قصص و روايات - قصص رائعة :

رواية إطلاق سراح مشروط للكاتبة روز الفياض الفصل السابع

رواية إطلاق سراح مشروط للكاتبة روز الفياض الفصل السابع

رواية إطلاق سراح مشروط للكاتبة روز الفياض الفصل السابع

رجعت للبيت امي نايمه خطيه اكيد ضاجت اليوم وحدها وديان ماكو ماجايه اكيد بعدها بالعرس بدلت وغسلت وكعدت بالصاله وحدي.
كمت رحت للمطبخ ردت اسويلي شي واتعشى بس اتعاجزت بعدين جعت حيل طلعت بتيته وطماطه ردت اسوي مثل الغدا إلى اكلته عد اهل حسناء طيب اشتهيته بديت اكشر البتيته وكصيت اصبعي كص جبير وظل الدم يصب ذبيت السجين وكمت دورت كطن او شاش اي شي الف بي اصبعي حتى الدم يوكف.

لفيته بكلينكس ماادري وين علبة الاسعافات الاوليه يخلوها.
ظليت كاعد وضايج جوعان ونعسان وتعبان والبيت وحشه.
رحت للغرفه اتمددت مالازم عشى مااريد بعد. كعدت اكلب بالتليفون شويه واتصلت حسناء.
حسام: الو
حسناء: الو حبيبي.
حسام: هاا؟
حسناء: الو حسام تسمعني؟
ماادري شصار بيه من كلتلي حبيبي سبحان الله كلمه ممكن تكلب كيان ابن آدم كله او مره احد يكولي هالكلمه غير امي والحجيه ام وديان.

بس هالمره زوجتي هي إلى تكولها بس مع الاسف مو وديان.
حسام: هلا اي اسمعج. شلونج؟
حسناء: الحمدلله.
حسام: شلون الاهل؟
حسناء: الحمدلله بخير.
حسام: عساكم. وحشه البيت اليوم حتى امي لكيتها نايمه وظليت بدون عشا هههه.
حسناء: اسم الله. سوده عليه جوعان؟
حسام: اي والله جعت وردت اسوي بتيته وطماطه مادبرتها كصيت ايدي وظلت تصب دم كلت مالازم عشا.

حسناء: حبيبي غير تدير بالك بعدين اني كاعده من المغرب لهسه منتظرتك وانت ماكو اتوقعت تجي علي. لذلك اتصلت بيك استبطيتك.
حسام: شفتج مااتصلتي كلت خليها متونسه ويه خواتها اتوقعت تريدين تباتين.
حسناء: لا جنت متوقعه من ترجع من الشغل تمر تاخذني.
بعدين احنه عدنه عيب المره المتزوجه تبات عد اهلها وتترك زوجها وحده.
حسام: يعني تردين اجي عليج؟
حسناء: لاخلص شيجيبك بعد ترجع هذا الطريق علمودي هسه امي راح تجيبني.

حسام: لا لا وين تجون وحدكم بهاالليل من كل عقلج اني جاي انتي جهزي نفسج.
حسناء: جاهزه اني منتظرتك.
اول مره اشوف وحده فرحانه وهي راجعه لبيتها عادة البنات ميصدكون يبقون عد اهلهم يوم يومين يغيرون جو.
رحت لبيت اهلها دكيت الباب فتحته حسناء: فوت.
حسام: لا الوقت متأخر خاف يردون ينامون؟
حسناء: لا كاعدين اليوم عدهم تلفزيون ههههه.
حسام: ميخالف خليها غير مره.

حسناء: لا وين غير مره سويتلك عشا اتعشى حتى نروح مو تكول جوعان؟
حسام: اي والله واكع من الجوع.
حسناء: سوده عليه ديالله فوت خل نتعشى اني هم منتظرتك مااتعشيت.
دخلت كعدت مستحي بس شويه وارتاحيت من بدوا يسولفون ويضحكون ويعلقون عالمسلسل بالتلفزيون فرحت من شفت خواتها فرحانات بالتلفزيون.
اتعشينه كل احنه عالواهس وهم ماحسينه بالوقت باوعت عالساعه ب12 ونص اشرت لحسناء يالله.

رجعنه لبيتنه دخلنه لكينه وديان موجوده بعدها بفستانها وبكامل اناقتها.
وديان: بعد وكت جان ظليتوا بره للصبح.
حسام: شكو؟ خلص عرسكم؟
وديان: وين جنتوا؟ وين اخذتها؟ اتعشيتوا بره؟
حسناء: لا جنه عد اهلي.
دارت وديان على حسناء: اني وجهتلج الكلام؟
حسناء باوعتلي يمكن جانت تريدني اني ارد على وديان بس مارديت.
حسناء: لا.
وديان: تمام معناها لاتردين من كيفج اني احجي ويه زوجي.
سكتت حسناء ماحجت بعد دخلت لغرفتها وسدت الباب.

حسام: خير وديان اشو جايه تكولين ياشر اشتر.
وديان: هي ليلة وحده غبت بيها عنك وعن بيتي اجي الكاك كالب نظام البيت كله ومخرب كل شغلنه واتفاقاتنه.
اشرتلها اششش.
وديان: لا اش ولاغيره شنو اخاف منها اني هالزعطوطه هاي.
حسام: وديااان كافي.
وديان: انت كافي مو اني هالمره راح اسكت واعبرها بمزاجي بس اقسم بالله اذا مره ثانيه عرفت ماخذها لمطعم لو لمكان هيج كدام الناس ياحسام معناها مااضل وياك دقيقه وتعرفني اسويها.

حسام: يامطعم البنيه تريد تشوف اهلها شنو نمنعها عن اهلها؟ حالها حالج مره تروحلهم مره يجوها.
وديان: ماكو حالها حالي هذا العايز بعد حالها من حالي. واهلها مايجون ولايعتبون هالبيت وهي تعرف هالحجي اني كايلتلها وكايله لاهلها محد يوصل لبيتي. تريد تفضحني تريد الناس تعرف انت متزوج علي ومكعدها ابيتي بعد؟
عافتني وراحت للغرفه بقيت واكف حسيت من العصبيه راسي راح انفجر.

رحت وراها دخلت وسديت الباب كتلها: صدك الحجي إلى كلتيه هذا؟
وديان: شنو؟ ياحجي؟
حسام: كايله لحسناء اهلها ميجون هنا؟
باوعتلي وضحكت كالت: طبعا صدك.
حسام: وديان شهالتصرفات شلون تمنعيهم يجون يشوفون بتهم؟
وديان: مامنعتهم يشوفوها تكدر هي تروحلهم بس مااقبل همه يجون.
حسام: اي ليش؟

وديان: حسام شبيك اتخبلت تريد الناس تعرف بزواجك شكول للناس ليش اتزوج علي شكول لصاحباتي شبيه واتزوجت علي مو حلوه مو مدلله مو من مستواك معيديه ماشايفه لو شنو؟
حسام: كوليلهم الصدك.

وديان: عادي عندك الموضوع اكوللهم اتزوج يريد اطفال لان اني ميصير عندي وتجي امة محمد حتى تتفرج على ست الحسن والجمال البريئه الصغيره الشابه ويكعدون يقارنون بين القديمه والجديده ويألفون قصص ويكولون اكيد حبها واتزوجها واصير اني علج بحلك الموظفات بالدوام علمود حسناء خاتون.
حسام: وديان غيري اسلوبج تره مليت وتعبت زين؟
وديان: هذا اسلوبي من الاول ومراح يتغير هسه مليت وتعبت من اجت العروس الجديده؟

حسام: وبعدين؟ لشوكت هالموضوع يبقى سر لازم؟
وديان: لحدما اني اريده ينعرف.
اتدنت يمي حضنتني كالت بدلع: اووف منك خربت كل مزاجي عبالي ارجع الكاك منتظرني على نار ومشتاقلي حتى ماعلقت على فستاني مكياجي شعري لاكتلي حلوه طالعه لو لا.
ضوجتني كولش ماادري بذوقج هيجي متدني مستواه.

الفصل التالي
جميع الفصول
روايات الكاتب
روايات مشابهة