: معرفش هما مين. بس اكيد هعرفهم
ليلي: الاحسن بقي متعرفهمش.
عمار: لا هعرفهم وهيكون ليا معاهم حساب
ليلي: اسكت انت فيك حته سليمه. شكلهم اتغابو عليك
عمار: انت شمتانه فيا
ليلي: انا. خاللللص. ده انا فرحانه فيك بس.
عمار: كان قلبي حاسس. امشي ي ليلي.
ليلي: لا. مش هامشي. انت محتاج حد معاك وانا جيت مع باباك
عمار: هو منصور بيه هنا
ليلي: باباك يا عمار. مشوفتش كان خايف عليك ازاي.
عمار سكت...
دخل منصور: الف سلامه عليك يا عمار. انا هعرف بطريقتي مين عمل كده
عمار: ممكن يكون انت اللي عملت كده. انا مليش أعداء
منصور بصدمه: انا ي بني. لدرجه دي انا وحش في نظرك. انا مش شيطان عشان اذاي ابني بالشكل ده.
خرج منصور والدموع محبوسه في عينه
ليلي: على فكره انت غبي اوي.
عمار: لمي نفسك يا متخلفه
ليلي: ليه تقوله كده يا عمار. انت مش شايفه خايف عليك ازاي. ده ماسك نفسه عشان ميعطش. جتها نيله اللي عايزه خلفه زي خلفتكم
خرجت ليلي: معلش يا منصور بيه. الواد عمار ده شكله دبش وحمار.
منصور: هما بيكرهوني كلهم. ليهم حق
ليلي: محدش بيكره ابوه. مع الوقت هتعرف أنهم بيحبوك.
منصور: ربنا يهديهم. روحي انتي يا ليلي. وانا هقعد معاه
ليلي: انا هقعد معاه عشان انكد عليه
منصور بصلها: اشمعانه.
ليلي وشها احمر: ها. عادي. اصل حضرتك عجزت ومش هتقدر على السهر. انا هروح اجيب قهوه. سلام
ضحك منصور على شكل ليلي المكسوف: مش عمار لوحده اللي دبش. بس يارب تكون من نصيبك يابني.
منصور اتصل بزينب وقالها أنها هيقعد في المستشفي لحد الصبح مع عمار. وليلي معاه.
مهند كان في البيت رايح جاي: هما اتاخرو كده ليه يا زياد
زياد: معرفش ومش عايز اعرف
مهند: انا كمان مش شاغلني. بس ليلي كمان بره وهي بنت
زياد: هي مش لوحدها. انا طالع انام
مهند: انا كمان هنام
طلع زياد.
مهند وقف لوحده وكان لسه هيطلع: مينفعش برضو. لازم اطمن عليهم عشان اتاخرو
اتصل على منصور وساله على عنوان المستشفي وراح على هناك
ليلي: اخيرا حد فيكم حس على دمه. فين الواد الحلوف التاني.
مهند: في البيت. هو ماله متخرشم كده ليه
ليلي: في ناس طلعو عليه وضربوه. عيب في حقك يكون اخوك مضروب
مهند: مين ده اللي مد أيده عليه
ليلي: منعرفش. بس ابوك قال هيعرف بطريقته
مهند وليلي ومنصور كانو جنب عمار. واليوم الثاني
الدكتور كتبله خروج من المستشفي مع العلاج
ليلي: هنحتاج عضلاتك يا بطل. يلا شيل د
عمار: يشيل مين
ليلي: يشيلك انت. يلا يا مهند
عمار: لا. انا اصلا هكلم مرتضي ياخدني على الشقه.
ليلي: شقه مين بمنظرك ده. اسمع الكلام عشان أنا مخنوقه ومنمتش ومش شايفه قدامي. شايله يا مهند ويلا
منصور: انت مش هتقدر تمشي يا عمار. خلي اخوك يساعدك
ليلي: انت لسه هتستاذن منه. شيله زي شوال البطاطس على كتفك
مهند رفع عمار وشاله على كتفه. عمار: اخف بس ي ليلي وحسابك معايا تقل اوي
ليلي: بؤ ومتعرفش تعمل اي حاجه.
منصور: بس يا ولاد صوتكم عالي.
مهند: انت تقيل اوي. بتاكل ايه
عمار: نزلني ياعم.
ليلي: اياك تنزله. اما نروح هعملك الاكل اللي بتحبه
مهند: اهو ده الكلام. انا عايز محشي
ليلي: حاضر.
ركبو العربيه وطول الطريق ليلي وعمار بيتخانقو مع بعض. ومنصور بيضحك عليهم.
في البيت
طلعوه على اوضته الجديده
زينب: الف سلامه عليك يا عمار.
ليلي: ماما انتي عملتي اكل.
زينب: اه يا بنتي. اكلكم تحت. سلقت فراخ وعملت شوربه لعمار
منصور: تسلم ايدك يا زينب. تعبتك معايا
زينب: تعبك راحه يا منصور. عمار ابني. ربنا يشفيه
قعدت زينب جنب عمار تأكله
عمار: احم. انا هعرف اكل لوحدي. متعبيش نفسك
ليلي: يا بني استغل الموقف في حد يلاقي دلع ويقول لا
زينب: اهي قالتلك. كل بقي عشان تخف بسرعه.
منصور طبطب عليه: متنساش الدوا
زينب: قولي ميعاده وانا مش هنسي
عمار ابتسم: شكرا.
منصور كان مع زياد في مكتبه
منصور: خلاص يا زياد فهمت هتعمل ايه
زياد: ايوه. فهمت
منصور: طيب قبل ما تمشي. اطلع شوف اخوك
زياد: اطلع ليه.
منصور: عشان اخوك تعبان. ومفروض تكون جنبه.
زياد: اما ارجع ابق اشوفه
منصور: اطلع شوف اخوك يا زياد. لازم تقربو من بعض.
زياد: مش لازم. وبعدين هو اخويا بالاسم بس. وميهنيش اقرب منه
خرج زياد. منصور قعد بتعب
زينب: شكلك تعبان. اطلع نام.
منصور: منمتش امبارح كويس في المستشفي. وغير كده الولاد دماغهم ناشفه. لازم افضل اناهد عشان يسمعو الكلام
زينب: انت هتتعب في الاول بس بعد كده هترتاح اما يقربو من بعض.
زياد راح الشركه
في المكتب: اعمل ايه انا. مش فاهم اي حاجه
دخلت ناني: منصور بيه اول مره تتأخر
زياد: انا مش منصور بيه
ناني: زياد. مش معقول بتعمل ايه هنا
زياد: زي ما انتي شايفه همسك الشغل هنا
ناني: كويس. اخيرا قررت تعمل حاجه مفيده غير الجري ورا البنات
زياد: انتي مرقباني ليه
ناني: هرقبك ليه. انا مالي. اعمل اللي تعمله.
زياد: والله. افتكرتك مع عمار.
ناني: معاه فين
زياد: في المستشفى انتي مش اقرب حد ليه.
ناني: مستشفي ايه؟
زياد: غريبه متعرفيش ازاي. انتم الاتنين مع بعض دائما
ناني اتصلت على عمار عشان تفهم في ايه.