رواية إطلاق سراح مشروط للكاتبة روز الفياض الفصل السادس
الصبح كعدت كالمعتاد مالكيتها يمي طلعت للحمام شفتها بالمطبخ رحت غسلت ورجعت لكيتها هي وامي تسولف وتضحك.
سلمت وكعدت اتريك وياهم اباوعلها لابسه دشداشه خضره نص ردن عاديه بس لان بشرتها بيضا طالعه ضاويه ورافعه شعرها ذيل حصان عالي وفاركه كذلتها من الوسط مخليتها منا خصله ومنا خصله محوطه وجهها ولان شعرها لونه بني مبين بياض وجها قوي والنمش واضح شكلها لطيف عبالك طفله تحجي ويه امي وتأشر ومنفعله واني صافن بتفاصيل ملامحها شويه وكامت للطباخ مخليه جدر تحمس بي اباوع على ركبتها شامه مدوره بصوره غريبه سبحان الله عبالك مرسومه رسم دائره عدله اول مره اشوف هيج شامه حلوه.
لثواني ردت اكوللها لتروحين اليوم لاهلج ابقي يمي وغير يوم اوديج بعدين من انتبهت هي كاعده من الصبح ومتحضره وتطبخ غدا علمودي حتى من تروح متخلي وراها شي من واجباتها كسرت خاطري وماكدرت امنعها واخرب فرحتها.
خلصت ريوك وكمت كتلها: ها حسناء نروح؟
حسناء: مستعجل؟
حسام: ليش عندج شي؟
حسناء: نص ساعه بس اكمل الغدا ونروح ميطول على ما اني البس.
حسام: ان شاءالله.
رحت لبست وكملت وكتلها انتظرج بالسياره خلصي وتعالي.
وره تقريبا نص ساعه اجت لابسه فستان عدل مشجر اسود واحمر وشال اسود اجت كعدت يمي التفتت عليها باوعتلها كتلها: شطالعه اليوم.
ابتسمت بخجل كالت: شدعوه قابل شلابسه هو كل فستان وشال حتى لونه اسود.
حسام: الحلو حلو مالها علاقه الالوان.
خجلت وظلت ساكته ابتسمت من خجلها.
وصلتها لبيت اهلها من رادت تنزل انطيتها فلوس.
حسناء: مال شنو؟
حسام: مصرف الج يجوز تردين تشترين شي او تنطين لاحد او تعجبج حاجه او كل شي يصير خليهم جوه ايدج.
اخذتهم بخجل حسيتها محرجه كلتلي: مشكور عمرك طويل.
نزلت واني رحت للمعرض خصلت كم شغله بعدين طلعت رحت محل اجهزه كهربائيه قررت اشتري اشتري لاهلها تلفزيون وثلاجه وسبلت زغير.
اشتريتهم ووديتهم لاهلها دكيت الباب مستحي شكوللهم حني اتسرعت خاف احرجهم.
درت ردت ارجع بس انفتح الباب طلعت امها.
رحبت بيه ودخلتني بس اشرتلها وياي جماعه ظلت صافنه مسكينه لان ماعدهم مكان هي بس غرفه الجماعه وين تكعدهم بهالاثناء دخلوا العمال ودخلوا الاغراض وراحوا.
ظلت هي تباوع مافهمت وطلعت حسناء من الغرفه اتفاجأت بيه.
دخلت كعدت يمهم بالغرفه وكتلهم: اطلب ولد فلوس وماعنده يرجعهن بس عنده محل كهربائيات كتله اخذ هاي الاغراض بمكانهن.
ام حسناء: خاله جان اخذتهن لبيتكم.
حسام: خاله بيتنه ماناقصه شي. وهنا هم بيتنه مابيها شي.
حسيت انحرجوا مني ظلوا ساكتين وحسناء تباوعلي باستغراب.
يمكن استعجلت ضجت من نفسي ردت اساعدهم بس ماحسبتها صح جان لازم احجي ويه حسناء قبل لااتصرف حتى لايصير احراج وسوء فهم.
كمت اريد اكلع بس ام حسناء مقبلت وجلبت بيه عالغدا استحيت ارفض وبنفس الوقت مااريد اكلف عليهم.
بقيت للغدا بس محرج بس من قبلت ابقى حسيت حسناء فرحت وجها نور.
ارتاحيت من شفتها فرحانه بوجودي وياهم وكعدنه نسولف عادي اني وام حسناء واباوع لحسناء تراوي خواتها تليفونها فرحانه وهن فرحانات استخطيتهم كلهم ظلت ام حسناء تسولف واني بالي مو يمها يم حسناء احساسي بالذنب تجاهها جبير واي شي اسوي الها لو لاهلها مراح يغير شي من الواقع او من نيتي تجاهها اني اتزوجتها علمود الاطفال مو محبة بالزواج وحاس نفسي ظالم.
المصيبه شرط وديان اذا صار عندي اطفال لازم اطلك حسناء.
صعبه ياربي معقوله ولك حسام تطلكها بدون ذنب؟
شنو بنات الناس لعبه؟
مو تصلي انت؟ ان الصلاة تنهى عن الفحشاء والمنكر وهذا منكر الظلم منكر وانت ظلمت هاي البنيه شلت ذنبها بركبتك ليوم القيامه.
جابت حسناء الغدا جان بسيط بتيته وطماطه كلي وباذنجان وخضره وخبزت هي وخواتها خبز حار.
نسولف ونضحك واحنه ناكل ماحسيت بالوقت ولاانتبهت الى ان صارت الساعه ب3 ونص كمت اترخصت اروح ارجع للمعرض.
طلعت وطلعت وياي حسناء للباب.
حسام: يالله مع السلامه اذا ردتي شي اتصلي زين؟
هزت راسها اي.
فتحت الباب اريد اطلع كالت: حسام؟
التفتت عليها: هاا؟
حضنتني كلتلي: شكرا.
استحيت بست راسها وطلعت.
رجعت للمعرض واني افكر بالي سويته شلون طاوعني كلبي هيجي اسوي؟
يعني لان ناس فقره مالهم ظهر نستقوي عليهم؟
ياربي سامحني اتصرفت بأنانيه ومافكرت بغيري فكرت بنفسي بس وبمصلحتي وماادري شسوي شلون اصلح غلطي شلون اتصرف؟
ماعندي حل ومحتار وضاك صدري حيل لدرجة طلعت من المعرض كعدت بالشارع عالرصيف بالكاع واباوع عالناس وعالسما خايف إلى سويته من ظلم يرجع علي الله يعاقبني بس شلون وبيمن؟
ربي عاقبني إلى بس اني لاتعاقبني بامي لو زوجتي لو اختي لو احد عزيز علي محد اله ذنب بس اني مذنب لان اني اناني وجبان ماعندي شخصيه.
ربي دليني الطريق الصح والصواب وين؟
ربي حلها من يمك ماعندي حل.
خطأي جبير بس عفوك اكبر مااريد اظلمها اكثر من هيج حتى الاطفال مااريدهم المن يجون اذا اطلك امهم بعدين؟
ظليت ادك صفنات لحدما اذن المغرب رحت صليت وبجيت بصلاتي ودعيت ربي يسامحني وهو يحلها اني ماعندي حل وجبان جبان ونذل.