قصص و روايات - قصص رائعة :

رواية إطلاق سراح مشروط للكاتبة روز الفياض الفصل الثامن

رواية إطلاق سراح مشروط للكاتبة روز الفياض الفصل الثامن

رواية إطلاق سراح مشروط للكاتبة روز الفياض الفصل الثامن

طبعا بليلتها وديان ماخلتني اعتب باب الغرفه سوت علي حجر حتى لا اروح لحسناء واني هم جنت فرحان بغيرة وديان واهتمامها المفاجأ بيه ونسيت حسناء واهل حسناء والدنيا.
الصبح كعدت متأخر لان جمعه وديان نايمه اسمع صوت ضحك امي اكيد ويه حسناء كمت رحت للمطبخ شفتها خاله الريوك وتتريك هي وامي.
حسام: صباح الخير.
حسناء ماجاوبت امي كالت: ياصباح يمه صار الظهر.
حسام: اي والله ماحسيت تعبان.

اليوم تتريكون قبلي ماانتظرتوني.
حسناء هم ماجاوبت بقت مدنكه امي ردت كالت: اتريك ويه مرتك.
ضجت من حجاية امي ومن سكوت حسناء يمكن زعلانه مني لان ماارد على وديان من تتعمد تغثها لو تفشلها وتحرجها.
والظاهر امي هم ماعاجبها هالوضع وطابكه ويه حسناء.
غسلت ورجعت كعدت بالصاله شويه واجت امي جابتها لاكيشا يمي كالت: شبيك ماتكوم تتريك ويه البنيه؟
حسام: مااريد يمه مااشتهي.
امي: ماتشتهي لو ماعجبك الحجي؟

سكتت كالت: كوم روح اتريك ويه البنيه وطيب خاطرها بكلمتين كوم الله يرضى عليك ويهديك.
كمت رحت للمطبخ هي واكفه تغسل ايديها ردت اصب جاي التفتت علي اتدنت صبتلي وخلته عالطاوله.
كعدت واتنهدت هي دنت يمي الاكل كالت: تريد بيض لو بس اجبان؟
لزمت ايدها كتلها: مااريد شي كعدي يمي شويه حتى اشتهي اكل ولو انتي ماانتظرتيني.
حسناء: شسوي انتظرك؟ اليوم وديان هنا.
حسام: واذا؟

حسناء: نسيت من تكون موجوده لازم تاكلون وحدكم لان عدكم اشياء خاصه تحجوها؟ بعدين البارحه انتظرت للساعه 3 الصبح مااجيت.
كلامها جان جدا مؤلم إلى رغم اعرفه صحيح واعرف شنو تحس واعرف احنه ظالميها واعرف هي هم زوجتي والها حقوق واعرف غلطي بس يمكن لان مااتوقعت راح تعاتبني بهالطريقه الصريحه والواضحه دائما جانت تبلع كل تصرفاتي وتصرفات وديان بحقها وتبقى ساكته بس الظاهر هالمره اتجاوزنه الحد.

ماعرفت شنو ارد عليها لو بشنو ادافع عن نفسي ماعندي اي عذر يعني اني رحت جبتها من بيت اهلها وكتلها البيت وحشه تالي عفتها ورحت لوديان وبقيت يمها للصبح بدون حتى مااعتذر او انطيها خبر او اسوي اي شي حتى يكون عدها علم ومتنتظرني.
بقيت ساكت محرج بعدين بست ايدها كنوع من الاعتذار او يمكن ردت اقشمرها واضيع السالفه عليها كلتلها: اذا متاكلين وياي معناها مااكل تقبلين ابقى بدون اكل ينطيج كلبج؟

ماعلقت سحبت الكرسي كعدت يمي بعدها مامدت ايدها عالاكل دخلت وديان.
وديان: ها دتتريك؟
رأسا كامت حسناء وعافت الاكل.
رادت تطلع من المطبخ وديان اجت كعدت وكلتلها: عفيه صبيلي وياج حليب مابيه اكوم بعد.
صبتلها حسناء بدون كلام وخلته يمها وراحت.
بقيت ساكت شربت الجاي وكمت رحت للصاله لكيت امي وحسناء يباوعون عالتلفزيون.

كعدت يمهم يم حسناء وخليت ايدي على جتفها ماادري شنو لازم اسوي حتى احسن الوضع واحسن صورتي كدامها وكدام امي او يمكن اعرف بس مااتجرأ اسوي.
دخلت وديان كالت: تره اليوم معزومين عد اهلي عالغدا.
ماحجيت شي امي ردت عليها: بالعافيه سلمي عليهم.
وديان: لا خاله شنو متجين ويانه؟
امي: لاخاله مااروح ابقى يم حسناء ميصير كل احنه نطلع وتبقى وحدها بالبيت.
وديان: ليش ميصير شنو زغيرونه.

امي: اي زغيرونه طبعا بنيه شابه عمرها 17 سنه شلون تبقى بالبيت وحدها بالله احد سطا عالبيت وهي موجوده.
وديان: لاكيشا وياها تبقى.
امي: لا مو اصول شنو لاكيشا تبقى وياها الاصول تنعزم ويه زوجها.
وديان: يعني هسه طلعت مااعرف الاصول.
امي: ماكلت اني هالشي انتي كلتي.
وديان: حسام دتسمع الحجي اشو ساكت تاليتي اطلع اني ماعندي اصول.
حسام: وديان تردين ترحين لاهلج كومي لبسي وخلصيني بله لغوه وهوسه.

كامت وديان وتدردم راحت لبست اني هم رحت لبست ووديت وديان لاهلها اتغدينه ومن خلصنه وديان اشتكت من امي كدام اهلها: بابا صدوك اني مااعرف الاصول؟
ابو وديان: ليش؟ شلون متعرفين الاصول منة يكول؟
وديان: خاله ام حسام اليوم كلتلي.
باوعتلها اني كتلها: مكلتلج ماعندج اصول وديان لتظلين تاخذين وتجيبين بالحجايه.
ابو وديان: اكيد اكو سبب الحجيه ام حسام ماتطلع منها العيبه.
حجيت اني القصه لاهلها.

ابو وديان: لا صدوك ماعندج اصول. شلون يصير هالحجي عالاقل لخاطر زوجج تحترميها حتى لو ضرتج انتي مو وافقتي يتزوج؟ معناها تحترميها مدام محترمتج ومن عزمناكم احنه قصدنه الكل مو بس انتي وحسام والحجيه لا والله قصدنه حتى حسناء ولاكيشا.
حسام: والنعم منك عمي ادري بيك مترضى بالغلط.
ابو وديان: مع الاسف والله فشلتينه وديان شتكول علينه البنيه وشتكول علينه الحجيه هسه؟ ليش بابا هيج؟

وديان: شدعوه عليكم تره ماسويتلها شي قابل اكلتها لو اكلتها. بعدين مااحبها مااطيقها هي كوه مو بيدي ماتنحب ماتبلع ولاتنجرع.
حسام: هذا اسلوبها كدامكم واذا اني غلطان شتكولون اني حاضر.

ابو وديان: لا حشاك مغلطان بس بتنه الظاهر مامؤدبه وفعلا ماتعرف الاصول. لج بابا اذا البنيه بحالها وكافيه خيرها شرها شتردين من عدها هي بحالها وانتي بحالج مو انتي تكولين تطبخ وتنظف 24 ساعه وترجعين للبيت تلكين كل شي حاضر وجاهز؟ وين اكو هيج ضره؟
راجعي نفسج بنيتي تره حرام إلى تسوينه وحسام عمي اعتذرلنه من الحجيه ومن حسناء وان شاءالله اني هم اجيب ام وديان ونجيكم للبيت ونطيب خاطرهم.

الفصل التالي
جميع الفصول
روايات الكاتب
روايات مشابهة