رواية العروسة والشلة الموكوسة للكاتبة ياسمين علاء الدين الفصل الثاني
اتخنقت ليلي ومامتها مع سيد وامه وبعد ما مشيو
مسكتها امها بالشبشب وفضلت تضرب فيها
ليلي: ايه يا نبع الحنان. بتضربيني ليه. مش انت كنتي لسه معايا
الام: انصر بنتك ظالمه أو مظلومه
ليلي: والله المثل مش كده. وبعدين انتي شايفه سيد كرشو بيمنظر عليا ازاي. يرضيك
الام: اه يرضيني. يا بت ده كان شغال تاجر حديد خرده.
ليلي: ايه الفخر ده. بقولك ايه يا مامتي روقي كده وهدي عضلاتك. انا عندي شغل انهارده واستاذنت فتره الصبح عشان كرشو ده. بس انا لازم امشي.
الام: لسه مخلصتش ضرب
ليلي: طيب هروح الشغل وارجعلك تضربي فيا زي ما تحبي. المهم محتاجه حاجه يا زوزا
الام: مش عايزه حاجه من خلقتك
ليلي: الله على حنان الام. نسمه يا ناس. سلام يا زوزو يا قمر.
خرجت ليلي قبل الشبشب ما يجي فيها.
ليلي: فلت منه. الحمد لله.
ركبت التاكسي مفيش وقت تتشعلق في المواصلات.
في المطعم
كان زياد قاعد مع صاحبه
صاحبه: ايه يا عم زياد. هي أول مره يعني منصور باشا يتجوز
زياد: لا. بس المره دي متجوز السكرتيره. دي قدي في السن.
صاحبه: يا عم الفلوس تعمل اي حاجه، روح جهز نفسك عشان متحصلش مشكله. هو شهر وهيطلقها.
زياد: هروح بس لازم اخطف منه الاضواء.
صاحبه: هتعمل ايه يا زيزو. روق وبلاش مشاكل
زياد: عايز بنت تيجي معايا وتمثل أنها خطبيتي.
صاحبه: ياعم انت تعرف بنات بعدد شعر راسك. اتصل باي واحده
زياد: مخنوق منهم. كلهم. تصور البت سالي زعلانه عشان ايه. لقت رقم بنت عمها على موبايلي. وتصور فتحت وشافت الرسائل. انا معرفش ايه ده
صاحبه: بجاحه ازاي تزعل انك بتخونها
زياد: انت بتتريق. انا مش بخونها. انا كنت بواسي بنت عمها عشان فركشت خطوبتها
صاحبه: يا حونين. فيكي الخير
زياد: بنات غريبه. معرفش ليه الانانيه دي
صاحبه: المهم هتروح ازاي.
زياد: بسيطه هشوف واحده هنا تيجي معايا الفرح.
صاحبه: انت لسه هتشقط واحده
زياد: عيب الألفاظ دي. ايه هتشقط. اسمها هتعلق
صاحبه: اخلاق يا زيزو.
دخلت ليلي المطعم ومنه على المطبخ من الباب اللي ورا وبدات الشغل
دخل الويتر وهو بيقولها: في واحد مش عاجله الاكل وبيقول في ملح كتير
ليلي: كان طالب ايه
الويتر: مكرونه نجريسكو
ليلي خدت الطبق ودقته: فين الملح الكتير ده
الويتر: معرفش. هو مصمم ميدفعش الفاتوره عشان الاكل معجبوش
ليلي شمرت كم القميص اللي لابسه وخرجت وهي لابسه الطاقيه البيضا بتاعت الطباخين
علي ترابيزه الزبون: انت بقي اللي مش عاجبك الاكل.
الراجل: اه. الاكل وحش. وفي ملح
ليلي: كمان بتقول في وشي أن الاكل وحش
الراجل: اه. ومش هدفع كمان، وامشي من هنا يا شاطره. هتيلي حد كبير اكلمه
ليلي: كمان. لا ده انت قلبك مين بقي.
الراجل: بت انتي عبيطه. امشي من وشي
ليلي ياعين ماما. بس كده.
وقفت على الكرسي ونطت على الراجل وفضلت تضرب فيه والناس بيبعدوها عنه وهي مش عايزه تسيبه
ليلي: سبوني عليه. انا هضربه براحه يا جماعه متخفوش
الجرسون: يا ليلي مينفعش كده.
ليلي: غلط ولازم يتعاقب
الجرسون: المدير. هيشوفك
ليلي: وربنا ما هسيبه
خرج المدير من مكتبه: ليلي. بتعملي ايه
ليلي: اهلا يا مدير
المدير: سيبي الراجل يا ليلي
ليلي نفخت: اهو. بس هو اللي بدا على فكره
المدير: معلش يا فندم. احنا بنقدم اعتذارنا ليك ارجوك تسامحنا
الراجل: والله لو مرفدتها لاقفلك المحل
ليلي: انت اللي بتجيب الضرب لنفسك اهو. وبعدين شكلك اصلا كحيان جاي تاكل ببلاش
الراجل خرج الكارنيه من جيبه والمدير اتصدم.
المدير ايوه يا باشا. اللي تؤمر بيه هنفذه معاليك
الراجل ارفد الحيوانه دي من هنا
المدير: بررره. ملكيش شغل هنا.
ليلي: كده يا فوزي بتبعني. عشان الراجل القرعه ده
المدير: يا خربيتك. هنتسجن كلنا. غوري ومتجيش هنا تاني
ليلي: طيب هات حقي الاول
المدير: ملكيش حاجه. وغوري من هنا
ليلي: ماشي يا فوزي الكلب. دي اخرتها ده انا شقيانه وتاكل عليا فلوسي. يارب مراتك تقفشك مع البت سماح.
المدير: غوري يا حيوانه. لو جيتي هنا تاني هسجنك
خرجت ليلي وهي بلبس الشغل وبتشتم في المدير والراجل الاقرع
كل اللي كان بيحصل ده كان تحت عين زياد.
اللي خرج وراها وهو بيضحك بخبث
زياد: يا انسه. يا اسمك ايه
وقفت ليلي: هو يوم مش معدي. ابتديته بكرشو ونهايته عليك. عايز ايه ياعم
زياد: احم. براحه متزوقيش. انا زياد المنصور. مش عرفاني
ليلي: لا. ايه صورك على علب السمنه.
زياد ياريت لسانك ميطلوش. إنا شوفتك وانتي بتترفدي والصراحه اضايقت من اللي حصل. رغم أن طريقتك كانت غريبه في اخد حقك. مش لازم العنف والضرب. كان ممكن بهدوء تخدي حقك
ليلي: في ناس مينفعش معاها الهدوء. وياريت تقولي عايز ايه. عشان أنا مليش خلق
زياد: انا عندي فندق وكنت عايز طباخ جديد. ايه رايك تيجي تشتغلي
ليلي: قول وربنا. احلف كده بسرعه
زياد. ؛ والله العظيم. موافقه تشتغلي هناك.
ليلي: طبعا موافقه. بس قولي الاول اسم الفندق. انا مقبلش اشتغل في فندق أقل من نجمه
زياد: هو في اقل من كده. على العموم متخفيش. الفندق مشهور. اسمه
ليلي: وحياه ابوك. ده فندقك
زياد: اه. تحبي تيجي دلوقتي وتتاكدي بنفسك
ليلي: اه طبعا. احب جدا. بينا على الفندق
ركبت معاه العربيه اللي طبعا كانت اخر موديل. عربيه مرسيدس تخطف العقل
زياد: ايه رايك في العربيه
ليلي: حلوه. بس لو كانت احمر كانت هتبق احلي.
زياد: احمر. المهم يا. انتي قولتي اسمك ايه
هي: انا ليلي السيد. طباخه مهاره
هو: انا زياد المنصور. تشرفت بيكي
هي الشرف ليا. هو انا هقبض كام
زياد: 15 الف
هي في السنه. حلو اوي. انا موافقه
زياد: في الشهر
ليلي احلف كده
زياد ضحك: وحياه ابويا. وممكن تاخدي المبلغ كله انهارده.
ليلي فرحت وبعدين بصتله بشر: انت ياض. فاكرني من البنات اللي بتشتغل في شارع الهرم.
زياد: لا. حاشا لله يا انسه ليلي. انا عايز منك خدمك. وياريت تنفذيها وقتها هتشتغلي
ليلي: خدمه ايه دي اللي بالمبلغ ده
زياد: الحقيقه ان ولدي تعبان وحالته خطر، انا قولتله اني خطبت ووعدته اعرفه على خطبتي. بس عرفت انها خانتني مع صاحبي
ليلي: لا حول ولا قوه الا بالله. معلش يا استاذ زياد. هي واطيه متستهلش زعلك عليها.
زياد: هقول ايه. الحمد لله. عرفت حقيقتها قبل ما اتورط فيها اكتر. بس المشكله ان انهارده في حفله خيريه احنا بنعملها كل سنه. بنام تبرعات لمستشفي الاطفال
ليلي: كمان. ما شاء الله. ربنا يتقبل منكم ويزيدكم
زياد وهو بيضحك عليها في سره. بلعت الطعم وصدقت كدبته. دلوقتي جه الدور أنه يقنعها أنها تحصر معاه كخطيبته.
زياد: احم. يا انسه ليلي. انا عارف اني اطلب منك كده. بس انتي لو ساعدتيني ربما هيكرمك وكمان هتشتغلي في الفندق. ده شئ اساسي.
ليلي اساعدك ازاي. اقول لباباك الحقيقه
زياد: لاااا. كده هيتعب وممكن يحصله حاجه. انا بس عايزك ساعتين بالظبط تمثلي انك خطيبتي وكمان عشان متفتكريش اني بضحك عليكي. خدي الفلوس. وهروح لمدير الفندق قبل ما ندخل واقوله يشغلك.
ليلي لا مش ممكن. مش انا اللي اعمل كده.
زياد: ده عمل خيري. لو سمحتي ساعديني دول ساعتين بس. مش هيضروكي في حاجه. هتاخدي الفلوس وكمان هتتوظفي في الفندق
وقف زياد بالعربيه قدام الفندق وهي بصت عليه. ه فندق احلامها. كانت بتتمني تدخل تشوفه من جوه. مش تشتغل فيه. بس طبعا ده بتاع الطبقه الاولى من الشعب. يعني كريمه المجتمع
زياد: ها يا ليلي. قولتي ايه.
ليلي: موافقه. هما ساعتين مش هيحصل حاجه.
زياد بجد انتي احسن واحده عرفتها في حياتي. شكرا من قلبي. يلا بقي عشان تغيري الهدوم دي
ليلي: نعم يا خويا. هدوم ايه. انت بتضحك عليا
زياد: لا خالص. بس مش معقول هتدخلي الحفله بلبس المطبخ ده..
ليلي: احنا هنجيب هدوم منين دلوقتي.
زياد انا هتصرف. تعالي بس ارتاحي في اوضتك. وعشر دقايق هتلاقي لبس عشان الحفله عندك.
ليلي: طيب الاول قول للمدير يشغلني. عشان أنا مش واثقه فيك
زياد: من عيوني. تعالي.
دخل زياد وهو ماسك ايد ليلي وطبعا الصحافه واول ما شافته حاولت تصوره بس هو قلع الجاكت وحطه على راسه ليلي عشان محدش يعرفها ودخل بيها على الفندق
ليلي انصدمت من شكل الفندق من جوه. كان وهم حاجه كده فوق الخيال
خدها على مكتب المدير اللي اول ما شافه قام وقف باحترام.
زياد: ليلي هتكون الطباخه الجديده
المدير: بس.
زياد: من غير بس. خليها تمضي العقد حالا
المدير: اؤمرك يا فندم. اتفضلو ارتاحو وانا هجهز عقد العمل.
زياد: احنا في جناح 303. طلعه
مشيت ليلي مع زياد وهي حاسه انها بتحلم
وقفت قدام الجناح وهي بتفتح في عينها وتقفلها.
: ده متحف مش جناح ايه الروعه دي
زياد: ادخلي انتي يا ليلي وانا خمس دقايق واجيلك
ليلي: ماشي
وهو كان واقف قدام الجناح بيعمل تليفون عشان يجيبو فستان ليها باسرع وقت
وهي دخلت وبتتفرج على الجناح، خبطت في واحد
يا تري مين؟